Kahadloki si Jehova—Magmalipayon!
Kahadloki si Jehova—Magmalipayon!
“Malipayon ang tawo nga nahadlok kang Jehova.”—SALMO 112:1.
1, 2. Unsay mahimong ipatungha sa pagkahadlok kang Jehova?
ANG kalipay dili daling makab-ot. Ang tinuod nga kalipay nagdepende sa paghimo sa hustong mga pagpili, pagbuhat ug maayo, ug paglikay sa kon unsay daotan. Ang atong Magbubuhat, si Jehova, naghatag kanato sa iyang Pulong, ang Bibliya, aron sa pagtudlo kanato kon sa unsang paagi matagamtam nato ang kinamaayohang paagi sa pagkinabuhi. Pinaagi sa pagpangita ug pagsunod sa pagtultol ni Jehova, sa ingon nagpakitag kahadlok sa Diyos, kita tinuod nga magmatagbawon ug magmalipayon.—Salmo 23:1; Proverbio 14:26.
2 Niining artikuloha, atong hisgotan ang Biblikanhon ug moderno nga mga panig-ingnan nga nagpakita kon sa unsang paagi ang tinuod nga pagkahadlok sa Diyos mohatag sa usa ug kusog sa pagsukol sa pagpit-os sa pagbuhat kon unsay daotan ug kaisog sa pagbuhat kon unsay matarong. Atong masabtan nga ang pagkahadlok sa Diyos makahatag kanatog kalipay pinaagi sa pagpalihok kanato sa pagtul-id sa usa ka sayop nga dalan, sama sa kinahanglang buhaton ni Haring David. Masabtan usab nato nga ang pagkahadlok kang Jehova maoy bililhon gayod nga panulondon nga ikahatag sa mga ginikanan ngadto sa ilang mga anak. Sa pagkatinuod, ang Pulong sa Diyos nagpasalig kanato: “Malipayon ang tawo nga nahadlok kang Jehova.”—Salmo 112:1.
Pagbaton Pag-usab sa Nawala nga Kalipay
3. Unsay nakatabang kang David nga maulian sa iyang mga sala?
3 Ingon sa gihisgotan sa nag-unang artikulo, sa tulo ka talagsaong higayon si David napakyas sa pagpakitag kahadlok sa Diyos ug nakasala. Apan, ang iyang pagsanong sa disiplina ni Jehova nagpakita nga siya sa pagkatinuod usa ka tawo nga mahinadlokon sa Diyos. Ang iyang kataha ug pagtahod sa Diyos nagtukmod kaniya sa pag-angkon sa iyang sala, pagtul-id sa iyang dalan, ug paghupot pag-usab ug maayong relasyon uban kang Jehova. Bisan tuod nga gumikan sa iyang kasaypanan siya ug ang uban nag-antos, siya nakadawat sa padayong tabang ug panalangin ni Jehova tungod sa iyang tim-os nga paghinulsol. Ang panig-ingnan ni David seguradong makahatag ug kaisog sa mga Kristohanon karon nga makahimo tingali ug grabeng sala.
4. Sa unsang paagi ang pagkahadlok sa Diyos makatabang sa usa ka tawo sa pagbaton pag-usab ug kalipay?
4 Tagda ang kahimtang ni Sonja. a Bisan tuod nag-alagad ingong bug-os-panahong ebanghelisador, si Sonja nakighugoyhugoy sa mga tawo nga dili maayog panggawi, nalangkit sa dili-Kristohanong panggawi, ug kinahanglang ipalagpot sa Kristohanong kongregasyon. Sa dihang naulian siya sa iyang maayong panghunahuna, gihimo ni Sonja ang tanan nga gikinahanglan aron mahibalik ang iyang maayong relasyon kang Jehova. Sa ngadtongadto, siya nakabalik sa kongregasyon. Niining tanan, wala gayod mawala ang tinguha ni Sonja nga moalagad kang Jehova. Sa ngadtongadto, siya misulod pag-usab sa bug-os-panahong payunir nga ministeryo. Sa ulahi, siya naminyo sa usa ka sulondan nga Kristohanong ansiyano, ug karon siya malipayong nag-alagad uban kaniya diha sa kongregasyon. Bisan tuod si Sonja nagbasol tungod kay siya temporaryong nahitipas gikan sa Kristohanong dalan, siya malipayon nga ang iyang pagkahadlok sa Diyos nakatabang kaniya sa pagbalik.
Mas Maayong Mag-antos kay sa Makasala
5, 6. Ipatin-aw kon sa unsang paagi ug ngano nga sa duha ka higayon wala patya ni David si Saul.
5 Siyempre, mas maayo kon ang pagkahadlok sa Diyos motabang sa usa sa paglikay sa pagpakasala. Tinuod kini sa kahimtang ni David. Kas-a, sa dihang naggukod kang David uban sa tulo ka libong sundalo, si Saul misulod sa usa ka langob diin si David ug ang iyang mga tawo nagtago. Ang mga tawo ni David nag-aghat kaniya sa pagpatay kang Saul. Wala ba itugyan ni Jehova ang mortal nga kaaway ni David ngadto sa iyang kamot? Si David mihinok pag-adto kang Saul ug giputol ang sidsid sa besti niini. Tungod kay si David nahadlok sa Diyos, bisan kanang daw dili makadaot nga lihok naghasol sa iyang tanlag. Gipalakaw ni David ang iyang napikal nga mga tawo, nga miingon: “Halayo ra alang kanako, gikan sa panglantaw ni Jehova, nga buhaton ko kining butanga sa akong ginoo, ang dinihogan ni Jehova.” b—1 Samuel 24:1-7.
6 Sa laing higayon, si Saul nagkampo aron sa pagpalabay sa kagabhion, ug siya ug ang tanan niyang mga tawo nahikatulog tungod kay “usa ka paghinanok gikan kang Jehova ang midangat kanila.” Si David ug ang iyang isog nga pag-umangkong lalaki nga si Abisai miyuhot ngadto sa kinataliwad-an sa kampo ug mibarog tungod sa nahikatulog nga si Saul. Gusto nang patyon ni Abisai si Saul. Gipugngan ni David si Abisai, nga nagsukna kaniya: “Kinsa ba ang makabakyaw sa iyang kamot batok sa dinihogan ni Jehova ug makapabiling walay sala?”—1 Samuel 26:9, 12.
7. Unsay nakapugong kang David sa pagpakasala?
7 Nganong wala man patya ni David si Saul sa duha ka higayon nga mahimo unta niya kana? Tungod kay mas labaw ang iyang kahadlok kang Jehova kay kang Saul. Tungod sa hustong matang sa pagkahadlok sa Diyos, si David andam nga moantos, kon gikinahanglan, inay kay makasala. (Hebreohanon 11:25) Siya bug-os nga nagsalig sa pag-atiman ni Jehova sa Iyang katawhan ug kaniya mismo. Si David nahibalo nga ang pagsugot ug pagsalig sa Diyos mopahinabog kalipay ug daghang panalangin, samtang ang dili pagpanumbaling sa Diyos moresulta sa pagkawala sa pag-uyon sa Diyos. (Salmo 65:4) Nahibalo usab si David nga tumanon sa Diyos ang Iyang saad sa paghimo kang David nga hari ug pagtangtang kang Saul sa pagkahari sa Iyang gitakdang panahon ug paagi.—1 Samuel 26:10.
Ang Pagkahadlok sa Diyos Mopatunghag Kalipay
8. Sa unsang paagi ang panggawi ni David ilalom sa pagpit-os nagsilbing panig-ingnan?
8 Ingong mga Kristohanon, kita makadahom ug pagbugalbugal, paglutos, ug uban pang mga pagsulay. (Mateo 24:9; 2 Pedro 3:3) Usahay, mag-antos pa gani kita tungod sa atong mga isigkamagsisimba. Apan, kita nahibalo nga si Jehova makakita sa tanang butang, makadungog sa atong mga pag-ampo ug, sa hustong panahon, magtul-id sa mga butang uyon sa iyang kabubut-on. (Roma 12:17-21; Hebreohanon 4:16) Busa, inay kay mahadlok sa atong mga magsusupak, kita mahadlok sa Diyos ug maglaom nga kita iyang luwason. Sama kang David, kita dili manimalos, ni ikompromiso nato ang matarong nga mga prinsipyo aron malikayan ang pag-antos. Sa kataposan, kini mopatunghag kalipay. Apan sa unsang paagi?
9. Paghatag ug panig-ingnan kon sa unsang paagi ang pagkahadlok sa Diyos mahimong moresulta sa kalipay bisan pa sa paglutos.
9 “Nahunahunaan nako ang panig-ingnan sa usa ka inahan ug sa iyang anak nga dalagita kinsa tungod sa ilang Kristohanong neyutralidad midumili sa pagpalit ug mga kard sa politikanhong partido,” nag-asoy ang usa ka dugay nang misyonaryo sa Aprika. “Sila gidagmalan sa usa ka panon sa mga lalaki ug dayon gipapauli. Samtang sila naglakaw, naningkamot ang inahan sa paghupay sa iyang nagbakho nga anak, kinsa naglibog kon nganong kini nahitabo kanila. Dili sila malipayon niadtong tungora, apan hinlo ang ilang tanlag. Sa ulahi, sila nalipay kaayo nga gituman nila ang Diyos. Kon namalit pa sila ug mga kard sa politikanhong partido, malipay unta kaayo ang panon. Hatagan unta sila sa mga lalaki ug mga binotelyang ilimnon ug magsayawsayaw kini libot kanila hangtod makaabot sila sa ilang balay. Apan ang dalagita ug ang iyang inahan mag-antos gayod unta sa tumang kaguol tungod kay sila nahibalo nga sila mikompromiso.” Tungod sa ilang pagkahadlok sa Diyos, wala nila maagomi ang maong kagul-anan.
10, 11. Unsang maayong mga resulta ang mitungha tungod sa pagpakita sa usa ka babaye ug kahadlok sa Diyos?
10 Ang pagpakitag kahadlok sa Diyos moresulta usab sa kalipay sa dihang nag-atubang ug mga pagsulay nga naglangkit sa pagtahod sa pagkabalaan sa kinabuhi. Sa dihang nagsabak si Mary sa iyang ikatulong anak, giawhag siya sa doktor nga magpakuha. “Delikado ang imong kahimtang,” miingon ang doktor. “Mahimong motungha ang komplikasyon bisan kanus-a ug ikaw mamatay sulod sa 24 oras. Unya ang bata mamatay usab. Kon ugaling matawo man, walay garantiya nga ang bata mahimong normal.” Si Mary nagtuon sa Bibliya uban sa mga Saksi ni Jehova apan dili pa bawtismado. “Bisan pa niana,” matod ni Mary, “ako nakahukom na sa pag-alagad kang Jehova, ug ako determinado nga magmatinumanon kaniya, bisan unsay mahitabo.”—Exodo 21:22, 23.
11 Panahon sa iyang pagsabak, si Mary puliki kaayo sa pagtuon sa Bibliya ug sa pag-atiman sa iyang pamilya. Sa kataposan natawo ang bata. “Medyo naglisod ko pagpanganak kon itandi sa akong unang duha ka anak, apan wala kaayoy komplikasyon,” miingon si Mary. Ang pagkahadlok sa Diyos nakatabang kang Mary sa paghupot ug hinlong tanlag, ug wala madugay siya nabawtismohan. Samtang nagdako kanang bataa, siya usab nakakat-on sa pagkahadlok kang Jehova, ug siya sa pagkakaron nag-alagad na diha sa usa sa mga sangang buhatan sa mga Saksi ni Jehova.
‘Palig-ona ang Imong Kaugalingon Pinaagi Kang Jehova’
12. Sa unsang paagi ang pagkahadlok sa Diyos nagpalig-on kang David?
12 Ang pagkahadlok ni David kang Jehova wala lamang magpugong kaniya sa pagbuhat ug daotan. Kini nagpalig-on kaniya sa paghimog lig-ong desisyon ug paglihok nga maalamon ilalom sa malisod nga mga sirkumstansiya. Sulod sa usa ka tuig ug upat ka bulan, si David ug ang iyang mga tawo mikalagiw gikan kang Saul ug midangop sa Ziklag diha sa kabanikanhan sa mga Filistehanon. (1 Samuel 27:5-7) Kas-a sa dihang ang mga lalaki nanglakaw, ang nanulong nga mga Amalekanhon nagsunog sa siyudad ug nagbihag sa mga asawa, anak, ug mga panon sa kahayopan sa mga lalaki. Sa pagpauli ug pagkakita nila sa nahitabo, si David ug ang iyang mga tawo nanghilak. Ang kasubo kalit nga nahimong kasuko, ug ang mga tawo ni David naghisgot sa pagbato kaniya. Bisan tuod nasakit pag-ayo, si David wala mawad-ig paglaom. (Proverbio 24:10) Ang iyang kahadlok sa Diyos nagtukmod kaniya sa pagdangop kang Jehova, ug iyang ‘gipalig-on ang iyang kaugalingon pinaagi kang Jehova.’ Sa tabang sa Diyos, naapsan ni David ug sa iyang mga tawo ang mga Amalekanhon ug nabawi ang tanan nga gidala niini.—1 Samuel 30:1-20.
13, 14. Sa unsang paagi ang pagkahadlok sa Diyos nakatabang sa usa ka Kristohanon sa paghimog maayong mga desisyon?
13 Ang mga alagad sa Diyos karon nag-atubang usab ug mga situwasyon nga nagkinahanglag pagsalig kang Jehova ug kaisog sa paghimog lig-ong desisyon. Tagda si Kristina ingong pananglitan. Sa bata pa, si Kristina nagtuon sa Bibliya uban sa mga Saksi ni Jehova. Apan gusto niyang mahimong pianista sa konsiyerto, ug nahanite na siya sa maong propesyon. Dugang pa, maulaw siyang mosangyaw ug busa mahadlok nga modawat sa mga responsibilidad nga nalangkit sa pagpabawtismo. Samtang si Kristina nagpadayon sa pagtuon sa Pulong sa Diyos, anam-anam niyang nakita ang epekto niini sa iyang kinabuhi. Iyang nakat-onan ang pagkahadlok kang Jehova, ug iyang naamgohan nga gidahom ni Jehova nga ang iyang mga alagad mahigugma kaniya sa tibuok nilang kasingkasing, kaisipan, kalag, ug kusog. (Marcos 12:30) Kini nagtukmod kaniya sa pagpahinungod sa iyang kaugalingon kang Jehova ug pagpabawtismo.
14 Si Kristina nangayog tabang kang Jehova aron mouswag sa espirituwal. “Ako nahibalo nga ang kinabuhi sa usa ka pianista sa konsiyerto naglangkit ug kanunayng pagbiyahe ug mga kontrata nga motugtog ug mga 400 ka konsiyerto kada tuig,” miingon si Kristina. “Busa nakahukom ako nga magtudlo na lang aron makasuportar sa akong kaugalingon sa pinansiyal ug makaalagad ingong bug-os-panahong ebanghelisador.” Nianang panahona, si Kristina naeskedyul na nga mohimo sa iyang unang pasundayag sa publiko diha sa labing iladong konsiyertohanan sa iyang nasod. “Ang akong unang pasundayag sa publiko nahimong akong kataposang konsiyerto,” miingon siya. Sa ngadtongadto, si Kristina naminyo sa usa ka Kristohanong ansiyano. Karon, silang duha nag-alagad na diha sa usa sa mga sangang buhatan sa mga Saksi ni Jehova. Malipayon siya nga si Jehova naghatag kaniya ug kalig-on sa paghimog hustong mga desisyon ug nga siya makagamit na sa iyang panahon ug kusog diha sa pag-alagad kang Jehova.
Usa ka Bililhong Panulondon
15. Unsay gustong ihatag ni David sa iyang mga anak ingong panulondon, ug sa unsang paagi gibuhat niya kana?
15 “Umari kamo, mga anak, pamati kanako,” misulat si David. “Ang pagkahadlok kang Jehova maoy itudlo ko kaninyo.” (Salmo 34:11) Ingong amahan, si David determinado nga ihatag sa iyang mga anak ang usa ka bililhong panulondon nga iyang ikabilin—ang tiunay, timbang, maayo nga matang sa pagkahadlok kang Jehova. Pinaagi sa mga pulong ug mga buhat, gihulagway ni David si Jehova, dili ingong estrikto ug makahahadlok nga Diyos, nga magpunayg bantay kon kinsay nakalapas sa Iyang balaod, kondili usa ka mahigugmaon, mahingawaon, ug mapasayloon nga Amahan sa Iyang yutan-ong mga anak. “Kasaypanan kinsay makasubay niini?” nangutana si David. Unya, sa pagpakita sa iyang pagsalig nga si Jehova dili magpunayg bantay sa atong mga sala, siya midugang: “Ipahayag ako nga inosente sa tinagong kasal-anan!” Segurado si David nga kon siya maningkamot pag-ayo, ang iyang mga pulong ug mga hunahuna mahimong dalawaton kang Jehova.—Salmo 19:12, 14, Byington.
16, 17. Sa unsang paagi matudloan sa mga ginikanan ang ilang mga anak sa pagkahadlok kang Jehova?
16 Si David usa ka panig-ingnan alang sa mga ginikanan karon. “Ang among mga ginikanan nagmatuto kanamo sa paagi nga kami nalipay nga anaa sa kamatuoran,” miingon si Ralph, kinsa duyog sa iyang manghod nga lalaki nag-alagad diha sa usa ka sangang buhatan sa mga Saksi ni Jehova. “Sa bata pa kami, ila kaming iapil sa ilang mga panaghisgot mahitungod sa mga kalihokan sa kongregasyon, ug kami nahimong sama kanila ka madasigon bahin sa kamatuoran. Kanunay nilang gisilsil kanamo nga kami makahimog maayong mga butang diha sa pag-alagad kang Jehova. Sa pagkatinuod, sulod sa pipila ka tuig ang among pamilya nagpuyo sa usa ka nasod diin may dakong panginahanglan sa mga magmamantala sa Gingharian ug mitabang sa pagpanukod ug bag-ong mga kongregasyon.
17 “Ang nakatabang kanamo sa pagpabilin sa hustong dalan dili ang daghan kaayong estriktong mga lagda kondili ang panig-ingnan sa among mga ginikanan, nga para kanila si Jehova maoy tinuod ug maluloton ug maayo kaayo nga Diyos. Sila nagtinguha sa pagkaila pa kang Jehova ug sa pagpahimuot kaniya, ug kami nakakat-on gikan sa ilang tiunay nga pagkahadlok sa Diyos ug gugma alang kaniya. Bisan sa dihang kami masayop, wala kami pabatia sa among mga ginikanan nga wala na kami higugmaa ni Jehova; ni sila masuk-anong naghatag ug wala-kinahanglanang mga pagdili kanamo. Kasagaran, sila kalmadong makig-estorya kanamo, si Mama usahay maghilak, nga maningkamot sa pagtugkad sa among kasingkasing. Ug kadto milampos. Among nakat-onan pinaagi sa mga pulong ug mga buhat sa among mga ginikanan nga ang pagkahadlok kang Jehova maoy maayo kaayong butang ug ang pagkahimong usa sa iyang mga Saksi makalilipay, dili usa ka kabug-at.”—1 Juan 5:3.
18. Unsay atong mabatonan pinaagi sa pagkahadlok sa matuod nga Diyos?
18 Lakip sa “kataposang mga pulong ni David,” atong mabasa: “Kon ang nagamando sa katawhan matarong, nga nagamando diha sa kahadlok sa Diyos, nan kini sama sa kahayag sa kabuntagon, sa dihang ang adlaw mosidlak.” (2 Samuel 23:1, 3, 4) Si Solomon, ang anak ug manununod ni David, dayag nga nakasabot sa maong punto, kay iyang gihangyo si Jehova nga hatagan siya ug “usa ka kasingkasing nga masinugtanon” ug katakos “sa pag-ila tali sa maayo ug sa daotan.” (1 Hari 3:9) Nasabtan ni Solomon nga ang pagkahadlok kang Jehova moresulta sa kaalam ug kalipay. Sa ulahi, iyang gisumaryo ang basahon sa Ecclesiastes niining mga pulonga: “Kini ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo. Kay pagadad-on sa matuod nga Diyos ang tanang matang sa buhat ngadto sa paghukom maylabot sa tagsatagsa ka tinagong butang, maayo man kini o daotan.” (Ecclesiastes 12:13, 14) Kon sundon nato kanang tambaga, sa pagkatinuod atong makaplagan nga “ang sangpotanan sa pagpaubos ug pagkahadlok kang Jehova” dili lamang kaalam ug kalipay kondili “bahandi ug himaya ug kinabuhi” usab.— Proverbio 22:4.
19. Unsay makapaarang kanato sa pagsabot sa “pagkahadlok kang Jehova”?
19 Gikan sa mga panig-ingnan sa Bibliya ug sa modernong-adlaw nga mga eksperyensiya, atong masabtan nga ang hustong pagkahadlok sa Diyos adunay positibong bahin sa kinabuhi sa matuod nga mga alagad ni Jehova. Dili lang kay ang maong kahadlok mopugong kanato sa pagbuhat kon unsay makapasuko sa atong langitnong Amahan kondili makahatag usab kini kanato ug kaisog sa pag-atubang sa atong mga kaaway ug kusog sa paglahutay sa mga pagsulay ug sa mga kalisdanan nga atong maatubang. Busa, bata man kita o tigulang, magkugi kita sa pagtuon sa Pulong sa Diyos, mamalandong sa atong nakat-onan, ug makigsuod kang Jehova pinaagi sa regular ug kinasingkasing nga mga pag-ampo. Sa pagbuhat niana, dili lamang nato makaplagan “ang mismong kahibalo sa Diyos” kondili masabtan usab nato “ang pagkahadlok kang Jehova.”—Proverbio 2:1-5.
[Mga footnote]
a Ang mga ngalan giusab.
b Lagmit usa kini sa mga kasinatian nga nagdasig kang David sa pagkomposo sa Salmo 57 ug 142.
Makapatin-aw Ka Ba?
Sa unsang paagi ang pagkahadlok sa Diyos
• makatabang sa usa nga maulian sa grabeng pagpakasala?
• makahatag ug kalipay ilalom sa mga pagsulay ug mga paglutos?
• makapalig-on kanato sa pagtuman sa kabubut-on sa Diyos?
• mahimong bililhong panulondon alang sa atong mga anak?
[Mga Pangutana sa Pagtuon]
[Hulagway sa panid 26]
Ang pagkahadlok kang Jehova nakapugong kang David sa pagpatay kang Haring Saul
[Mga hulagway sa panid 29]
Ang pagkahadlok sa Diyos maoy bililhong panulondon nga ikahatag sa mga ginikanan sa ilang mga anak