‘Likayi ang Pagbagulbol’
‘Likayi ang Pagbagulbol’
“Magpadayon sa pagbuhat sa tanang butang nga walay pagbagulbol.”—FILIPOS 2:14.
1, 2. Unsay gitambag ni apostol Pablo sa mga Kristohanon sa Filipos ug sa Corinto, ug ngano?
SA IYANG inspirado-sa-Diyos nga sulat alang sa Kristohanong kongregasyon sa Filipos sa unang siglo, gipahayag ni apostol Pablo ang daghang pagdayeg. Iyang gidayeg ang iyang mga isigkamagtutuo nianang siyudara tungod sa ilang pagkamahinatagon ug pagkamasiboton, ug iyang gipahayag ang kalipay tungod sa ilang maayong mga buhat. Bisan pa niana, gipahinumdoman sila ni Pablo nga “magpadayon sa pagbuhat sa tanang butang nga walay pagbagulbol.” (Filipos 2:14) Nganong gitambag kadto ni Pablo?
2 Nasayod si Pablo kon unsay sangpotanan sa pagbagulbol. Pipila ka tuig nga miagi, siya nagpahinumdom sa kongregasyon sa Corinto nga peligroso ang pagbagulbol. Gihisgotan ni Pablo nga samtang ang mga Israelinhon didto sa kamingawan, subsob nilang gipukaw ang kasuko ni Jehova. Sa unsang paagi? Pinaagi sa pagpangandoy ug makadaot nga mga butang, pinaagi sa pagsimbag mga idolo ug pagpakighilawas, pinaagi sa pagbutang kang Jehova sa pagsulay, ug pinaagi sa pagbagulbol. Gidasig ni Pablo ang mga taga-Corinto sa pagkakat-on gikan sa maong mga pananglitan. Siya misulat: ‘Ayaw kamo pagkahimong mga bagulbolan, ingon sa pipila kanilang nagbagulbol, aron lamang mangalaglag pinaagi sa tiglaglag.’—1 Corinto 10:6-11.
3. Nganong makapaikag karon ang ulohan bahin sa pagbagulbol?
3 Ingong mga alagad ni Jehova karon, kita nagpadayag sa espiritu nga susama sa iya sa kongregasyon sa Filipos. Kita masiboton alang sa maayong mga buhat, ug kita adunay gugma sa atong taliwala. (Juan 13:34, 35) Hinunoa, tungod sa kadaot nga gipahinabo sa pagbagulbol taliwala sa katawhan sa Diyos sa nangagi, aduna kitay maayong rason sa pagsunod sa tambag: “Magpadayon sa pagbuhat sa tanang butang nga walay pagbagulbol.” Ato unang hisgotan ang mga pananglitan sa pagbagulbol nga gihisgotan sa Kasulatan. Dayon atong hisgotan ang pipila ka butang nga atong mahimo sa pagsanta sa kadaot nga mahitabo karon gumikan sa pagbagulbol.
Daotang Katigoman Nagbagulbol Batok Kang Jehova
4. Sa unsang paagi ang mga Israelinhon nagbagulbol didto sa kamingawan?
4 Ang Hebreohanong pulong nga nagkahulogan nga ‘pagbagulbol o pagreklamo’ gigamit diha sa Bibliya may kalabotan sa mga panghitabo sulod sa 40 ka tuig nga pagpuyo sa Israel sa kamingawan. May mga higayon nga wala matagbaw ang mga Israelinhon sa ilang kahimtang ug kadto gipahayag pinaagi sa pagbagulbol. Pananglitan, pipila lang ka semana human sa ilang pagkaluwas gikan sa pagkaulipon sa Ehipto, “ang tibuok katigoman sa mga anak sa Israel nagbagulbol batok kang Moises ug kang Aaron.” Ang mga Israelinhon nagreklamo bahin sa pagkaon, nga nag-ingon: “Namatay na lang unta kami pinaagi sa kamot ni Jehova didto sa yuta sa Ehipto samtang kami naglingkod tupad sa mga kulon sa karne, samtang nangaon kami sa tinapay hangtod sa pagkatagbaw, tungod kay kamo nagpagawas kanamo nganhi niini nga kamingawan aron kining tibuok nga kongregasyon mamatay sa gutom.”—Exodo 16:1-3.
5. Sa dihang mireklamo ang mga Israelinhon, batok kang kinsa sila tinuod nga nagbagulbol?
5 Sa pagkatinuod, si Jehova nagtagana sa mga kinahanglanon sa mga Israelinhon didto sa kamingawan, nga sa pagkamahigugmaon naghatag kanilag pagkaon ug tubig. Wala gayoy kapeligrohan nga ang katawhan sa Israel mangamatay gumikan sa gutom didto sa kamingawan. Apan, tungod sa espiritu sa pagkadili-matagbawon, ilang gipasobrahan ang ilang kalisdanan ug sila nagbagulbol. Bisag sila nagreklamo batok kang Moises ug kang Aaron, giisip ni Jehova nga ang ilang mga pagreklamo maoy batok Kaniya. Giingnan ni Moises ang mga Israelinhon: “Si Jehova nakadungog sa inyong mga pagbagulbol nga inyong ginabagulbol batok kaniya. Ug unsa ba kami? Ang inyong mga pagbagulbol dili batok kanamo, kondili batok kang Jehova.”—Exodo 16:4-8.
6, 7. Sumala sa gipakita sa Numeros 14:1-3, sa unsang paagi nausab ang tinamdan sa mga Israelinhon?
6 Wala madugay human niadto, ang mga Israelinhon nagbagulbol na usab. Si Moises nagpadalag 12 ka lalaki sa pag-espiya sa Yutang Saad. Ang napulo kanila namalik nga nagdalag daotang balita. Ang resulta? “Ang mga anak sa Israel nagbagulbol batok kang Moises ug kang Aaron, ug ang tibuok katigoman misulti batok kanila: ‘Maayo pa unta ug kita namatay sa yuta sa Ehipto, o namatay kita niining kamingawan! Ug nganong si Jehova nagdala kanato niining yutaa [Canaan] aron mapukan pinaagi sa espada? Ang atong mga asawa ug ang atong mga anak mamahimong mga binihag. Dili ba maayo pa nga kita mamalik sa Ehipto?’”—Numeros 14:1-3.
7 Pagkadako ang kausaban sa tinamdan sa Israel! Sa sinugdan, ilang gipahayag ang ilang pagkamapasalamaton tungod sa ilang pagkagawas gikan sa Ehipto ug pagkaluwas latas sa Pulang Dagat pinaagi sa pag-awit ug mga pagdayeg kang Jehova. (Exodo 15:1-21) Ugaling lang, sa dihang nakasinati silag mga kalisdanan sa kamingawan ug kay nahadlok sa mga Canaanhon, ang pagkamapasalamaton sa katawhan sa Diyos napulihan ug dili-matagbawon nga tinamdan. Imbes magpasalamat sa Diyos tungod sa ilang kagawasan, ilang gibasol siya tungod sa butang nga sa kasayop giisip nila ingong kawalad-on. Busa ang pagbagulbol maoy kapahayagan sa kakulang sa angay nga pagpabili sa mga tagana ni Jehova. Dili katingad-ang siya miingon: “Hangtod kanus-a nga kining daotang katigoman magbagulbol batok kanako?”—Numeros 14:27; 21:5.
Pagbagulbol sa Unang Siglo
8, 9. Paghatag ug mga pananglitan sa pagbagulbol nga natala diha sa Kristohanon Gregong Kasulatan.
8 Ang nahisgotan nang mga pananglitan bahin sa pagbagulbol naglangkit sa mga pundok sa katawhan nga nagpahayag sa dayag sa ilang pagkadili-matagbawon. Apan, sa dihang si Jesu-Kristo didto sa Jerusalem alang sa Pista sa mga Balongbalong sa 32 K.P., ‘dihay daghang paghulungihong bahin kaniya taliwala sa mga panon sa katawhan.’ (Juan 7:12, 13, 32) Lagmit sila naghulungihong bahin kaniya, nga ang pipila nag-ingon nga siya maayong tawo, ang uban nag-ingon nga siya dili-maayong tawo.
9 Sa laing higayon, si Jesus ug ang iyang mga tinun-an maoy mga bisita sa balay ni Levi o Mateo, ang maniningil ug buhis. “Ang mga Pariseo ug ang ilang mga eskriba nagbagulbol ngadto sa iyang mga tinun-an, nga nag-ingon: ‘Ngano man nga makigpangaon ug makig-inom kamo sa mga maniningil ug buhis ug sa mga makasasala?’” (Lucas 5:27-30) Sa ulahi didto sa Galilea, “ang mga Hudiyo nagbagulbol [kang Jesus] tungod kay siya miingon: ‘Ako mao ang tinapay nga nanaog gikan sa langit.’” Bisan ang pipila ka sumusunod ni Jesus nasuko tungod sa iyang gisulti ug sila nagbagulbol.—Juan 6:41, 60, 61.
10, 11. Nganong nagbagulbol ang nagsultig-Grego nga mga Hudiyo, ug unsay makat-onan sa Kristohanong mga ansiyano sa ilang paagi sa pagdumala sa reklamo?
10 Mas maayo ang sangpotanan sa usa ka kaso sa pagbagulbol nga nahitabo pagkahuman gayod sa Pentekostes 33 K.P. Ang daghang bag-ong nakabig nga mga tinun-an nga gikan sa gawas sa Israel giabiabi sa mga isigkamagtutuo sa Judea, apan ang mga suliran mitungha bahin sa pagpakig-ambitay sa mga gitagana. Ang asoy nag-ingon: “Dihay pagbagulbol sa nagsultig-Grego nga mga Hudiyo batok sa nagsultig-Hebreohanon nga mga Hudiyo, tungod kay ang ilang mga babayeng balo nataligam-an man sa adlaw-adlaw nga pagpang-apod-apod.”—Buhat 6:1.
11 Kadtong mga nagbagulbol lahi sa mga Israelinhon sa kamingawan. Ang nagsultig-Grego nga mga Hudiyo wala magpahayag ug pagkadili-matagbawon sa ilang kahimtang sa kinabuhi tungod sa kahakog. Ila rang gipaila ang kapakyasan sa pagtagana sa mga panginahanglan sa pipila ka babayeng balo. Dugang pa, ang mga nagbagulbol wala magsinamok ug wala magpatugbaw sa ilang mga tingog batok kang Jehova. Ilang gipunting ang ilang reklamo ngadto sa mga apostoles, kinsa milihok dayon tungod kay ang reklamo maoy makataronganon. Pagkamaayong panig-ingnan ang gihatag sa mga apostoles alang sa Kristohanong mga ansiyano karon! Kining espirituwal nga mga magbalantay mag-amping nga sila dili ‘magasampong sa ilang mga igdulungog sa pagtuaw sa timawa.’—Proverbio 21:13; Buhat 6:2-6.
Pagbantay sa Makadaot nga Epekto sa Pagbagulbol
12, 13. (a) Iilustrar ang mga epekto sa pagbagulbol. (b) Unsay makatukmod sa usa ka tawo sa pagbagulbol?
12 Ang kadaghanang pananglitan sa Kasulatan nga atong nahisgotan nagpakita nga ang pagbagulbol nakahimog dakong kadaot sa katawhan sa Diyos sa nangagi. Busa, angay natong isipong seryoso ang makadaot nga epekto niini karon. Ang usa ka ilustrasyon makatabang kanato sa pagsabot niini. Ang daghang matang sa metal lagmit gayong tay-an. Kon dili tagdon ang unang mga ilhanan sa taya, ang metal tay-an sa punto nga dili na kini magamit. Ang di-maihap nga mga kotse giabandonar na, dili tungod sa pagkadaot sa makina, kondili tungod kay gitay-an na pag-ayo ang metal mao nga peligroso ang maong mga sakyanan. Sa unsang paagi ikapadapat nato ang maong ilustrasyon diha sa pagbagulbol?
13 Ingon nga ang pipila ka metal lagmit gayong tay-an, ang dili-hingpit nga mga tawo adunay kiling sa pagreklamo. Angay kitang magbantay sa pagmatikod sa ilhanan niini. Ingon nga ang kaumog ug paraton nga hangin kusog makapataya, tungod sa kalisdanan kita lagmit magbagulbol. Ang kapit-os makahimo sa gamayng kapikalan nga usa ka dakong reklamo. Samtang magkadaot ang mga kahimtang sa kataposang mga adlaw niining sistemaha, lagmit modaghan ang posibleng mga hinungdan sa pagreklamo. ( Timoteo 3:1-5) Busa, ang usa ka alagad ni Jehova mahimong mobagulbol batok sa lain. Ang hinungdan mahimong usa lang ka gamayng isyu, sama sa pagkadisgusto tungod sa mga kahuyangan, abilidad, o espesyal nga mga pribilehiyo sa pag-alagad sa usa ka tawo.
14, 15. Nganong angay natong pugngan ang kiling sa pagreklamo?
14 Bisan kon unsay hinungdan sa atong kalagot, kon dili nato pugngan ang atong kiling sa pagreklamo, kana makapasamot sa atong pagkadili-matagbawon ug kana maghimo kanato nga mga bagulbolan. Oo, ang makadaot sa espirituwal nga epekto sa pagbagulbol mahimong bug-os nga magdaot kanato. Sa dihang nagbagulbol ang mga Israelinhon bahin sa kinabuhi sa kamingawan, miabot sila sa punto nga ila pang gibasol si Jehova. (Exodo 16:8) Hinaot nga kana dili gayod mahitabo kanato!
15 Mahimong makunhoran ang pagtaya sa metal kon kana pahirag kontra-taya nga pintal ug pintalan dayon ang mga bahin nga gitay-an. Sa susamang paagi, kon mamatikdan nato sa atong kaugalingon ang kiling sa pagreklamo, kini mahimong mapugngan kon ato kanang iampo ug tul-iron dayon. Sa unsang paagi?
Lantawa ang mga Butang Sumala sa Punto-Debista ni Jehova
16. Sa unsang paagi mapukgo ang kiling sa pagreklamo?
16 Kon kita magbagulbol, kita naghunahuna lamang sa atong kaugalingon ug sa atong mga suliran ug wala magtagad sa mga panalangin nga atong gipahimuslan ingong mga Saksi ni Jehova. Aron mapukgo ang kiling sa pagreklamo, angay natong pahinumdoman ang atong kaugalingon sa maong mga panalangin. Pananglitan, ang matag usa kanato adunay talagsaong pribilehiyo sa pagdala sa personal nga ngalan ni Jehova. (Isaias 43:10) Mahimo natong maugmad ang pagpakigsuod kaniya, ug mahimo kitang makigsulti sa “Tigpatalinghog sa pag-ampo” sa bisan unsang panahon. (Salmo 65:2; Santiago 4:8) Ang atong kinabuhi adunay tinuod nga kahulogan tungod kay atong nasabtan ang isyu bahin sa pagkasoberano sa uniberso ug nahinumdoman nga atong pribilehiyo ang paghupot sa integridad ngadto sa Diyos. (Proverbio 27:11) Kita regular nga makapakigbahin sa pagwali sa maayong balita sa Gingharian. (Mateo 24:14) Pinaagi sa pagtuo sa halad lukat ni Jesu-Kristo, kita makabaton ug hinlo nga tanlag. (Juan 3:16) Kini maoy mga panalangin nga atong gipahimuslan bisan kon unsa pay atong giantos.
17. Nganong angay natong paningkamotan nga lantawon ang mga butang sumala sa punto-debista ni Jehova, bisan pag kita adunay angay nga hinungdan sa pagreklamo?
17 Atong paningkamotan ang paglantaw sa mga butang sumala sa punto-debista ni Jehova, dili lamang ang sa atong kaugalingon. “Ipaila kanako ang imong mga dalan, Oh Jehova; tudloi ako sa imong mga alagianan,” miawit ang salmistang si David. (Salmo 25:4) Kon duna kitay angay nga hinungdan sa pagreklamo, kini mamatikdan ni Jehova. Siya makatul-id dayon sa maong butang. Busa nganong iyang itugot usahay nga ang kalisod magpadayon? Ang hinungdan mahimong aron kita matabangan sa pag-ugmad sa maayong mga hiyas, sama sa pagkamapailobon, pagkamainantoson, pagtuo, ug hataas-nga-pailob.—Santiago 1:2-4.
18, 19. Iilustrar ang posibleng mga epekto sa pag-antos sa mga kalisod nga walay pagreklamo.
18 Ang atong pag-antos sa mga kalisod nga walay pagbagulbol makapauswag sa atong personalidad ug kadtong naniid kanato lagmit makadayeg usab sa atong panggawi. Niadtong 2003, ang usa ka grupo sa mga Saksi ni Jehova mibiyahe sakay sa bus gikan sa Alemanya aron motambong ug kombensiyon sa Hungaria. Ang drayber sa bus dili Saksi, ug siya nag-ukon-ukon gani sa pag-uban sa mga Saksi sulod sa napulo ka adlaw. Apan, pagkatapos sa biyahe, ang iyang hunahuna bug-os nga nausab. Ngano?
19 Nahitabo ang daghang kadaot sa panahon sa biyahe. Apan wala moreklamo ang mga Saksi. Ang drayber miingon nga kadto ang labing buotang grupo sa mga pasahero nga nasakay niya sukad masukad! Ngani, siya misaad nga sa sunod higayong moduaw ang mga Saksi sa iyang balay, iyang padayonon sila ug pamatian gayod sila. Pagkamaayong impresyon ang gihatag sa mga pasahero pinaagi sa ‘pagbuhat sa mga butang nga walay pagbagulbol’!
Ang Pagpasaylo Magpausbaw sa Panaghiusa
20. Nganong angay kitang magpinasayloay sa usag usa?
20 Unsa na man kon kita adunay reklamo batok sa usa ka isigkamagtutuo? Kon seryoso kana, angay natong ipadapat ang mga prinsipyong makaplagan sa gisulti ni Jesus ingon nga natala sa Mateo 18:15-17. Hinuon, kini dili kinahanglanon kanunay, sanglit ang kadaghanang reklamo gagmay ra man. Nganong dili isipon ang maong kahimtang ingong kahigayonan sa pagpasaylo? Si Pablo misulat: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon. Apan, gawas pa niining tanang butanga, isul-ob ninyo ang gugma, kay kini maoy usa ka hingpit nga bugkos sa panaghiusa.” (Colosas 3:13, 14) Andam ba kitang magpasaylo? Dili ba si Jehova may hinungdan sa pagreklamo bahin kanato? Bisan pa niana, siya subsob nagpakitag kahingawa ug nagpasaylo.
21. Sa unsang paagi apektado kadtong nakadungog sa pagbagulbol?
21 Bisan kon unsa man ang reklamo, kana dili masulbad sa pagbagulbol. Ang Hebreohanong termino nga nagkahulogang “pagbagulbol” mahimong magpasabot usab sa “pagyagubyob.” Lagmit gayong alingugngogan kita kon kauban sa bagulbolan ug mosulay kita sa pagpalayo kaniya. Kon kita magbagulbol o magyagubyob, kadtong nakadungog mahimong mobati ug sama niana. Aw, sila mahimong alingugngogan kaayo nga buot nilang magpalayo kanato! Ang pagyagubyob makadani tingali sa pagtagad sa laing tawo, apan kita dili madani kaniya.
22. Unsay giingon sa usa ka dalaga bahin sa mga Saksi ni Jehova?
22 Ang mapasayloon nga tinamdan makapausbaw sa panaghiusa—butang nga gipabilhan sa katawhan ni Jehova. (Salmo 133:1-3) Sa usa ka nasod sa Uropa, ang usa ka 17-anyos nga Katolikong dalaga misulat sa sangang buhatan sa mga Saksi ni Jehova sa pagpahayag sa iyang pagdayeg kanila. Matod niya: “Kini lamang ang organisasyon nga akong nahibaloan diin ang mga membro wala mabahin tungod sa pagdumtanay, kadalo, pagkapanatiko, pagkahakog, o kawalay-panaghiusa.”
23. Unsay hisgotan nato sa sunod artikulo?
23 Ang pagpabili sa tanang espirituwal nga mga panalangin nga atong nadawat ingong mga magsisimba sa matuod nga Diyos, si Jehova, makatabang kanato sa pagpausbaw sa panaghiusa ug paglikay sa pagbagulbol batok sa uban diha sa personal nga mga butang. Ipakita sa sunod artikulo kon sa unsang paagi ang diyosnong mga hiyas mopugong kanato sa paghimo sa mas peligrosong matang sa pagbagulbol—nga mao, ang pagbagulbol batok sa yutan-ong bahin sa organisasyon ni Jehova.
Nahinumdom Ka Ba?
• Unsay nalakip sa pagbagulbol?
• Sa unsang paagi mahimong iilustrar ang mga epekto sa pagbagulbol?
• Unsay makatabang kanato sa pagbuntog sa kiling sa pagbagulbol?
• Sa unsang paagi ang kaandam sa pagpasaylo makatabang kanato sa paglikay sa pagbagulbol?
[Mga Pangutana sa Pagtuon]
[Hulagway sa panid 15]
Ang mga Israelinhon sa pagkatinuod nagbagulbol batok kang Jehova!
[Hulagway sa panid 17]
Gipaningkamotan mo ba ang paglantaw sa mga butang sama sa paglantaw ni Jehova?
[Mga hulagway sa panid 18]
Ang pagpasaylo magpausbaw sa Kristohanong panaghiusa