Usa ka Kasaligang Giya Aron Magmalipayon

“ANG pagpangagpas sa Kalipay” maoy katungod sa tanang tawo. Kana ang panglantaw sa mga nagmugna sa Deklarasyon sa Independensiya sa Tinipong Bansa sa Amerika. Apan ang pagpangagpas sa usa ka tumong lahi sa pagpangab-ot niana. Bisan tuod daghang batan-on ang nangagpas ug mga karera diha sa natad sa kalingawan ug esport, pila ka tawo ang imong nahibaloan nga nakakab-ot sa ila gayong gitinguha? “Lagmit dili nimo makab-ot kana,” matod sa usa ka iladong mag-aawit nga sinati sa pagpakigbisog aron mahimong malamposong mag-aawit.

Kon kanay imong pagbati bahin sa pagkaplag ug kalipay, adunay maayong katarongan nga ikaw madasig. Kon pangagpason mo ang kalipay sa hustong paagi, imong makab-ot kana. Ngano man? Ang nag-unang artikulo naghisgot bahin sa “malipayong Diyos,” si Jehova. (1 Timoteo 1:11) Sa Bibliya, ang Diyos naghatag ug giya aron ang imong pagpangagpas sa kalipay dili mosangko sa kahigawad. Si Jehova makatabang kanimo sa pagbuntog sa kasagarang mga hinungdan sa kasubo. Ingong pananglitan, tagda ang kahupayan nga iyang gitanyag kanimo sa dihang mamatay ang imong minahal.

Sa Dihang Mamatay ang Usa ka Minahal

Duna bay ikasulti nga maayo bahin sa kamatayon? Tungod sa kamatayon magkabulag ang mga ginikanan ug ang ilang mga anak. Kini magbulag sa suod nga mga higala ug makapahuyang sa nagkahiusa nga mga komunidad. Sa dihang mahitabo ang kamatayon, ang usa ka malipayong pamilya lagmit maguol pag-ayo.

Dayag nga ang kamatayon maoy usa ka trahedya. Apan, ang pipila ka tawo dili motuo niana ug nag-ingon nga panalangin pa gani ang kamatayon. Matikdi kon unsay nahitabo human mohapak ang  Hurricane Katrina sa Gulpo sa Mexico niadtong Agosto 2005. Sa paglubong sa usa nga namatay, ang pari miingon: “Siya wala patya ni Katrina. Ang Diyos maoy nagkuha kaniya aron dad-on sa langit.” Sa laing higayon, ang usa ka maayog-tuyo nga klerk sa ospital miingon ngadto sa usa ka anak nga babaye nga dili siya angayng mabalaka, kay ang Diyos maoy nagkuha sa iyang inahan aron dad-on sa langit. Ang anak mihilak: “Ngano, nganong gikuha man niya si Mama gikan nako?”

Dayag nga ang maong sayop nga mga pagtuo bahin sa mga patay sagad dili makahupay sa mga nagbangotan. Ngano man? Tungod kay kining mga ideyaha dili mao ang kamatuoran bahin sa kamatayon. Mas ngil-ad pa, ilang gipadayag nga ang Diyos nagkuha sa maong mga minahal gikan sa ilang pamilya ug mga higala sa makalilisang ug masakit nga paagi. Imbes tinubdan sa kahupayan, ang Diyos gipadayag ingong kontrabida sa trahedya sa kamatayon. Apan ang Pulong sa Diyos naghisgot sa kamatuoran bahin sa kamatayon.

Ang Bibliya nagtawag sa kamatayon ingong kaaway. Kini nagpakasama sa kamatayon ngadto sa usa ka hari nga nagmando sa katawhan. (Roma 5:17; 1 Corinto 15:26) Ang kamatayon maoy usa ka gamhanang kaaway nga dili masuklan ni bisan kinsang tawo, ug ang matag minahal nga mamatay maoy usa lamang sa dili-maihap nga mga biktima sa kamatayon. Kini nga kamatuoran sa Bibliya mao gayod ang katin-awan sa kaguol ug kahaw-ang nga atong bation sa dihang ang usa ka minahal mamatay. Kini nagpamatuod nga kinaiyanhon ra ang maong mga pagbati. Bisan pa niana, gigamit ba sa Diyos ang kaaway nga kamatayon aron dad-on ang atong mga minahal ngadto sa langit? Ang Bibliya maoy atong patubagon nianang pangutanaha.

Ang Ecclesiastes 9:5, 10 nag-ingon: “Bahin sa mga patay, sila walay nahibaloan nga bisan unsa . . . Walay buluhaton ni lalang ni kahibalo ni kaalam sa Sheol, ang dapit diin ikaw moadto.” Unsa ba ang Sheol? Kini mao ang komon nga lubnganan sa mga tawo inigkamatay nila. Sa lubnganan ang patay bug-os nga walay ginahimo, walay kalihokan, pagbati, o bisan unsang panghunahuna. Sila daw nahinanok sa pagkatulog. a Busa ang Bibliya nagpatin-aw nga ang Diyos wala magkuha sa atong mga minahal aron mahiuban kaniya sa langit. Tungod sa kamatayon, sila walay kinabuhi diha sa lubnganan.

Gipamatud-an ni Jesus kini nga kamatuoran human mamatay ang iyang higala nga si Lazaro. Gipakasama ni Jesus ang kamatayon sa pagkatulog. Kon si Lazaro didto na sa langit uban sa Labing Gamhanan nga Diyos, ang pagpabalik ni Jesus kaniya dinhi sa yuta nga sa ngadtongadto mamatay pag-usab maoy pagkadili-maluloton. Ang inspiradong asoy nagtug-an nga sa lubnganan, si Jesus misinggit: “Lazaro, gula ngari!” Ang Bibliya nagpadayon: “Ang tawo nga namatay migula.” Si Lazaro nabuhi pag-usab. Nahibalo si Jesus nga si Lazaro wala mobiya sa yuta. Siya naghigda nga walay kinabuhi diha sa lubnganan.—Juan 11:11-14, 34, 38-44.

Kining hitaboa nga natala sa Bibliya makatabang kanato sa pagsabot nga ang kamatayon wala gamita sa Diyos sa pagbalhin sa mga tawo gikan sa yuta ngadto sa langit. Busa kita makaduol sa Diyos, kay kita nahibalo nga siya dili mao ang nakaingon sa atong kagul-anan. Makasalig usab kita nga siya  bug-os nakasabot sa kasubo ug kadaot nga gipahinabo sa kamatayon kanato. Ug ang kamatuoran sa Bibliya bahin sa kahimtang sa mga patay nagpamatuod nga ang mga patay wala mag-antos didto sa nagkalayong impiyerno o sa purgatoryo kondili walay kinabuhi diha sa lubnganan. Busa, ang panumdoman sa atong mga minahal dili angayng madaot tungod sa pagkayugot sa Diyos o kahadlok kay wala mahibalo kon hain na sila. Gawas pa, diha sa Bibliya si Jehova naghatag ug dugang paghupay.

Ang Paglaom Motultol Ngadto sa Kalipay

Ang mga teksto nga atong nahisgotan nagpunting nga ang paglaom maoy usa ka hinungdanong bahin sa tinuod nga kalipay. Ang pulong “paglaom” ingon sa pagkagamit sa Bibliya nagpasabot sa masaligong pagdahom ug maayo. Aron atong masabtan kon nganong ang paglaom makahatag ug kalipay karon, atong balikan ang asoy bahin sa pagbanhaw ni Jesus kang Lazaro.

Dunay labing menos duha ka rason kon nganong gihimo ni Jesus ang maong milagro. Ang una mao ang paghanaw sa kasubo ni Marta, Maria, ug sa nagbangotang mga higala. Malipay na usab sila sa pagpakig-uban sa ilang minahal. Apan si Jesus may gisulti kang Marta bahin sa ikaduha ug mas hinungdanong rason: “Wala ba ako magsulti kanimo nga kon motuo ka makita mo ang himaya sa Diyos?” (Juan 11:40) Ang The New Testament in Modern English, ni J. B. Phillips, naghubad sa kataposang mga pulong nga “ang kahibulongang mahimo sa Diyos.” Sa pagbanhaw kang Lazaro, si Jesus naghatag ug pasiunang pagtan-aw kon unsay mahimo ug pagahimoon ni Jehova nga Diyos sa umaabot. Aniay dugang detalye bahin niining “kahibulongang mahimo sa Diyos.”

Sa Juan 5:28, 29, si Jesus miingon: “Ayaw kahibulong niini, tungod kay ang takna nagsingabot nga ang tanan nga anaa sa handomanang mga lubnganan makadungog sa iyang tingog ug manggula.” Kini nagkahulogan nga ang tanang patay nga anaa sa Sheol, apil na ang atong mga minahal, pagabanhawon. Ang Buhat 24:15 nagbutyag ug dugang bahin niining talagsaong hitabo, nga nagkanayon: “Aduna unyay pagkabanhaw sa mga matarong ug sa mga dili-matarong.” Busa bisan ang “mga dili-matarong,” ang mga tawo nga wala makaila ug mag-alagad kang Jehova, may kahigayonan nga makabaton sa pag-uyon sa Diyos sa umaabot.

Asa man mahitabo kini nga pagpamanhaw? Ang Salmo 37:29 nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” Hunahunaa lang kon unsay kahulogan niana! Ang mga pamilya ug mga higala nga nagkabulag tungod sa kamatayon magkita pag-usab dinhi sa yuta. Samtang imong hunahunaon ang malipayong mga panahon nga imong gipahimuslan uban sa imong mga minahal kaniadto, makataronganon nga ikaw malipay gayod.

Buot ni Jehova nga Ikaw Malipay

Atong nahisgotan ang duha ka paagi nga gigamit ni Jehova aron ikaw mas magmalipayon bisan pa sa imong mga suliran. Una, pinaagi sa Bibliya, siya naghatag sa kahibalo ug giya nga makatabang kanimo aron malamposon nimong masagubang ang mga kalisdanan. Gawas pa sa pagtabang kanato sa pagsagubang sa kaguol tungod sa kamatayon, ang tambag sa Bibliya makatabang usab kanato sa pagsagubang sa mga suliran bahin sa panalapi ug sa panglawas. Kini makahatag kanimog kalig-on sa pag-antos sa inhustisya diha sa katilingban ug sa politikal nga kagubot. Ug kon imong ipadapat ang giya niini sa imong kinabuhi, kini makatabang kanimo sa pagsagubang sa uban pang personal nga mga problema.

Ikaduha, pinaagi sa pagtuon sa Bibliya, ikaw makabaton ug paglaom nga labaw pa kay sa bisan unsang ikatanyag sa mga tawo. Ang pagkabanhaw sa mga higala ug pamilya maoy bahin sa paglaom nga gitudlo sa Bibliya. Ang Pinadayag 21:3, 4 naghatag ug dugang detalye: “Ang Diyos makig-uban [sa katawhan]. Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Kini nagpasabot nga ang bisan unsang hinungdan sa kaguol sa imong kinabuhi sa dili madugay mawagtang na hangtod sa hangtod. Ang gisaad sa Bibliya matuman gayod, ug imong matagamtam ang katumanan niini. Ang pagkahibalo lang gani nga umaabot ang mas maayong panahon makapahupay na. Ang pagkasayod nga ikaw dili mag-antos sa walay kataposan human mamatay makapalipay na.

 Sa pag-ilustrar: Daghang tuig kanhi si Maria nagsud-ong sa iyang bana nga namatay sa masakit nga kamatayon tungod sa kanser. Siya naghilakhilak pa sa dihang siya ug ang iyang tulo ka anak babaye napugos sa pagpahawa sa ilang balay tungod sa mga problema sa panalapi. Duha ka tuig sa ulahi, nahibaloan ni Maria nga siya may kanser. Naoperahan na siyag kaduha ug nag-antos sa grabeng kasakit kada adlaw. Bisan pa niining mga problemaha, siya malaomon kaayo sa iyang hunahuna nga siya natukmod sa pagdasig sa ubang mga tawo. Sa unsang paagi nagpabilin siyang malipayon?

Si Maria nag-ingon: “Kon duna akoy problema, paningkamotan nakong dili maghunahuna pag-ayo sa akong kaugalingon. Dili ako mangutana ug sama niini: ‘Nganong nahitabo man kini kanako? Nganong kinahanglan man akong mag-antos ug sama niini? Nganong kinahanglan man akong magsakit?’ Mawad-an kag kusog tungod sa negatibong panghunahuna. Hinunoa, akong gamiton ang akong kusog sa pag-alagad kang Jehova ug pagtabang sa uban. Kana makapalipay kanako.”

Sa unsang paagi ang paglaom nakatabang kang Maria? Iyang gisentro ang iyang kasingkasing sa umaabot sa dihang hanawon na ni Jehova ang mga sakit ug uban pang mga problema sa katawhan. Sa dihang moadto siya sa ospital aron magpatambal, iyang ipaambit ang maong paglaom ngadto sa ubang mga pasyente nga may kanser, nga lagmit walay paglaom. Unsa ka hinungdanon ang paglaom alang kang Maria? Siya miingon: “Kanunay akong maghunahuna sa giingon sa Bibliya diha sa Hebreohanon 6:19, diin gibatbat ni Pablo ang paglaom ingong angkla sa kalag. Kon wala ang maong angkla, maanod ka sama sa usa ka barko taliwala sa usa ka bagyo. Apan kon ikaw nahigot sa maong angkla, ikaw mahimong luwas bisan pa sa mabagyohong mga problema nga imong gisagubang.” Kana nga “paglaom sa kinabuhing walay kataposan nga gisaad sa Diyos, nga dili makabakak” nagtabang kang Maria sa pagpabiling malipayon. Kini makatabang usab kanimo.—Tito 1:2.

Pinaagi sa pagtuon sa Bibliya, ikaw makakaplag ug tinuod nga kalipay bisan pa sa imong mga problema. Apan, tingali aduna kay mga pangutana bahin sa kamapuslanon sa pagtuon sa Bibliya. Ang mga Saksi ni Jehova malipay sa pagpakita kanimo sa mga tubag sa Kasulatan nga kinahanglan nimong mahibaloan aron ikaw magmalipayon gayod. Samtang imong paaboton ang katumanan sa paglaom nga gihatag ni Jehova, ikaw mahilakip niadtong gihubit niining paagiha: “Sila makabaton sa kasadya ug pagmaya, ug ang kaguol ug pagpanghupaw mokalagiw gayod.”—Isaias 35:10.

[Footnote]

[Hulagway sa panid 5]

Ang kamatuoran lamang sa Bibliya ang makahupay sa kaguol

[Hulagway sa panid 7]

Ang paglaom sa pagkabanhaw nga anaa sa Bibliya makapalipay