Sugilanon sa Kinabuhi

Sa Kataposan Nagkahiusa ra Gayod ang Among Pamilya!

SUMALA SA GIASOY NI SUMIKO HIRANO

Akong nakaplagan ang labing maayong paagi sa pagkinabuhi, ug gusto nakong matagamtam kana uban sa akong bana. Kuwarentay-dos pa ka tuig ang milabay usa kana nahitabo.

NAMINYO kami sa akong bana sa 1951, sa dihang ako nag-edad ug 21 anyos. Sulod sa upat ka tuig, nakabaton kamig duha ka anak nga lalaki, ug gibati nakong malipayon kaayo ang akong kinabuhi.

Usa ka adlaw niana sa 1957, gisultihan ako sa akong magulang nga babaye nga adunay usa ka misyonarya sa mga Saksi ni Jehova nga tigduawan niya. Bisag usa ka Budhista, ang akong igsoong babaye nagtuon sa Bibliya uban sa misyonarya ug nagdasig kanako sa pagtuon usab sa Bibliya. Misugot ako. Ako nagtambongan sa simbahan sa Protestante, ug ako naghunahuna nga akong ikapakita ang sayop sa mga Saksi ni Jehova.

Wala madugay, akong nakaplagan kon unsa diay ka diyutay ang akong nahibaloan sa Bibliya. Kinahanglan nakong pangutan-on ang misyonarya, “Kinsa man si Jehova?” Wala gayod nako madunggi nga gigamit kanang ngalana sa among simbahan. Ang misyonarya nga si Daphne Cooke (Pettitt, sa naminyo), nagpabasa kanako sa Isaias 42:8, nga klarong nag-ingon nga Jehova ang ngalan sa Labing Gamhanan nga Diyos. Gitubag ni Daphne ang tanan nakong mga pangutana pinaagi sa Bibliya.

Ang maong mga pangutana gisukna usab nako sa among ministro. Siya miingon kanako: “Sala ang pagsuknag mga pangutana. Tuo na lang kon unsay gisulti kanimo.” Bisag wala ko magtuo nga sala ang pagsuknag mga pangutana, sulod sa unom ka bulan ako nagasimba matag Dominggo sa buntag ug nagatambong sa mga tigom sa mga Saksi ni Jehova sa hapon.

 Ang Epekto Niini Diha sa Akong Kaminyoon

Ako nalipay sa akong nakat-onan sa Bibliya, ug ako kanang gipaambit sa akong bana, si Kazuhiko. Human sa matag pagtuon ug tigom, ako siyang sultihan sa akong nakat-onan. Tungod niini, medyo nagubot ang among relasyon. Dili siya gusto nga mahimo ko nga usa sa mga Saksi ni Jehova. Apan ang pagtuon sa Bibliya makapatagbaw kaayo nga tungod niana akong gipadayon ang akong pagtuon ug ang pagpakig-uban sa mga Saksi.

Sa dili pa mobiya sa balay sa gabii panahon sa tigom, akong andamon ang paboritong pagkaon ni Kazuhiko, apan siya mokaon sa restawran. Sa pagpauli nako gikan sa tigom, maglain ang iyang buot ug di ko niya tinggan. Human sa duha o tulo ka adlaw, moarang-arang ang iyang tinamdan, apan unya panahon na usab sa sunod nga tigom.

Niadtong higayona, nasakit ako ug tesis, ug ubay-ubay na sa mga paryente sa akong bana ang namatay tungod niining sakita. Naguol pag-ayo si Kazuhiko ug giingnan ko niya nga kon mamaayo ko, mahimo nako bisan unsay akong gusto. Ang ako lang gihangyo mao nga dili unta niya babagan ang akong pagtambong sa senemanang mga tigom. Miuyon siya.

Gidangtag unom ka bulan usa ko naayo, ug sulod nianang higayona akong gitun-an pag-ayo ang Bibliya. Nangita kog sayop diha sa mga pagtulon-an sa mga Saksi, nga naghunahunang moundang ko sa pagtuon kon makakaplag kog bisan usa lang ka sayop. Wala koy nakaplagan. Naklaro hinuon nako ang mga sayop sa Simbahan sa Protestante. Akong nakat-onan ang gugma ug hustisya ni Jehova ug akong nasabtan ang kaayohan sa pagkinabuhi subay sa iyang mga balaod.

Sa naulian ko, ang akong bana mituman sa iyang saad ug wala na mosupak sa akong pagtambong sa mga tigom. Ako padayong miuswag sa espirituwal, ug sa Mayo 1958, ako nabawtismohan ingong usa sa mga Saksi ni Jehova. Ako nangandoy nga moduyog kanako ang akong pamilya sa pagsimba sa matuod nga Diyos.

Pagtabang sa Akong mga Anak sa Espirituwal nga Paagi

Ang akong mga anak nga lalaki kanunayng mokuyog kanako sa mga tigom ug sa buluhatong pagsangyaw, apan dihay pipila ka butang nga nakapakombinsir kanako nga nag-uswag ang ilang kahibalo sa Bibliya. Usa ka adlaw niana, si Masahiko, ang akong sayis-anyos nga anak lalaki, nagduladula sa gawas sa balay. Nakadungog akog kasaba nga lanog kaayo ug dihay misiyagit. Ang among silingan midali pag-adto sa among balay, ug misinggit nga nabanggaan ang akong anak. Patay na kaha siya? Akong gipugos ang akong kaugalingon nga mokalma samtang nagdagan paingon sa gawas. Sa akong pagkakita sa iyang naguba nga bisekleta ako nangurog, apan akong nakita nga nagpaingon siya kanako nga halos wala ra maunsa. Sa iyang paggakos kanako, siya miingon, “Ma, gitabangan ko ni Jehova no?” Sa dihang akong nakita nga buhi siya ug akong nadungog kadtong nindot nga mga pulong, mitulo ang akong mga luha.

Sa laing adlaw, diha sa ministeryo nakahibalag kamig usa ka tigulang nga lalaki nga misinggit: “Unsa man kanang imong gibuhat nga nagguyod-guyod nianang bata? Kaluoy baya niya.” Sa wala pa ako makasulti, ang akong otso-anyos nga anak nga si Tomoyoshi miingon: “Nong, wala baya ko pugsa ni Mama nga mosangyaw. Nagsangyaw ko kay gusto kong moalagad kang Jehova.” Ang tigulang  nga lalaki igo lang mitutok ug wala makatingog.

Sa espirituwal nga diwa, ang akong mga anak maoy mga ilo sa amahan. Nag-agad kanako ang pagtudlo kanila sa mga kamatuoran sa Bibliya, bisag ako mismo daghan pag angayng kat-onan. Akong giugmad ang akong gugma, pagtuo, ug kadasig ug ako naningkamot sa paghatag kanilag maayong panig-ingnan. Adlaw-adlaw, pasalamatan nako si Jehova atubangan sa akong mga anak. Suginlan nako sila sa akong mga eksperyensiya sa pagsangyaw. Kini nakadasig kanila. Sa dihang gipangutana sila sa ulahi kon nganong sila nagpayunir, o bug-os-panahong ministro sa mga Saksi ni Jehova, sila mitubag, “Among nakita nga malipayon si Mama sa pag-alagad ingong payunir, ug gusto namong magmalipayon usab.”

Nag-amping ko nga dili magsultig negatibo bahin sa ilang amahan o bahin kang bisan kinsa diha sa kongregasyon. Akong naamgohan nga ang negatibong estorya makadaot sa akong mga anak. Malagmit nga mawad-an silag pagtahod sa tawo nga gilibak mao man usab sa nagsulti niini.

Pagbuntog sa mga Babag sa Pag-uswag

Sa 1963, ang among pamilya kinahanglang mobalhin sa Taiwan tungod sa trabaho sa akong bana. Giingnan ko niya nga kon mosangyaw ko sa komunidad sa mga Hapon didto, motungha ang mga suliran. Papaulion kami sa Japan, ug mopatungha kanag problema sa ilang kompaniya. Gusto niyang ipahilayo kami sa mga Saksi.

Sa Taiwan, diin ang tanang tigom maoy Ininsek, ang mga Saksi mainitong nag-abiabi kanamo. Ako nakadesisyon sa pagtuon ug Ininsek aron makasangyaw sa mga molupyo didto inay sa mga Hapon. Nianang paagiha, malikayan nako ang mga suliran nga gihisgotan sa akong bana.

Ang among panaghigalaay uban sa mga Saksi sa Taiwan nakapalig-on kanamo. Ang usa ka magtiayong misyonaryo, si Harvey ug Kathy Logan, dakog natabang kanamo. Si Brader Logan nagsilbing espirituwal nga amahan sa akong mga anak. Iyang gipakita kanila nga ang pag-alagad kang Jehova dili kay walay-kalipay, higpit nga pagkinabuhi. Ako nagtuo nga didto sa Taiwan nakadesidir ang akong mga anak nga moalagad kang Jehova.

Si Tomoyoshi ug Masahiko nagtungha sa Amerikanhong eskuylahan, diin sila nakakat-og Iningles ug Ininsek. Ang maong edukasyon nagsangkap kanila alang sa umaabot nga pag-alagad ingong mga ministro sa matuod nga Diyos, si Jehova. Ako mapasalamaton kaayo kang Jehova kay imbes maglisod mi niadtong panahona, nahimo man hinuon kadto nga panahon sa dumalayong panalangin. Human sa tulo-ug-tunga ka halandomong mga tuig sa Taiwan, ang among pamilya mibalik sa Japan.

Niadtong panahona, ang akong mga anak tin-edyer na ug gusto nang mag-independente. Ako migugol ug daghang oras sa paghisgot uban kanila sa mga prinsipyo sa Bibliya, ug si Jehova mitabang kanila nianang malisod nga panahon. Human sa  hayskul, si Tomoyoshi nagpayunir. Siya nakatabang ug upat ka tawo nga mabawtismohan sulod sa unang mga tuig sa iyang pagpayunir. Gisundog ni Masahiko ang panig-ingnan sa iyang magulang ug nagpayunir usab siya pagkahuman sa hayskul. Siya nakatabang ug upat ka batan-on nga mahimong Saksi sa iyang unang upat ka tuig sa pagpayunir.

Gipanalanginan pa gayod ug dugang ni Jehova ang akong mga anak. Gitun-an ni Tomoyoshi ang bana sa babaye nga akong natabangan sa pagkat-on sa mga kamatuoran sa Bibliya. Ang ilang duha ka anak nga babaye na-Saksi usab. Sa ulahi, giminyoan ni Tomoyoshi ang magulang, si Nobuko, ug giminyoan ni Masahiko ang manghod, si Masako. Si Tomoyoshi ug Nobuko nag-alagad karon sa tibuok-kalibotang hedkuwarter sa mga Saksi ni Jehova sa Brooklyn, New York. Ug si Masahiko ug Masako maoy mga misyonaryo sa Paraguay.

Inanayng Kausaban sa Akong Bana

Ang akong bana daw walay interes sa among pagtuo niadtong mga tuiga, apan may mga timailhan nga nagakausab siya. Sa dihang ang uban misupak kanako, iyang gidepensahan ang akong pagtuo ug sa pagkatinuod iyang gisuportahan ang mga kamatuoran sa Bibliya nga wala niya mamatikdi. Siya nagtaganag materyal nga tabang sa mga Saksi nga nanginahanglan. Sa iyang mubong pakigpulong panahon sa kasal sa among ikaduhang anak, siya miingon: “Ang pagtudlo sa mga tawo sa hustong paagi sa pagkinabuhi mao ang kinamaayohang buluhaton, ug ang kinalisoran usab. Ang akong mga anak ug ang ilang mga asawa mipili niining kinalisorang dalan ingong ilang karera. Palihog tabangi sila.” Kining tanan nagpahunahuna kanako nga moduyog gayod siya kanamo sa pagsimba kang Jehova.

Akong gihikay nga makauban niya ang mga Saksi diha sa among balay. Akong dapiton si Kazuhiko sa Kristohanong mga tigom ug mga asembliya mao man usab sa Memoryal sa kamatayon ni Kristo. Kon itugot sa iyang trabaho, siya motambong niini, bisag siya nagpanuko. Daghang higayon nga gibati nako nga tingali mosugot na siya nga magtuon sa Bibliya, busa dapiton nako ang Kristohanong mga ansiyano sa among balay. Apan mobalibad siya. Ako nahibulong kon unsay nakababag.

Ang mga pulong ni apostol Pedro misantop sa akong hunahuna: “Kamong mga asawa, magpasakop kamo sa inyong mga bana, aron nga, kon aduna may dili-masinugtanon sa pulong, sila makabig nga walay pulong pinaagi sa panggawi sa ilang mga asawa, tungod kay mga saksing-nakakita sa inyong maputling panggawi uban ang halawom nga pagtahod.” (1 Pedro 3:1, 2) Ako nakaamgo nga wala nako kanunayng masunod kanang tambaga. Aron bug-os makasunod niana, gikinahanglan nga pauswagon nako ang akong espirituwalidad.

Sa 1970, ako nagpayunir aron mouswag pa ingong espirituwal nga tawo. Milabay ang napulo ka tuig, dayon 20 ka tuig. Apan, wala gihapon koy nakitang espirituwal nga pag-uswag diha sa akong bana. Ang usa ka estudyante sa Bibliya kas-a miingon: “Lagmit lisod motabang sa ubang tawo kon ang imong bana dili gani nimo matabangan.” Makapaluya kadto, apan wala ako moangka.

Sa ulahing bahin sa katuigan sa 1980, ang among mga ginikanan tigulang na kaayo. Ang pag-atiman kanila ug ang pagbuhat sa uban pa nakong mga buluhaton makapakapoy ug makapapit-os. Sa daghang katuigan, misupak sila sa akong pagtuo kang Jehova, apan gipakitaan nako silag gugma kutob sa akong maarangan. Una mamatay ang akong 96-anyos nga inahan, siya miingon kanako, “Sumiko, kon mabanhaw ko, mosulod ko sa inyong relihiyon.” Ako nakaamgo nga wala diay makawang ang akong mga paghago.

Namatikdan sa akong bana ang tanan nakong gibuhat alang sa akong mga ginikanan. Ingong apresasyon niana, siya misugod sa pagtambong sa mga tigom nga regular. Gibuhat niya kana sa pipila ka tuig apan wala gayod siya miuswag sa espirituwal. Ako padayong naningkamot sa pagpahimuot kaniya. Akong dapiton sa pagpangaon ang iyang mga higala ug bisan ang iyang langyaw nga mga kauban sa trabaho sa among balay. Ubanan nako siya sa paglingawlingaw. Sa dihang gipaubsan ngadto sa 70 ang binulan nga kinahanglanong oras alang sa payunir nga pag-alagad, ako migugol ug mas daghang panahon uban kaniya.

Ang Pagretiro Nagdalag Kausaban

Ang akong bana miretiro sa 1993. Ako naghunahuna niadtong panahona nga makagahin na gayod siyag panahon sa pagtuon sa Bibliya. Apan siya miingon nga usa ka pasipala kon moalagad  siya sa Diyos tungod lang kay makalugar na siya. Hinuon miingon siya nga moalagad siya sa Diyos sa dihang palihokon na siya sa iyang kasingkasing sa pagbuhat niana ug nga dili nako siya pugson.

Usa ka adlaw niana gisukna ako ni Kazuhiko kon ako na bang igugol ang nahibiling bahin sa akong kinabuhi alang kaniya. Nasakitan ako niini, tungod kay ako nang gibuhat ang tanan nakong maarangan alang kaniya sukad pa nga naminyo kami. Ako naningkamot pag-ayo aron malipay siya, apan gibati niya nga ako labawng nagkinabuhi alang kang Jehova kay kaniya. Human sa pipila ka panahon nga pagpalandong niini, giingnan nako siya nga dili na ako makahimo ug labaw pa kay sa akong ginahimo. Apan kon iya akong duyogan sa akong ginabuhat, makasugod kamig bag-ong kinabuhi nga magkauban dili lang sa moabot nga pipila ka tuig kondili sa walay kataposan. Sulod sa pipila ka adlaw, ang akong bana wala magtingog-tingog. Sa kataposan siya nangutana, “Nan, mahimo ba nga tun-an ko nimo sa Bibliya?” Sa matag higayon nga akong mahinumdoman kadtong mga pulonga, ang akong kasingkasing molukso sa kalipay.

Sa sinugdanan, akong gihikay nga ang akong bana madumalahan ug pagtuon sa usa ka Kristohanong ansiyano, apan giingnan ko niya, “Dili ko magtuon kon dili ikaw ang magdumala.” Busa gisugdan namo ang adlaw-adlaw nga pagtuon sa Bibliya. Sanglit ako anaa sa Ininsek nga kongregasyon ug ang akong bana larino niana nga pinulongan, Ininsek ang among gigamit sa pagtuon. Nabasa usab namo ang entero Bibliya nga wala dangtig usa ka tuig.

Nianang panahona, ang usa ka ansiyano sa Ininsek nga kongregasyon, uban sa iyang asawa, nagpakitag interes kanamo ingong magtiayon. Bisag mas bata sila kay sa among mga anak, nahimo namo silang tinuod nga mga higala. Daghan pang mga Saksi ang nagpakita usab ug linaing pagtagad sa akong bana. Sila nag-abiabi kanamo ug nakigsulti kang Kazuhiko nga morag siya ilang amahan. Kana nakapalipay kaayo kaniya.

Usa ka adlaw niana, dihay gihatod sa balay nga usa ka imbitasyon sa kasal diha sa kongregasyon, nga giadres sa akong bana. Ang maong pag-ila ingong ulo sa pamilya nakatandog pag-ayo kaniya, ug siya mihukom nga motambong. Wala madugay, siya mahigalaon na sa mga Saksi ug nagtuon na sa Bibliya uban sa usa ka Kristohanong ansiyano. Ang iyang pagtuon sa Bibliya, pagtambong sa tigom, ug ang gugma sa kongregasyon nakatabang kaniya nga mouswag pag-ayo sa espirituwal.

Usa ka Nahiusang Pamilya sa Kataposan

Sa Disyembre 2000, ang akong bana nabawtismohan ingong simbolo sa iyang pagpahinungod kang Jehova. Ang akong mga anak ug ang ilang mga asawa mipauli gikan sa halayo aron sa pagsaksi niining modernong-adlaw nga “milagro.” Kana mikabat ug 42 ka tuig, apan sa kataposan nagkahiusa ra gayod ang among pamilya.

Karon, kada buntag among hisgotan ang teksto nianang adlawa ug basahon ang Bibliya. Adlaw-adlaw, kami malipayong maghisgot sa espirituwal nga mga butang ug makigbahin sa espirituwal nga mga kalihokan. Ang akong bana usa na ka ministeryal nga alagad sa kongregasyon karon, ug di pa dugay siya mihatag ug publikong pakigpulong sa Bibliya sa Ininsek. Ako nagpasalamat kang Jehova nga iya kaming gihiusa. Uban sa tanang minahal nakong pamilya ug mga higala, ako naglantaw sa umaabot sa pagtuboy sa iyang ngalan ug pagkasoberano sa walay kataposan.

[Mapa sa panid 13]

(Alang sa aktuwal nga pagkahan-ay, tan-awa ang publikasyon)

CHINA

DEMOCRATIC PEOPLE’S REPUBLIC OF KOREA

REPUBLIC OF KOREA

Sea of Japan

JAPAN

Tokyo

East China Sea

TAIWAN

Taipei

[Hulagway sa panid 12]

Uban sa akong pamilya sa 1958, ang tuig nga ako nabawtismohan

[Mga hulagway sa panid 13]

Kami gilig-on sa espirituwal sa mga higala sama nila ni Harvey ug Kathy Logan sa dihang kami mibalhin gikan sa Tokyo ngadto sa Taipei

[Hulagway sa panid 15]

Karon ang akong pamilya nahiusa na diha sa matuod nga pagsimba