Sila Gipanganak Ingong mga Membro sa Piniling Nasod sa Diyos

“Ikaw mao ang gipili ni Jehova nga imong Diyos nga mahimong iyang katawhan.”—DEUTERONOMIO 7:6.

1, 2. Unsang gamhanang mga buhat ang gihimo ni Jehova alang sa iyang katawhan, ug unsang relasyon uban sa Diyos ang gisudlan sa mga Israelinhon?

 SA 1513 W.K.P., gipahigayon ni Jehova nga ang iyang mga alagad sa yuta makabaton ug bag-ong relasyon uban kaniya. Nianang tuiga, iyang gipakaulawan ang usa ka gahom sa kalibotan ug giluwas ang mga Israelinhon gikan sa pagkaulipon. Sa pagbuhat niana, siya nahimong ilang Manluluwas ug Tag-iya. Sa wala pa niya luwasa sila, giingnan sa Diyos si Moises: “Sultihi ang mga anak sa Israel, ‘Ako si Jehova, ug ako tinong magpagawas kaninyo gikan sa ilalom sa mga pabug-at sa mga Ehiptohanon ug magluwas kaninyo gikan sa ilang pag-ulipon, ug bawion ko gayod kamo pinaagi sa tinuy-od nga bukton ug sa dagkong mga paghukom. Ug ako tinong magdala kaninyo ngari kanako ingong usa ka katawhan, ug ako gayod mahimong inyong Diyos.’”—Exodo 6:6, 7; 15:1-7, 11.

² Wala madugay human sa ilang Paggula sa Ehipto, ang mga Israelinhon misulod sa usa ka pakigsaad uban sa ilang Diyos, si Jehova. Inay kay makiglabot sa mga indibiduwal, pamilya, o mga banay, sukad niadto si Jehova may organisado nang katawhan, usa ka nasod, dinhi sa yuta. (Exodo 19:5, 6; 24:7) Iyang gihatagan ang iyang katawhan ug mga balaod nga naggiya sa ilang adlaw-adlaw nga kinabuhi ug, labawng hinungdanon, sa ilang pagsimba. Giingnan sila ni Moises: “Unsa bang nasora nga dako nga may mga diyos duol niini nga ingon ka duol ni Jehova nga atong Diyos sa tanan natong pagsangpit kaniya? Ug unsa bang nasora nga dako nga may matarong nga mga regulasyon ug hudisyal nga mga hukom nga sama niining tibuok balaod nga akong gibutang sa inyong atubangan niining adlawa?”—Deuteronomio 4:7, 8.

Gipanganak Ingong Membro sa Usa ka Nasod sa mga Saksi

3, 4. Unsa ang usa ka hinungdanong rason sa paglungtad sa Israel ingong nasod?

³ Kasiglohan sa ulahi, gipahinumdoman ni Jehova ang mga Israelinhon, pinaagi sa iyang manalagnang si Isaias, sa usa ka hinungdanong rason sa ilang paglungtad ingong nasod. Si Isaias miingon: “Mao kini ang giingon ni Jehova, ang imong Maglalalang, Oh Jacob, ug ang imong Mag-uumol, Oh Israel: ‘Ayaw kahadlok, kay ako naglukat kanimo. Ako nagtawag kanimo pinaagi sa imong ngalan. Ikaw akoa. Kay ako mao si Jehova nga imong Diyos, ang Balaang Usa sa Israel nga imong Manluluwas. . . . Dad-a ang akong mga anak nga lalaki gikan sa halayo, ug ang akong mga anak nga babaye gikan sa kinatumyan sa yuta, ang matag usa nga gitawag pinaagi sa akong ngalan ug nga akong gilalang alang sa akong kaugalingong himaya, nga akong giumol, oo, nga akong gibuhat. Kamo mao ang akong mga saksi,’ mao ang giingon ni Jehova, ‘ang akong alagad nga akong gipili,  . . . ang katawhan nga akong giumol alang sa akong kaugalingon, aron ilang isugilon ang akong kadayeganan.’”—Isaias 43:1, 3, 6, 7, 10, 21.

⁴ Ingong katawhan nga gitawag sa ngalan ni Jehova, ang mga Israelinhon magsilbing mga saksi sa iyang pagkasoberano atubangan sa mga nasod. Sila mahimong katawhan nga ‘gilalang alang sa himaya ni Jehova.’ Ilang ‘isugilon ang kadayeganan ni Jehova,’ iasoy ang iyang kahibulongang mga buhat sa pagluwas ug sa ingon maghimaya sa iyang balaang ngalan. Sa laktod, sila mahimong usa ka nasod sa mga saksi alang kang Jehova.

5. Sa unsang paagi ang Israel usa ka napahinungod nga nasod?

⁵ Sa ika-11ng siglo W.K.P., gipaila ni Haring Solomon nga gihimo ni Jehova ang Israel nga usa ka nahilain nga nasod. Sa pag-ampo ngadto kang Jehova, siya miingon: “Imong gilain sila ingong imong panulondon gikan sa tanang mga katawhan sa yuta.” (1 Hari 8:53) Ang tagsa-tagsa ka Israelinhon may linain usab nga relasyon kang Jehova. Una pa niana, giingnan sila ni Moises: “Mga anak kamo ni Jehova nga inyong Diyos. . . . Kay ikaw usa ka katawhan nga balaan alang kang Jehova nga imong Diyos.” (Deuteronomio 14:1, 2) Busa, ang batan-ong mga Israelinhon dili na kinahanglang magpahinungod sa ilang kinabuhi kang Jehova. Sila gipanganak ingong mga membro sa napahinungod nga katawhan sa Diyos. (Salmo 79:13; 95:7) Ang matag bag-ong kaliwatan gitudloan sa mga balaod ni Jehova ug obligado nga motuman niana tungod sa pakigsaad nga nagbugkos sa Israel ngadto kang Jehova.—Deuteronomio 11:18, 19.

May Kagawasan sa Pagpili

6. Unsang pagpili ang kinahanglang himoon sa tagsa-tagsa ka Israelinhon?

⁶ Bisan tuod ang mga Israelinhon gipanganak ingong mga membro sa usa ka napahinungod nga nasod, ang matag indibiduwal kinahanglang mohimog personal nga desisyon sa pag-alagad sa Diyos. Sa wala pa sila mosulod sa Yutang Saad, sila giingnan ni Moises: “Himoon ko ang mga langit ug ang yuta ingong mga saksi batok kaninyo niining adlawa, nga gibutang ko ang kinabuhi ug ang kamatayon sa imong atubangan, ang panalangin ug ang maldisyon; ug kinahanglan nga pilion mo ang kinabuhi aron ikaw magpadayong buhi, ikaw ug ang imong kaliwat, pinaagi sa paghigugma kang Jehova nga imong Diyos, pinaagi sa pagpamati sa iyang tingog ug sa pag-unong kaniya; kay siya mao ang imong kinabuhi ug ang gitas-on sa imong mga adlaw, aron makapuyo ka ibabaw sa yuta nga gipanumpa ni Jehova sa imong mga katigulangan, kang Abraham, Isaac ug Jacob nga ihatag kanila.” (Deuteronomio 30:19, 20) Busa, ang tagsa-tagsa ka Israelinhon kinahanglang mopili sa paghigugma kang Jehova, sa pagpamati sa iyang tingog, ug sa pag-unong kaniya. Sanglit ang mga Israelinhon may kagawasan sa pagpili, kinahanglang dawaton nila ang mga sangpotanan sa ilang pagpili.—Deuteronomio 30:16-18.

7. Unsay nahitabo human sa kamatayon sa kaliwatan ni Josue?

⁷ Ang panahon sa mga Maghuhukom klarong nag-ilustrar sa mga sangpotanan sa pagkamatinumanon ug pagkadili-matinumanon. Sa wala pa magsugod ang maong panahon, ang mga Israelinhon misunod sa maayong panig-ingnan ni Josue ug sila gipanalanginan. “Ang katawhan nagpadayon sa pag-alagad kang Jehova sa tanang adlaw ni Josue ug sa tanang adlaw sa mga ansiyano kansang mga adlaw milugway pa human kang Josue ug nga nakakita sa tanang dagkong buhat ni Jehova nga iyang gibuhat alang sa Israel.” Apan, paglabay sa pipila ka panahon human sa kamatayon ni Josue, “may laing kaliwatan nga mitungha sunod kanila nga wala makaila kang Jehova o sa buhat nga gibuhat niya alang sa Israel. Ug ang mga anak sa Israel nagbuhat kon unsay daotan sa mga mata ni Jehova.” (Maghuhukom 2:7, 10, 11) Dayag nga ang batabata pa, walay-kasinatian nga kaliwatan wala magpabili sa ilang panulondon ingong mga membro sa usa ka napahinungod nga katawhan, nga alang kanila ang ilang Diyos, si Jehova, naghimo ug daghang gamhanang mga buhat sa nangagi.—Salmo 78:3-7, 10, 11.

Pagkab-ot sa mga Kinahanglanon sa Ilang Pagpahinungod

8, 9. (a) Unsang kahikayan ang nagtugot sa mga Israelinhon sa pagpasundayag sa ilang pagpahinungod kang Jehova? (b) Unsay nabatonan niadtong naghimog kinabubut-ong mga halad?

⁸ Gihatagan ni Jehova ang iyang katawhan ug mga kahigayonan nga makab-ot ang mga kinahanglanon  sa ilang pagpahinungod ingong nasod. Pananglitan, ang iyang Balaod naglatid ug usa ka sistema sa mga paghalad nga ang uban niana obligado nilang buhaton, samtang ang uban kinabubut-on nilang buhaton. (Hebreohanon 8:3) Ang maong mga halad naglakip sa mga halad-nga-sinunog, mga halad-nga-lugas, ug sa mga halad-sa-panag-ambit nga pulos kinabubut-ong buhaton—mga gasa nga gitanyag ngadto kang Jehova aron mabatonan ang iyang pag-uyon ug ipahayag ang pagpasalamat.—Levitico 7:11-13.

⁹ Ang maong kinabubut-ong mga halad nakapahimuot kang Jehova. Ang halad-nga-sinunog ug ang halad-nga-lugas giisip ingong “makapahupay nga alimyon alang kang Jehova.” (Levitico 1:9; 2:2) Sa halad-sa-panag-ambit, ang dugo ug tambok sa mananap ihalad ngadto kang Jehova, samtang ang pipila ka parte sa karne kaonon sa mga saserdote ug sa naghalad. Busa usa kadto ka simbolikong pagpangaon nga nagkahulogan ug malinawong relasyon uban kang Jehova. Ang Balaod nag-ingon: “Karon kon maghalad kamo ug usa ka halad-sa-panag-ambit alang kang Jehova, igahalad ninyo kini aron kamo makabaton ug pag-uyon.” (Levitico 19:5) Bisan tuod ang tanang Israelinhon napahinungod na kang Jehova sa dihang gipanganak, kadtong naghimo sa ilang pagpahinungod nga makahuloganon pinaagi sa paghimog kinabubut-ong mga halad ‘nakabaton ug pag-uyon’ ug dagayang gipanalanginan.—Malaquias 3:10.

10. Sa unsang paagi gipahayag ni Jehova ang iyang kasuko sa mga adlaw ni Isaias ug Malaquias?

¹⁰ Apan, subsob nga ang napahinungod nga nasod sa Israel wala magmatinumanon kang Jehova. Pinaagi sa iyang manalagnang si Isaias, si Jehova miingon kanila: “Wala nimo dad-a kanako ang mga karnero sa tibuok nimong mga halad-nga-sinunog, ug pinaagi sa imong mga halad wala mo ako himayaa. Wala ako magpugos kanimo sa pag-alagad kanako pinaagi sa gasa.” (Isaias 43:23) Dugang pa, ang mga halad nga dili kinabubut-on ug dili tinukmod sa gugma walay bili sa mga mata ni Jehova. Pananglitan, tulo ka siglo human kang Isaias, sa mga adlaw ni manalagnang Malaquias, ang mga Israelinhon naghalad ug mga mananap nga depektoso. Busa, giingnan sila ni Malaquias: “‘Ako wala mahimuot kaninyo,’ miingon si Jehova sa mga panon, ‘ug ako wala malipay sa halad nga gasa gikan sa inyong kamot.’ . . . ‘Inyong gidala ang sinakmit, ug ang piang, ug ang masakiton; oo, inyong gidala kini ingong gasa. Ikalipay ko ba  kini gikan sa inyong kamot?’ miingon si Jehova.”—Malaquias 1:10, 13; Amos 5:22.

Gisalikway Ingong Napahinungod nga Nasod

11. Unsang kahigayonan ang gihatag ngadto sa Israel?

¹¹ Sa dihang ang mga Israelinhon nahimong nasod nga napahinungod kang Jehova, gisaaran niya sila: “Kon kamo hugot nga magasugot sa akong tingog ug magatuman gayod sa akong pakigsaad, nan kamo tinong mahimong akong linaing katigayonan gikan sa tanang ubang mga katawhan, tungod kay ang tibuok yuta akoa man. Ug kamo mahimong usa ka gingharian sa mga saserdote ug usa ka balaan nga nasod alang kanako.” (Exodo 19:5, 6) Ang gisaad nga Mesiyas motungha sa ilang taliwala ug maghatag kanila sa unang kahigayonan nga mahimong mga membro sa Ginghariang kagamhanan sa Diyos. (Genesis 22:17, 18; 49:10; 2 Samuel 7:12, 16; Lucas 1:31-33; Roma 9:4, 5) Apan ang kinabag-an sa nasod sa Israel wala magkinabuhi sumala sa ilang pagpahinungod. (Mateo 22:14) Ilang gisalikway ang Mesiyas ug sa ngadtongadto nagpatay kaniya.—Buhat 7:51-53.

12. Unsang mga pulong ni Jesus ang nagpakita nga ang Israel gisalikway ingong usa ka napahinungod nga nasod ni Jehova?

¹² Pipila ka adlaw una pa sa iyang kamatayon, giingnan ni Jesus ang Hudiyong relihiyosong mga lider: “Wala ba gayod kamo makabasa sa Kasulatan, ‘Ang bato nga gisalikway sa mga magtutukod mao ang nahimong pangulong bato nga pamag-ang. Kini naggikan kang Jehova, ug kahibulongan kini sa atong mga mata’? Mao nga ako magaingon kaninyo, Ang gingharian sa Diyos pagakuhaon gikan kaninyo ug igahatag ngadto sa usa ka nasod nga magpatunghag mga bunga niini.” (Mateo 21:42, 43) Sa pagpakita nga gisalikway sila ni Jehova ingong usa ka nasod nga napahinungod Kaniya, si Jesus miingon: “Jerusalem, Jerusalem, ang nagapatay sa mga manalagna ug ang nagabato niadtong mga gipadala kaniya,—pagkasubsob nga buot kong tigomon ang imong mga anak, sa paagi nga ang usa ka himungaan magatigom sa iyang mga piso ilalom sa iyang mga pako! Apan dili kamo buot niini. Tan-awa! Ang inyong balay mabiniyaan kaninyo.”—Mateo 23:37, 38.

Usa ka Bag-ong Napahinungod nga Nasod

13. Unsang matagnaong mga pulong ang gisulti ni Jehova sa mga adlaw ni Jeremias?

¹³ Sa panahon ni manalagnang Jeremias, si Jehova nagtagna ug usa ka bag-ong butang maylabot sa iyang katawhan. Atong mabasa: “‘Tan-awa! Moabot ang mga adlaw,’ mao ang giingon ni Jehova, ‘ug pagahimoon ko uban sa balay sa Israel ug uban sa balay sa Juda ang usa ka bag-ong pakigsaad; dili sama sa pakigsaad nga akong gihimo uban sa ilang mga katigulangan sa adlaw sa akong paggunit sa ilang kamot aron pagawason sila gikan sa yuta sa Ehipto, “nga ang maong pakigsaad nako ilang gilapas, bisan tuod ako bana nga tag-iya nila,” mao ang giingon ni Jehova.’ ‘Kay mao kini ang pakigsaad nga akong himoon uban sa balay sa Israel human niadtong mga adlawa,’ mao ang giingon ni Jehova. ‘Ibutang ko ang akong balaod sa sulod nila, ug isulat ko kini sa ilang kasingkasing. Ug ako mahimong ilang Diyos, ug sila mahimong akong katawhan.’”—Jeremias 31:31-33.

14. Kanus-a ug pinasukad sa unsa nga ang bag-ong napahinungod nga nasod ni Jehova milungtad? Hubita kanang bag-ong nasod.

¹⁴ Ang pundasyon niining bag-ong pakigsaad gipahiluna sa dihang si Jesus namatay ug sa ulahi nagpresentar sa bili sa iyang giula nga dugo ngadto sa iyang Amahan, sa 33 K.P. (Lucas 22:20; Hebreohanon 9:15, 24-26) Apan, pinaagi sa pagbubo sa balaang espiritu sa Pentekostes 33 K.P. ug sa pagkahimugso sa bag-ong nasod, “ang Israel sa  Diyos,” ang bag-ong pakigsaad miepekto na. (Galacia 6:16; Roma 2:28, 29; 9:6; 11:25, 26) Nagsulat ngadto sa dinihogang mga Kristohanon, si apostol Pedro miingon: “Kamo maoy ‘usa ka piniling rasa, usa ka harianong pagkasaserdote, usa ka balaang nasod, usa ka katawhan alang sa linaing pagpanag-iya, aron kaylap ninyong ipahayag ang mga kahamili’ sa usa nga nagtawag kaninyo gikan sa kangitngit ngadto sa iyang katingalahang kahayag. Kay kanhi kamo dili usa ka katawhan, apan karon kamo maoy katawhan sa Diyos.” (1 Pedro 2:9, 10) Ang linaing relasyon tali kang Jehova ug sa unodnong Israel natapos na. Sa 33 K.P., ang pabor ni Jehova gibalhin na gikan sa yutan-ong Israel ngadto sa espirituwal nga Israel, ang Kristohanong kongregasyon, ‘usa ka nasod nga nagpatunghag mga bunga’ sa Mesiyanikong Gingharian.—Mateo 21:43.

Indibiduwal nga Pagpahinungod

15. Sa adlaw sa Pentekostes 33 K.P., unsang bawtismo ang giawhag ni Pedro nga buhaton sa iyang mga mamiminaw?

¹⁵ Human sa Pentekostes 33 K.P., ang matag indibiduwal, Hudiyo o Hentil, kinahanglan nang mohimog personal nga pagpahinungod ngadto sa Diyos ug magpabawtismo “sa ngalan sa Amahan ug sa Anak ug sa balaang espiritu.” a (Mateo 28:19) Sa Pentekostes, giingnan ni apostol Pedro ang madinawatong mga Hudiyo ug mga kinabig: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” (Buhat 2:38) Kinahanglang ipaila sa maong mga Hudiyo ug mga kinabig pinaagi sa ilang pagpabawtismo dili lamang nga gipahinungod na nila ang ilang kinabuhi kang Jehova kondili gidawat na usab nila si Jesus ingong instrumento sa pagpasaylo ni Jehova sa ilang mga sala. Kinahanglang ilhon nila siya ingong Hataas nga Saserdote ni Jehova ug ingong ilang Lider, ang Ulo sa Kristohanong kongregasyon.—Colosas 1:13, 14, 18.

16. Sa adlaw ni Pablo, sa unsang paagi ang mga tawong mahiligon sa pagkamatarong—mga Hudiyo ug mga Hentil—nahimong bahin sa espirituwal nga Israel?

¹⁶ Katuigan sa ulahi, si apostol Pablo nag-ingon: “Ngadto sa mga atua sa Damasco ug ngadto kanilang atua sa Jerusalem, ug sa tibuok yuta sa Judea, ug ngadto sa kanasoran gidala ko ang mensahe nga sila kinahanglang maghinulsol ug moliso ngadto sa Diyos pinaagi sa pagbuhat ug mga buhat nga nahiangay sa paghinulsol.” (Buhat 26:20) Human makombinsir ang mga tawo—mga Hudiyo ug mga Hentil—nga si Jesus mao ang Kristo, ang Mesiyas, gitabangan sila ni Pablo nga makadangat sa pagpahinungod ug bawtismo. (Buhat 16:14, 15, 31-33; 17:3, 4; 18:8) Pinaagi sa pagliso ngadto sa Diyos, kadtong bag-ong mga tinun-an nahimong mga membro sa espirituwal nga Israel.

17. Unsang buluhatong pagpanimbre ang hapit nang matapos, ug unsang laing buluhaton ang tulin nga nagapadayon?

¹⁷ Karon, hapit nang matapos ang pagpanimbre sa nahibilin sa espirituwal nga mga Israelinhon. Sa dihang kini matapos na, ang “upat ka manulonda” nga nagpugong sa mga hangin sa kalaglagan sa “dakong kasakitan” tugotan na unya sa pagbuhi niana. Sa kasamtangan, ang pagtigom sa “dakong panon,” kinsa naglaom nga mabuhi sa yuta sa walay kataposan, tulin nga nagapadayon. Kining “ubang mga karnero” kinabubut-ong mipili sa pagpasundayag ug pagtuo sa “dugo sa Kordero” ug sa pagpabawtismo ingong simbolo sa ilang pagpahinungod kang Jehova. (Pinadayag 7:1-4, 9-15; 22:17; Juan 10:16; Mateo 28:19, 20) Nalakip kanila ang daghang batan-on nga gimatuto sa Kristohanong mga ginikanan. Kon ikaw usa ka batan-on nga sama niana, maikag ka sa pagbasa sa sunod nga artikulo.

[Footnote]

Agig Pagsubli

• Nganong ang batan-ong mga Israelinhon dili kinahanglang mohimog personal nga pagpahinungod kang Jehova?

• Sa unsang paagi ikapasundayag sa mga Israelinhon nga sila nagkinabuhi sumala sa ilang pagpahinungod?

• Nganong gisalikway ni Jehova ang Israel ingong iyang napahinungod nga nasod, ug sa unsang paagi kini giilisan?

• Sukad sa Pentekostes 33 K.P., unsay kinahanglang buhaton sa mga Hudiyo ug mga Hentil aron mahimong mga membro sa espirituwal nga Israel?

[Mga Pangutana sa Pagtuon]

[Hulagway sa panid 21]

Ang batan-ong mga Israelinhon gipanganak ingong mga membro sa piniling nasod sa Diyos

[Hulagway sa panid 23]

Ang matag Israelinhon kinahanglang mohimog personal nga desisyon sa pag-alagad sa Diyos

[Hulagway sa panid 23]

Ang kinabubut-ong mga halad naghatag sa mga Israelinhon ug kahigayonan sa pagpasundayag sa ilang gugma kang Jehova

[Hulagway sa panid 25]

Human sa Pentekostes 33 K.P., ang mga sumusunod ni Kristo kinahanglang mohimog personal nga pagpahinungod ngadto sa Diyos ug simbolohan kini pinaagi sa pagpabawtismo