Sila Nalipay sa Pagtuman sa Kabubut-on sa Diyos

SI Jesus naghatag ug sumbanan alang sa tanang Kristohanon pinaagi sa pag-ampo ngadto sa iyang Amahan: “Matuman unta dili ang akong kabubut-on, kondili ang imoha.” (Lucas 22:42) Ang maong mapaubsanong pagpahayag sa pagpasakop kang Jehova gibanaag karon sa milyonmilyong mga alagad sa Diyos. Lakip kanila ang 52 ka estudyante sa ika-120 nga klase sa Watchtower Bible School of Gilead. Sa Marso 11, 2006, ang migraduwar nga mga estudyante nalipay nga nakabaton ug kahigayonan sa pagtuman sa kabubut-on sa Diyos sa lainlaing kayutaan, bisan ilalom sa malisod nga mga kahimtang.

Unsay nagtukmod sa mga migraduwar sa pagtugot nga giyahan ang ilang kinabuhi sa kabubut-on ni Jehova? Si Chris ug Leslie, usa ka magtiayon nga giasayn sa pag-alagad ingong mga misyonaryo sa Bolivia, nag-ingon: “Kay gidumilian na namo ang among kaugalingon, kami andam na sa pagbuhat sa bisan unsang kahikayan sa organisasyon ni Jehova.” (Marcos 8:34) Si Jason ug Chere, nga giasayn sa Albania, nag-ingon usab: “Lisod ang matag asaynment nga among nadawat gikan sa organisasyon ni Jehova. Apan, napamatud-an namo nga takos si Jehova sa among bug-os nga pagsalig.”

Gidasig nga Magpasakop sa Kabubut-on ni Jehova

Si George Smith, nga membro sa pamilyang Bethel nga nag-alagad sa Art Department, nagbukas sa programa sa graduwasyon pinaagi sa pag-ampo. Si Stephen Lett, nga membro sa Nagamandong Lawas sa mga Saksi ni Jehova ug tsirman sa programa sa graduwasyon, nag-abiabi sa tanang mitambong. Ang mga bisita gikan sa 23 ka kayutaan mibiyahe paingon sa Watchtower Educational Center sa Patterson, New York, aron sa pagtambong niining malipayong okasyon. Giingnan ni Brader Lett ang migraduwar nga mga estudyante nga sila maghimog “usa ka butang nga gamhanan kaayo.” Siya naghisgot nga mapukan sa bag-ong mga misyonaryo ang “lig-ong pagkatarok nga mga butang”—sama sa bakak nga mga doktrina—pinaagi sa gahom sa Kasulatan. (2 Corinto 10:4, 5) Siya mihinapos: “Pagkadakong kalipay nga magamit ni Jehova sa pagpukan sa lig-ong pagkatarok nga mga butang diha sa kasingkasing sa matinud-anong mga tawo sa inyong mga teritoryo!”

Si Harold Jackson, nga membro sa mga kawani sa hedkuwarter, naghisgot sa temang “Pipila ka Butang nga Hinumdoman.” Siya miingon nga dili gayod angay kalimtan sa bag-ong mga misyonaryo ang ‘pagpangita pag-una sa gingharian ug sa pagkamatarong sa Diyos.’ (Mateo 6:33) Kinahanglan nilang hinumdoman nga ang “gugma nagapalig-on” ug maoy dili mapakyas nga yawi sa kalamposan. (1 Corinto 8:1) Siya nagkanayon: “Himoang giya ang gugma sa inyong pagpakiglabot sa uban.”

Sunod, si Geoffrey Jackson, usa ka membro sa Nagamandong Lawas nga nag-alagad ingong misyonaryo sukad sa 1979 hangtod sa 2003, nangutana sa mga graduwado, “Unsay Inyong Kaakohan?” Iyang gipasiugda ang kahinungdanon sa pagbaton ug timbang nga panglantaw sa kaugalingon ug sa ministeryo. Ang mga  Kristohanon may kaakohan nga kuging magtanom ug magbisibis sa binhi sa kamatuoran. Apan, si Jehova ang may responsabilidad sa pagpatubo niini sa espirituwal, tungod kay ang ‘Diyos maoy magpatubo niini.’ (1 Corinto 3:6-9) Si Brader Jackson midugang: “Si Jehova masaligon nga kamo maghupot kanunay ug lig-ong espirituwalidad. Apan unsay inyong kinadak-ang kaakohan? Ang paghigugma kang Jehova ug ang paghigugma sa mga tawo nga inyong alagaran.”

Ang instruktor sa Gilead nga si Lawrence Bowen maoy nagpatin-aw sa temang ‘Hibaloi Kon Unsaon Ninyo Paggawi.’ Siya nagpahinumdom sa mga estudyante nga si Jehova milagrosong naggiya ug nanalipod sa mga Israelinhon didto sa kamingawan. (Exodo 13:21, 22) Siya naggiya ug nanalipod kanato karon, sa usa ka bahin pinaagi sa kongregasyon sa dinihogang mga Kristohanon, nga “usa ka haligi ug tukod sa kamatuoran.” (1 Timoteo 3:14, 15) Ang bag-ong mga misyonaryo magtuboy sa kamatuoran,  nga maoy mogiya ug manalipod sa mga mapainubsanon.

Si Wallace Liverance, laing instruktor sa Gilead, nagtambag sa mga graduwado nga dili kalimtan ang pulong sa Diyos nga anaa sa ilang “luyo.” Ang pulong sa Diyos anaa sa atong luyo sa diwa nga ang Bibliya nakompleto kasiglohan na kanhi. Sama sa usa ka magbalantay nga nanawag diha sa luyo sa panon sa mga karnero, si Jehova anaa sa luyo sa iyang katawhan, nga naghatag kanilag giya pinaagi sa “matinumanon ug maalamong ulipon.” (Isaias 30:21; Mateo 24:45-47) Ang Tunghaan sa Gilead nagtabang sa mga graduwado sa pagpauswag sa ilang pagtamod sa ulipon nga matang. Ang “ulipon” nagtagana pa gani sa Bag-ong Kalibotang Hubad sa Balaang Kasulatan. Ang mamumulong nagdasig sa mga graduwado: “Dad-a kining natagong bahandi sa impormasyon, ug gamita kini sa pagtudlo sa mga tawo.”—Mateo 13:52.

Pagtuman sa Kabubut-on ni Jehova Diha sa Ministeryo sa Kanataran

Sa temang “Maikagon sa Pagmantala sa Maayong Balita,” ang instruktor sa Gilead nga si Mark Noumair nagpasiugda sa pipila ka kasinatian sa mga graduwado diha sa pagsangyaw samtang nagtungha sa Tunghaan sa Gilead. (Roma 1:15) Gipadayag sa maong mga interbiyo nga ang mga graduwado nagpakita gayod ug talagsaong kaikag sa pagsangyaw sa tanang higayon.

Ang mga graduwado nakadawat ug dugang pagdasig pinaagi sa interbiyo nga gidumala ni Kenneth Flodin uban sa tulo ka nagapanawng mga magtatan-aw nga nag-alagad na karon sa Tinipong Bansa. Si Richard Keller ug si Alejandro Lacayo, kinsa nag-alagad kaniadto sa Amerika del Sur ug Sentral Amerika, nagpatin-aw kon giunsa nila pagsagubang ang lainlaing pagsulay ug nag-asoy sa mga panalangin nga ilang nadawat samtang nag-alagad ingong mga misyonaryo. Si Moacir Felisbino nahinumdom sa pagbansay nga iyang nadawat samtang suod nga nakigtambayayong uban sa mga misyonaryo sa Brazil, diin siya nagdako.

Giinterbiyo ni David Schafer sila si Robert Jones, Woodworth Mills, ug Christopher Slay, mga misyonaryo nga taas nag kasinatian. Ang tulo ka igsoon nag-asoy kon sa unsang paagi sila nakakat-on sa paglihok nga may pagsalig kang Jehova sa dihang nag-atubang ug mga kalisdanan. Ilang gipasaligan ang klase nga ang pagbansay nga nadawat nila gikan sa organisasyon ni Jehova nag-andam pag-ayo kanila alang sa ilang mga asaynment ingong mga misyonaryo. Si Brader Mills nagsumaryo niining paagiha: “Dili ang akademikong bahin sa Gilead ang labawng nakatabang kanako, kondili ang gitudlo kanako sa tunghaan bahin sa pagkamapaubsanon ug gugma.”

Ang membro sa Nagamandong Lawas nga si Guy Pierce maoy naghatag sa pangunang pakigpulong, nga nag-ulohang “Si Jehova Dili Gayod Mapakyas.” Si Adan napakyas, apan nagpasabot ba kana ug kapakyasan sa bahin sa Diyos? Napakyas ba ang Diyos sa paglalang kang Adan nga hingpit, sama sa giingon sa ubang tawo? Wala gayod, kay “ang matuod nga Diyos naghimo sa katawhan nga matul-id.” (Ecclesiastes 7:29) Ang paghupot ni Jesus sa iyang integridad ilalom sa kinalisorang pagsulay dinhi sa yuta nagpamatuod nga “si Adan walay katarongan nga mapakyas,” matod pa sa mamumulong. Ang pagsulay sa pagkamasinugtanon ni Adan didto sa tanaman sa Eden dili sama ka lisod sa pagsulay nga malamposong naatubang ni Jesus. Apan, napakyas si Adan. Bisan pa niana, si Jehova dili gayod mapakyas. Ang iyang katuyoan matuman. (Isaias 55:11) Giingnan ni Brader Pierce ang bag-ong mga misyonaryo: “Kamo adunay pribilehiyo sa pagpasidungog kang Jehova pinaagi sa inyong pagpasundayag sa espiritu sa pagsakripisyo-sa-kaugalingon. Hinaot nga si Jehova magauban sa matag usa kaninyo bisan asa kamo mag-alagad kaniya ingong mga misyonaryo.”

Human basaha ang mga pangomosta gikan sa lainlaing sangang-buhatan sa mga Saksi ni Jehova, ang tsirman nga si Brader Lett nagtunol sa mga graduwado sa ilang mga diploma ug mga asaynment. Si Vernon Wisegarver, nga dugay nang membro sa pamilyang Bethel, ang mihawas sa tanang nanambong sa paniklop nga pag-ampo.

Ang 6,872 nga nanambong mibati nga ang programa sa graduwasyon nakahaling pag-usab sa ilang kasibot sa pagtuman sa kabubut-on sa Diyos. (Salmo 40:8) Ang migraduwar nga si Andrew ug Anna miingon: “Among gipahinungod ang among kinabuhi kang Jehova. Nanaad kami kang Jehova nga buhaton namo ang tanan nga iyang ipabuhat kanamo. Karon si Jehova nagpaadto kanamo sa Cameroon, Aprika.” Sila ug ang kaubang migraduwar nga mga estudyante maikagon sa pagsubay sa usa ka karera nga maghatag kanilag katagbawan. Oo, sila nalipay sa pagtuman sa kabubut-on sa Diyos.

[Kahon sa panid 17]

ESTADISTIKA SA KLASE

Gidaghanon sa mga nasod nga gihawasan: 6

Gidaghanon sa mga nasod nga gipadalhan: 20

Gidaghanon sa mga estudyante: 52

Aberids nga edad: 35.7

Aberids nga gidugayon sa kamatuoran: 18.3

Aberids nga katuigan sa bug-os-panahon nga ministeryo: 14.5

[Hulagway sa panid 18]

Ika-120 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubangan paingon sa likod, ug ang mga ngalan gilista gikan sa wala ngadto sa tuo sa matag laray.

(1) Wright, S.; Suárez, B.; Croisant, B.; Davenport, L. (2) Johnson, A.; Ali, C.; Cady, K.; Guerrero, P.; Ases, A. (3) Ortiz, L.; Lyall, K.; Uzeta, M.; Perez, R.; Backus, K.; Caterina, C. (4) Palmer, B.; Loving, D.; Macdonough, J.; Bostock, D.; Benetatos, L. (5) Jasicki, M.; Sarafianos, E.; Stelter, C.; Vaira, R.; Woon, J.; Prentice, K. (6) Davenport, H.; Croisant, H.; Perez, M.; Vaira, E.; Suárez, A.; Caterina, I.; Wright, C. (7) Cady, K.; Macdonough, J.; Ortiz, M.; Woon, J.; Ali, J.; Ases, M. (8) Sarafianos, G.; Lyall, D.; Uzeta, C.; Stelter, P.; Prentice, G.; Johnson, A.; Benetatos, C. (9) Palmer, J.; Jasicki, W.; Backus, J.; Bostock, S.; Guerrero, J. M.; Loving, S.