Mga Pangutana Gikan sa mga Magbabasa

Unsay gipasabot ni Jesus sa dihang iyang giingnan si Nicodemo: “Walay tawo nga nakasaka sa langit gawas kaniya nga nanaog gikan sa langit, ang Anak sa tawo”?—Juan 3:13.

Si Jesus dinhi sa yuta niadtong tungora, ug siya wala pa makasaka o makabalik sa langit. Hinunoa, ang atong nahibaloan bahin kang Jesus ug ang konteksto sa iyang giingon makatabang kanato sa pagsabot sa iyang gisulti.

Si Jesus “nanaog gikan sa langit” sa pagkaagi nga siya nagkinabuhi kaniadto sa langit uban sa iyang Amahan, apan sa tinudlong panahon, ang kinabuhi sa Anak gibalhin ngadto sa tagoangkan ni Maria ug si Jesus nahimugso ingong tawo. (Lucas 1:30-35; Galacia 4:4; Hebreohanon 2:9, 14, 17) Human sa iyang kamatayon, si Jesus mabanhaw ingong espirituhanong linalang ug mobalik sa langit aron mahiuban kang Jehova. Busa, pipila ka gutlo antes sa iyang kamatayon, si Jesus miampo: “Amahan, himayaa ako uban kanimo sa himaya nga akong nabatonan uban kanimo sa wala pa ang kalibotan.”—Juan 17:5; Roma 6:4, 9; Hebreohanon 9:24; 1 Pedro 3:18.

Sa dihang gikaestorya ni Jesus si Nicodemo, nga usa ka Pariseo ug magtutudlo sa Israel, si Jesus wala pa makabalik sa langit. Siyempre, wala pay tawo nga namatay ug misaka sa langit. Si Jesus mismo nag-ingon nga walay ikatandi kang Juan Bawtista ingong manalagna sa Diyos, apan “ang usa nga ubos sa gingharian sa mga langit labaw pa kay kaniya.” (Mateo 11:11) Ug si apostol Pedro nag-ingon nga bisan ang matinumanon nga si Haring David namatay ug atua pa sa iyang lubnganan; si David wala mosaka sa langit. (Buhat 2:29, 34) Adunay rason kon nganong kadtong nangamatay una kang Jesus, sama kang David, Juan Bawtista, ug uban pang matinumanong mga tawo, wala moadto sa langit. Sila namatay una pa buksi ni Jesus ang dalan o kahigayonan aron ang mga tawo mabanhaw ngadto sa langitnong kinabuhi. Si apostol Pablo misulat nga si Jesus, sama sa usa ka mag-uuna, ‘nagsugod o nag-abli ug usa ka bag-o ug buhing dalan’ ngadto sa langit.—Hebreohanon 6:19, 20; 9:24; 10:19, 20.

Tungod kay si Jesus wala pa man mamatay ug mabanhaw niadtong tungora, unsay buot niyang ipasabot sa pag-ingon kang Nicodemo: “Walay tawo nga nakasaka sa langit gawas kaniya nga nanaog gikan sa langit, ang Anak sa tawo”? (Juan 3:13) Tagda ang konteksto, o kon unsay gihisgotan nila ni Jesus ug Nicodemo.

Sa dihang ang maong lider sa mga Hudiyo miadto kang Jesus sa kagabhion, si Jesus miingon kaniya: “Sa pagkatinuod gayod ako magaingon kanimo, Gawas kon ang usa ipanganak pag-usab, dili siya makakita sa gingharian sa Diyos.” (Juan 3:3) Sa pagtubag, si Nicodemo nangutana: ‘Mahitabo ba god kana? Ikapanganak ba diay ang usa ka tawo sa ikaduhang higayon?’ Wala niya masabti kining pagtulon-an sa Diyos bahin sa pagsulod sa Gingharian sa Diyos. Aduna bay laing paagi aron mahibalo siya bahin niini? Aw, dili gayod siya mahibalo bahin niini pinaagi sa tawhanong panglantaw; walay tawo ang makatudlo kaniya bahin niini tungod kay wala pay nakaadto sa langit ug busa arang makapatin-aw sa tanang butang bahin sa pagsulod sa Gingharian. Ang bugtong makatudlo kaniya mao lang si Jesus. Iyang matudloan si Nicodemo ug ang uban tungod kay Siya nanaog man gikan sa langit ug takos gayong motudlo sa mga tawo bahin nianang mga butanga.

Busa, ang pangutana bahin niining tekstoha nagpakita ug usa ka hinungdanong punto bahin sa pagtuon sa Pulong sa Diyos. Dili makataronganong magduhaduha bahin sa usa ka teksto tungod lang kay kini morag lisod sabton. Ang gisulti sa Bibliya sa usa ka bahin kinahanglang sabton sa tabang sa ubang mga teksto ug kinahanglang magkauyon kini. Dugang pa, kasagaran nga ang konteksto—ang kahimtang o kon unsay gihisgotan—makatabang kanato sa pagkab-ot sa makataronganon ug tin-aw nga kahulogan sa usa ka teksto nga lisod sabton.