Luwason ni Jehova ang Sinakit

“Daghan ang mga katalagman sa matarong, apan si Jehova magaluwas kaniya.”—SALMO 34:19.

1, 2. Unsang suliran ang gisagubang sa usa ka matinumanong Kristohanon, ug nganong mahimo kitang mobatig susama niana?

 ANG usa ka batan-ong babaye nga ginganlag Keiko a maoy Saksi ni Jehova sulod sa kapin nag 20 anyos. Siya nag-alagad ingon nga regular payunir, o bug-os-panahon nga magmamantala sa Gingharian sa taastaas nga panahon. Iyang gimahal pag-ayo kanang pribilehiyoha. Ugaling lang, dili pa dugay, gibati ni Keiko ang kawalay-paglaom ug nga siya nag-inusara lamang. “Nagsige lang kog hilak,” miingon siya. Sa pagpukgo sa iyang grabeng kasub-anan, migahin si Keiko ug mas dakong panahon sa personal nga pagtuon. “Wala gihapon nako mausab ang akong panghunahuna,” miingon siya. “Kadto miabot sa punto nga gusto na kong mamatay.”

² Nakigbisog ka ba sa susamang pagbati sa kawalay-paglaom? Ingong usa ka Saksi ni Jehova, daghan kag rason sa pagmaya tungod kay ang diyosnong pagkamahinalaron ‘naghupot ug saad sa kinabuhi karon ug sa umaabot.’ (1 Timoteo 4:8) Ikaw nagpuyo karon mismo sa espirituwal nga paraiso! Apan kana ba nagpasabot nga gipanalipdan ka batok sa tanang kasakitan? Wala gayod! Ang Bibliya nag-ingon: “Daghan ang mga katalagman sa matarong.” (Salmo 34:19) Dili kini katingad-an, kay “ang tibuok kalibotan nailalom sa gahom sa usa nga daotan,” si Satanas nga Yawa. (1 Juan 5:19) Sa usa ka paagi, kitang tanan makasinati sa mga epekto sa pagmando sa Yawa sa tibuok kalibotan.—Efeso 6:12.

Ang mga Epekto sa Kasakitan

3. Paghatag ug mga pananglitan sa Bibliya bahin sa mga alagad sa Diyos nga nakasinatig grabeng kasakitan.

³ Ang kasakitan makapangiob sa atong panglantaw. (Proverbio 15:15) Tagda ang matul-id nga tawong si Job. Taliwala sa grabeng kasakitan, si Job miingon: “Ang tawo, nga natawo sa usa ka babaye, mubo ug kinabuhi ug tugob sa kasamok.” (Job 14:1) Ang kalipay ni Job nahanaw. May panahon nga siya nagtuo nga si Jehova mibiya na kaniya. (Job 29:1-5) Si Job dili mao lamang ang alagad sa Diyos nga nakasinatig grabeng kagul-anan. Ang Bibliya nagtug-an kanato nga si Ana ‘mibatig kapait sa kalag’ tungod sa iyang pagkawalay anak. (1 Samuel 1:9-11) Tungod kay naguol mahitungod sa usa ka suliran sa pamilya, si Rebeca miingon: “Gikasilagan ko kining akong kinabuhi.” (Genesis 27:46) Sa naghinumdom sa iyang mga kasaypanan, si David miingon: “Naglakaw ako sa tibuok adlaw nga masulub-on.” (Salmo 38:6) Kining pipila ka pananglitan nagpatin-aw  nga ang mahadlokon-sa-Diyos nga mga lalaki ug mga babaye sa una-Kristohanong panahon nag-antos sa mga yugto sa grabeng kasakitan.

4. Nganong dili katingad-an nga dunay “magul-anong mga kalag” taliwala sa mga Kristohanon karon?

⁴ Komosta man ang mga Kristohanon? Giawhag gayod ni apostol Pablo ang mga taga-Tesalonica sa ‘paghupay sa magul-anong mga kalag.’ (1 Tesalonica 5:14) Usa ka reperensiyang basahon nag-ingon nga ang Gregong pulong nga gihubad “magul-anong mga kalag” mahimong nagtumong niadtong “temporaryong nabug-atan sa kapit-os sa kinabuhi.” Ang mga pulong ni Pablo nagpaila nga ang pipila ka dinihogan sa espiritu sa maong kongregasyon sa Tesalonica nagmasulub-on. May magul-anong mga kalag usab taliwala sa mga Kristohanon karon. Apan nganong magul-anon man sila? Hisgotan nato ang tulo ka kasagarang mga hinungdan.

Ang Atong Pagkamakasasala Makapaguol Kanato

5, 6. Unsang paghupay ang atong makuha gikan sa Roma 7:22-25?

⁵ Lahi sa hiwi nga mga tawo nga “nawad-an na sa tanang moral nga pagbati,” ang matuod nga mga Kristohanon maguol tungod sa ilang pagkamakasasala. (Efeso 4:19) Sila mahimong mobati sama kang Pablo, kinsa misulat: “Nahimuot gayod ako sa balaod sa Diyos sumala sa akong pagkatawo sa sulod, apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.” Dayon si Pablo mipatugbaw: “Alaot ako nga tawo!”—Roma 7:22-24.

⁶ Gibati mo ba sukad ang gibati ni Pablo? Dili daotan nga ikaw dulot nga nakaamgo sa imong mga kahuyangan, kay ang kagrabe sa sala masilsil diha kanimo ug ang imong determinasyon sa paglikay sa pagkadaotan mapalig-on. Apan dili angayng magmagul-anon ka kanunay tungod sa imong mga kahuyangan. Sa iyang mga pulong bahin sa kagul-anan nga bag-o pang gikutlo, si Pablo midugang: “Salamat sa Diyos pinaagi kang Jesu-Kristo nga atong Ginoo!” (Roma 7:25) Oo, si Pablo may pagsalig nga ang giula nga dugo ni Jesus makatubos kaniya gikan sa napanunod nga sala.—Roma 5:18.

7. Unsay makatabang sa usa ka tawo aron dili magmagul-anon tungod sa iyang makasasalang mga kiling?

⁷ Kon nabug-atan ang imong hunahuna tungod sa imong pagkamakasasala, magkalipay diha sa mga pulong ni apostol Juan, kinsa misulat: “Kon adunay makasala, kita adunay usa ka magtatabang ngadto sa Amahan, si Jesu-Kristo, usa nga matarong. Ug siya usa ka halad pasig-uli alang sa atong mga sala, apan dili lamang sa atoa kondili usab nianang sa tibuok kalibotan.” (1 Juan 2:1, 2) Kon naguol ka tungod sa imong makasasalang mga kiling, hinumdomi kanunay nga si Jesus namatay alang sa mga makasasala, dili alang sa hingpit nga mga tawo. Sa pagkatinuod, “ang tanan nakasala ug wala makaabot sa himaya sa Diyos.”—Roma 3:23.

8, 9. Nganong angay natong isalikway ang nagahukom-sa-kaugalingon nga mga hunahuna?

⁸ Ugaling lang, pananglit kon ikaw nakahimog grabeng sala sa nangagi. Walay duhaduha nga subsob nimo kanang gihisgotan sa imong pag-ampo kang Jehova. Nakadawat kag espirituwal nga tabang gikan sa Kristohanong mga ansiyano. (Santiago 5:14, 15) Ikaw naghinulsol gayod ug busa nagpabilin nga bahin sa kongregasyon. O tingali mibiya ka kadiyot sa organisasyon sa Diyos, apan sa ulahi naghinulsol ka ug napasig-uli sa mahinlong kahimtang. Bisan kon unsay kahimtang, ang imong nangaging sala mahimong mosantop sa hunahuna ug makapaguol kanimo. Kon kana mahitabo, hinumdomi nga si Jehova magpasaylo sa tinuod nga mga mahinulsolon “sa madagayaon gayod.” (Isaias 55:7) Dugang pa, dili niya gusto nga mobati ka nga ikaw maoy daotan ug wala nay paglaom. Kana ang gusto ni Satanas nga imong bation. (2 Corinto 2:7, 10, 11) Laglagon ang Yawa tungod kay siya takos niana, apan gusto niya nga ikaw mobating takos sa samang paghukom. (Pinadayag 20:10) Ayaw itugot nga molampos si Satanas sa iyang plano nga daoton ang imong pagtuo. (Efeso 6:11) Hinunoa, “barog kamo batok kaniya” niining bahina, ingon nga ikaw nagbarog sa ubang mga paagi.—1 Pedro 5:9.

⁹ Sa Pinadayag 12:10, si Satanas gitawag “ang magsusumbong sa atong mga igsoon”—ang dinihogang mga Kristohanon. Siya “nagsumbong kanila  adlaw ug gabii” atubangan sa Diyos. Ang pagpamalandong sa maong bersikulo makatabang kanimo sa pagkasabot nga si Satanas, ang bakak nga magsusumbong, malipay kon imong isumbong ug hukmang daotan ang imong kaugalingon, bisan pag si Jehova wala maghimo niana. (1 Juan 3:19-22) Nganong magmagul-anon kanunay tungod sa imong mga kahuyangan sa punto nga daw gusto na nimong mohunong? Ayaw itugot nga si Satanas magbungkag sa imong relasyon uban sa Diyos. Ayaw gayod itugot nga ang Yawa makapahinabo nga imong makalimtan ang kamatuoran nga si Jehova “maluluy-on ug mapuangoron, mahinay sa kasuko ug dagaya sa mahigugmaong-kalulot.”—Exodo 34:6.

Ang Atong mga Kahuyangan Makapalusno sa Atong Pagbati

10. Sa unsang mga paagi ang atong mga kahuyangan makapalusno kanato?

¹⁰ Ang pipila ka Kristohanon malusno tungod kay ang ilang pag-alagad sa Diyos naapektohan sa ilang mga kahuyangan. Kana ba nahitabo kanimo? Tingali ang seryosong sakit, pagkatigulang, o ubang mga kahimtang makapugong kanimo sa paggahin ug dakong panahon diha sa ministeryo nga sama sa nangagi. Tinuod, ang mga Kristohanon gidasig sa pagpalit ug panahon alang sa pag-alagad sa Diyos. (Efeso 5:15, 16) Apan unsa na man kon ang mga kahuyangan makapugong kanimo gikan sa mas dakong pag-alagad ug kini mahimong makapalusno kanimo?

11. Sa unsang paagi ang tambag ni Pablo nga natala sa Galacia 6:4 makabenepisyo kanato?

¹¹ Ang Bibliya nag-awhag kanato nga dili magtinapolan kondili mahimong “mga tigsundog kanila nga pinaagi sa pagtuo ug pailob nagapanunod sa mga saad.” (Hebreohanon 6:12) Makahimo lang kita niini kon atong susihon ang maayo nilang panig-ingnan ug paningkamotan ang pagsundog sa ilang pagtuo. Apan, dili kita makabenepisyo kon atong itandi ang atong kaugalingon sa uban ug mohinapos nga walay bisan unsa nga atong gibuhat ang makapatagbaw. Busa, maayong ipadapat nato ang tambag ni Pablo: “Pasulaya ang matag usa sa iyang kaugalingong binuhatan, ug niana siya may hinungdan sa pagsadya labot sa iyang kaugalingon lamang, ug dili sa pagtandi sa laing tawo.”—Galacia 6:4.

12. Nganong kita mahimong malipay diha sa atong pag-alagad kang Jehova?

¹² Ang mga Kristohanon adunay maayong rason nga malipay, bisan pag sila gamay rag mahimo tungod sa grabeng mga suliran sa panglawas. Ang Bibliya nagpasalig kanato: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.” (Hebreohanon 6:10) Tungod sa mga kahimtang nga dili nimo makontrolar, ikaw malisdan tingali sa pag-alagad kang Jehova nga sama sa nangagi. Bisan pa niana, sa tabang ni Jehova, makaalagad ka nga mas bug-os diha sa pipila ka bahin sa Kristohanong ministeryo, sama sa pagsangyaw pinaagig telepono ug pagpanulat. Seguradong panalanginan ni Jehova nga Diyos ang imong bug-os-kalag nga pag-alagad ug ang gugma nga imong gipakita alang kaniya ug alang sa mga isigkatawo.—Mateo 22:36-40.

Ang ‘Makuyaw nga mga Panahon’ Makapasakit Kanato

13, 14. (a) Sa unsang mga paagi nga kining ‘makuyaw nga mga panahon’ nakahatag ug kasakit kanato? (b) Sa unsang paagi dayag ang kakulang ug kinaiyanhong pagbati karon?

¹³ Bisan pag kita naglaom sa kinabuhi sa matarong nga bag-ong kalibotan sa Diyos, kita nagkinabuhi karon sa “makuyaw nga mga panahong lisod sagubangon.” (2 Timoteo 3:1) Mahupayan kita sa pagkahibalo nga ang mga kasakitan maoy ilhanan nga haduol na ang atong kaluwasan. Ugaling lang, apektado kita sa mga kahimtang alirong nato. Pananglitan, unsay imong bation kon wala kay trabaho? Nihit tingali ang mga trabaho, ug paglabay sa daghang bulan, maghunahuna ka kon si Jehova nakakita ba sa imong kahimtang o nakadungog sa imong mga pag-ampo. O ikaw nabiktima tingali sa pagkamapihigon o sa laing matang sa inhustisya. Ang pagbasa lang gani sa mga ulohan sa mantalaan mahimong mopabati kanimo sama sa matarong nga tawong si Lot, kinsa “naguol pag-ayo” tungod sa law-ay nga panggawi niadtong alirong niya.—2 Pedro 2:7.

¹⁴ Adunay usa ka linaing kinaiyahan sa kataposang mga adlaw nga dili mahimong dili nato hisgotan. Gitagna sa Bibliya nga daghan ang “walay kinaiyanhong pagbati.” (2 Timoteo 3:3) Ang pagbinatiay sa pamilya kulang kaayo diha sa daghang  panimalay. Sa pagkatinuod, “ang ebidensiya nagpaila nga ang mga tawo mas lagmit patyon, dagmalan sa pisikal, o abusohan sa emosyonal o seksuwal nga paagi sa mga sakop sa pamilya imbes sa laing tawo,” matod sa librong Family Violence. “Ang dapit diin ang mga tawo angayng mobati nga gihigugma ug gipanalipdan maoy labing peligroso alang sa pipila ka hingkod ug mga bata.” Kadtong nakasinatig dili-maayong kahimtang sa panimalay mahimong mobatig kabalisa ug kawalay-paglaom sa ulahing katuigan. Unsa man kon kana mahitabo kanimo?

15. Sa unsang paagi ang gugma ni Jehova labaw kaayo kay sa gugma ni bisan kinsang tawo?

¹⁵ Ang salmistang si David miawit: “Kon ugaling biyaan ako sa akong amahan ug sa akong inahan, si Jehova mismo magsagop kanako.” (Salmo 27:10) Makapahupay kaayo nga mahibalong ang gugma ni Jehova labaw kaayo kay sa gugma sa tawhanong ginikanan! Bisan pag makapaguol kaayo ang pagsalikway, pagdagmal, o pag-abandonar sa ginikanan, kini dili makaapekto sa kadako sa pagmahal ni Jehova kanimo. (Roma 8:38, 39) Hinumdomi nga ang Diyos magkabig niadtong iyang gihigugma. (Juan 3:16; 6:44) Walay sapayan kon giunsa ka pagtratar sa mga tawo, ikaw gihigugma sa imong langitnong Amahan!

Praktikal nga mga Lakang sa Paghupay sa Kaguol

16, 17. Kon mobatig kagul-anan, unsay mahimo sa usa ka tawo aron mapreserbar ang iyang espirituwal nga kalig-on?

¹⁶ Adunay praktikal nga mga lakang nga imong mahimo sa paghupay sa kaguol. Pananglitan, sunda ang makapalig-ong programa sa Kristohanong mga kalihokan. Palandonga ang Pulong sa Diyos, ilabina sa dihang ang pagkalusno daw bug-at kaayo. Ang salmista miawit: “Sa dihang miingon ako: ‘Molakaw ako nga magparagparag,’ Oh Jehova, ang imong mahigugmaong-kalulot nagpalig-on kanako. Sa dihang ang makapatugaw nga mga hunahuna midaghan sa akong kahiladman, ang imong mga paghupay mihapohap sa akong kalag.” (Salmo 94:18, 19) Ang imong hunahuna mapunog makapahupay nga mga pulong ug makapalig-ong mga ideya pinaagi sa regular nga pagbasa sa Bibliya.

¹⁷ Ang pag-ampo hinungdanon usab kaayo. Bisan pag dili nimo bug-os ikapahayag sa mga pulong ang imong mga pagbati sa kahiladman, si Jehova nasayod kon unsay gusto unta nimong isulti. (Roma 8:26, 27) Ang salmista mihatag niini nga pasalig: “Itugyan ang imong palas-anon kang Jehova, ug siya magasapnay kanimo. Dili gayod niya itugot nga matarog ang matarong.”—Salmo 55:22.

18. Unsang praktikal nga mga lakang ang mahimo sa usa nga magul-anon kaayo?

¹⁸ Ang pipila mobatig kawalay-paglaom tungod sa clinical depression o grabeng depresyon. b  Kon kini nahitabo kanimo, paningkamoti nga ipunting ang imong hunahuna sa bag-ong kalibotan sa Diyos ug sa panahon nga “walay pumoluyo nga moingon: ‘Ako masakiton.’” (Isaias 33:24) Kon ang imong pagbati sa kawalay-paglaom daw dili lamang panagsa nga temporaryong kasubo, maalamon tingali nga mangitag propesyonal nga tabang. (Mateo 9:12) Hinungdanon usab ang pag-atiman sa imong kaugalingong lawas. Ang makapahimsog nga diyeta ug ehersisyo basin makatabang. Seguroha nga igo ang imong pahulay. Ayaw pagpulaw sa pagtan-awg telebisyon, ug likayi ang mga matang sa kalingawan nga makapaluya sa lawas ug sa emosyon. Labaw sa tanan, ipadayon ang pagbuhat sa diyosnong mga buluhaton! Bisag dili pa panahon nga si Jehova ‘magapahid sa tanang luha,’ siya motabang kanimo aron makaantos.—Pinadayag 21:4; 1 Corinto 10:13.

Pagkinabuhi “Ilalom sa Gamhanang Kamot sa Diyos”

19. Unsay gisaad ni Jehova niadtong sinakit?

¹⁹ Ang Bibliya nagpasalig kanato nga bisan pag daghan ang mga katalagman sa matarong, “si Jehova magaluwas kaniya gikan niining tanan.” (Salmo 34:19) Sa unsang paagi ginahimo kini sa Diyos? Sa dihang si apostol Pablo balikbalik nga nag-ampo nga luwason siya gikan sa iyang “tunok sa unod,” siya giingnan ni Jehova: “Ang akong gahom ginahingpit diha sa kaluyahon.” (2 Corinto 12:7-9) Unsay gisaad ni Jehova kang Pablo, ug unsay iyang gisaad kanimo? Dili ang dihadiha nga pagkaayo, kondili ang gahom aron makaantos.

20. Bisan pa sa atong mga pagsulay, unsay gipasalig kanato sa 1 Pedro 5:6, 7?

²⁰ Si apostol Pedro misulat: “Ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon; samtang inyong itugyan kaniya ang tanan ninyong mga kabalaka, kay siya may kahingawa kaninyo.” (1 Pedro 5:6, 7) Tungod kay si Jehova may kahingawa kanimo, siya dili mobiya kanimo. Iya kang paluyohan bisan pa sa mga pagsulay nga imong masinati. Hinumdomi nga ang matinumanong mga Kristohanon maoy “ilalom sa gamhanang kamot sa Diyos.” Samtang mag-alagad kita kang Jehova, iya kitang hatagan ug kusog aron makaantos. Kon kita magmatinumanon kaniya, walay bisan unsa ang makahimog malungtarong espirituwal nga kadaot. Busa, hinaot huptan nato ang integridad kang Jehova aron makatagamtam kitag kinabuhing walay kataposan sa iyang gisaad nga bag-ong kalibotan ug makakita sa adlaw nga siya magaluwas gayod sa sinakit hangtod sa kahangtoran!

[Mga footnote]

Nahinumdom Ka Ba?

• Nganong bisan ang mga alagad ni Jehova apektado man sa kasakitan?

• Unsa ang pipila ka hinungdan nga ang pipila sa katawhan sa Diyos mobatig grabeng kagul-anan?

• Sa unsang paagi si Jehova nagatabang kanato sa pagsagubang sa atong mga kabalaka?

• Sa unsang paagi kita “ilalom sa gamhanang kamot sa Diyos”?

[Mga Pangutana sa Pagtuon]

[Mga hulagway sa panid 25]

Bisan pa sa mga pagsulay, ang katawhan ni Jehova adunay rason sa pagkalipay

[Hulagway sa panid 28]

Ang pagsangyaw pinaagig telepono maoy usa ka paagi sa pag-alagad kang Jehova sa bug-os nga kasingkasing