Mga Pangutana Gikan sa mga Magbabasa

Mapalagpot ba ang usa ka tawo gikan sa Kristohanong kongregasyon tungod sa paghimog kahugawan maingon nga siya mapalagpot tungod sa pakighilawas o malaw-ayng panggawi?

Oo, ang usa ka tawo mahimong mapalagpot gikan sa kongregasyon kon siya dili mahinulsolong nagbatasan sa pagpakighilawas, naghimog pipila ka matang sa kahugawan, o malaw-ayng panggawi. Si apostol Pablo naghisgot nianang tulo ka sala lakip sa ubang mga sala nga takos sa pagpalagpot sa dihang siya miingon: “Dayag ang mga buhat sa unod, ug kini mao ang pakighilawas, kahugawan, malaw-ayng panggawi . . . [Ako magpasidaan] kaninyo, nga kadtong nagabuhat sa maong mga butang dili makapanunod sa gingharian sa Diyos.”—Galacia 5:19-21.

Ang pakighilawas (Grego, por·neiʹa) mapadapat ngadto sa gidiling seksuwal nga mga relasyon nga gawas sa Kasulatanhong kaminyoon. Kini naglakip sa pagpanapaw, pagpamampam, ug seksuwal nga mga relasyon tali sa wala makasal nga mga tawo maingon man ang pagpakigsekso nga ipaagi sa baba ug lubot ug ang pag-ugay-ugay sa mga kinatawo sa laing tawo nga dili niya bana o asawa. Ang usa ka tawo nga dili mahinulsolong nagbatasan sa  pakighilawas walay luna sa Kristohanong kongregasyon.

Ang malaw-ayng panggawi (Grego, a·selʹgei·a) nagpasabot sa “seksuwal nga kahilayan; pagkaunodnon; walay-ulaw nga panggawi; malaw-ayng panggawi.” Ang The New Thayer’s Greek-English Lexicon naghubit sa maong Gregong termino ingong “pagpatuyang sa kaulag, . . . kangil-aran, kaulawan, pagkasalbahis.” Sumala sa laing basahon, ang malaw-ayng panggawi maoy usa ka matang sa batasan nga “naglapas sa tanang kinutbanan nga dalawaton sa katilingban.”

Sumala sa gipakita sa maong mga kahubitan, ang “malaw-ayng panggawi” naglangkit sa duha sa elemento: (1) Ang maong panggawi mismo maoy usa ka seryosong paglapas sa mga balaod sa Diyos, ug (2) ang tinamdan sa mamumuhat sa kalapasan maoy dili matinahoron, sinalbahis.

Busa, ang “malaw-ayng panggawi” wala magtumong sa ginagmayng daotang panggawi. Kini nagtumong sa mga buhat nga seryosong naglapas sa mga balaod sa Diyos ug nagbanaag sa matamayong tinamdan—usa ka espiritu nga nagpasundayag ug pagkawalay-pagtahod o pagtamay pa gani sa awtoridad, mga balaod, ug mga sukdanan. Gilangkit ni Pablo ang malaw-ayng panggawi uban sa gidili nga pagpakigsekso. (Roma 13:13, 14) Tungod kay ang Galacia 5:19-21 naglista sa malaw-ayng panggawi apil sa daghang makasasalang mga buhat nga makadiskuwalipikar sa usa sa pagpanunod sa Gingharian sa Diyos, ang malaw-ayng panggawi maoy basehanan alang sa pagbadlong ug posibleng pagpalagpot gikan sa Kristohanong kongregasyon.

Ang kahugawan (Grego, a·ka·thar·siʹa) mao ang kinadaghanan ug nasakop nga kahulogan sa tulo ka termino nga gihubad ug “pakighilawas,” “kahugawan,” ug “malaw-ayng panggawi.” Kini naglakip sa kahugawan sa bisan unsang matang—diha sa seksuwal nga mga butang, sinultihan, linihokan, ug sa espirituwal nga mga relasyon. Nalakip gayod sa “kahugawan” ang daghang matang sa seryosong mga sala.

Sumala sa narekord sa 2 Corinto 12:21, si Pablo nagtumong niadtong “kanhi nakasala apan wala maghinulsol sa ilang kahugawan ug pagpakighilawas ug malaw-ayng panggawi nga ilang ginabuhat.” Tungod kay ang “kahugawan” gilista uban sa “pagpakighilawas ug malaw-ayng panggawi,” ang pipila ka matang sa kahugawan angayng hatagan ug hudisyal nga pagtagad. Apan ang kahugawan maoy lapad nga termino nga naglakip sa mga butang nga dili kinahanglang hatagan ug hudisyal nga pagtagad. Maingon nga ang usa ka balay mahimong may pagkahugaw o hugaw kaayo, ang kahugawan adunay lainlaing sukod.

Si Pablo nag-ingon, sumala sa Efeso 4:19, nga ang pipila ka tawo “nawad-an na sa tanang moral nga pagbati” ug nga “ilang gitugyan ang ilang kaugalingon sa malaw-ay nga panggawi sa pagbuhat sa tanang matang sa kahugawan uban ang kadalo.” Busa si Pablo nagbutang sa “kahugawan uban ang kadalo” diha sa samang kategoriya sa malaw-ayng panggawi. Kon ang usa ka bawtismadong tawo dili mahinulsolong nagbatasan sa “kahugawan uban ang kadalo,” siya mahimong ipalagpot gikan sa kongregasyon tungod sa grabeng kahugawan.

Tugotan ta nga ang minyoonong lalaki ug babaye naghimog sobrang paggaksanay ug paghagkanay nga makapukaw sa kailibgon sa ubay-ubayng higayon. Mahimong mohukom ang mga ansiyano nga bisan tuod kining mga tawhana wala magpasundayag ug way-kaulaw nga tinamdan nga nagpaila sa malaw-ayng panggawi, ang ilang panggawi nagpadayag ug kadalo. Busa ang mga ansiyano lagmit mohimog hudisyal nga aksiyon tungod kay nalangkit ang grabeng kahugawan. Ang grabeng kahugawan mahimo usab nga haom nga pasikaranan sa paghusay sa usa ka kaso diin ang usa ka tawo sublisubli nga nagtawag sa telepono sa laing tawo nga tin-awng naghisgot ug seksuwal nga mga buhat, ilabina kon siya gitambagan na sa nangagi bahin sa maong kaso.

Ang mga ansiyano nagkinahanglag pagsabot sa paghimo sa maong mga paghukom. Aron matino kon angay ba ang hudisyal nga aksiyon, kinahanglang mainampingon nilang susihon kon unsay nahitabo ug ang gidak-on nga kini gihimo. Dili kini usa ka kaso diin si bisan kinsa nga dili modawat ug Kasulatanhong tambag mahimong iakusar ug malaw-ayng panggawi; wala usab kini magpasabot nga ihapon kon kapila makahimo ang usa ka tawo sa usa ka sala una pa himoon ang hudisyal nga aksiyon. Ang mga ansiyano kinahanglang mainampingon ug mainampoon nga magtimbangtimbang sa matag situwasyon ug magsusi kon unsay nahitabo ug kon unsa ka subsob kining nahimo, sa kinaiyahan ug gidak-on sa nahimong sala, ug ang tuyo ug motibo sa tagsala.

Dili lamang seksuwal nga mga sala ang nalangkit sa grabeng kahugawan. Pananglitan, ang usa ka bawtismadong batang lalaki mahimong nakayupyop ug pipila ka sigarilyo sa mubong panahon ug  gitug-an niya kini sa iyang mga ginikanan. Siya determinadong dili na manigarilyo pag-usab. Kini maoy kahugawan, apan wala pa makaabot sa punto nga mahimong grabeng kahugawan o “kahugawan uban ang kadalo.” Ang Kasulatanhong tambag gikan sa usa o duha ka ansiyano uban sa pagpaluyo sa mga ginikanan sa bata mahimong igo na. Apan kon ang maong bata subsob nga nanigarilyo, kini maoy tinuyong kahugawan sa unod, ug ang usa ka hudisyal nga komite mahimong pormahon aron susihon kini nga kaso sa grabeng kahugawan. (2 Corinto 7:1) Kon ang maong bata dili mahinulsolon, siya mahimong ipalagpot.

Ang pipila ka Kristohanon mahimong nalangkit sa pagtan-aw ug pornograpiya. Kini maoy dulumtanan sa Diyos, ug ang mga ansiyano mahimong makurat nga dunay usa ka isigkamagtutuo nga nakahimo niini. Apan dili tanang pagtan-aw ug pornograpiya kinahanglang husayon sa usa ka hudisyal nga komite. Pananglitan, ibutang ta nga ang usa ka igsoong lalaki nagtan-aw nianang gitawag ug soft-core o dili kaayo madayganon sa sekso nga pornograpiya sa pipila ka higayon. Siya mobatig kaulaw, motug-an niini ngadto sa usa ka ansiyano, ug determinadong dili na mohimo niana pag-usab. Ang ansiyano mahimong mohinapos nga ang panggawi sa maong igsoon wala pa mosangko sa punto nga siya nakahimog “kahugawan uban ang kadalo”; ni siya nagpakitag way-kaulaw nga tinamdan, nga nagpaila sa malaw-ayng panggawi. Bisan tuod dili pa angay ang hudisyal nga aksiyon, kining matanga sa kahugawan nagkinahanglag bug-at nga Kasulatanhong tambag ug tingali dugang tabang gikan sa mga ansiyano.

Apan, ibutang ta nga ang usa ka Kristohanon sekretong nagtan-aw ug law-ay-kaayong pornograpiya sulod sa daghang katuigan ug gihimo niya ang tanan niyang mahimo aron malilong ang iyang sala. Ang maong pornograpiya mahimong nagpakita sa usa ka babaye nga gitabangan paglugos, gilugos samtang gigaid, linuog nga pagpaantos, pagpamintas sa mga babaye, o bisan pornograpiya sa kabataan. Sa dihang nahibaloan sa uban ang iyang binuhatan, siya naulaw pag-ayo. Siya wala gayod magpakitag way-kaulaw nga tinamdan, apan ang mga ansiyano mahimong mohukom nga ‘iyang gitugyan ang iyang kaugalingon’ ngadto niining mahugaw nga batasan ug nakahimog “kahugawan uban ang kadalo,” nga mao, grabeng kahugawan. Ang usa ka hudisyal nga komite mahimong pormahon tungod sa grabeng kahugawan nga nahimo. Ang tagsala mahimong ipalagpot kon siya wala magpasundayag ug diyosnong paghinulsol ug determinasyon nga dili na gayod motan-aw pa ug pornograpiya. Kon iyang gidapit ang uban sa iyang balay aron sa pagtan-aw ug pornograpiya—nga nagdasig pa gani sa pagtan-aw niana—siya nagpakitag way-kaulaw nga tinamdan nga nagpaila sa malaw-ayng panggawi.

Ang termino sa Kasulatan nga “malaw-ayng panggawi” kanunayng naglangkit sa usa ka seryosong sala, nga subsob maylabot sa pagpakigsekso. Sa dihang maningkamot sa pag-ila sa malaw-ayng panggawi, angayng tan-awon sa mga ansiyano ang kawalay-kaulaw, pagkamahilayon, kahugaw, kangil-ad, ug kon unsay lapas na sa publikong kaligdong. Sa laing bahin, ang seryosong mga paglapas sa balaod ni Jehova nga nahimo sa usa ka tawo nga wala magpakita ug way-kaulaw nga tinamdan mahimong naglangkit sa “kadalo.” Kining mga kasoha dumalahon pinasukad sa grabeng kahugawan nga ilang nahimo.

Ang pagtino kon ang usa ka tawo nakasala ba gayod ug grabeng kahugawan o malaw-ayng panggawi maoy usa ka seryosong responsabilidad, tungod kay nalangkit ang mga kinabuhi. Kadtong maghukom sa maong mga kaso angayng maghimo niana sa mainampoong paagi, nga mangayo sa Diyos sa iyang balaang espiritu, kahibalo, ug pagsabot. Kinahanglang huptan sa mga ansiyano ang kahinlo sa kongregasyon ug kinahanglang ipasukad ang ilang paghukom diha sa Pulong sa Diyos maingon man sa pagtultol sa “matinumanon ug maalamong ulipon.” (Mateo 18:18; 24:45) Ug niining daotang mga adlaw, kinahanglang hinumdoman gayod sa mga ansiyano kining mga pulonga: “Tinoa kon unsa ang inyong buhaton, tungod kay dili alang sa tawo nga kamo magahukom kondili alang kang Jehova.”—2 Cronicas 19:6.