Oo, Mahimo Nimong Makaplagan ang Kalipay

ANG kalipay—ang tinuod, dumalayon nga kalipay—usahay lisod nga makaplagan. Tinuod gayod kana kay kanunayng gipangita sa daghang tawo ang kalipay diha sa sayop nga mga dapit. Maayo unta kon sila dunay kasaligan ug may katakos nga higala nga makatudlo kanila sa hustong direksiyon!

Ang Bibliya maoy usa ka tinubdan nianang gikinahanglang direksiyon. Tagda ang usa lang ka basahon niini—ang Salmo. Kining basahona maoy koleksiyon sa 150 ka sagradong mga awit kang Jehova nga Diyos, nga ang katunga gikomposo ni Haring David sa karaang Israel. Apan mas hinungdanon nga mahibaloan nga kini gisulat ubos sa inspirasyon sa kinalabwang Higala sa katawhan, si Jehova, kay sa mailhan lamang ang mga magsusulat niini. Busa kita makaseguro nga kini naundan sa giya sa Diyos alang sa atong kaayohan ug nga kini nagtudlo kanato kon sa unsang paagi kita magmalipayon.

Ang mga magsusulat sa mga Salmo nakaseguro nga ang kalipay mao ang resulta sa maayong relasyon sa tawo uban sa Diyos. “Malipayon ang tawo nga nahadlok kang Jehova,” misulat ang salmista. (Salmo 112:1) Walay tawhanong relasyon, walay materyal nga kabtangan, ug walay personal nga kalamposan ang makahatag sa kalipay nga magagikan sa pagkahimong sakop sa “katawhan kansang Diyos mao si Jehova.” (Salmo 144:15) Gipamatud-an kini sa kinabuhi sa daghang modernong mga alagad sa Diyos.

Si Susanne, nga di pa dugayng nag-40 anyos, maoy usa ka pananglitan. a Siya miingon: “Karon, daghan ang moanib sa usa ka grupo aron makab-ot ang gikausahan nilang mga tumong o makig-uban sa pareho nilag mga interes. Apan, talagsa ra nilang isipon ang matag usa sa maong grupo ingong higala. Lahi ang katawhan ni Jehova. Ang atong gugma alang kang Jehova maoy nagtukmod kanato sa paghigugma sa  usag usa. Taliwala sa katawhan sa Diyos, kita mobating relaks, bisag asa pa kita sa maong panahon. Kini nga panaghiusa nakapatugob gayod sa atong kinabuhi. Kinsay laing makaingon nga sila adunay mga higala gikan sa nagkalainlaing hut-ong sa katilingban ug mga kagikan ug sa nagkalainlaing mga nasod? Ako kinasingkasing nga makaingon nga ang pagkahimong usa sa katawhan ni Jehova maoy makahatag ug kalipay.”

Si Maree, nga natawo sa Scotland, nahibalo usab nga ang maayong relasyon uban kang Jehova hinungdanon aron ang usa magmalipayon. “Sa wala pa nako makat-oni ang kamatuoran sa Bibliya,” matod niya, “ganahan akong motan-aw ug makahahadlok nga mga salida. Apan inigkagabii dili ako makatulog kon dili ako maggunit ug krus aron sa pag-abog sa mga multo ug mga bampira, nga maoy gipasiugda sa daghang pelikula. Apan, sa dihang akong nakat-onan ang kamatuoran ug wala na ako motan-aw sa maong mga pelikula, ako makatulog na nga dili mahadlok tungod sa akong relasyon uban kang Jehova, nga malipayong nag-alagad sa Diyos nga mas gamhanan kay sa mga demonyo o sa tinumotumong mga bampira.”

Ang Pagsalig Kang Jehova Mosangpot sa Kalipay

Kita walay katarongan nga magduhaduha sa pagkalabing-gamhanan sa Maglalalang ug sa iyang walay-kinutobang kaalam. Kay nahibalo nga siya bug-os nga makasalig kang Jehova ug nga siya makadangop Kaniya, si David misulat: “Malipayon ang tawo nga lig-on ug lawas nga nagbutang sa iyang pagsalig diha kang Jehova.”—Salmo 40:4.

Si Maria nag-ingon: “Ang akong kasinatian didto sa Espanya ug sa ubang dapit mao nga kon atong buhaton ang mga butang sumala sa paagi ni Jehova, bisan pag lahi ang gusto natong buhaton, atong maangkon ang kinamaayohang mga resulta. Kini mosangpot sa kalipay kay ang paagi ni Jehova kanunayng mao ang labing maayo.”

Si Andreas, usa ka Kristohanong ansiyano nga nakaalagad sa daghang nasod sa Uropa, nahibalo usab gikan sa kaugalingon niyang kasinatian nga kita makasalig kang Jehova. Siya miingon: “Ang akong magulang nga lalaki, kinsa dili pareho nakog relihiyon, dakog impluwensiya sa batan-on pa ako, nga nagdasig kanako sa pagpangagpas ug karera nga makapadato. Hilabihang guola sa akong magulang sa dihang ako misulod sa bug-os-panahong ministeryo ug wala na magsalig sa gitawag ug kasegurohan nga gitanyag sa mga pension plan sa kalibotan. Sa akong pag-alagad nga bug-os-panahon, wala gayod ako makabsi sa panginahanglan, ug akong napahimuslan ang mga panalangin nga gipangandoy lamang sa uban.”

Niadtong 1993, si Felix gidapit sa pagtabang sa pagpalapad sa mga pasilidad sa sangang buhatan sa mga Saksi ni Jehova sa Selters, Alemanya. Sa  natapos na ang trabaho, siya gidapit nga mahimong permanenteng membro sa pamilyang Bethel didto. Unsay iyang reaksiyon? “Akong gidawat ang maong imbitasyon nga may pagduhaduha. Apan halos napulo ka tuig na ako karon dinhi, ug ako kombinsido nga gidungog ni Jehova ang akong mga pag-ampo. Siya nahibalo kon unsay labing maayo para kanako. Pinaagi sa bug-os nga pagsalig kaniya ug pagtugot kaniya sa paggiya kanako, ako siyang gihatagan ug kahigayonan sa pagpakita kanako kon unsay gusto niyang ipabuhat kanako.”

Si Susanne, nga gihisgotan ganina, gustong mag-alagad ingong bug-os-panahong ministro o payunir, apan naglisod siya sa pagpangitag partaym nga trabaho. Human palabya ang usa ka tuig nga nagpaabot ug trabaho, siya milihok nga may pagsalig kang Jehova. Siya miingon: “Akong gihatag ang akong aplikasyon sa pag-regular payunir. Igo na ang akong natigom sa pagbayad sa naandan nakong galastohan sulod sa usa ka bulan. Pagkamakaiikag nga bulan kadto! Ang akong ministeryo maoy tuboran sa dakong kalipay, apan wala ako madawat sa daghang interbiyo sa trabaho. Apan, sama sa gisaad ni Jehova, wala niya ako biyai. Sa kataposang adlaw sa maong bulan, nakasulod ako ug trabaho. Nasayod na ako karon nga makasalig gayod ako kang Jehova! Kining unang kasinatian sa bug-os-panahong pag-alagad nakahatag kanako ug magantihon ug malipayong kinabuhi.”

Ang Pagdawat sa Tambag sa Diyos Makahatag ug Kalipay

Si Haring David nakahimog seryosong mga sayop. Usahay, siya nagkinahanglag maalamong tambag. Kita ba andam sa pagdawat sa tambag ug instruksiyon sama kang David?

Si Aida, nga taga-Pransiya, kas-a nakaamgo nga siya nakahimog seryosong sayop. Siya miasoy: “Ang ako gayong gikabalak-an mao ang pagpasig-uli sa akong relasyon uban kang Jehova. Wala na akoy laing gihunahuna pa.” Miduol siya sa Kristohanong mga ansiyano alang sa tabang. Kay nakaalagad nag kapin sa 14 ka tuig sa bug-os-panahong ministeryo, siya karon nag-ingon: “Pagkadako sa akong kalipay sa pagkasayod nga gipasaylo ni Jehova ang akong sala!”

Ang pagkamadinawaton sa tambag sa Diyos makapugong kanato sa paghimog kasaypanan. Si Judith miingon: “Sa edad nga 20, ako naibog sa usa ka Aleman nga kauban nako sa negosyo nga nagpakitag dakong interes kanako. Siya tinahod, may malamposong karera, ug minyo na! Ako nahibalo nga kinahanglan akong mopili tali sa pagtuman sa mga balaod ni Jehova ug sa bug-os nga pagsalikway Kaniya. Akong gisuginlan ang akong mga ginikanan. Walay lipudlipod nga misulti si Papa sa pagpahinumdom kanako kon unsay gidahom ni Jehova kanako. Prangka kaayo siyang misulti kanako—nga maoy akong gikinahanglan! Bisan pa niana, nangita akog katarongan aron patumanan ang pinitik sa akong kasingkasing. Sulod sa daghang semana ang akong inahan makig-estorya kanako inigkagabii bahin sa mga balaod sa Diyos, nga kini hinungdanon kaayo ug nagaluwas ug kinabuhi. Nalipay kaayo ako nga sa ngadtongadto ang akong kasingkasing nabutad ngadto kang Jehova. Ang iyang pagdisiplina ug pagtudlo kanako nakahatag kanakog dakong kalipay—daghang mabungahong katuigan sa bug-os-panahong pagministeryo ug usa ka buotang Kristohanong bana nga nahigugma kanako ug kang Jehova nga bug-os kasingkasing.”

Dayag nga ang maong mga kasinatian nagpasiugda sa mga pulong ni David: “Malipayon siya kansang kalapasan gipasaylo, kansang sala gitabonan. Malipayon ang tawo nga kaniya wala ipahamtang ni Jehova ang kasaypanan.”—Salmo 32:1, 2.

Kalipay Tungod sa Pagkamahunahunaon sa Uban

“Malipayon siya nga nagabuhat uban ang pagkamahunahunaon sa timawa,” misulat ni David. Siya mipadayon: “Sa adlaw sa katalagman itagana ni Jehova ang kaikyasan kaniya. Si Jehova magabantay kaniya ug magatipig kaniya nga buhi. Siya ipahayag nga malipayon.” (Salmo 41:1, 2) Ang mahigugmaong konsiderasyon nga gipakita ni David kang Mepiboset, ang bakol nga anak lalaki ni Jonatan, ang minahal nga higala ni David, maoy usa ka panig-ingnan sa hustong tinamdan ngadto sa mga timawa.—2 Samuel 9:1-13.

Si Marlies, kinsa usa ka misyonaryo sulod sa 47 ka tuig, nakapribilehiyo sa pagsangyaw sa mga tawo nga mikalagiw tungod sa krisis sa mga dapit sa Aprika, Asia, ug Sidlakang Uropa. Siya miingon:  “Lainlain silag mga problema ug kasagaran sila mobati nga sinalikway, nga sila, sa pagkamatuod, gipakitaag pagpihig. Ang pagtabang sa maong mga tawo kanunayng makapalipay.”

Si Marina, nga kapin lag diyutay sa 40 anyos, misulat: “Kay tagsaanon, makapahupay gayod ang pagkasayod nga anaa ang imong mga higala sa pagtabang kanimo. Kini nagtukmod kanako sa pagdasig sa mga tawo pinaagi sa pagtelepono o pagsulat kanila. Daghan ang mapasalamaton. Ang pagtabang sa uban nakapalipay kanako.”

Si Dimitar, nga nag-edad ug mga 25 anyos, miingon: “Ako rang inahan ang nagpadako kanako. Sa bata pa ako, nalipay ako nga iuban sa among magtatan-aw sa Pagtuon sa Libro sa Kongregasyon kada semana aron bansayon ako diha sa ministeryo. Mapasalamaton gihapon ako tungod sa iyang kakugi. Nahibalo ako nga lisod akong dasigon.” Tungod sa iyang pagkamapasalamaton sa tabang nga iyang nadawat kanhi, si Dimitar karon nagtabang sa uban: “Gipaningkamotan kong ikauban ang usa ka batan-on ug usa ka tigulang diha sa pagsangyaw sa kanataran labing menos kas-a sa usa ka bulan.”

Ang basahon sa Salmo naghisgot usab sa ubang mga butang nga makapalipay. Usa niana mao ang pagsalig sa kusog ni Jehova imbes sa kaugalingon: “Malipayon ang mga tawo kansang kusog anaa [kang Jehova].”—Salmo 84:5.

Si Corinna mouyon niini. Mibalhin siya ngadto sa usa ka nasod diin mas dako ang panginahanglan sa ministeryo. “Akong giatubang ang bag-ong pinulongan, bag-ong kultura, ug bag-ong panghunahuna. Gibati nakong morag didto ako sa laing planeta. Gikulbaan gayod ako sa paghunahuna pa lamang sa pagsangyaw diha sa laing palibot. Nangayo akog tabang kang Jehova, ug pinaagi sa iyang kusog ako nakaarang sa pagsangyaw sa tibuok adlaw diha sa nahilit nga teritoryo. Sa kadugayan, ang paghimo niana daw normal na lang kaayo. Nakasugod akog daghang pagtuon sa Bibliya, ug nakabenepisyo gihapon ako gikan niining maong kasinatian. Akong nakat-onan nga pinaagi sa kusog ni Jehova, atong mabuntog bisan ang daw dili-mabuntog nga mga babag.”

Oo, ang lainlaing mga hinungdan makaamot sa kalipay, sama sa pag-ugmad ug panaghigala uban sa Diyos ug sa iyang katawhan, pagsalig kang Jehova sa bug-os, pagdawat sa iyang tambag, ug pagkamahunahunaon sa uban. Pinaagi sa paglakaw subay sa mga dalan ni Jehova ug pagtuman sa iyang mga balaod, kita malipayong makapahimulos sa iyang pag-uyon.—Salmo 89:15; 106:3; 112:1; 128:1, 2.

[Footnote]

[Hulagway sa panid 12]

Maria

[Hulagway sa panid 13]

Maree

[Hulagway sa panid 13]

Susanne ug Andreas

[Hulagway sa panid 15]

Corinna

[Hulagway sa panid 15]

Dimitar