Mga Pangutana Gikan sa mga Magbabasa

Human sa kataposang pagsulay sa kataposan sa Milenyo, posible bang makasala pa ang mga tawo ug mamatay?

Duha ka teksto sa Pinadayag ang makatabang kanato sa pagsabot niini: “Gitambog ang kamatayon ug ang Hades ngadto sa linaw nga kalayo. Mao kini ang ikaduhang kamatayon, ang linaw nga kalayo.” (Pinadayag 20:14) “Iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:4.

Matikdi ang panahon nga gihisgotan nga nalangkit dinhi. Ang pagtambog sa ‘kamatayon ug Hades’ ngadto sa linaw nga kalayo mahitabo human nga mahukman na ang mga nakalabang-buhi sa Armagedon, ang mga binanhaw, ug ang tanang nangatawo human sa Armagedon. Sila gihukman pinasukad sa “mga butang nga nahisulat sa mga linukot nga basahon,” o ang detalyadong mga kinahanglanon ni Jehova alang sa mga tawo sulod sa usa ka libo ka tuig. (Pinadayag 20:12, 13) Si apostol Juan nagtala ug laing panan-awon nga makaplagan diha sa Pinadayag kapitulo 21, nga matuman panahon sa Milenyong Pagmando ni Kristo Jesus. Apan, ang bug-os nga katumanan sa maong panan-awon maoy sa kataposan pa sa usa ka libo ka tuig nga Adlaw sa Paghukom. Nianang panahona, si Jehova mopuyo uban sa katawhan sa bug-os nga diwa nga walay si bisan kinsa nga tigpataliwala, kay giuli na man ni Jesus ang Gingharian ngadto sa iyang Amahan. Si Jehova simbolikong mopuyo uban sa “iyang mga katawhan” sa permanente ug direktang paagi. “Ang kamatayon mawala na” sa bug-os nga diwa sa dihang ang katawhan makabaton ug kahingpitan tungod kay ang bili sa halad lukat ni Kristo bug-os nga napadapat na.—Pinadayag 21:3, 4.

Busa, ang kamatayon nga gihisgotan diha sa mga teksto nga gikutlo sa ibabaw mao ang Adanhong kamatayon, nga pagawagtangon sa halad ni Kristo. (Roma 5:12-21) Kay nawagtang na ang kamatayon nga napanunod gikan sa unang tawo, ang mga tawo mahimong sama na kang Adan sa dihang siya gilalang. Si Adan hingpit, apan wala kana magpasabot nga siya dili mamatay. Gisugo ni Jehova si Adan nga dili mokaon gikan “sa kahoy sa kahibalo sa maayo ug sa daotan” ug siya miingon: “Sa adlaw nga mokaon ka gikan niini mamatay ka gayod.” (Genesis 2:17) Kana maoy kamatayon gumikan sa tinuyong pagpakasala. Human sa kataposang pagsulay sa kataposan sa Usa ka Libo ka Tuig nga Pagmando, ang mga tawo aduna gihapoy kagawasan sa pagpili. (Pinadayag 20:7-10) Sila makapili gihapon sumala sa kaugalingon nilang pagbuot kon mopadayon ba sila sa pag-alagad kang Jehova o dili. Dili kita makaingon nga wala gayoy tawo nga motalikod sa Diyos sama sa gihimo ni Adan.

Unsay mahitabo niadtong mopili sa pagrebelde sa dihang wala nay kamatayon o Hades? Nianang panahona, wala na ang Adanhong kamatayon. Ug ang Hades, ang komon nga lubnganan sa mga tawo nga may paglaom sa pagkabanhaw, wala na usab. Bisan pa niana, si Jehova makalaglag gihapon sa usa ka rebelde diha sa linaw nga kalayo, nga dili na gayod magbanhaw kaniya. Ang maong kamatayon mahisama sa kamatayon nga naagoman ni Adan ug Eva, dili ang kamatayon nga napanunod sa mga tawo gikan kang Adan.

Hinunoa, wala kitay katarongan sa pagdahom nga mahitabo kana. Kadtong makapasar sa kataposang pagsulay lahi kang Adan sa usa ka hinungdanong diwa. Sila bug-os nga nasulayan. Kita makasalig sa kabug-osan sa kataposang pagsulay tungod kay si Jehova nahibalo kon unsaon pagsusi sa bug-os ang mga tawo. Makasalig kita nga ang kataposang pagsulay magwagtang sa tanan nga mogamit sa ilang kagawasan sa pagpili sa sayop nga paagi. Busa, bisan tuod posible nga kadtong makapasar sa kataposang pagsulay morebelde sa Diyos ug sa ingon pagalaglagon, lagmit dili gayod nila buhaton kana.

[Hulagway sa panid 31]

Human sa kataposang pagsulay, sa unsang diwa ang mga tawo mahisama kang Adan?