Makapadasig nga Pag-uswag Diha sa Usa ka Matahom nga Isla

ANG mga bisita sa Taiwan makadayeg gayod sa lunhaw nga tropikanhong mga tanom nga naglukop sa isla. Ang maanindot nga lunhawng kahumayan nga bag-ong tinanom mahimong bulawanon sa ting-ani. Ang mga bakilid napunog baga ug labong nga kakahoyan. Kasukwahi sa mga siyudad nga napunog mga tawo, makapahayahay gayod ang labong nga mga tanom sa kaumahan ug sa kabukiran. Sa pagkatinuod, kana ang nakatukmod sa usa ka taga-Kasadpan nga nakakita sa maong isla sa pagngalan niya niining Ilha Formosa, o “Matahom nga Isla.”

Oo, ang Taiwan maoy usa ka matahom nga gamayng isla—mga 390 kilometros lang ang gitas-on ug mga 160 kilometros lang ang gilapdon diha sa kinalaparang bahin. Ang tibuok isla halos napunog tag-as nga kabukiran. Ang Yü Shan (Mount Morrison) mas taas pa kay sa Mount Fuji sa Japan o sa Mount Cook sa New Zealand. Ang hiktin nga kapatagan nga moabot sa daplin sa baybay ug punog mga tawo sa Taiwan nga karon kapin na sa 22 ka milyon, maoy naglibot sa nasentro nga kabukiran.

Usa ka Bag-ong Matang sa Pag-uswag

Hinuon, adunay laing matang sa pag-uswag nga nag-anam ka dayag diha sa Taiwan—ang espirituwal nga pag-uswag. Kini gibanaag diha sa kasibot nga gipakita sa mga tawo, batag tigulang, sa dihang ilang mailhan ang matuod nga Diyos, si Jehova. Makapalipay gayod ang pagkakita sa pag-uswag sa gidaghanon niadtong masibotong nagtabang sa uban nga makakat-on bahin kang Jehova ug sa iyang katuyoan.

Ang maong pag-uswag nanginahanglag pagpalapad. Niadtong Disyembre 1990, napalit ang usa ka lote alang sa gipadak-an nga sangang buhatan sa mga Saksi ni Jehova. Ang kanhing pasilidad, nga didto sa Taipei, gamay na kaayo aron makaatiman sa mga kalihokan sa 1,777 ka magmamantala sa Gingharian sa Taiwan niadtong panahona. Human sa ubay-ubayng katuigan sa makugihong paningkamot sa mga boluntaryo gikan sa ubang nasod ug sa lokal, ang nindot nga bag-ong mga pasilidad sa Hsinwu andam nang gamiton niadtong Agosto 1994. Niadtong panahona may 2,515 nga nakigbahin sa pagsangyaw sa maayong balita  sa Pulong sa Diyos, ang Bibliya. Karon, kapig napulo ka tuig ang milabay, kining gidaghanona sobra pa sa nadoble, nga miabot ug kapin sa 5,500, ug matag bulan mga ikaupat ka bahin nianang gidaghanona ang nagpakigbahin sa bug-os-panahong buluhaton sa pagsangyaw. Ilabinang mamatikdan ang batan-ong mga lalaki ug babaye nga nahisamag makapapreskong “mga yamog” sa kabuntagon.—Salmo 110:3.

Espirituwal nga Pag-uswag Taliwala sa mga Batan-on

Daghang masibotong mga magmamantala sa maayong balita ang mga bata pa kaayo. Ang pipila mga estudyante pa sa elementarya. Pananglitan, sa usa ka lungsod sa amihanang Taiwan, ang usa ka magtiayon gidapit sa unang higayon sa pagtambong sa Teokratikanhong Tunghaan sa Ministeryo, diin didto nagtuon ang mga Saksi ni Jehova kon sa unsang paagi itudlo ang mga kamatuoran sa Bibliya. Nahingangha ang magtiayon sa pagkakita sa usa ka gamayng bata, si Weijun, nga nagbasa sa Bibliya gikan sa plataporma nga mas larino pa kay sa daghang uban pa tingaling mga hamtong. Dayon sa ubang mga tigom nga ilang natambongan, nakadayeg kaayo sila nga bisan ang mga bata nga wala pa magtungha naghatag ug undanong mga tubag. Kini nga magtiayon nagkomento nga buotan kaayo ang mga bata diha sa Kingdom Hall.

Nganong kining mga bataa nagsentro man sa ilang pagtagad diha sa edukasyon sa Bibliya niining nasod nga ang kadaghanan Budhista man ug Taoista? Kini tungod kay ang ilang Kristohanong mga ginikanan nagpadapat sa mga prinsipyo sa Bibliya ug nagtukod ug malipayong pamilya nga nasentro sa relasyon uban kang Jehova. Tungod kay ang mga ginikanan ni Weijun naningkamot sa paghimo sa pamilyahanong pagtuon sa Bibliya ug sa pagsangyaw sa kanataran nga makalingaw, ang magulang nga igsoong lalaki ug babaye ni Weijun maoy bawtismado nang mga Saksi. Sa dihang si Weijun di pa dugayng mihangyo nga mouban sa publikong buluhaton sa pagsangyaw, ang iyang inahan miingon nga siya mas daghag napahimutang nga mga magasin nianang bulana kay sa tanang napahimutang sa ubang membro sa pamilya. Siya dayag nga malingaw sa pagpakigsulti sa uban bahin sa kamatuoran, pagkomento diha sa mga tigom, ug pagpaambit sa uban kon unsay iyang nakat-onan.

Samtang Managko na ang mga Bata

Komosta man ang maong mga bata samtang managko na sila? Ang kadaghanan magpadayon sa pagpakitag tinuod nga gugma kang Jehova ug sa ministeryo. Pananglitan, si Huiping maoy usa ka estudyante. Usa ka adlaw niana, ang iyang maestro naghisgot nga ang mga membro sa usa ka relihiyon dili magpaabonog dugo apan wala siya mahibalo kon kinsa sila. Human buhii ang mga estudyante, gipatin-aw niining batan-ong Kristohanon ngadto sa iyang maestro nga sila ang mga Saksi ni Jehova ug kon nganong kana ang ilang baroganan.

Ang usa pod ka maestra nagpasalida ug video bahin sa mga sakit nga napasa pinaagig pagpakigsekso. Gihisgotan sa video ang 1 Corinto 6:9, apan siya miingon nga wala sawaya sa Bibliya ang homoseksuwalidad. Sa makausa pa, gisangyawan ni Huiping ang maestra bahin sa panglantaw sa Diyos bahin sa homoseksuwalidad.

Sa dihang ang iyang klasmet nga si Shuxia nangandam ug usa ka report bahin sa kapintasan diha sa pamilya, gihatagan siya ni Huiping ug Nobyembre 8, 2001, nga Pagmata! nga may ulohan sa hapin nga “Tabang Alang sa Gikulata nga mga Babaye” ug iyang gipatin-aw nga kini naundan ug daghang impormasyon bahin sa maong ulohan nga gipasukad sa Bibliya. Sa ngadtongadto, si Shuxia nahimong di-bawtismadong magmamantala. Siya ug si Huiping nagpaambit na karon sa maayong balita ngadto sa uban.

Nakaplagan sa daghang Kristohanong nagtungha nga dili sayon nga mailhang nagkinabuhi sa mga prinsipyo sa Bibliya. Tinuod gayod kini ilabina diha sa gagmayng mga lungsod. Kinahanglang sagubangon ni Zhihao ang pagpit-os sa isigkaingon tungod sa iyang relihiyon ug pagsangyaw. Siya miingon: “Mahadlok gayod akong makahibalag ug mga klasmet samtang nagsangyaw. Usahay, napulo sila ka buok nga magbiaybiay kanako!” Usa ka adlaw niana, gihatagag asaynment si Zhihao sa iyang maestro nga mopakigpulong bahin sa iyang relihiyon atubangan sa klase. “Akong gisugdan ang akong pakigpulong  diha sa Genesis kapitulo 1 ug dayon gihisgotan ang mga pangutanang sama sa: Kinsay naghimo sa yuta ug sa tanang butang diha niana? Ug sa unsang paagi milungtad ang tawo? Sa dihang mibasa na ako gikan sa Kasulatan, gikataw-an ko sa uban, nga nag-ingon nga matuotuohon kono ko. Apan, nagpadayon lang ko sa pagsulti ug gihuman ang akong pakigpulong. Human niana, nakahigayon ko sa pagpakigsulti mismo sa pipila sa akong mga klasmet bahin sa atong buluhaton ug sa atong relihiyon. Karon, sa dihang makakita sila nako nga nagsangyaw, dili na ko nila bugalbugalan!”

Si Zhihao nagpadayon: “Tungod kay Saksi ang akong mga ginikanan, among hisgotan kada buntag ang adlaw-adlaw nga teksto. Tun-an usab namo ang Bibliya ug regular kaming motambong sa mga tigom. Mao nga ako rang masagubang si bisan kinsa nga mobiaybiay nako sa dihang maningkamot ako sa pagpaambit sa makapahupay nga mga kamatuoran sa Bibliya ngadto sa uban.”

Si Tingmei maoy estudyante diha sa usa ka teknikal nga eskuylahan sa mga babaye. Kas-a giimbitar siya sa usa ka piknik sa iyang mga klasmet uban sa mga lalaki gikan sa eskuylahan sa mga lalaki. Nakita niya ang moral nga kapeligrohan sa maong panag-uban ug gibalibaran niya ang imbitasyon. Kadaghan siyang gidapit, bisan pag iya nang gisultihan ang iyang mga klasmet bahin sa maayong impormasyon gikan sa librong Mga Pangutanang Gisukna sa mga Batan-on—Mga Tubag nga Mosaler. * Giyagayagaan siya sa mga babaye, nga nag-ingong biya na kono siya sa uso. Apan, ang kaalam sa pagsunod sa mga prinsipyo sa Bibliya sa wala madugay nadayag sa dihang usa sa mga babaye namabdos ug nagpakuha. Si Tingmei miingon: “Ang pagbuhat kon unsay gisugo ni Jehova naghatag kanako ug hinlong tanlag. Tungod niana, nakabaton akog tumang kalipay ug mibatig dakong katagbawan.”

Pagbuntog sa mga Babag sa Pag-uswag

Usa sa suod nga mga higala ni Tingmei mao si Ruiwen. Sa batabata pa siya, gibati ni Ruiwen nga ang pagtambong sa Kristohanong mga tigom ug ang pagsangyaw sa kanataran maoy usa lamang ka makapuol nga tulumanon. Ugaling lang, sa pagkakita sa kalainan sa tinuod nga gugma niadtong anaa sa iyang kongregasyon ug sa taphaw nga panaghigalaay sa iyang mga klasmet, siya nakombinsir nga kinahanglan siyang mohimog mga kausaban sa iyang kinabuhi. Si Ruiwen misugod sa pagsangyaw sa iyang mga eskolmet ug sa wala madugay tin-aw niyang naamgohan kon unsay angay niyang himoon. Nag-oksilyare payunir siya, nga migugol ug kapin sa 50 ka oras sa usa ka bulan diha sa ministeryo. Dayon nagregular payunir siya, nga migugol ug kapin sa 70 ka oras sa usa ka bulan diha sa pag-alagad. Si Ruiwen miingon:  “Mapasalamaton gayod ako kang Jehova. Wala gayod siya mawad-ig paglaom nako. Bisan tuod nakahimo akog mga butang nga nakapaguol kaniya, siya nahigugma gihapon kanako. Ang akong inahan ug ang uban diha sa kongregasyon nagpakitag susamang mahigugmaong tinamdan. Karon nga nagdumala na akog lima ka pagtuon sa Bibliya, gibati nakong nalangkit sa labing makapatagbaw nga buluhaton.”

Diha sa usa ka hayskul sa lungsod, duha ka batan-ong Saksi ang giasayn sa paghawas sa eskuylahan sa usa ka bangga sa kinaraan nga sayaw. Sa dihang ilang nahibaloan ang kinaiyahan sa maong bangga, gibati sa maong mga batan-on nga ang pagpakigbahin niana maglapas sa ilang Kristohanong tanlag. Sa dihang misulay sila sa pagpatin-aw sa ilang panglantaw ug mihangyo nga dili na lang moapil, wala dawata ang ilang hangyo. Hinunoa, giingnan sila sa mga magtutudlo nga tungod kay sila maoy gitahasan, kinahanglan silang moapil. Kay dili gustong mokompromiso, gitan-aw sa batan-ong mga Saksi ang Web site sa departamento sa edukasyon ug nagpadalag sulat nga nagpatin-aw sa ilang problema. Bisan tuod wala sila makadawat ug personal nga tubag, sa wala madugay nakadawat ug direksiyon ang eskuylahan nga dili obligahon si bisan kinsang estudyante sa pag-apil sa maong bangga. Pagkamalipayon niining duha ka batan-on nga ang pagbansay sa Bibliya nga ilang nadawat wala lamang mag-umol sa ilang konsensiya kondili naghatag usab kanila ug kalig-on sa pagbarog dapig sa kon unsay matarong!

Bisan kadtong adunay pisikal nga kakulian nakabaton ug dakong kalipay sa pagpaambit sa ilang paglaom sa Bibliya ngadto sa uban. Si Minyu maoy paralisado sukad sa iyang pagkahimugso. Kay dili man niya magamit ang iyang mga kamot, iyang paklion ang mga panid sa Bibliya pinaagi sa iyang dila ug pangitaon ang teksto nga gusto niyang basahon. Sa dihang mohatag siyag bahin sa Teokratikanhong Tunghaan sa Ministeryo sa Kingdom Hall, siya mohirag diha sa usa ka mubo nga sopa, ug ang iyang katabang molingkod sa mubo nga lingkoranan ug maoy mogunit sa mikropono alang kaniya. Pagkamakapadasig ang pagkakita sa paningkamot nga gihimo ni Minyu sa pagpangandam niining mga pakigpulonga!

Sa dihang buot ni Minyu nga mahimong magmamantala sa Gingharian, ang pipila ka sister diha sa kongregasyon nagtuon kon unsaon pagsangyaw pinaagig telepono aron matabangan nila siya. Iyang tulpokon ang mga numero pinaagi sa iyang dila samtang ang mga sister maoy mohimog rekord sa iyang mga tawag. Nalingaw kaayo siya sa maong buluhaton nga siya nag-oksilyare payunir, nga nakigsulti sa uban bahin sa Gingharian sa Diyos sulod sa 50 ngadto sa 60 ka oras matag bulan pinaagig telepono. Nakakaplag siyag pipila nga midawat ug literatura sa Bibliya ug nagtugot kaniya sa pagtawag pag-usab. Siya karon nagdumalag tulo ka pagtuon sa Bibliya uban sa mga tawo nga iyang nakontak niining paagiha.

Oo, sama sa makapapreskong mga yamog, ang mga batan-ong lalaki ug babaye diha sa 78 ka kongregasyon sa mga Saksi ni Jehova sa Taiwan andam ug masiboton nga nagdala sa nagahatag-ug-kinabuhi nga maayong balita sa Gingharian ngadto sa milyonmilyong katawhan niining islaha. Kini maoy usa lamang ka gamayng bahin sa tibuok-kalibotang katumanan sa mosunod nga tagna sa Bibliya: “Ang imong katawhan magatanyag sa ilang kaugalingon nga kinabubut-on sa adlaw sa imong puwersa militar. Sa kahalangdon sa pagkabalaan, gikan sa tagoangkan sa kaadlawon, ikaw adunay pundok sa mga batan-on nga sama gayod sa mga yamog.” (Salmo 110:3) Pagkadakong tuboran sa pagdasig ang mga batan-on alang sa mga tigulang nga ilang mga isigkamamumuo, ug labaw sa tanan, pagkadakong tuboran sa kalipay sila alang sa ilang langitnong Amahan, si Jehova nga Diyos!—Proverbio 27:11.

[Potnot]

[Kahon/​Hulagway sa panid 10]

GIKINAHANGLAN ANG DUGANG NGA MGA KINGDOM HALL

Tungod sa pag-uswag sa Taiwan, lisod kaayo ang pagbaton ug igong mga Kingdom Hall. Ngano man? Tungod kay gawas sa pipila ka lungsod, halos wala nay lote nga katukoran ug mga Kingdom Hall. Lain pa, mahal kaayo ang yuta, ug estrikto kaayo ang mga balaod sa pagsona. Diha sa mas dagkong mga lungsod ug mga siyudad, ang bugtong kapilian mao ang pagpalit ug mga lawak pang-opisina ug himoon kining mga Kingdom Hall. Bisan pa niana, kadaghanan sa mga opisina mugbo kaayog mga kisame, dakog bayranan para sa pagmentinar, limitado ra ang pasudlon, o uban pang mga hinungdan nga tungod niana kini dili angayang himoong mga Kingdom Hall.

Bisan pa niana, sa di pa dugayng katuigan, ang mga Saksi ni Jehova sa Taiwan nakabaton ug ubay-ubayng bag-ong mga Kingdom Hall. Nagpadayon ang pagpangitag bag-ong mga propiedad samtang gipakita sa mga Saksi ang ilang kaandam sa pagpaluyo sa pinansiyal nga paagi ug ang pag-ugmad sa gikinahanglang katakos sa pagpanukod.