Mga Batan-on, Pilia ang Pag-alagad Kang Jehova
Mga Batan-on, Pilia ang Pag-alagad Kang Jehova
“Pagpili alang sa inyong kaugalingon karong adlawa kon kinsay inyong alagaran.”—JOSUE 24:15.
1, 2. Unsang sayop nga mga matang sa bawtismo ang gibatasan sa Kakristiyanohan?
“ANG [mga bata] mahimo lamang nga Kristohanon kon sila may igo nang kabuot sa pagkaila kang Kristo.” Mao kanay gipamulong sa magsusulat nga ginganlag Tertullian sa hinapos sa ikaduhang siglo K.P. Supak siya sa pagbunyag (bawtismo) sa mga bata, usa ka batasan nga nakagamot sa apostatang Kristiyanidad sa iyang adlaw. Sukwahi sa giingon ni Tertullian ug sa gitudlo sa Bibliya, ang Amahan sa Simbahan nga si Augustine nangangkon nga ang bunyag magwagtang sa mansa sa orihinal nga sala ug ang mga bata nga mamatay nga walay bunyag mahiadto sa impiyerno. Kana nga pagtuo nagpaluyo sa batasan sa pagbunyag dayon sa mga bata nga bag-ong natawo.
2 Daghang dagkong mga relihiyon sa Kakristiyanohan nagabunyag gihapon ug mga bata nga bag-ong natawo. Dugang pa, sa tibuok kasaysayan, ang pinugos nga pagbawtismo sa napildi nga “mga pagano” gibatasan sa mga magmamando ug relihiyosong mga lider sa gitawag ug Kristohanong mga nasod. Apan ang pagbunyag sa mga bata ug ang pinugos nga pagbawtismo sa mga hamtong wala itudlo sa Bibliya.
Walay Awtomatikong Pagpahinungod Karon
3, 4. Unsay makatabang sa mga anak sa nakapahinungod nang mga ginikanan sa paghimog kinabubut-ong pagpahinungod?
3 Gipakita sa Bibliya nga giisip sa Diyos nga balaan ang mga bata bisan pag usa lang sa ilang mga ginikanan ang matinumanong Kristohanon. (1 Corinto 7:14) Maisip ba nga napahinungod na nga mga alagad ni Jehova kanang mga bataa tungod lang kay usa sa iyang ginikanan maoy usa ka matinumanong Kristohanon? Dili. Apan, ang mga bata nga gimatuto sa mga ginikanan nga nakapahinungod na kang Jehova ginabansay ug kini moagak kanila sa paghimog kinabubut-ong pagpahinungod kang Jehova. Ang maalamong Haring Solomon misulat: “Bantayi, Oh anak ko, ang sugo sa imong amahan, ug ayaw talikdi ang balaod sa imong inahan. . . . Sa diha nga ikaw magalakaw, kini magatultol kanimo; sa diha nga ikaw magahigda, kini magabantay kanimo; ug sa diha nga ikaw mahigmata, ikaw hatagag pagtagad niini. Kay ang sugo maoy usa ka lampara, ug ang balaod maoy usa ka suga, ug ang mga pagbadlong sa disiplina maoy dalan sa kinabuhi.”—Proverbio 6:20-23.
4 Ang giya nga ihatag sa Kristohanong mga ginikanan makapanalipod sa mga batan-on, kon sila andam mosunod niana. Miingon usab si Solomon: “Ang anak nga maalamon maoy usa nga makapalipay sa iyang amahan, ug ang anak nga hungog maoy kaguol sa iyang inahan.” “Ikaw, Oh anak ko, pamati ug magmaalamon, ug tultoli ang imong kasingkasing diha sa dalan.” (Proverbio 10:1; 23:19) Oo, aron makabenepisyo sa pagbansay sa mga ginikanan, kamong mga batan-on kinahanglang andam modawat sa pahimangno, tambag, ug disiplina. Kamo wala matawo nga maalamon, apan kamo “mahimong maalamon” ug kinabubut-ong makasubay sa “dalan sa kinabuhi.”
Unsa ang Pagdumala-sa-Kaisipan?
5. Unsay gitambag ni Pablo ngadto sa mga anak ug sa mga amahan?
5 Si apostol Pablo misulat: “Mga anak, magmasinugtanon sa inyong mga ginikanan nga nahiusa sa Ginoo, kay kini maoy matarong: ‘Pasidunggi ang imong amahan ug ang imong inahan’; nga maoy unang sugo nga may saad: ‘Aron magmauswagon ka ug molungtad ka sa hataas nga panahon sa yuta.’ Ug kamong mga amahan, ayaw palagota ang inyong mga anak, kondili magpadayon sa pagmatuto kanila sa disiplina ug sa pagdumala-sa-kaisipan ni Jehova.”—Efeso 6:1-4.
6, 7. Unsay nalangkit sa pagmatuto sa mga anak diha sa “pagdumala-sa-kaisipan ni Jehova,” ug nganong wala kini magpasabot nga ang mga ginikanan nag-impluwensiya sa ilang mga anak sa dili-makataronganong paagi?
6 Ang Kristohanong mga ginikanan sa pagkadili-makataronganon nagaimpluwensiya ba sa ilang mga anak sa dihang nagamatuto kanila diha sa “disiplina ug pagdumala-sa-kaisipan ni Jehova”? Wala. Kinsay makasaway sa mga ginikanan tungod sa pagtudlo nila sa ilang mga anak sa ilang gihunahuna nga husto ug makaayo sa ilang pamatasan? Ang mga ateyista wala sawaya tungod sa pagtudlo nila sa ilang mga anak nga ang Diyos wala maglungtad. Ang mga Romano Katoliko naghunahuna nga ilang obligasyon ang pagmatuto sa ilang mga anak subay sa ilang relihiyon, ug talagsa rang may mosaway nila tungod sa ilang pagpaningkamot sa pagbuhat niana. Sa samang paagi, dili angayng akusahan ang mga Saksi ni Jehova nga nag-impluwensiya sa hunahuna sa ilang mga anak sa dihang magmatuto kanila sa pagsagop sa panghunahuna ni Jehova bahin sa paninugdang mga kamatuoran ug moral nga mga prinsipyo.
7 Sumala sa Theological Dictionary of the New Testament, ang orihinal nga Gregong pulong nga gihubad ug “pagdumala-sa-kaisipan” diha sa Efeso 6:4 nagtumong sa paagi “sa pagtul-id sa hunahuna, sa pagtul-id sa sayop, sa pagpauswag sa espirituwal nga panglantaw.” Komosta man kon ang usa ka batan-on dili mosunod sa pagbansay sa ginikanan tungod sa pagpit-os sa mga higala, ang pangandoy sa pagduyog sa ginabuhat sa ubang mga batan-on? Kinsa kahay ikaingon nga namit-os sa batan-on nga makahatag ug kadaot kaniya—ang mga ginikanan o ang mga higala sa batan-on? Kon ang mga higala nagpugos sa batan-on sa pagdroga, pagpatuyang sa pag-inom, o pagpakigbahin sa malaw-ay nga panggawi, angay bang sawayon ang mga ginikanan sa ilang paningkamot nga ipasibo ang panghunahuna sa ilang anak ug tabangan siya nga makaamgo sa mga sangpotanan nianang peligrosong binuhatan?
8. Unsay nalangkit sa ‘pagkakombinsir ni Timoteo sa pagtuo’?
8 Si apostol Pablo misulat ngadto sa batan-ong si Timoteo: “Magpadayon ka sa mga butang nga imong nakat-onan ug nakakombinsir kanimo sa pagtuo, nga nahibalo kon kang kinsa nimo nakat-onan kini ug nga sukad pa sa pagkamasuso ikaw nahibalo na sa balaang mga sinulat, nga makahimo kanimong maalamon alang sa kaluwasan pinaagi sa pagtuo maylabot kang Kristo Jesus.” (2 Timoteo 3:14, 15) Sukad pa sa pagkamasuso ni Timoteo, ang iyang inahan ug apohang babaye nagtukod ug lig-ong pundasyon sa iyang pagtuo sa Diyos pinasukad sa kahibalo sa Balaang Kasulatan. (Buhat 16:1; 2 Timoteo 1:5) Sa ulahi, sa dihang sila nahimong mga Kristohanon, wala nila pugsa si Timoteo sa pagtuo kondili ‘gikombinsir’ nila siya pinaagi sa lig-ong pangatarongan nga gibase sa kahibalo sa Kasulatan.
Si Jehova Nag-awhag Kanimo sa Pagpili
9. (a) Sa unsang paagi gipasidunggan ni Jehova ang iyang mga linalang, ug sa unsang katarongan? (b) Sa unsang paagi gigamit sa bugtong Anak sa Diyos ang iyang kagawasan sa pagpili?
9 Mahimo untang buhaton ni Jehova ang iyang mga linalang nga samag mga robot, nga giprograma sa pagtuman sa iyang kabubut-on ug dili makahimog kaugalingong desisyon. Hinunoa, iyang gipasidunggan sila pinaagi sa paghatag kanila ug kagawasan sa pagpili. Ang atong Diyos nagtinguha nga ang iyang mga linalang kinabubut-ong magpasakop kaniya. Siya malipay nga magtan-aw sa iyang mga linalang, bata ug tigulang, nga nag-alagad kaniya tungod kay sila nahigugma kaniya. Ang kinamaayohang panig-ingnan sa mahigugmaong pagpasakop sa kabubut-on sa Diyos mao ang iyang bugtong Anak, nga bahin kaniya si Jehova miingon: “Kini mao ang akong Anak, ang hinigugma, nga akong giuyonan.” (Mateo 3:17) Kining panganay nga Anak miingon sa iyang Amahan: “Sa pagbuhat sa imong kabubut-on, Oh Diyos ko, ako nagakalipay, ug ang imong balaod ania sa akong kahiladman nga mga bahin.”—Salmo 40:8; Hebreohanon 10:9, 10.
10. Gipasukad sa unsa ang pag-alagad kang Jehova sa dalawatong paagi?
10 Gidahom ni Jehova nga kadtong mag-alagad kaniya ilalom sa pagtultol sa iyang Anak magmapasinakopon usab sa Iyang kabubut-on. Sa matagnaong paagi, ang salmista miawit: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar. Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.” (Salmo 110:3) Ang tibuok organisasyon ni Jehova, langitnon man ug yutan-on, naglihok pinasukad sa mahigugmaong pagpasakop sa kabubut-on sa Diyos.
11. Unsang pagpili ang gisangon ngadto sa mga batan-on nga gimatuto sa nakapahinungod nang mga ginikanan?
11 Busa kamong mga batan-on kinahanglang makasabot nga ang inyong mga ginikanan ni ang Kristohanong mga ansiyano sa kongregasyon dili mopugos kaninyo sa pagpabawtismo. Ang tinguha sa pag-alagad kang Jehova kinahanglang maggikan kaninyo. Si Josue sa karaang panahon miingon sa mga Israelinhon: “Mag-alagad [kang Jehova] sa paaging walay-ikasaway ug sa kamatuoran . . . Pagpili alang sa inyong kaugalingon karong adlawa kon kinsay inyong alagaran.” (Josue 24:14-22) Sa samang paagi, kinahanglang inyong kaugalingong pagbuot ang inyong pagpili sa pagpahinungod kang Jehova ug pagdeboto sa inyong kinabuhi sa pagtuman sa iyang kabubut-on.
Pagdawat sa Inyong Responsibilidad
12. (a) Bisan tuod ang mga ginikanan makabansay sa ilang mga anak, unsay dili nila mahimo para sa ilang mga anak? (b) Kanus-a nga ang usa ka batan-on manubag kang Jehova sa mga desisyon nga iyang himoon?
12 Moabot ra ang panahon dihang kamong mga batan-on dili na makalaom nga mapanalipdan sa pagkamatinumanon sa inyong mga ginikanan. (1 Corinto 7:14) Ang disipulong si Santiago misulat: “Kon ang usa nasayod sa pagbuhat kon unsay maayo apan wala magbuhat niini, siya nakasala.” (Santiago 4:17) Ang mga ginikanan dili makaalagad sa Diyos para sa ilang mga anak maingon nga ang mga anak dili makaalagad sa Diyos para sa ilang mga ginikanan. (Ezequiel 18:20) Kamo ba may nakat-onan na bahin kang Jehova ug sa iyang mga katuyoan? Kamo ba may igo nang kabuot sa pagsabot sa inyong nakat-onan ug sa pag-ugmad ug personal nga relasyon uban kaniya? Busa, dili ba makataronganon ang paghunahuna nga kamo gilantaw sa Diyos nga makaarang na sa pagdesisyon sa inyong kaugalingon sa pag-alagad kaniya?
13. Unsang mga pangutana ang angayng isukna sa dili-bawtismadong mga batan-on sa ilang kaugalingon?
13 Ikaw ba usa ka dili-bawtismadong batan-on nga gimatuto sa diyosnong mga ginikanan, nga nagtambongan sa Kristohanong mga tigom, ug nakigbahin pa gani sa pagsangyaw sa maayong balita sa Gingharian? Kon mao, matinud-anong pangutan-a ang imong kaugalingon: ‘Nganong ginabuhat man nako kini? Ako ba motambong sa mga tigom ug makigbahin sa buluhatong pagsangyaw tungod kay mao kanay gusto sa akong mga ginikanan nga akong buhaton o tungod kay buot nakong pahimut-an si Jehova?’ Napamatud-an ba nimo sa imong kaugalingon “ang maayo ug dalawaton ug hingpit nga kabubut-on sa Diyos”?—Roma 12:2.
Nganong Maglangan-langan sa Pagpabawtismo?
14. Unsang mga panig-ingnan sa Bibliya ang nagpakita nga dili angayng ipalangan-langan nga dili makataronganon ang pagpabawtismo?
14 ‘Unsay nakapugong kanako sa pagpabawtismo?’ Ang Etiopianhong lalaki nga misukna niana sa ebanghelisador nga si Felipe bag-o lang nahibalo nga si Jesus mao ang Mesiyas. Apan ang Etiopianhon may igo nang kahibalo sa Kasulatan sa pagkaamgo nga siya dili angayng maglangan-langan sa paghimog dayag nga pagpamatuod, nga sugod nianang panahona siya mag-alagad na kang Jehova ingong bahin sa Kristohanong kongregasyon, ug kana nakapalipay pag-ayo kaniya. (Buhat 8:26-39) Sa samang paagi, ang babaye nga ginganlag Lydia, kansang kasingkasing andam ‘sa pagpaminaw sa mga butang nga gisulti ni Pablo,’ dihadiha ‘gibawtismohan,’ siya ug ang iyang panimalay. (Buhat 16:14, 15) Ang magbalantay usab sa bilanggoan sa Filipos namati kang Pablo ug Silas samtang sila ‘nagsulti sa pulong ni Jehova ngadto kaniya,’ ug “siya ug ang mga iya gibawtismohan sa walay langan.” (Buhat 16:25-34) Busa, kon ikaw aduna nay igong kahibalo bahin kang Jehova ug sa iyang mga katuyoan, may kinasingkasing nga tinguha sa pagtuman sa iyang kabubut-on, ug maayog dungog diha sa kongregasyon ug tigtambongan na sa mga tigom ug nagapakigbahin na sa pagsangyaw sa maayong balita sa Gingharian, nganong maglangan-langan ka pa man sa pagpabawtismo?—Mateo 28:19, 20.
15, 16. (a) Unsang sayop nga pangatarongan ang lagmit nakapugong sa pipila ka batan-on sa pagpabawtismo? (b) Sa unsang paagi ang pagpahinungod ug pagpabawtismo nagsilbing proteksiyon sa mga batan-on?
15 Dili kaha nga nagpanuko ka sa paghimo niining hinungdanong lakang tungod kay nahadlok ka nga manubag engkasog mahulog ka sa daotang mga buhat? Kon mao, hunahunaa kini: Dili ka ba mokuhag lisensiya sa pagdrayb tungod lang kay nahadlok ka nga basig maaksidente ka unya? Siyempre, dili! Sa samang paagi, dili ka sab angayng magpanuko sa pagpabawtismo kon ikaw takos na niana. Sa pagkatinuod, mas determinado kang suklan ang buhat nga daotan kon imo nang gipahinungod ang imong kinabuhi kang Jehova ug miuyon ka na nga tumanon ang iyang kabubut-on. (Filipos 4:13) Mga batan-on, palihog ayawg hunahunaa nga pinaagi sa paglangan-langan sa pagpabawtismo, kamo walay tulubagon. Sa dihang kamo anaa na sa hustong edad, kamo manubag kang Jehova sa inyong binuhatan bawtismado man kamo o dili.—Roma 14:11, 12.
16 Daghang mga Saksi sa tibuok kalibotan mibati nga ang ilang desisyon nga magpabawtismo sa batan-on pa sila dakog gikatabang kanila. Tagda pananglitan ang 23-anyos nga Saksi sa Kasadpang Uropa. Siya nahinumdom nga ang pagpabawtismo sa edad nga 13 anyos nagpalihok kaniya sa pag-amping nga dili madaog sa “mga tinguha nga iya sa pagkabatan-on.” (2 Timoteo 2:22) Sa bata pa, siya nakahukom na sa pag-alagad ingong bug-os-panahong ministro. Karon, siya malipayong nag-alagad sa sangang buhatan sa mga Saksi ni Jehova. Ang tanang batan-on nga mopili sa pag-alagad kang Jehova, lakip na kanimo, makalaom nga dagayang panalanginan.
17. Sa unsang mga bahina nga hinungdanong magpadayon sa pagsabot kon unsay “kabubut-on ni Jehova”?
17 Ang pagpahinungod ug pagpabawtismo mao ang sinugdanan sa usa ka kinabuhi diin atong tagdon ang kabubut-on ni Jehova diha sa tanan natong mga kalihokan. Ang pagtuman sa atong pagpahinungod naglangkit ug ‘pagpalit sa panahon.’ Unsaon nato pagbuhat kana? Pinaagi sa paggahin sa panahon nga lagmit atong magugol diha sa walay pulos nga mga kalihokan ug paggamit niana sa seryosong pagtuon sa Bibliya, regular nga pagtambong sa tigom, ug bug-os nga pagpakigbahin sa pagsangyaw sa “maayong balita sa gingharian.” (Efeso 5:15, 16; Mateo 24:14) Ang atong pagpahinungod kang Jehova ug ang atong tinguha sa pagtuman sa iyang kabubut-on mapuslanon diha sa tanang bahin sa atong kinabuhi, lakip na sa atong paglingawlingaw, sa atong batasan sa pagkaon ug pag-inom, ug sa matang sa musika nga atong paminawon. Nganong dili pilion ang matang sa kalingawan nga mahimong kalipayan nimo hangtod sa hangtod? Libolibong malipayon nga batan-ong mga Saksi mosulti kanimo nga adunay daghang maayong mga kalingawan nga dili supak sa “kabubut-on ni Jehova.”—Efeso 5:17-19.
“Mouban Kami Kaninyo”
18. Unsang pangutana ang angayng isukna sa mga batan-on sa ilang kaugalingon?
18 Sukad sa 1513 W.K.P. hangtod sa Pentekostes 33 K.P., si Jehova adunay organisadong katawhan nga iyang gipili sa pagsimba kaniya ug mahimong iyang mga saksi dinhi sa yuta. (Isaias 43:12) Ang batan-ong mga Israelinhon gipanganak nga membro na nianang nasora. Sukad sa Pentekostes, si Jehova may bag-ong “nasod” dinhi sa yuta, ang espirituwal nga Israel, nga “usa ka katawhan alang sa iyang ngalan.” (1 Pedro 2:9, 10; Buhat 15:14; Galacia 6:16) Si apostol Pablo nag-ingon nga si Kristo naghinlo alang sa iyang kaugalingon ug “usa ka katawhan nga iyaha lamang gayod, nga masiboton sa maayong mga buhat.” (Tito 2:14) Kamong mga batan-on adunay kagawasan sa pagsusi kon asa ninyo makaplagan ang maong mga tawo. Kinsa karon ang naglangkob “sa matarong nga nasod nga nagmatinumanon,” nga nagkinabuhi uyon sa mga prinsipyo sa Bibliya, nagsilbing matinumanong mga Saksi kang Jehova, ug nagmantala sa iyang Gingharian ingong bugtong paglaom sa katawhan? (Isaias 26:2-4) Tan-awa ang mga relihiyon sa Kakristiyanohan ug ang ubang mga relihiyon, ug itandi ang ilang panggawi sa kon unsay gikinahanglan sa Bibliya sa matuod nga mga alagad sa Diyos.
19. Sa unsa kombinsido gayod ang milyonmilyong tawo sa tibuok yuta?
19 Milyonmilyong tawo sa tibuok kalibotan, lakip na sa daghang batan-on, kombinsido gayod nga ang dinihogang nanghibilin sa mga Saksi ni Jehova maoy naglangkob nianang “matarong nga nasod.” Sila miingon ngadto niining espirituwal nga mga Israelinhon: “Mouban kami kaninyo, kay kami nakadungog nga ang Diyos nagauban kaninyo.” (Zacarias 8:23) Kami kinasingkasing nga naglaom ug nag-ampo nga kamong mga batan-on makahukom nga mahimong bahin sa katawhan sa Diyos ug sa ingon ‘nagpili sa kinabuhi’—walay-kataposang kinabuhi sa bag-ong kalibotan ni Jehova.—Deuteronomio 30:15-20; 2 Pedro 3:11-13.
Agig Pagsubli
• Unsay nalangkit sa pagdumala-sa-kaisipan?
• Unsang matanga sa pag-alagad ang dalawaton kang Jehova?
• Unsang pagpili ang gisangon ngadto sa mga batan-on nga gimatuto sa nakapahinungod nang mga ginikanan?
• Nganong dili angayng ipalangan-langan nga dili makataronganon ang pagpabawtismo?
[Mga Pangutana sa Pagtuon]
[Mga hulagway sa panid 26]
Kinsay imong pamation?
[Hulagway sa panid 28]
Sa unsang paagi ang pagpahinungod ug pagpabawtismo nagsilbing proteksiyon kanimo?
[Hulagway sa panid 29]
Unsay nakapugong kanimo sa pagpabawtismo?