Nahinumdom Ka Ba?

Nalingaw ka ba sa pagbasa sa bag-ong mga gula sa Ang Bantayanang Torre? Buweno, susiha kon makatubag ka ba sa mosunod nga mga pangutana:

• Sa unsang paagi “pagaluwason [ni Jesus] ang kabos,” sumala sa gitagna sa Salmo 72:12?

Panahon sa iyang pagmando, aduna unyay hustisya alang sa tanan, wala nay korapsiyon. Ang gubat subsob magpahinabog kakabos, apan si Kristo magpatunghag hingpit nga pakigdait. Siya adunay simpatiya alang sa mga tawo ug iyang hiusahon ang tanan, ug iyang paneguroon nga aduna unyay dagayang pagkaon alang sa katawhan. (Salmo 72:4-16)—5/1, panid 7.

• Sa unsang paagi kita ingong mga Kristohanon makapasundayag sa atong “kagawasan sa pagsulti”? (1 Timoteo 3:13; Filemon 8; Hebreohanon 4:16)

Ikapasundayag nato kana pinaagi sa masiboton ug maisogong pagsangyaw sa uban, pinaagi sa pagtudlo ug pagtambag dihadiha ug sa epektibong paagi, ug pinaagi sa pagpahayag sa bug-os sa atong kaugalingon ngadto sa Diyos diha sa pag-ampo, nga masaligon nga kita iyang patalinghogan ug tubagon.—5/15, panid 14-16.

• Ilalom sa Balaod, nganong ang pipila ka kinaiyahan may labot sa mga sangkap sa pagpanganak ‘makapahugaw’ sa usa ka tawo?

Ang mga balaod mahitungod sa kahugawan nga nalangkit sa paggawas sa binhi sa lalaki, pagregla, ug pagpanganak nagpatungha ug seksuwal nga kahinlo ug himsog nga pagkinabuhi, nagpasiugda sa pagkabalaan sa dugo, ug nagpakita sa panginahanglan sa pagtabon sa mga sala.—6/1, panid 31.

• Kon buot sa usa ka tawo nga magmalipayon, nganong mapuslanon nga iyang susihon ang basahon sa Mga Salmo?

Ang mga tagsulat sa Mga Salmo nahibalo nga ang kalipay maoy resulta sa pagbaton ug maayong relasyon uban sa Diyos. (Salmo 112:1) Ilang gipasiugda nga walay tawhanong relasyon, walay materyal nga kabtangan, ug walay personal nga kalamposan ang makahatag sa kalipay nga magagikan sa pagkasakop sa “katawhan kansang Diyos mao si Jehova.” (Salmo 144:15)—6/15, panid 12.

• Unsang linaing relasyon uban kang Jehova ang nabatonan sa karaang mga Israelinhon?

Niadtong 1513 W.K.P., gidala ni Jehova ang mga Israelinhon ngadto sa usa ka bag-ong relasyon uban kaniya, pinaagi sa usa ka pakigsaad. (Exodo 19:5, 6; 24:7) Human niana, ang mga Israelinhon nangatawo ingong mga membro sa piniling nasod sa Diyos nga napahinungod kaniya. Bisan pa niana, ang matag usa kinahanglang mohimog personal nga desisyon sa pag-alagad sa Diyos.—7/1, panid 21-2.

• Nganong angay kitang magbuhat sa tanang butang nga “walay pagbagulbol”? (Filipos 2:14)

Daghang pananglitan diha sa Kasulatan ang nagpakita nga ang pagbagulbol nakadaot sa katawhan sa Diyos. Angay natong hunahunaon pag-ayo ang makadaot nga impluwensiya nga ipahinabo niini karon. Ang dili-hingpit nga mga tawo adunay kiling sa pagbagulbol, ug angay kitang magbantay sa pagmatikod sa atong kaugalingon sa bisan unsang timailhan niini ug pukgoon kini.—7/15, panid 16-17.

• Giunsa nato pagkahibalo nga ang kaalam nga gihubit diha sa Proverbio 8:22-31 dili lamang usa ka hiyas?

Ang maong kaalam ‘gibuhat,’ o gilalang, ingon nga sinugdanan sa dalan ni Jehova. Ang Diyos kanunayng naglungtad ug maalamon; ang iyang kaalam wala lalanga. Ang kaalam nga gihisgotan sa Proverbio 8:22-31 diha sa tupad sa Diyos ingong “batid nga magbubuhat,” nga mapadapat sa espiritung linalang nga nahimong Jesus ug kinsa nagbuhat nga kauban sa Diyos sa pagpanglalang. (Colosas 1:17; Pinadayag 3:14)—8/1, panid 31.