Tawhanong Dignidad—Mahimong Mabatonan sa Tanan

“Kita kinahanglang magtukod ug usa ka bag-ong kalibotan—kanang mas maayong kalibotan—usa ka kalibotan nga nagtahod sa tinuod nga dignidad sa tawo.”—PRESIDENTE SA AMERIKA NGA SI HARRY TRUMAN, SAN FRANCISCO, CALIFORNIA, T.B.A., ABRIL 25, 1945.

SAMA sa kadaghanang tawo sa mga tuig human sa Gubat sa Kalibotan II, si Presidente Truman nagtuo nga ang mga tawo makakat-on gikan sa kasaysayan ug makahimo sa pagtukod ug “usa ka bag-ong kalibotan” diin ang dignidad mabatonan sa tanan. Ikasubo, gipamatud-an sa modernong kasaysayan nga lahi ang nagakahitabo. Ang “tinuod nga dignidad sa tawo” padayong giyatakan tungod kay ang gamot sa problema nagsukad, dili sa tawo, kondili sa bantogang kaaway sa tawo.

Ang Gamot sa Problema

Gipaila sa Bibliya kining maong kaaway nga si Satanas nga Yawa, usa ka daotan kaayong espiritung linalang kinsa sukad sa pagsugod sa kasaysayan sa tawo naghagit sa katungod sa Diyos sa pagmando. Sukad sa pagpakigsulti ni Satanas kang Eva sa tanaman sa Eden, ang iyang tumong mao na ang pagpatalikod sa mga tawo gikan sa pag-alagad sa ilang Maglalalang. (Genesis 3:1-5) Handurawa ang malaglagong mga epekto kang Adan ug Eva sa dihang sila nagpadala sa mga panghaylo sa Yawa! Ang dihadihang epekto sa ilang pagsupak sa balaod sa Diyos labot sa gidiling bunga mao ang ‘pagtago nila gikan sa nawong ni Jehova nga Diyos.’ Ngano? Si Adan miadmitir: “Ako nahadlok tungod kay ako hubo ug busa ako nagtago.” (Genesis 3:8-10) Nausab ang relasyon ni Adan sa iyang langitnong Amahan  ug ang iyang panglantaw sa iyang kaugalingon. Siya naulaw ug nagpanuko sa pagpakigsulti kang Jehova.

Nganong gusto man sa Yawa nga madaot ang dignidad ni Adan? Tungod kay ang tawo gilalang sa larawan sa Diyos, ug malipay si Satanas nga magtan-aw kaniya nga mogawi sa paagi nga madaot ang iyang pagpabanaag sa himaya sa Diyos. (Genesis 1:27; Roma 3:23) Kini makatabang sa pagpatin-aw kon nganong ang mga buhat sa pagpakaulaw kaylap kaayo sa tibuok kasaysayan sa tawo. Ingong “diyos niini nga sistema sa mga butang,” si Satanas nagpakaylap niining espirituha “sulod sa panahon nga ang tawo nagmando sa tawo alang sa iyang kadaotan.” (2 Corinto 4:4; Ecclesiastes. 8:9; 1 Juan 5:19) Nagpasabot ba kini nga dili na gayod mabatonan pa ang tinuod nga dignidad sa tawo?

Gihatagan ni Jehova ug Dignidad ang Iyang mga Linalang

Handurawa pag-usab ang kahimtang sa tanaman sa Eden sa wala pa si Adan ug Eva makasala. Sila dihay dagayang pagkaon, makapatagbawng trabaho, ug paglaom nga sila ug ang ilang mga anak mabuhing himsog sa walay kataposan. (Genesis 1:28) Ang tanang bahin sa ilang paglungtad nagpasiugda sa mahigugmaon, hamiling katuyoan sa Diyos alang sa katawhan.

Nausab ba ang panglantaw ni Jehova sa tawhanong dignidad sa dihang nakasala si Adan ug Eva? Wala. Siya nagpakitag konsiderasyon sa ilang gibating kaulaw tungod sa ilang pagkahubo. Sa kamahigugmaon, ang Diyos naghimog “hatag-as nga mga besti nga panit” aron ipuli sa tapis nga gikan sa mga dahon sa igos nga ilang gitahi para sa ilang kaugalingon. (Genesis 3:7, 21) Inay pasagdan sila sa ilang gibating kaulaw, ang Diyos nagtratar kanila nga may dignidad.

Sa ulahi, sa dihang nakiglabot sa nasod sa Israel, si Jehova nagpakitag kahingawa sa mga ilo, balo, ug sa langyawng mga pumoluyo—mga sakop sa katilingban nga sagad abusohan. (Salmo 72:13) Pananglitan, sa dihang mag-ani sa ilang mga tanom nga lugas, olibo, ug parasan, ang mga Israelinhon gisugo nga dili na balikon ang nahibilin. Hinunoa, ang Diyos nagbaod nga ang mga nahibilin ihatag sa ‘langyaw nga pumoluyo, sa batang ilo-sa-amahan ug sa babayeng balo.’ (Deuteronomio 24:19-21) Kon tumanon, kini nga mga balaod magwagtang sa pagpakilimos ug maghatag ug dungganong trabaho bisan sa mga timawa.

Gihatagan ni Jesus ug Dignidad ang Uban

Sa dinhi pa sa yuta, ang Anak sa Diyos, si Jesu-Kristo, nagpakitag kaikag sa dignidad sa uban. Pananglitan, didto sa Galilea, siya giduol sa usa ka tawo nga grabeng gisanla. Sumala sa Moisesnong Balaod, aron dili makatakod sa uban, ang tawong sanlahon kinahanglang mosinggit: “Mahugaw, mahugaw!” (Levitico 13:45) Apan, kining tawhana wala mosinggit ug pasidaan sa dihang miduol siya kang Jesus. Hinunoa, siya mihapa ug nagpakiluoy kang Jesus: “Ginoo, kon buot mo lamang, ikaw makahinlo kanako.” (Lucas 5:12) Unsay  reaksiyon ni Jesus? Wala kasab-i ni Jesus ang tawo tungod sa paglapas sa Balaod, ni gilabyan o gilikayan Niya ang maong tawo. Hinunoa, gihatagan niyag dignidad ang sanlahon pinaagi sa paghikap kaniya nga nag-ingon: “Buot ko. Mamahinlo ka.”—Lucas 5:13.

Sa laing mga higayon, gipakita ni Jesus nga makaayo siya ug mga masakiton bisag dili mohikap kanila—usahay gikan sa halayo. Apan, niining tungora, siya mipili sa paghikap sa tawo. (Mateo 15:21-28; Marcos 10:51, 52; Lucas 7:1-10) Tungod kay ang tawo ‘napunog sanla,’ walay duhaduha nga wala gayoy nakahikap kaniya nga laing tawo sa taastaas nang panahon. Pagkamakapahupay gayod alang kaniya nga nahikap pag-usab! Tino nga ang gidahom lang niya mao nga mamaayo siya sa iyang sanla. Apan, ang paagi sa pag-ayo ni Jesus kaniya nakapasig-uli ug mas labaw pa—ang iyang dignidad. Makataronganon ba ang pagtuo nga ang maong pagkamahunahunaon sa dignidad sa uban mahimong maglungtad sa katilingban karon? Kon mao, sa unsang paagi kini ikapakita?

Ang Lagda nga Makahatag ug Dignidad sa Uban

Gipahayag ni Jesus ang giisip sa kadaghanan nga mao ang labing iladong instruksiyon maylabot sa tawhanong mga relasyon: “Busa, ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Kining Bulawanong Lagda, sumala sa sagad nga pagtawag niini, magpalihok sa mga tawo sa pagtahod sa usag usa.

Ingon sa gipakita sa kasaysayan, dili sayon ang pagpadapat niini nga lagda—sagad sukwahi kaayo ang mahitabo. “Kaniadto malingaw gayod ako sa pagpakaulaw sa uban,” matod pa sa usa ka tawo nga atong nganlag Harold. “Pinaagig pipila lang ka pulong, ako silang palagoton, pakaulawan, ug usahay pahilakon.” Apan dihay panghitabo nga  nakapausab sa paagi sa pagtratar ni Harold sa uban. “Ubay-ubayng mga Saksi ni Jehova ang misugod pagduaw kanako. Sa paghinumdom, maulaw akong maghunahuna sa akong gipanulti kanila ug sa paagi sa akong pagtratar usahay kanila. Apan wala gayod sila mohunong, ug sa hinayhinay, ang mga kamatuoran sa Bibliya nagtandog sa akong kasingkasing ug nagtukmod kanako sa pag-usab.” Sa pagkakaron, si Harold nag-alagad na ingong usa ka ansiyano sa Kristohanong kongregasyon.

Si Harold maoy buhing pamatuod nga “ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Hebreohanon 4:12) Ang Pulong sa Diyos adunay gahom sa pagtandog sa kasingkasing sa tawo ug pag-usab sa iyang hunahuna ug batasan. Kini mao ang yawi sa paghatag ug dignidad sa uban—ang kinasingkasing nga tinguha sa pagtabang inay kay pagpasakit sa uban, sa pagpasidungog imbes pagpakaulaw sa uban.—Buhat 20:35; Roma12:10.

Tinuod nga Dignidad Napasig-uli

Tungod niining maong tinguha, buot sa mga Saksi ni Jehova nga makigsulti sa uban bahin sa kahibulongang paglaom nga gitanyag sa Bibliya. (Buhat 5:42) Wala nay mas maayong paagi sa pagpakitag pagtahod ug paghatag ug dignidad sa atong isigkatawo kay sa pagpaambit kaniya sa “maayong balita sa butang nga mas maayo.” (Isaias 52:7) Lakip sa “butang nga mas maayo” mao ang pagsul-ob sa “bag-ong pagkatawo,” nga mopatay sa “makadaot nga tinguha” sa pagpakaulaw sa uban. (Colosas 3:5-10) Kini naglakip usab sa katuyoan ni Jehova nga wagtangon sa dili madugay ang mga kahimtang ug kinaiya nga naghikaw sa tawo sa iyang dignidad, uban sa tighulhog nga si Satanas nga Yawa. (Daniel 2:44; Mateo 6:9, 10; Pinadayag 20:1, 2, 10) Nianang panahona lamang, sa dihang ang yuta “mapuno sa kahibalo kang Jehova,” nga mabatonan na gayod ang dignidad alang sa tanan.—Isaias 11:9.

Gidapit ka namo sa pagkat-on bahin niining maanindot nga paglaom. Pinaagi sa pagpakig-uban sa mga Saksi ni Jehova, imong makita nga ang pagpadapat sa mga prinsipyo sa Bibliya makahatag ug dignidad sa uban. Ug imong makat-onan kon sa unsang paagi ipatungha sa Gingharian sa Diyos sa dili madugay ang ‘usa ka bag-o ug mas maayong kalibotan,’ usa ka kalibotan diin ang “tinuod nga dignidad sa tawo,” mabatonan na ug dili na gayod yatakan pa pag-usab.

[Kahon/Hulagway sa panid 6]

Ang Paghupot sa Integridad Nanalipod sa Ilang Dignidad

Panahon sa Gubat sa Kalibotan II, kapin sa 2,000 ka Saksi ni Jehova ang gibalhog sa mga kampo konsentrasyon sa Nazi tungod sa ilang pagtuo. Naghisgot bahin sa pagkatalagsaon sa ilang integridad, ang napriso kanhi sa Ravensbrück nga si Gemma La Guardia Gluck nag-asoy diha sa iyang basahon nga My Story: “Usa ka higayon niana, ang Gestapo nagpahibalo nga si bisan kinsang Estudyante sa Bibliya nga magsalikway sa iyang pagtuo pinaagi sa pagpirma sa dokumento buhian ug dili na lutoson.” Maylabot niadtong midumili sa pagpirma sa dokumento, siya nagsulat: “Gipalabi nila nga mag-antos ug mapailobong maghulat sa adlaw sa kagawasan.” Nganong kana may ilang gipili nga baroganan? Ang kapin nag 80 anyos nga si Magdalena, nga gihisgotan sa sinugdan sa nag-unang artikulo, nagpatin-aw: “Ang pagpabiling matinumanon kang Jehova mas hinungdanon kay sa bisan unsang paningkamot nga magpabiling buhi. Ang paghupot sa atong dignidad nagkahulogan nga atong huptan ang atong integridad.” a

[Footnote]

[Hulagway sa panid 5]

Gihatagan ni Jesus ug dignidad ang mga tawo nga iyang gipang-ayo

[Hulagway sa panid 7]

Ang mga Saksi ni Jehova naghatag ug dignidad sa uban pinaagi sa pagpaambit kanila sa “maayong balita sa butang nga mas maayo”