“Maingon sa Langit, Mao man Usab sa Yuta”

“Ang Katolikong pagtuo espesipikong naglakip ug Upat ka Dulnganan: Kamatayon, Paghukom, Impiyerno, Langit.”—Catholicism, giedit ni George Brantl.

MATIKDI nga sa upat ka dulnganan sa katawhan, ang yuta wala maapil. Dili kana ikatingala tungod kay ang Simbahang Katoliko, sama sa daghang uban pang mga relihiyon, nagtuo nga may adlaw nga pagalaglagon ang yuta. Ang Dictionnaire de Théologie Catholique nagpatin-aw niini ubos sa ulohang “Kataposan sa Kalibotan”: “Ang Simbahang Katoliko nagtuo ug nagtudlo nga ang presenteng kalibotan, nga gilalang sa Diyos ug naglungtad karon, dili magpabilin hangtod sa hangtod.” Ang di pa dugayng Katolikong katekismo nagtudlo usab niining ideyaha: “Ang atong kalibotan . . . gikatakda nang mahanaw.” Apan kon ang atong planeta mahanaw, unsaon na lang ang mga saad sa Bibliya bahin sa usa ka paraisong yuta?

Ang Bibliya tin-awng naghisgot bahin sa umaabot nga paraiso dinhi sa yuta. Pananglitan, ang manalagnang si Isaias nagbatbat sa yuta ug sa mga molupyo niini niining paagiha: “Sila gayod magtukod ug mga balay ug magpuyo niini; ug  sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon. Kay ang mga adlaw sa akong katawhan mahisama sa mga adlaw sa usa ka kahoy; ug gamiton sa bug-os sa akong mga pinili ang buhat sa ilang mga kamot.” (Isaias 65:21, 22) Ang mga Hudiyo, ang mga tawo nga gisaaran niini sa Diyos, nakaseguro nga ang ilang yuta—sa pagkatinuod, ang tibuok yuta—may adlaw ra nga mahimong usa ka paraiso alang sa walay-kataposang kaayohan sa katawhan.

Gipanghimatud-an sa Salmo 37 kining paglaoma. “Ang mga maaghop magapanag-iya sa yuta.” (Salmo 37:11) Kining bersikuloha wala lamang maghisgot bahin sa usa ka temporaryong kapasig-ulian sa nasod sa Israel ngadto sa Yutang Saad. Ang mao ra gihapong salmo tin-awng nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” (Salmo 37:29) * Matikdi nga kining salmoha nag-ingon nga kinabuhing walay kataposan sa yuta ang iganti sa “mga maaghop.” Ang usa ka Pranses nga Bibliya nagkomento niining bersikuloha nga ang pulong “maaghop” “adunay mas dakong kahulogan kay sa gipadayag diha sa mga hubad; kini naglakip sa mga timawa, sa mga sinakit o gilutos tungod kang Yahweh, sa mga mapainubsanog kasingkasing nga masinugtanon sa Diyos.”

Sa Yuta o sa Langit?

Sa iyang Wali sa Bukid, si Jesus nagsaad nga nagpahinumdom kanato sa mga teksto nga gikutlo sa ibabaw: “Bulahan ang mga maaghop, kay sila manunod sa yuta.” (Mateo 5:5, Revised Standard Version) Sa makausa pa, ang yuta mahimong usa ka dumalayong ganti alang sa mga matinumanon. Apan, giklaro ni Jesus sa iyang mga apostoles nga siya nag-andam ug luna alang kanila “sa balay sa [iyang] Amahan” ug nga sila mahiuban kaniya didto sa langit. (Juan 14:1, 2; Lucas 12:32; 1 Pedro 1:3, 4) Nan, sa unsang paagi atong sabton ang mga saad bahin sa yutan-ong mga panalangin? Aduna ba kiniy kahulogan karon, ug kang kinsa kini mapadapat?

Daghang eskolar sa Bibliya nag-ingon nga “ang yuta” nga gihisgotan diha sa Wali sa Bukid ni Jesus ug bisan diha sa Salmo 37 maoy simboliko lamang. Sa iyang mga komento diha sa Bible de Glaire, gisabot ni F. Vigouroux nga niining mga bersikuloha “adunay usa ka simbolo sa langit ug sa Simbahan.” Sumala pa ni M. Lagrange, usa ka Pranses nga tigpanukiduki sa Bibliya, kini nga saad “dili usa ka saad nga ang mga maaghop magapanag-iya sa yuta nga ilang gipuy-an, ilalom man kini sa presenteng sistema o ilalom sa mas hingpit nga sistema, kondili kining saara nagtumong sa mga maaghop nga magapanag-iya sa gingharian sa mga langit.” Sumala sa lain pang tigpanukiduki, kini maoy usa ka “simbolikong paggamit sa yutan-ong mga butang nga nagtumong sa langit.” Sumala sa uban pa gayod, “ang yutang saad, ang Canaan, gisabot sa espirituwal nga diwa ug naghawas sa yutang natawhan sa itaas, ang gingharian sa Diyos, ang panulondon nga gitagana alang sa mga maaghop. Kana usab ang kahulogan niini nga hulagway diha sa Salmo 37 ug laing bahin sa Bibliya.” Apan angay ba natong isalikway dayon ang literal nga yuta gikan sa mga saad sa Diyos?

Usa ka Dumalayong Katuyoan Alang sa Yuta

Sa sinugdan, ang yuta direktang nalangkit sa katuyoan sa Diyos alang sa mga tawo. “Kon bahin sa mga langit, iya ni Jehova ang mga langit, apan ang yuta iyang gihatag sa mga anak sa mga tawo,” misulat ang salmista. (Salmo 115:16) Busa, ang orihinal nga katuyoan sa Diyos alang sa mga tawo nalangkit sa yuta, dili sa langit. Gisugo ni Jehova ang unang magtiayon sa pagpalapad sa tanaman sa Eden aron kini molukop sa tibuok yuta. (Genesis 1:28) Kini nga katuyoan dili temporaryo. Gipamatud-an kini ni Jehova diha sa  iyang Pulong nga ang yuta magpabilin hangtod sa hangtod: “Usa ka kaliwatan moagi, ug usa ka kaliwatan moabot; apan ang yuta magpabilin bisan hangtod sa panahong walay tino.”—Ecclesiastes 1:4; 1 Cronicas 16:30; Isaias 45:18.

Ang mga saad sa Diyos matuman gayod, tungod kay siya mao ang Labing Hataas, ug iyang paneguroon nga matuman kini. Ginamit ang kinaiyanhong siklo sa tubig ingong ilustrasyon, ang Bibliya nagpatin-aw nga seguradong matuman ang mga saad sa Diyos: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga niini ug magpasalingsing, . . . maingon niana ang akong pulong [ang pulong sa Diyos] nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.” (Isaias 55:10, 11) Ang Diyos naghimog mga saad ngadto sa mga tawo. Mahimong molabay una ang usa ka yugto sa panahon sa dili pa matuman kanang mga saara, apan kini seguradong matuman. Kini “mobalik” kaniya nga natuman sumala sa iyang giingon.

Si Jehova tinong ‘nahimuot’ sa paglalang sa yuta alang sa mga tawo. Sa kataposan sa ikaunom nga adlaw sa paglalang, siya miingon nga ang tanang butang “maayo kaayo.” (Genesis 1:31) Ang paghimo sa yuta nga usa ka dumalayong paraiso maoy bahin sa katuyoan sa Diyos nga wala pa matuman. Bisan pa niana, ang mga saad sa Diyos ‘dili mobalik kaniya nga dili matuman.’ Ang tanang saad bahin sa hingpit nga kinabuhi sa yuta, diin ang mga tawo magpuyo sa walay kataposan diha sa kalinaw ug kasegurohan, mamatuman.—Salmo 135:6; Isaias 46:10.

Ang Katuyoan sa Diyos Matuman Gayod

Ang sala sa atong unang mga ginikanan, si Adan ug Eva, temporaryong nagbalda sa orihinal nga katuyoan sa Diyos sa paghimo sa yuta nga usa ka paraiso. Human sa ilang pagsupak, sila gipapahawa gikan sa tanaman. Busa, sila nawad-an sa pribilehiyo sa pagpakig-ambit sa katumanan sa katuyoan sa Diyos sa pagbaton ug hingpit nga mga tawo nga magpuyo sa usa ka paraisong yuta. Bisan pa niana, gihikay sa Diyos ang mga butang aron molampos ang iyang katuyoan. Sa unsang paagi?—Genesis 3:17-19, 23.

Ang kahimtang sa Eden maoy susama sa usa ka lalaki nga nagsugod sa pagtukod ug usa ka balay diha sa usa ka maayo kaayong luna sa yuta. Samtang iyang gipahiluna ang pundasyon, dunay laing tawo nga mianha ug midaot sa iyang pundasyon. Inay biyaan ang iyang proyekto, ang maong tawo mihimog mga lakang aron maseguro nga mahuman ang balay. Bisan pag kining dugang trabaho nagkinahanglag ekstrang gastos, walay duhaduha nga molampos gayod ang orihinal nga proyekto.

Sa samang paagi, ang Diyos naghimog mga kahikayan aron matuman gayod ang iyang katuyoan. Wala madugay human makasala ang atong unang mga ginikanan, iyang gipahayag ang paglaom alang sa ilang mga kaliwat—usa ka “binhi” nga magbali sa nahimong kadaot. Sa pagtuman niining tagnaa, ang pangunang bahin sa maong binhi mao ang Anak sa Diyos, si Jesus, kinsa mianhi sa yuta ug mihatag sa iyang kinabuhi ingong halad aron sa paglukat sa katawhan. (Galacia 3:16; Mateo 20:28) Sa dihang mabanhaw na siya ngadto sa langit, si Jesus mahimong Hari sa Gingharian. Si Jesus mao ang pangunang maaghop nga makapanunod sa yuta uban sa piniling mga matinumanon nga banhawon ngadto sa langit nga mahimong kaubang mga magmamando sa maong Gingharian. (Salmo 2:6-9) Sa nahaigong panahon, kini nga kagamhanan maoy magdumala sa mga kalihokan sa yuta aron sa pagpalampos sa orihinal nga katuyoan sa Diyos ug sa paghimo sa yuta nga usa ka paraiso. Milyonmilyong mga maaghop ang ‘manunod sa yuta’ sa diwa nga sila makabenepisyo gikan sa pagmando niini nga Gingharian ilalom ni Jesu-Kristo ug sa iyang kaubang mga magmamando.—Genesis 3:15; Daniel 2:44; Buhat 2:32, 33; Pinadayag 20:5, 6.

“Maingon sa Langit, Mao man Usab sa Yuta”

Kini nga kaluwasan nga may duha ka dulnganan, langitnon ug yutan-on, gihisgotan diha sa  usa ka panan-awon nga nakita ni apostol Juan. Iyang nakita ang mga hari nga nanglingkod sa mga trono sa langit nga gipili gikan sa matinumanong mga tinun-an ni Kristo. Ang Bibliya espesipikong nag-ingon bahin niining mga kauban ni Kristo nga “sila magamando ingong mga hari ibabaw sa yuta.” (Pinadayag 5:9, 10) Matikdi ang duha ka bahin sa pagpalampos sa katuyoan sa Diyos—ang pagpasig-uli sa yuta ubos sa pagtultol sa langitnong Gingharian nga gilangkoban ni Jesu-Kristo ug sa iyang kaubang mga manununod. Kining tanang kahikayan sa Diyos magpalampos sa bug-os nga kapasig-ulian sa yutan-ong Paraiso sumala sa orihinal nga katuyoan sa Diyos.

Diha sa iyang sulondang pag-ampo, giawhag ni Jesus ang iyang mga tinun-an sa pag-ampo nga matuman unta ang kabubut-on sa Diyos “maingon sa langit, mao man usab sa yuta.” (Mateo 6:9, 10) Aduna bay kahulogan kining mga pulonga kon ang yuta pagalaglagon o usa lang ka simbolo sa langit? Sa samang paagi, aduna bay kahulogan kining mga pulonga kon ang tanang matarong nga mga tawo moadto sa langit? Ang kabubut-on sa Diyos alang sa yuta tin-aw kaayo diha sa Kasulatan, sukad sa asoy sa paglalang ngadto sa mga panan-awon sa basahon sa Pinadayag. Ang yuta mahimong usa ka paraiso sumala sa katuyoan sa Diyos. Kini ang kabubut-on nga gisaad sa Diyos nga tumanon. Ang mga matinumanon dinhi sa yuta nag-ampo alang sa katumanan niana nga kabubut-on.

Ang kinabuhing walay kataposan sa yuta mao ang orihinal nga katuyoan sa Maglalalang, sa Diyos nga ‘walay pagkausab.’ (Malaquias 3:6; Juan 17:3; Santiago 1:17) Sulod sa kapin sa 100 ka tuig, kining magasina, Ang Bantayanang Torre, nagpatin-aw niining duha ka bahin sa pagpalampos sa katuyoan sa Diyos. Tungod niini atong nasabtan ang mga saad sa pagpasig-uli sa yuta nga makita diha sa Kasulatan. Gidasig ka namo sa pagsusi ug dugang bahin niini, mahimong pinaagi sa pagpakighisgot uban sa mga Saksi ni Jehova o pinaagi sa pagkontak sa mga magpapatik niining magasina.

[Potnot]

[Hulagway sa panid 4]

Ang Bibliya tin-awng naghisgot bahin sa umaabot nga pagtukod sa Paraiso sa yuta

[Hulagway sa panid 7]

Aduna bay kahulogan ang sulondang pag-ampo ni Jesus kon ang yuta pagalaglagon?