Pag-uswag Taliwala sa Sarisari nga Katawhan sa Uganda

ANG Uganda, nga nahiluna taliwala sa duha ka buktonbukton sa dakong walog o Great Rift Valley sa Sidlakang Aprika ug samag nagkabayo sa ekwetor, nakabaton ug talagsaong katahom. Kini adunay nagkadaiya nga talan-awon, daghang tanom, ug makapaikag nga mga hayop. Kay nahimutang ang nasod sa kapatagan ibabaw sa habog nga kabukiran sa Aprika, kasarangan ang klima niini ug kini adunay matahom nga kabungtoran nga abot sa gatosan ka kilometro.

Diyutay ra ang mga nasod nga sa gamay nga luna niini ang panahon mograbe ang katugnaw ug unya dayon moinit, apan matuod kini sa Uganda. Kini nagsukad sa naputos-sa-niyebe nga mga taluktok sa Kabukiran sa Bulan, sa Kabukirang Ruwenzori, sa kasadpan hangtod sa ugahon nga kabanikanhan sa silangan. Imong makita ang mga elepante, bupalo, ug mga leyon sa kapatagan niini. Ang kabukiran ug bagang kalasangan mao ang pinuy-anan sa mga gorilya, mga chimpanzee, ug sa kapig 1,000 ka espisye nga langgam. Ang dakong bahin sa kontinente sa Aprika nag-antos sa hulaw ug gutom, apan ang Uganda nabulahan sa daghang suba ug mga lanaw, sama sa Victoria, ang ikaduha sa kinadak-ang tab-ang nga lanaw sa kalibotan. Ang amihanang agosanan sa Lanaw Victoria molahos ngadto sa Suba sa Nilo. Mao diay nga kining nasora gitawag ni Winston Churchill ug “perlas sa Aprika”!

“Ang Perlas” Nag-idlak Karon

Hinuon, ang pangunang pangdani sa Uganda mao ang katawhan niini—mahigalaon, maabiabihon, ug sarisari. Kining nasora nga “Kristohanon” ang mayoriya sa katawhan mabatbat ingon nga sagolanan sa daghang grupong etniko ug mga kultura. Bisan karon, ang maong sarisari nga katawhan mailhang lahi tungod sa ilang mga tradisyon ug besti.

Di pa dugay, nagdaghan ang mga taga-Uganda nga nagdawat sa maayong balita sa Bibliya bahin sa panahon nga ang dumalayong pakigdait molungtad sa tibuok yuta. (Salmo 37:11; Pinadayag 21:4) Lisod ang pagdala sa maong mensahe ngadto sa tanan, diha sa nasod nga sama ra ka dako sa Gran Britanya.

Gikan sa gamay nga sinugdanan sa dihang ang unang pagbawtismo sa usa ka lokal nga molupyo  ingon nga nagpahinungod nga Saksi ni Jehova gihimo sa Lanaw Victoria niadtong 1955, “ang diyutay” sa kataposan nahimo gayong usa ka libo niadtong 1992. Sukad niadto, ang pagtubo nagpadayon. Kini maoy sumala sa mapasaligon nga mga pulong sa Diyos: “Ako, si Jehova, magpadali niini sa kaugalingong panahon niini.”—Isaias 60:22.

Pagwagtang sa mga Babag sa Pinulongan

Ang Iningles mao ang opisyal nga pinulongan ug kini gigamit sa kadaghanan, ilabina diha sa edukasyon, apan dili kini ang nitibong pinulongan sa kadaghanang taga-Uganda. Busa, sa pagpaningkamot nga makabati ang mga tawo sa maayong balita, ang mga Saksi ni Jehova nagtagad usab sa ubang dagkong mga pinulongan. Nasabtan ang panginahanglan niini tungod kay kapig 80 porsiyento sa 25 ka milyong katawhan sa nasod nagpuyo sa kabanikanhan o gagmayng kalungsoran diin ang mga tawo nagagamit gayod sa ilang nitibong pinulongan diha sa adlaw-adlaw nga komunikasyon. Gikinahanglan ang dakong paningkamot aron masangyawan ang maong mga grupo sa katawhan nga lahig pinulongan ug matagbaw ang espirituwal nga panginahanglan sa katawhan.

Hinuon, ang mga Saksi ni Jehova naningkamot sa pagtagana sa maong mga panginahanglan pinaagi sa pagsangyaw ngadto sa katawhan diha sa ilang kaugalingong pinulongan ug sa paggamag literatura sa Bibliya diha sa nagkadaiyang mga pinulongan. Sa sangang buhatan sa kaulohan, sa Kampala, ang mga grupo sa mga maghuhubad nagahubad sa upat ka pinulongan: Acholi, Lhukonzo, Luganda, ug Runyankore. Dugang pa, ang Kristohanong mga asembliya nga gihimo sa nagkadaiyang mga pinulongan sa tibuok nasod may ekselenteng mga tumatambong, nga kapin sa doble sa gidaghanon sa mga Saksi ni Jehova. Kini tin-awng nagpaila nga ang paningkamot nga masangyawan ang nagkadaiyang mga grupo sa katawhan nga lahig pinulongan usa ka hinungdan sa kusog nga espirituwal nga pag-uswag. Apan dili kay kana ra.

Ang mga Payunir Nanguna sa Buluhaton

Ang mga kongregasyon malipayong nagsuportar sa tinuig nga mga kampanya nga tagtulo ka bulan, nga sulod nianang panahona ginasangyawan ang hilit nga mga teritoryo. (Buhat 16:9) Ang nagdaghan nga masiboton ug batan-ong mga payunir, o bug-os-panahong mga ebanghelisador, maoy nanguna sa maong buluhaton. Nangadto sila sa hilit  nga mga dapit nga sa pipila ka kahimtang wala pay nakabati sa maayong balita.

Duha ka Saksi ang giasayn ingong mga espesyal payunir sulod sa tulo ka bulan sa Bushenyi, nga maoy usa ka gamayng lungsod sa kasadpang Uganda. Ilang gikuyogan ang bugtong Saksi ni Jehova nianang dapita diha sa pagsangyaw ug sa pag-organisar ug Kristohanong mga tigom. Sulod sa usa ka bulan, ang duha ka payunir nagdumalag regular nga mga panaghisgot sa Bibliya uban sa 40 ka tawo, nga ang 17 kanila nagtambongan na sa mga tigom sa mga Saksi ni Jehova. Miasoy ang mga payunir: “Ang pipila nga among gibinlan ug brosyur nga Unsay Gikinahanglan sa Diyos Kanato? a nangabot sa among gipuy-an human sa pipila ka adlaw; ang daghang panid ilang gisulatan sa mga tubag sa mga pangutana sa brosyur. Sila gustong mahibalo kon husto ba ang ilang mga tubag.” Sa pagkakaron, adunay usa ka kongregasyon nga may kaugalingong Kingdom Hall nianang lungsora.

Duha ka payunir miadto sa usa ka teritoryo sa kasadpang Uganda diin wala pa ikasangyaw ang maayong balita. Sila misulat: “Ang mga tawo giuhaw gayod sa kamatuoran sa Bibliya. Sulod sa tulo ka bulan namong pagpuyo dinhi, kami nakasugod ug nakadumalag 86 ka pagtuon sa Bibliya.” Sa wala madugay, ang usa ka grupo sa mga Saksi opisyal nga natukod sa maong dapit.

Ubang Masibotong mga Mamumuo sa Kanataran

Nalakip sa masibotong mga payunir ang pipila nga nag-alagad nag daghang katuigan. Sa wala pa ma-Saksi ni Jehova, si Patrick maoy manunugtog sa klarinet sa banda sa kasundalohan sa kahanginan sa Uganda panahon sa pagmando ni Idi Amin. Unom ka bulan human sa bawtismo ni Patrick niadtong 1983, siya nahimong bug-os-panahong ministro. Sa pagkakaron siya maoy nagapanawng magtatan-aw, nga nagduaw ug nagpalig-on sa mga kongregasyon.

Si Margaret nabawtismohan niadtong 1962. Bisan pag siya hapit nang mag-80 anyos ug aduna pay problema sa bat-ang mao nga siya maglisod sa paglakaw, siya nagagugol ug mga 70 ka oras sa usa ka bulan diha sa pagsangyaw sa gipasukad-sa-Bibliya nga paglaom ngadto sa iyang mga silingan. Iyang idispley ang mga basahon diha sa bangko sa gawas sa iyang balay ug makigsulti sa lumalabay nga gustong mamati sa maayong balita bahin sa malinawong bag-ong kalibotan.

Si Simon, usa ka mag-uuma sa silangang Uganda, nangita sa kamatuoran sulod nag 16 ka tuig sa dihang, niadtong 1995, siya nakabaton ug literatura nga gipatik sa mga Saksi ni Jehova. Ang iyang nabasa nagdasig kaniya sa pagkat-on ug dugang pa bahin sa Gingharian sa Diyos ug sa kahibulongang katuyoan ni Jehova alang sa yuta. Walay mga Saksi sa Kamuli nga iyang gipuy-an, busa si Simon mibiyaheg  mga 140 ka kilometro paingon sa Kampala aron pangitaon sila. Sa pagkakaron, aduna nay usa ka kongregasyon sa iyang balangay.

“Magpabilin Kami Dinhi”

Ingon nga tinuod sa ubang mga dapit sa Aprika, ang daghang tawo nagdahom nga ang usa ka relihiyosong grupo adunay maayong dapit sa pagsimba. Maorag usa kini ka bug-at nga suliran alang sa pipila ka kongregasyon sa mga Saksi ni Jehova, kay sila walay salapi aron makatukod ug maayong Kingdom Hall. Dili ikabatbat sa mga pulong ang pagkamapasalamaton sa mga igsoon sa dihang, sa hinapos sa 1999, gisugdan ang tibuok-kalibotang programa sa daling pagpanukod ug mga Kingdom Hall. Sa misunod nga lima ka tuig, nahuman ang 40 ka bag-ong Kingdom Hall sa Uganda. Sa pagkakaron, halos tanang kongregasyon adunay ilang kaugalingong kasarangan apan presentable nga Kingdom Hall. Ang mensahe nga gipahayag ngadto sa lokal nga mga komunidad gikan sa maong pagpanukod mao, “Magpabilin kami dinhi.” Nakatabang kini sa pag-uswag.

Ang usa ka gamayng kongregasyon sa amihanang Uganda nagtigom niadto sa ilalom sa mga mangga nga bagag dahon. Sa dihang diha nay lote, kusog ang pag-abante sa trabaho. Ang mga igsoon nga sakop sa proyekto sa konstruksiyon, nga nagbuhat uban sa lokal nga mga Saksi, misugod pagtukod ug usa ka Kingdom Hall. Usa ka kanhi ilado nga politiko sa maong dapit nakadayeg sa trabaho. Iyang gitanyag ang iyang garahe aron gamiton sa ilang mga tigom hangtod mahuman ang Kingdom Hall. Siya midawat usab ug pagtuon sa Bibliya uban sa usa sa mga boluntaryo sa pagpanukod. Usa na siya karon ka masiboton ug bawtismadong magmamantala, nga malipayong nagsimba kang Jehova diha sa maong matahom nga bag-ong Kingdom Hall!

Panahon sa pagtukod ug usa ka Kingdom Hall sa habagatan-silangang bahin sa nasod, ang usa ka kantero natandog kaayo sa espiritu sa kamahigalaon, gugma, ug kooperasyon nga iyang napanid-an sa mga igsoon mao nga siya miboluntaryo sa pagtabang sa trabaho. Sa hinapos sa proyekto, siya mitrabaho pa gani ug tibuok gabii aron ang Kingdom Hall maandam sa mga igsoon alang sa dedikasyon sa pagkabuntag. Siya mikomento: “Kamo lang gayod ang tinuod nga nahigugma sa usag usa, dili lang pinaagig mga pulong.”

Gidahom ang Pag-uswag Bisan pa sa mga Suliran

Tungod kay ginasangyawan ang bag-ong mga teritoryo sa Uganda, adunay inanayng pag-uswag sa gidaghanon sa mga Saksi, ug ang daghang interesado nakig-uban sa mga kongregasyon. Hinuon, ang dakong suliran mao ang daghang kagiw nga nangabot sa Uganda. Ang gubat sibil sa kasikbit nga mga nasod nakaapektar usab sa katawhan ni Jehova. Ang mga Saksi diha sa mga kampo sa kagiw nagpasundayag ug talagsaong pagsalig kang Jehova. Ang usa ka hataas nga opisyal kanhi sa usa ka duol nga nasod, kinsa naglutos usab sa mga Saksi sa dihang may pagdili sa maong nasod, naghinumdom sa iyang hamugaway nga kinabuhi kanhi. Human sa pagtuon sa Bibliya diha sa usa sa mga kampo sa kagiw ug pagkahimong Saksi, siya mikomento: “Dili gayod bililhon ang materyal nga kadagaya ug taas nga katungdanan niining kalibotana. Bisan pag ako karon kabos ug masakiton, ang akong kinabuhi mas maayo kay sukad masukad. Ako nakaila kang Jehova, ug akong gipabilhan ang pribilehiyo sa pag-ampo. Samtang ako adunay lig-ong paglaom sa umaabot, nahibalo ko kon nganong kita mag-antos ug mga suliran karon. Busa ako adunay kalinaw sa kahiladman nga wala nako sukad masinati.”

Giingon nga kon itusok nimo ang usa ka lipak sa tabunok nga yuta sa Uganda sa gabii, kini aduna nay mga gamot pagkabuntag. Ang espirituwal nga pag-uswag nga nagakahitabo sa nasod nagpasabot nga ang espirituwal nga yuta tabunok usab kaayo. Kami nagpasalamat kang Jehova nga Diyos tungod sa pagtugot ug panahon aron ang mas daghan nga sarisaring katawhan sa Uganda makakat-on bahin sa iyang Gingharian. Gitandi ni Jesus ang pagkabililhon niini ngadto sa usa ka “perlas nga bililhon kaayo.” Nagakadaghan ang mga tawo sa Uganda nga nakasabot niana.—Mateo 13:45, 46.

[Footnote]

[Mga mapa sa panid 8]

(Alang sa aktuwal nga pagkahan-ay, tan-awa ang publikasyon)

SUDAN

UGANDA

Suba sa Nilo

Kamuli

Tororo

Kampala

Bushenyi

Lanaw Victoria

KENYA

TANZANIA

RWANDA

[Hulagway sa panid 9]

Tulo sa daghang masibotong payunir nga mga ministro

[Hulagway sa panid 10]

Patrick

[Hulagway sa panid 10]

Margaret

[Hulagway sa panid 10]

Simon

[Hulagway sa panid 10]

Distritong kombensiyon sa Tororo

[Picture Credit Line sa panid 8]

Background: © Uganda Tourist Board