“Kinahanglang Among Sugton ang Diyos Ingong Magmamando Inay ang mga Tawo”

‘Ang Among Diyos Makaluwas Kanamo’

ANG okasyon gituyo nga mahimong makapahingangha. Ang usa ka dakong imahen nga bulawan gipatindog sa kapatagan sa Dura, nga lagmit duol sa siyudad sa Babilonya. Ang maong imahen inagurahan panahon sa espesyal nga seremonyas nga tambongan sa dagkong mga opisyales nga gidahom nga moyukbo atubangan sa imahen sa dihang patingogon na ang daghang instrumento sa musika. Gimando ni Haring Nabucodonosor sa Babilonya nga si bisan kinsa nga dili mosimba sa maong imahen mamatay diha sa usa ka init kaayong hudno. Kinsay mangahas sa pagsupak sa maong mando?

Sa katingala sa mga nanan-aw, tulo ka mahinadlokon-sa-Diyos nga mga magsisimba ni Jehova—si Sadrak, Mesak, ug si Abednego—wala moyukbo. Sila nahibalo nga ang pagyukbo niana maoy paglapas sa ilang bug-os nga pagkamahinalaron kang Jehova nga Diyos. (Deuteronomio 5:8-10) Sa dihang gimandoan sila sa pagpatin-aw sa ilang lig-ong baroganan, way kokahadlok nilang giingnan si Nabucodonosor: “Kon mao man kana, ang Diyos nga among ginaalagaran makaluwas kanamo. Gikan sa hudno nga nagdilaab sa kalayo ug gikan sa imong kamot, Oh hari, siya magluwas kanamo. Apan kon dili, angay mong mahibaloan, Oh hari, nga ang imong mga diyos dili mao ang among ginaalagaran, ug ang larawang bulawan nga imong gipatindog dili namo pagasimbahon.”—Daniel 3:17, 18.

Sa dihang ang tulo ka Hebreohanon gitambog sa nagdilaab nga hudno, usa ka milagro lamang ang makaluwas sa ilang kinabuhi. Gipadala sa Diyos ang usa ka manulonda aron panalipdan ang Iyang matinumanong mga alagad. Apan gipalabi na nilang mamatay inay supakon si Jehova. a Ang ilang baroganan maoy susama sa iya sa mga apostoles ni Jesu-Kristo nga kapin sa unom ka siglo sa ulahi miingon atubangan sa hataas nga korte sa mga Hudiyo: “Kinahanglang among sugton ang Diyos ingong magmamando inay ang mga tawo.”—Buhat 5:29.

Hinungdanon Kaayong mga Leksiyon Alang Kanato

Si Sadrak, Mesak, ug Abednego maoy maayong panig-ingnan sa pagtuo, pagkamasinugtanon, ug pagkamaunongon. Ang tulo ka Hebreohanon nagpasundayag ug pagtuo kang Jehova. Ang ilang tanlag nga nabansay sa Kasulatan wala magtugot kanila sa pagpakigbahin sa bisan unsang buhat sa bakak nga pagsimba o sa nasyonalistikanhong kalihokan. Ang modernong-adlaw nga mga Kristohanon susamang nagbutang sa ilang bug-os nga pagsalig sa matuod nga Diyos. Sila gigiyahan sa ilang tanlag nga nabansay sa Bibliya ug midumili sa pagpakigbahin sa mga buhat sa bakak nga pagsimba o mga seremonyas nga nahisupak sa mga balaod ug mga prinsipyo sa Diyos.

Ang tulo ka matinumanong mga Hebreohanon misalig kang Jehova ug midumili sa pagsalikway sa ilang pagkamasinugtanon kaniya baylo sa pagkainila, posisyon, o kadungganan nga gitanyag sa Imperyo sa Babilonya. Ang maong mga batan-on andam nga mag-antos ug mamatay inay daoton ang ilang relasyon uban sa Diyos. Sama kang Moises una kanila, sila “nagpabiling lig-on nga daw nakakita sa Usa nga dili-makita.” (Hebreohanon 11:27) Luwason man sila ni Jehova o dili gikan sa kamatayon, silang tulo determinado sa paghupot sa ilang integridad  kaniya imbes mokompromiso aron sa pagluwas sa ilang mga kinabuhi. Nga lagmit nagtumong sa ilang panig-ingnan, si apostol Pablo naghisgot bahin sa mga matinumanon nga “nagpahunong sa puwersa sa kalayo.” (Hebreohanon 11:34) Ang maong pagtuo ug pagkamasinugtanon gipadayag sa mga alagad ni Jehova samtang sila nag-atubang ug mga pagsulay sa integridad sa atong adlaw.

Sumala sa kasinatian ni Sadrak, Mesak, ug Abednego, kita usab makakat-on nga ang Diyos magaganti sa mga maunongon kaniya. Ang salmista miawit: ‘Si Jehova dili mobiya sa mga maunongon kaniya.’ (Salmo 37:28) Karong panahona, dili kita makadahom nga luwason ni Jehova sa milagrosong paagi, sama sa iyang gihimo sa tulo ka Hebreohanon. Bisan pa niana, kita makasalig nga bisag unsa pang kalisdanan nga atong atubangon, ang atong langitnong Amahan motabang kanato. Ang Diyos mahimong maghanaw sa problema, maghatag kanato ug kusog nga makaagwanta niana, o magbanhaw kanato kon atong huptan ang atong integridad bisan hangtod sa kamatayon. (Salmo 37:10, 11, 29; Juan 5:28, 29) Ang pagtuo, pagkamasinugtanon, ug pagkamaunongon magmadaogon sa matag higayon nga pagasulayan ang atong integridad ug kita mopili sa pagsugot sa Diyos inay sa mga tawo.

[Footnote]

[Kahon/Hulagway sa panid 9]

NAHIBALO KA BA?

• Ang tulo ka Hebreohanon halos nag-30 anyos na ang edad sa dihang giatubang nila kining pagsulay sa integridad.

• Ang hudno dayag nga gipainit kutob sa mahimo.—Daniel 3:19.