Ang mga Maaghop Manunod sa Yuta

“Ako naghunahuna nga ang kinaiyahan mabag-o ug mapasig-uli. . . . Dili ugma dayon, kondili sa dugay pang panahon sa unahan, sa dihang aduna nay bag-ong langit ug usa ka bag-ong yuta.”—Jean-Marie Pelt, Pranses nga espesyalista sa kalikopan.

KAY nasubo tungod sa mga kahimtang maylabot sa kalikopan ug sa katilingban sa yuta, daghan ang malipay nga makakita sa atong planeta nga mahimong paraiso. Apan, kining maong pangandoy dili lamang usa ka damgo sa ika-21ng siglo. Dugay na kanhi, ang Bibliya nagsaad nga mapasig-uli ang Paraiso dinhi sa yuta. Ang mga gipahayag ni Jesus nga “ang mga maaghop . . . manunod sa yuta” ug “matuman ang imong pagbuot, dinhi sa yuta, maingon sa langit,” maoy usa sa ilado kaayong mga teksto sa Kasulatan. (Mateo 5:5; 6:10, Revised Standard Version) Ugaling lang, diyutay lang ang nagtuo karon sa usa ka paraisong yuta nga puy-an sa mga maaghop. Alang sa kadaghanan nga nag-angkong mga Kristohanon, ang Paraiso nahanaw na.

Ang senemanang magasin sa Pransiya nga La Vie nagpatin-aw kon nganong wala na tuohi ang usa ka paraiso—sa yuta man o sa langit—bisan diha lamang sa Simbahang Katoliko: “Human mahimong usa ka dakong bahin sa Katolikong mga pagtulon-an sulod sa labing menos 19 ka siglo, ang [ideya bahin sa usa ka] paraiso wala na hisgoti diha sa espirituwal nga mga yugto sa pagpahilit, sa mga misa ma-Dominggo, sa mga kurso sa teolohiya, ug sa mga klase sa katekismo.” Ang pulong paraiso gikaingon nga naliminan ug “bagang gabon” sa “misteryo ug kalibog.” Ang pipila ka magwawali tinuyong naglikay niini tungod kay kini “nagpasabot ug daghan kaayong ideya bahin sa yutan-ong kalipay.”

Alang kang Frédéric Lenoir, usa ka sosyologo nga eksperto bahin sa relihiyon, ang mga ideya sa usa ka paraiso nahimong “sumo nga paminawon.” Sa susama, si Jean Delumeau, usa ka historyano ug awtor sa daghang basahon bahin sa maong ulohan, naghunahuna nga ang mga saad sa Bibliya dili matuman sa literal nga paagi. Siya misulat: “Bahin sa pangutana, ‘Unsay nahitabo sa pagtuo bahin sa Paraiso?’ ang Kristohanong doktrina nagtubag: Tungod sa pagkabanhaw sa Manluluwas, may adlaw ra nga kitang tanan magkahiusa ug matuman ang atong gilaoman.”

Haom pa ba gihapon ang mensahe bahin sa usa ka paraisong yuta? Unsa ba gayod ang kaugmaon sa atong planeta? Hanap ba ang umaabot, o mapatin-aw pa kini? Ang mosunod nga artikulo motubag niining mga pangutanaha.