Ang Kamisen nga Gama sa Balhibo sa Mananap ug ang Espirituwalidad
Ang Kamisen nga Gama sa Balhibo sa Mananap ug ang Espirituwalidad
SI Haring Louis IX sa Pransiya nagsul-ob niini. Sa dihang nagtuon ug abogasiya sa batan-on pa siya, si Sir Thomas More nakapabiling nagmata sulod sa 19 o 20 ka oras kada adlaw sulod sa pipila ka bulan sa tabang niini. Sa pagkatinuod, si More nailhang nagsul-ob niini halos sa tibuok niyang kinabuhi. Ug sa dihang ang Arsobispo sa Canterbury nga si Thomas Becket gipatay didto sa Katedral sa Canterbury, nadiskobrehan nga nagsul-ob diay siya niini. Unsay panagsama niining inilang mga tawo sa kasaysayan? Ilang gipasakitan ang ilang kaugalingon pinaagi sa pagsul-ob ug kamisen nga gama sa balhibo sa mananap aron makontrolar ang ilang mga tinguha ug pagbati.
Kining kamisena maoy sapnot nga besti nga gama sa balhibo sa kanding. Ang nagsul-ob niini masakitan tungod kay ang iyang panit mangatol ug pilasan. Kini dali ra usab nga tumahon. Giingon nga si Thomas Becket nagsul-ob ug ingon niini nga kamisen ug karsonsilyo, hangtod nga kini “napuno sa tuma.” Human sa ika-16 nga siglo, ang balhibo sa kanding usahay pulihan ug pinong alambre nga may mga sima nga modapat sa lawas. Mas masakitan ang nagsul-ob niining matanga sa kamisen.
Sumala sa usa ka reperensiya, ang katuyoan sa maong kamisen, sama sa ubang matang sa pagpasakit-sa-kaugalingon, mao ang “pagkontrolar sa makasasalang unod ug busa magdasig sa pag-ugmad ug tinamdan ug paagi sa pagkinabuhi nga mas makapahimuot sa Diyos.” Dili lamang mga tawo nga naghikaw-sa-kaugalingon ang nagsul-ob niining bestiha; ang ordinaryong mga layko ug ang mga tawong prominente, nailhan nga nagsul-ob usab niini. Bisan karon ang pipila ka relihiyosong mga orden padayong naghimo niini.
Ang pagsul-ob ug kamisen nga gama sa balhibo sa mananap o ang pag-antos sa lainlaing matang sa paghikaw-sa-kaugalingon makapahimo ba sa usa nga espirituwal nga tawo? Dili gayod. Ang espirituwalidad wala mag-agad sa maong mga buhat. Sa pagkatinuod, si apostol Pablo nagsaway sa “grabeng pagsakit sa lawas.” (Colosas 2:23) a Hinunoa, ang tinuod nga espirituwalidad naggikan sa pagpangita sa kahibalo sa Diyos pinaagi sa makugihong pagtuon sa iyang Pulong ug sa pagpadapat nianang kahibaloa sa kinabuhi sa usa.
[Footnote]
a Alang sa dugang paghisgot niining ulohana, tan-awa ang Pagmata! Oktubre 8, 1997, “Ang Hunahuna sa Bibliya: Ang Pagkaermitanyo ba Mao ang Yawi sa Kaalam?”
[Picture Credit Lines sa panid 32]
King Louis IX, top: From the book Great Men and Famous Women; Thomas Becket, center: From the book Ridpath’s History of the World (Vol. IV); Thomas More, bottom: From the book Heroes of the Reformation, 1904