Pagkaplag ug Tinuod nga Kalamdagan

Disyembre 18, 1810 kadto. Nagkilumkilom na. Taliwala sa baloron nga kadagatan nga dili layo sa habagatan-sidlakang kabaybayonan sa Scotland, ang bapor sa British Navy nga HMS Pallas dili makatino sa nahimutangan niini. Tungod sa kangitngit ug kusog nga pag-ulan ug niyebe, ang mga tripulante nalisdan sa pagpangita sa signal gikan sa parola nga makagiya sa ilang bapor ngadto sa luwas nga dapit. Hunahunaa lang ang kalipay nga ilang gibati sa dihang sa kataposan nakakita silag mga suga ug ang bapor ilang girumbo sa maong direksiyon! Apan, ikasubo nga dili diay kini mao ang giya nga mga suga nga ilang gikinahanglan. Sa pagkatinuod, kini maoy mga daob sa mga trabahante nga nagtrabaho duol sa baybayon. Ang Pallas nabangga sa mga bato ug grabeng naguba. Onse ka marinero ang nangalumos. Pagkadako sa trahedya!

Sa kahimtang sa Pallas, ang usa ka sayop misangpot sa katalagman. Apan, sa ubang mga panahon, ang mga marinero nag-atubang ug mas dako pa ganing kapeligrohan—malimbongong mga suga. Ang maong mga suga gituyo pagbutang aron hayloon ang mga barko sa pag-agi sa batoon nga baybayon aron ilang pangawatan ang naguba nga barko, sumala pa sa basahon nga Wrecks, Wreckers and Rescuers.

‘Sagradong mga Sinulat nga Makatultol Kanimo Ngadto sa Kaluwasan’

Sa imong pagpangita ug kalamdagan, ikaw nag-atubang ug mga kapeligrohan nga susama sa naagoman sa maong mga marinero. Tingalig makasunod ka sa malimbongong mga impormasyon, o kaha mabiktima pa gani sa tinuyong pagpangilad. Ang bisan hain niini mahimong mosangpot sa makapasubong hitabo. Unsay imong mahimo aron mapanalipdan ang imong kaugalingon? Tinoa nga ang imong tinubdan sa kalamdagan maoy tinuod ug kasaligan. Sulod sa kapin sa 125 ka tuig na karon, kining magasina nagpasiugda sa inspiradong Pulong sa Diyos, ang Bibliya, ingong ang labing kasaligang tuboran sa kalamdagan tungod kay kini naundan sa “sagradong mga sinulat nga makapahimo kanimong maalamon ug makatultol kanimo ngadto sa kaluwasan.”—2 Timoteo 3:15-17, New English Bible.

Siyempre, aron makasalig ka sa Bibliya ingong  kasaligang giya, makataronganon lamang nga imong susihon ang mga kalig-onan niini. (Salmo 119:105; Proverbio 14:15) Ayaw pagpanuko sa pagsulat sa magpapatik niining magasina aron makabaton kag impormasyon nga nakatabang sa pagkombinsir sa minilyon nga ang Bibliya inspirado gayod sa Diyos. Pananglitan, basaha ang brosyur nga nag-ulohang Usa ka Basahon Alang sa Tanang Tawo. a Kini nagpresentar ug daghang impormasyon nga nagpakita nga ang Bibliya tukma, tinuod, ug inspirado.

Paninugdang mga Kamatuoran

Nan, unsa man ang pipila sa paninugdang mga kamatuoran nga anaa niining “sagradong mga sinulat”? Tagda ang mosunod nga mga pananglitan.

Adunay usa ka Labing Gamhanang Diyos ug Maglalalang nga naghimo sa tanang butang. (Genesis 1:1) Kita naglungtad lamang ‘tungod kay ang Diyos naglalang sa tanang butang’ ug naghatag kanato ug kinabuhi. (Pinadayag 4:11) Mao nga siya lamang ang takos natong simbahon. Ang Maglalalang mao ang kinalabwang Tuboran sa tanang kalamdagan. (Salmo 36:9; Isaias 30:20, 21; 48:17, 18) Siya adunay personal nga ngalan ug gusto niyang gamiton nato kana. (Exodus 3:15) Ang maong ngalan, nga gisulat sa Hebreohanong mga titik ug gihawasan sa mga titik nga YHWH, makita ug mga 7,000 ka beses diha sa Bibliya. Latas sa katuigan, kini gigamit na diha sa Cebuanong pinulongan sa pormang “Jehova.”—Salmo 83:18.

Si Jehova naglalang sa mga lalaki ug babaye aron mabuhi sa walay kataposan sa Paraisonhong kahimtang dinhi mismo sa yuta. Iyang gigasahan ang mga tawo ug espirituwal nga mga hiyas nga susama sa iyaha. Siya naghatag kanila ug kinaiyanhong mga katakos ug abilidad nga magamit nila aron magkalipay sa dumalayon, makapatagbaw nga tawhanong kinabuhi sa yuta. (Genesis 1:26-28) Wala niya lalanga ang yuta aron mahimong sulayanan sa mga tawo—usa ka dapit aron andamon ang mga tawo sa espirituhanong kinabuhi sa langit, nga morag didto lamang nila matagamtam ang suod nga relasyon uban sa Diyos.

Wala gayoy daotan sa tawhanong linalang sa Diyos. Ang daotan mitungha lamang sa dihang ang pipila sa mga linalang sa Diyos—tawhanon ug espirituhanon—sayop nga naggamit sa ilang kagawasan sa pagpili ug mirebelde batok sa Diyos. (Deuteronomio 32:5) Giilog sa atong unang mga ginikanan ang katungod sa paghukom kon unsay maayo ug daotan. (Genesis 2:17; 3:1-5) Kana misangpot sa kamatayon sa tawhanong pamilya. (Genesis 3:19; Roma 5:12) Sa paghusay sa mga isyu nga gipatungha sa maong rebelyon, si Jehova nakahukom nga temporaryong tugotan nga magpadayon ang pagkadaotan. Apan ang iyang katuyoan alang sa yuta ug sa tawhanong pamilya wala mausab. (Isaias 45:18) Ang mga tawo sa dili madugay mabuhi sa walay kataposan sa Paraisonhong mga kahimtang diha sa nahinloan nga yuta.—Mateo 6:10; Pinadayag 21:1-5.

Si Jesu-Kristo dili mao ang Labing Gamhanang Diyos, kondili Anak sa Diyos. Si Jesu-Kristo mismo nagtudlo sa iyang mga sumusunod sa pag-ampo: “Amahan namo nga anaa sa mga langit, pagabalaanon unta ang imong ngalan.” (Mateo 6:9) Siya wala gayod mangangkon nga katupong sa Diyos. Hinunoa, siya nag-ingon: “Ang Amahan labaw pa kay kanako.”—Juan 14:28.

Si Jesus adunay hinungdanong bahin sa katumanan sa katuyoan sa Diyos. Ang Diyos nagpadala kaniya “ingon nga kahayag sa kalibotan, aron nga  ang matag usa nga magbutang ug pagtuo [kaniya] dili magpabilin sa kangitngit.” (Juan 12:46) Sumala pa ni apostol Pedro, “walay kaluwasan diha kang bisan kinsa pang lain.” (Buhat 4:12) Tinuod kini tungod kay ang atong kaluwasan nagdepende sa bililhong dugo ni Kristo. (1 Pedro 1:18, 19) Gihatag ni Jesu-Kristo ang iyang kinabuhi ingong halad lukat sa pagtubos sa mga tawo gikan sa sala nga napanunod sa tawhanong pamilya gikan sa atong unang mga ginikanan, si Adan ug Eva. (Mateo 20:28; 1 Timoteo 2:6) Dugang pa, gigamit sa Diyos si Jesus sa pagpadayag sa Iyang kabubut-on ug katuyoan.—Juan 8:12, 32, 46, 47; 14:6; Buhat 26:23.

Ang Diyos nagtukod ug usa ka langitnong Gingharian, o kagamhanan, nga naglangkob kang Jesu-Kristo ug niadtong gipili gikan sa katawhan. Kini nga tema balik-balik nga makita sa tibuok Bibliya. Gipiyal sa Diyos sa maong kagamhanan ang buluhaton sa pagtino nga matuman ang iyang kabubut-on dinhi sa yuta maingon man sa langit. (Mateo 6:10) Dili bahin sa orihinal nga katuyoan sa Diyos nga adunay mga tawo nga moadto sa langit. Ang ilang puy-anan mao ang yuta. Apan human makasala ang tawo, ang Diyos naghimog bag-ong kahikayan. Siya mipilig mga tawo ‘gikan sa matag tribo ug pinulongan ug katawhan ug nasod aron magamando ingong mga hari’ uban kang Kristo sa langitnong kagamhanan. (Pinadayag 5:9, 10) Ang maong Ginghariang kagamhanan hapit nang ‘magdugmok ug magtapos’ sa tanang matang sa tawhanong pagmando, nga nagdalag grabeng kagul-anan ug kasakitan sa tawhanong pamilya.—Daniel 2:44.

Ang kalag mamatay. Kining paninugdang kamatuoran sa Bibliya nagpatin-aw gayod bahin sa tawo ug sa iyang paglaom sa umaabot. Kini nagwagtang usab sa sayop nga pagsabot ug bakak nga impormasyon bahin sa kahimtang sa mga patay nga nakapalibog sa mga tawo.

Ang unang basahon sa Bibliya nagtug-an kanato: “Giumol ni Jehova nga Diyos ang tawo gikan sa abog sa yuta ug gihuypan ang mga buho sa iyang ilong sa gininhawa sa kinabuhi, ug ang tawo nahimong buhing kalag.” (Genesis 2:7) Nasabtan ba nimo kon unsay kahulogan niana? Ang kalag dili samag usa ka anino nga butang nga mabuhi sulod sa lawas sa tawo. Ang tawo walay kalag. Siya mismo maoy kalag—usa ka kombinasyon sa mga elemento nga makita diha sa “abog sa yuta” ug sa puwersa sa kinabuhi nga gikan sa Diyos. Ang kalag dili imortal. Sa dihang ang tawo mamatay, ang kalag mamatay.—Genesis 3:19; Ecclesiastes 9:5, 10.

Kadtong nangamatay mabuhi pag-usab pinaagi sa pagkabanhaw. Sa dihang taposon na ang pagkadaotan nga temporaryong gitugotan sa Diyos, ‘ang tanan nga anaa sa handomanang mga lubnganan makadungog sa tingog ni Jesus ug manggula, ang mga nagbuhat ug maayong mga butang ngadto sa pagkabanhaw sa kinabuhi, ang mga nagbuhat ug mangil-ad nga mga butang ngadto sa pagkabanhaw sa paghukom.’ (Juan 5:28, 29; Buhat 24:15) Pinaagi sa pagkabanhaw, ang mga tawo mahibalik unya sa kinabuhi diha sa usa ka paraisong yuta, sa  matang sa kinabuhi nga sa sinugdan maoy katuyoan sa Diyos alang sa iyang tawhanong pamilya.

Maampingong Susiha ang Kasulatan Adlaw-adlaw

Nakita mo ba kon sa unsang paagi ang kahibalo sa maong paninugdang mga kamatuoran makatabang kanimo? Niining kritikal, gubot kaayong panahon, ang maong kahibalo makapanalipod kanimo batok sa “bakak nga gitawag ug ‘kahibalo’” nga gipakaylap ni Satanas nga Yawa. Siya nagtakoban ingong “manulonda sa kahayag,” ug ang iyang mga ahente nagpakaaron-ingnong “mga ministro sa pagkamatarong.” (1 Timoteo 6:20; 2 Corinto 11:13-15) Ang tukmang kahibalo sa Bibliya makapanalipod kanimo batok sa bakak nga kalamdagan nga gipasukad sa mga pilosopiya sa ‘mga maalamon ug mga makinaadmanon’ sa kalibotan, nga “nagsalikway sa pulong mismo ni Jehova.”—Mateo 11:25; Jeremias 8:9.

Tungod kay daghan kaayo ang malimbongong mga pagtulon-an ug mga pilosopiya sa iyang adlaw, si apostol Juan nagpasidaan sa unang-siglong mga Kristohanon: “Ayaw ninyo tuohi ang matag inspiradong pahayag.” Siya miingon: “Sulayi ang inspiradong mga pahayag aron masuta kon kini nagagikan ba gayod sa Diyos.” (1 Juan 4:1) Hunahunaa kining ilustrasyona. Kon ikaw makadawat ug mensahe nga mahimong makaapektar pag-ayo sa imong kinabuhi, motuo ka ba dayon niini tungod lang kay sa tan-aw nimo kini naggikan sa kasaligang tinubdan? Siyempre dili. Imong tinoon gayod una ang tinubdan niini ug susihon ang mga mensahe niini sa dili ka pa mohimog aksiyon.

Pinaagi sa pagtaganag inspiradong sinulat nga talaan nga naundan sa paninugdang mga kamatuoran, gipaposible sa Diyos nga mabuhat nimo kana—sa ‘pagtino’ nga ang giya nga mga suga nga imong gisunod maoy tinuod. (1 Tesalonica 5:21) Ang hamilig-hunahuna nga mga tawo sa unang siglo gidayeg tungod sa ‘maampingong pagsusi sa Kasulatan sa adlaw-adlaw’ aron sa pagtino nga ang ilang nakat-onan mao gayod ang kamatuoran. (Buhat 17:11) Ikaw makahimo usab niana. Tugoti nga ang Bibliya, sama sa “usa ka lampara nga nagadan-ag sa usa ka dapit nga mangitngit,” maggiya kanimo ngadto sa luwas nga dapit. (2 Pedro 1:19-21) Kon imo kanang buhaton, “imong makaplagan ang mismong kahibalo sa Diyos,” nga nagdalag tinuod nga kalamdagan.—Proverbio 2:5.

[Footnote]

[Hulagway sa panid 4]

Ang Pulong sa Diyos maoy sama sa usa ka lampara

[Hulagway sa panid 5]

Kinsay ngalan sa Diyos?

[Hulagway sa panid 5]

Unsay kaugmaon sa tawo?

[Hulagway sa panid 6]

Si Jesus ba Labing Gamhanang Diyos?

[Hulagway sa panid 6]

Hain ang mga patay?

[Hulagway sa panid 7]

Ang pagbanhaw sa mga patay maoy usa sa paninugdang mga kamatuoran nga gitudlo sa Bibliya