Unsa ang Gingharian sa Diyos?

PAGKADAKONG katalagman ang mihugpa sa katawhan sayo sa kasaysayan sa tawo! Ang usa ka manulonda mirebelde batok sa awtoridad sa Usa nga naglalang mismo kaniya. Ang maong rebelde nagtental sa unang babaye, si Eva, sa pagkaon sa gidiling bunga sa kahoy. Nga nagtumong kaniya ug sa iyang bana, si Adan, ang manulonda miingon: “Dili gayod kamo mamatay. Kay nasayod ang Diyos nga sa mismong adlaw nga kamo mokaon gikan niini ang inyong mga mata mangabuka ug kamo mahisama sa Diyos, nga mahibalo sa maayo ug sa daotan.” (Genesis 2:16, 17; 3:1-5) Ang rebelyosong manulonda gitawag sa ulahi nga Yawa ug Satanas.—Pinadayag 12:9.

Naminaw ba si Eva sa gisulti ni Satanas? Ang Bibliya nag-ingon kanato: “Nakita sa babaye nga ang kahoy maayong kan-on ug nga kini takos pangandoyon sa mga mata, oo, ang kahoy tilinguhaong tan-awon. Busa siya mikuha sa bunga niini ug mikaon niini. Human niana siya mihatag usab ug pipila sa iyang bana sa dihang nahiuban na kaniya ug siya mikaon niini.” (Genesis 3:6) Oo, ang unang magtiayon, si Adan ug Eva, miduyog kang Satanas sa iyang pagrebelde. Ingong sangpotanan, ilang giwala ang Paraiso para sa ilang kaugalingon ug sa ilang mga kaliwat. Ang mga anak nga matawo untang hingpit nga may kalaomang mabuhi sa walay kataposan makapanunod na hinuon sa sala ug kamatayon.—Roma 5:12.

Sa unsang paagi misanong si Jehova nga Diyos, ang Soberanong Magmamando sa uniberso? Maoy iyang katuyoan ang pagtagana ug kapasayloan sa mga sala. (Roma 5:8) Si Jehova nga Diyos nagtukod usab ug usa ka kagamhanan nga maoy modumala ning maong suliran. Kini nga kahikayan gitawag ug “ang gingharian sa Diyos.” (Lucas 21:31) Kay gitukod ingong kaabag sa unibersohanong pagmando sa Diyos, kining Ginghariana adunay espesipikong katuyoan.

Unsa bay katuyoan sa Gingharian sa Diyos? Unsa ang pipila ka bahin niini, ug unsay kalainan niini kon itandi sa tawhanong pagmando? Kanus-a nagsugod sa pagmando ang maong Gingharian? Kining mga pangutanaha pagahisgotan sa sunod artikulo.