Ang Iyang Pagtuo Nagdasig sa Uban

SA DIHANG si Silvia natawo sa Disyembre 1992, daw himsog kaayo siya nga batang babaye. Apan sa nag-edad na si Silvia ug dos anyos, siya nadayagnos nga dunay cystic fibrosis, usa ka sakit nga walay pagkaayo nga magpahinabog magkagrabe nga suliran sa pagginhawa ug sa paghilis sa pagkaon. Aron makasagubang sa iyang sakit, si Silvia motomar ug 36 ka tabletas matag adlaw, mogamit ug mahanggap nga tambal, ug ipailalom sa pisikal nga terapiya. Tungod kay ang kapasidad sa iyang baga maoy 25 porsiyento lamang sa normal, kinahanglan siyang taoran ug madaladala nga tangke sa oksiheno, bisan sa dihang mogawas siya sa balay.

“Apan, dalayegon kaayo ang pagsagubang ni Silvia sa iyang sakit,” miingon si Teresa, ang iyang inahan. “Tungod sa iyang kahibalo sa Kasulatan, siya adunay lig-on nga pagtuo. Kining maong pagtuo nagtabang kaniya sa pagsagubang sa iyang kaguol ug sa kahasol nga iyang gibati. Kanunay niyang mahinumdoman ang saad ni Jehova sa usa ka bag-ong kalibotan, diin ang tanang masakiton pagaayohon.” (Pinadayag 21:4) Usahay sa dihang mahigawad ang iyang pamilya, ang masaligon nga pahiyom ni Silvia magdasig kanila. Moingon siya sa iyang mga ginikanan ug sa iyang igsoong lalaki: “Ang kinabuhi sa bag-ong kalibotan maoy mohulip sa tanan natong pag-antos karon.”

Si Silvia kanunayng magpaambit sa maayong balita sa Pulong sa Diyos ngadto sa uban, ug ang mga tawo nga iyang kaestorya makamatikod sa iyang malipayong panagway. Ang mga membro sa Kristohanong kongregasyon diin siya nagtambongan sa mga tigom sa Canary Islands malipay usab kaayo nga makabati sa iyang mga komento ug makakita kaniya nga nakigbahin. Ug human sa matag tigom, si Silvia gustong magpabilin una aron makigsulti sa iyang Kristohanong mga igsoon. Ang iyang mahigalaon ug mangayaon nga kinaiya nagtukmod sa tanan diha sa kongregasyon sa paghigugma kaniya.

“Si Silvia nagtudlo kanamo ug hinungdanon kaayong pagtulon-an,” miingon ang iyang amahan nga si Antonio. “Bisan pag kita may mga problema, ang kinabuhi maoy gasa gikan sa Diyos, ug angay natong apresyahon kana.” Sama kang Silvia, ang tanang alagad sa Diyos—bata ug tigulang—mahinamong nagpaabot sa panahon nga “walay pumoluyo nga moingon: “Ako masakiton.’”—Isaias 33:24.

[Hulagway sa panid 31]

Si Silvia nagbasa ug teksto sa Bibliya samtang ang iyang inahan nagdala sa tangke sa oksiheno