“Nakadungog Kamo Bahin sa Pagkamainantoson ni Job”
“Nakadungog Kamo Bahin sa Pagkamainantoson ni Job”
“Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.”—SANTIAGO 5:11.
SI Harald Abt maoy usa ka Saksi ni Jehova nga wala pay usa ka tuig sa dihang ang kasundalohan ni Hitler mikontrolar sa Danzig (Gdańsk karon) sa amihanang Polandia. Unya ang kahimtang nahimong lisod, nga nameligro pa ang matuod nga mga Kristohanon didto. Gisulayan sa Gestapo nga pugson si Harald sa pagpirma ug dokumento nga magsalikway sa iyang relihiyon, apan midumili siya. Paglabay sa pipila ka semana nga pagkabilanggo, gipadala si Harald sa Sachsenhausen nga kampo konsentrasyon, diin sublisubli siyang gihulga ug gidagmalan. Gitudlo sa usa ka polis ang panghaw sa sunoganag mga patay ug gisultihan si Harald, “Mokayab ka niana paingon sa imong Jehova sa 14 ka adlaw kon magpabilin ka sa imong relihiyon.”
2 Sa dihang gidakop si Harald, ang iyang asawa nga si Elsa nagpasuso pa sa ilang batang babaye nga napulo pa ka bulan ang edad. Apan wala sayloi sa Gestapo si Elsa. Sa wala madugay, ang iyang masuso gikuha, ug siya gipadala sa kampong patyanan sa Auschwitz. Apan siya nakalahutay ug daghang katuigan, sama kang Harald. Sa Ang Bantayanang Torre sa Oktubre 15, 1980, makabasa kag dugang bahin sa paagi nga sila nakalahutay. Si Harald misulat: “Sa katibuk-an, gigugol ko ang 14 anyos sa akong kinabuhi diha sa mga kampo konsentrasyon ug mga prisohan tungod sa akong pagtuo sa Diyos. Ako gipangutana: ‘Ang imo bang asawa nakatabang kanimo sa pag-antos nianang tanan?’ Tinuod gayod nga siya nakatabang! Ako nahibalo sukad sa sinugdan nga dili gayod niya ikompromiso ang iyang pagtuo, ug ang maong kasayoran nakatabang sa paglig-on kanako. Ako nasayod nga palabihon pa niyang makita ako nga patay ibabaw sa usa ka teheras kay sa nahibaloang ako nalibre tungod kay mikompromiso. . . . Giantos ni Elsa ang daghang kalisod sulod sa mga katuigan sa Alemang mga kampo konsentrasyon.”
3 Ang pag-antos sa daotan dili gayod sayon, ingon nga kapamatud-an sa daghang Saksi. Tungod niini, ang Bibliya nagtambag sa tanang Kristohanon: “Himoa ninyong sumbanan sa pag-antos sa daotan ug sa pagkamapailobon ang mga manalagna, nga nagsulti sa ngalan ni Jehova.” (Santiago 5:10) Latas sa kasiglohan, daghang alagad sa Diyos ang gilutos nga wala lamay hinungdan. Ang mga panig-ingnan nga gihatag niining dakong “panganod sa mga saksi” makapadasig kanato nga molahutay sa pagdagan sa atong Kristohanong lumba.—Hebreohanon 11:32-38; 12:1.
4 Sa talaan sa Bibliya, si Job nailhang sumbanan sa pagkamainantoson. “Tan-awa! Gipahayag namo nga malipayon kadtong nakaantos,” misulat si Santiago. “Nakadungog kamo bahin sa pagkamainantoson ni Job ug nakakita sa sangpotanan nga gihatag ni Jehova, nga si Jehova malumo kaayo sa pagmahal ug maluluy-on.” (Santiago 5:11) Ang kasinatian ni Job mopaaninaw kanato sa ganti nga gitagana alang sa mga matinumanon, si kinsa mao ang panalanginan ni Jehova. Mas hinungdanon, mopadayag kinig mga kamatuoran nga atong mapahimuslan sa mga panahon sa kalisdanan. Ang basahong Job motabang kanato sa pagtubag niining mga pangutanaha: Sa dihang ginasulayan, nganong angay natong masabtan ang pangunang mga isyu nga nalangkit? Unsang mga hiyas ug mga tinamdan ang makatabang kanato sa pag-antos? Sa unsang paagi makapalig-on kita sa mga isigka-Kristohanon nga nag-antos sa kasakitan?
Pagsabot sa Tanang Isyu nga Nalangkit
5 Aron padayong mahuptan ang espirituwal nga panimbang samtang nagsagubang ug kalisdanan, angay natong masabtan ang tanang isyu nga nalangkit. Kon dili nato masabtan kana, ang personal nga mga suliran basin makapahanap sa atong espirituwal nga panan-aw. Ang isyu bahin sa pagkamaunongon ngadto sa Diyos maoy hinungdanon kaayo. Ang atong langitnong Amahan nagapangaliyupo nga ugdang natong hunahunaon: “Magmaalamon, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Pagkatalagsaong pribilehiyo kana! Bisan pa sa atong mga kahuyangan ug pagkadili-hingpit, kita makalipay sa atong Maglalalang. Malipay nato siya kon atong masagubang ang mga pagsulay ug mga tentasyon tungod sa atong gugma kang Jehova. Ang matuod nga Kristohanong gugma moantos sa tanang butang. Kini dili gayod mapakyas.—1 Corinto 13:7, 8.
6 Ang basahong Job tin-awng nagpaila nga si Satanas mao ang nagtamay kang Jehova. Nagpadayag usab kini sa daotang kinaiya niining dili-makitang kaaway ug sa iyang tinguha sa pagdaot sa atong relasyon uban sa Diyos. Ingong giilustrar sa kahimtang ni Job, ang pangunang akusasyon ni Satanas sa tanang alagad ni Jehova mao nga sila adunay mahakogong mga motibo ug gusto niyang pamatud-an nga ang ilang gugma alang sa Diyos mahimong mabugnaw. Iyang gitamay ang Diyos sulod sa libolibong katuigan. Sa dihang gipalagpot si Satanas gikan sa langit, usa ka tingog gikan sa langit nagbatbat kaniya ingong “ang magsusumbong sa atong mga igsoon” ug miingon nga siya nagahimo sa maong mga sumbong “adlaw ug gabii atubangan sa atong Diyos.” (Pinadayag 12:10) Pinaagi sa atong matinumanong pag-antos, atong ikapakita nga ang iyang mga sumbong walay basehan.
7 Pagahinumdoman nato nga ang Yawa mopahimulos sa bisan unsang kasakitan nga ato tingaling gisagubang aron sa pagpabulag kanato gikan ni Jehova. Kanus-a ba niya gitental si Jesus? Sa panahong si Jesus gigutom human magpuasa sulod sa daghang adlaw. (Lucas 4:1-3) Hinuon, bug-os gisalikway ni Jesus ang mga tentasyon sa Yawa tungod kay siya malig-on sa espirituwal. Hinungdanon gayod nga pukgoon ang lawasnong kaluya—nga mahimong tungod sa sakit o katigulangon—pinaagi sa kalig-on sa espirituwal! Bisan pag “ang [atong] pagkatawo sa gawas nagakahugo,” kita dili moangka tungod kay “ang [atong] pagkatawo sa sulod ginabag-o sa adlaw-adlaw.”—2 Corinto 4:16.
8 Dugang pa, ang negatibong mga emosyon lagmit makapaluya sa usa sa espirituwal nga paagi. ‘Nganong gitugotan man kini ni Jehova’? mahibulong tingali ang usa. ‘Nganong ingon niadto ang pagtratar ni brader kanako?’ basin mangutana ang lain human sa dili-maayong pagtratar. Basin tungod sa maong mga pagbati atong makalimtan ang pangunang mga isyu ug bug-os matagad ang personal nga mga kahimtang. Ang kahigawad ni Job sa iyang tulo ka higala nga may daotang motibo daw grabeng nakadaot sa iyang emosyon sama nga ang iyang sakit nakadaot sa iyang lawas. (Job 16:20; 19:2) Sa susamang paagi, gipaila ni apostol Pablo nga ang tagdugay nga kasuko mahimong “maghatag ug luna [o kahigayonan] sa Yawa.” (Efeso 4:26, 27) Imbes ipahungaw ang kahigawad o kasuko diha sa mga tawo o sobrang hunahunaon ang inhustisya sa usa ka kahimtang, mas maayo nga ang mga Kristohanon mosundog kang Jesus diha sa “pagpiyal [sa ilang kaugalingon] ngadto sa usa nga nagahukom sa pagkamatarong,” si Jehova nga Diyos. (1 Pedro 2:21-23) Ang pagbaton sa “kiling sa kaisipan” ni Jesus mahimong dakong depensa batok sa mga pag-atake ni Satanas.—1 Pedro 4:1.
9 Labaw sa tanan, dili angay natong sabton nga ang atong mga suliran maoy tinong ebidensiya nga wala kita kahimut-i sa Diyos. Kanang sayop nga pagsabot nakapaguol kang Job sa dihang siya gimakmakan ug hait nga mga pulong sa iyang mga maghuhupay konohay. (Job 19:21, 22) Ang Bibliya nagpasalig kanato pinaagi niining mga pulonga: “Ang Diyos dili masulayan sa daotang mga butang ni siya mosulay kang bisan kinsa.” (Santiago 1:13) Sa kasukwahi, si Jehova nagsaad nga tabangan kita sa pag-antos sa bisan unsang kabug-at nga modangat kanato ug siya motaganag kaikyasan gikan sa bisan unsang tentasyon nga maghasi kanato. (Salmo 55:22; 1 Corinto 10:13) Pinaagi sa pagduol sa Diyos sa mga panahon sa kasakitan, atong matimbangtimbang ang mga kahimtang sa hustong paagi ug mahimong molampos kita sa pagsukol sa Yawa.—Santiago 4:7, 8.
Mga Tabang Aron Makaantos
10 Bisan pa sa lisod nga kahimtang ni Job—lakip na ang masawayong mga pulong gikan sa iyang “mga maghuhupay” ug sa iyang kaugalingong kalibog bahin sa tinuod nga hinungdan sa iyang katalagman—gihuptan gihapon ni Job ang iyang integridad. Unsay atong makat-onan gikan sa iyang pagkamainantoson? Sa walay duhaduha, ang pangunang hinungdan sa iyang kalamposan mao ang iyang pagkamatinumanon kang Jehova. ‘Siya nahadlok sa Diyos ug naglikay sa daotan.’ (Job 1:1) Kana ang iyang paagi sa pagkinabuhi. Si Job midumili sa pagtalikod kang Jehova, bisan pag wala siya makasabot kon nganong kalit nagkadaotdaot ang ilang kahimtang. Nagtuo si Job nga siya angayng mag-alagad sa Diyos sa tanang kahimtang.—Job 1:21; 2:10.
11 Ang pagbaton ug maayong tanlag nakapahupay usab kang Job. Sa panahong siya daw mamatay na, siya nahupayan sa pagkahibalo nga gihimo niya ang iyang maarangan sa pagtabang sa uban, nga iyang nasunod ang matarong nga mga sukdanan ni Jehova, ug siya nakalikay sa tanang matang sa bakak nga pagsimba.—Job 31:4-11.
12 Siyempre, si Job nagkinahanglan gayod ug tabang aron mapasibo ang iyang punto-debista sa pipila ka bahin. Ug sa kamapainubsanon iyang gidawat ang maong tabang—laing dakong hinungdan nga siya nakaantos gayod. Si Job namati nga matinahoron sa maalamong tambag ni Elihu, ug iyang gidawat ang pagtul-id ni Jehova. “Ako misulti, apan wala ako makasabot,” siya miadmitir. “Ako naghimog pagbakwi, ug ako naghinulsol sa abog ug sa abo.” (Job 42:3, 6) Bisan pa sa sakit nga iyang giantos, nalipay si Job nga mas nasuod siya sa Diyos tungod sa maong pagpasibo sa iyang panghunahuna. “Nahibaloan ko na nga ikaw makahimo sa tanang butang,” matod ni Job. (Job 42:2) Tungod sa pagbatbat ni Jehova bahin sa Iyang kahimayaan, si Job nakasabot nga mas tin-aw sa iyang kaugalingong posisyon kon itandi sa Maglalalang.
13 Sa kataposan, gihatag ni Job ang talagsaong panig-ingnan bahin sa pagkamaluluy-on. Si Job nahimangod kaayo sa iyang mga maghuhupay konohay, apan sa dihang gihangyo ni Jehova si Job nga iampo sila, iya kanang gihimo. Pagkahuman niadto, gipasig-uli ni Jehova ang kahimsog ni Job. (Job 42:8, 10) Tin-aw, ang pagkayugot dili makatabang kanato sa pag-antos, apan ang gugma ug kaluoy makatabang. Ang paghanaw sa kayugot makapalig-on sa atong espirituwalidad, ug si Jehova magapanalangin kanato kon wad-on nato kana.—Marcos 11:25.
Maalamong mga Magtatambag nga Makatabang Kanato sa Pag-antos
14 Ang dugang leksiyon nga atong makat-onan gikan sa asoy ni Job mao ang pagkabililhon sa maalamong mga magtatambag. Sila maoy mga igsoon nga “natawo alang sa panahon sa kasakit.” (Proverbio 17:17) Hinuon, sumala sa gipakita sa kasinatian ni Job, ang pipila ka magtatambag makapaguol inay makapahupay. Ang maayong magtatambag angayng magpakitag empatiya, pagtahod, ug kalulot, sama sa gihimo ni Elihu. Basin ang mga ansiyano ug ubang hamtong nga mga Kristohanon kinahanglang magpasibo sa panghunahuna sa mga igsoong nabug-atan tungod sa mga suliran, ug may kalabotan niini, ang maong mga magtatambag daghan ug makat-onan gikan sa basahong Job.—Galacia 6:1; Hebreohanon 12:12, 13.
15 Adunay daghang maayong leksiyon nga makat-onan sa paagi sa pagdumala ni Elihu sa maong butang. Siya nagpatalinghog ug dugay una motubag sa sayop nga mga pulong sa tulo ka higala ni Job. (Job 32:11; Proverbio 18:13) Si Elihu migamit sa ngalan ni Job ug mihangyo kaniya isip higala. (Job 33:1) Lahi sa tulo ka maghuhupay konohay, si Elihu wala maghunahuna nga siya labaw kang Job. “Gikan sa yutang-kulonon ako giumol, ako usab,” matod niya. Dili niya gustong madugangan ang giantos ni Job pinaagi sa wala-hunahunaa nga mga pulong. (Job 33:6, 7; Proverbio 12:18) Imbes mosaway sa kanhing panggawi ni Job, siya gidayeg ni Elihu tungod sa iyang pagkamatarong. (Job 33:32) Labing hinungdanon, nasabtan ni Elihu ang mga butang sumala sa punto-debista sa Diyos, ug iyang gitabangan si Job sa pagpunting sa hunahuna nganha sa kamatuoran nga si Jehova dili gayod mohimog inhustisya. (Job 34:10-12) Iyang gidasig si Job sa paghulat kang Jehova, inay sa pagpaningkamot nga ipasundayag ang iyang kaugalingong pagkamatarong. (Job 35:2; 37:14, 23) Ang Kristohanong mga ansiyano ug ang uban makapahimulos gayod sa maong mga leksiyon.
16 Ang maalamong tambag ni Elihu maoy kasukwahi sa makapaguol nga mga pulong ni Elipaz, Bildad, ug Zopar. “Kamo wala mosulti sa tinuod mahitungod kanako,” giingnan sila ni Jehova. (Job 42:7) Bisan pag sila nag-ingon nga maayo ang ilang mga intensiyon, sila nahimong mga kasangkapan ni Satanas imbes maunongong mga higala ni Job. Silang tulo nagpatuo sukad sa sinugdan nga si Job ang mabasol sa iyang mga katalagman. (Job 4:7, 8; 8:6; 20:22, 29) Sumala kang Elipaz, ang Diyos walay pagsalig sa iyang mga alagad, ug dili mahinungdanon Kaniya kon kita matarong o dili. (Job 15:15; 22:2, 3) Si Elipaz miakusar pa kang Job sa mga sala nga wala niya mabuhat. (Job 22:5, 9) Sa laing bahin, si Elihu mitabang kang Job sa paghupot ug timbang nga panghunahuna bahin sa iyang relasyon sa Diyos, nga maoy tumong kanunay sa usa ka mahigugmaong magtatambag.
17 Adunay laing leksiyon bahin sa pagkamainantoson nga atong makat-onan gikan sa basahong Job. Ang atong mahigugmaong Diyos nagtan-aw sa atong kahimtang ug andam ug makaarang sa pagtabang kanato sa nagkalainlaing mga paagi. Atong gihisgotan sa miagi ang kasinatian ni Elsa Abt. Palandonga ang konklusyon nga iyang nakab-ot: “Sa wala pa ako dakpa, nakabasa ako sa usa ka sulat sa igsoong babaye nga nag-ingon nga kon ilalom sa grabeng pagsulay, ipahinabo sa espiritu ni Jehova nga moabot kanimo ang pagkakalmado. Gihunahuna ko nga siya nagpasobrag diyutay. Apan sa dihang akong naagoman ang mga pagsulay sa akong kaugalingon, ako nasayod nga ang iyang gisulti tinuod. Ingon gayod niana ang mahitabo. Lisod ang paghanduraw niana kon ikaw wala pa makaagom niana. Apan kadto nahitabo gayod kanako. Si Jehova motabang gayod.” Si Elsa wala maghisgot kon unsay mahimo o gihimo ni Jehova daghang milenyo kanhi sa adlaw ni Job. Siya naghisgot bahin sa atong panahon. Oo, “si Jehova motabang gayod”!
Malipayon ang Tawo nga Moantos
18 Pipila ra kanato ang moatubang ug kasakitan nga sama ka grabe sa kang Job. Apan bisan kon unsang mga pagsulay ang modangat kanato niining sistemaha sa mga butang, kita adunay lig-ong mga katarongan nga padayong huptan ang atong integridad, sama kang Job. Sa pagkatinuod, ang pagkamainantoson nakapatugob sa kinabuhi ni Job. Kadto naghingpit kaniya, nagbug-os kaniya. (Santiago 1:2-4) Kadto naglig-on sa iyang relasyon sa Diyos. “Sa hulungihong nakadungog ako bahin kanimo, apan karon ang akong mata nakakita kanimo,” matod ni Job. (Job 42:5) Si Satanas napamatud-ang bakakon sa pagkaagi nga wala siya makabungkag sa integridad ni Job. Gatosan ka katuigan sa ulahi, gihisgotan gihapon ni Jehova ang iyang alagad nga si Job ingong panig-ingnan sa pagkamatarong. (Ezequiel 14:14) Ang iyang rekord sa integridad ug pagkamainantoson nagpalihok sa katawhan sa Diyos bisan karon.
19 Sa dihang si Santiago misulat ngadto sa mga Kristohanon sa unang siglo bahin sa pagkamainantoson, iyang gihisgotan ang katagbawan nga motungha tungod sa pagkamainantoson. Ug iyang gigamit ang panig-ingnan ni Job aron pahinumdoman sila nga si Jehova dagayang nagaganti sa iyang matinumanong mga alagad. (Santiago 5:11) Atong mabasa sa Job 42:12: “Kon bahin kang Jehova, iyang gipanalanginan ang kaulahian ni Job labaw pa kay sa iyang sinugdan.” Ang Diyos mihatag kang Job ug doble sa nawala kaniya, ug siya may taas ug malipayong kinabuhi. (Job 42:16, 17) Sa susama, ang bisan unsang kasakitan, pag-antos, o kagul-anan nga atong antoson sulod sa kataposan niining sistema sa mga butang mapapas ug mahikalimtan sa bag-ong kalibotan sa Diyos. (Isaias 65:17; Pinadayag 21:4) Kita nakadungog sa pagkamainantoson ni Job, ug sa tabang ni Jehova, kita determinado nga mosunod sa panig-ingnan ni Job. Ang Bibliya nagsaad: “Malipayon ang tawo nga nagpadayon sa pag-antos sa pagsulay, tungod kay sa pagkahimong inuyonan iyang madawat ang purongpurong sa kinabuhi, nga gisaad ni Jehova niadtong nagpadayon sa paghigugma kaniya.”—Santiago 1:12.
Unsay Imong Tubag?
• Sa unsang paagi malipay nato ang kasingkasing ni Jehova?
• Nganong dili kita angayng moingon nga ang atong mga suliran maoy ebidensiya nga kita wala kahimut-i sa Diyos?
• Unsay nakatabang kang Job sa pag-antos?
• Sa unsang paagi masundog nato si Elihu diha sa paglig-on sa atong mga isigkamagtutuo?
[Mga Pangutana sa Pagtuon]
1, 2. Unsang pagsulay ang gisagubang sa usa ka magtiayon sa Polandia?
3, 4. (a) Unsang mga panig-ingnan ang makapadasig sa mga Kristohanon sa pag-antos? (b) Nganong giawhag kita sa Bibliya sa pagsusi sa kasinatian ni Job?
5. Unsa ang pangunang isyu nga hinumdoman sa dihang kita nagsagubang ug mga pagsulay o mga tentasyon?
6. Sa unsang paagi si Satanas nagtamay kang Jehova, ug unsa ka kaylap ang maong pagtamay?
7. Sa unsang paagi mapukgo nato ang lawasnong kaluya aron makaantos sa mga pagsulay?
8. (a) Sa unsang paagi makapadaot ang negatibong mga emosyon? (b) Unsang tinamdan ang nabatonan ni Jesus?
9. Unsay gipasalig sa Diyos kanato bahin sa mga kabug-at nga angay natong pas-anon o mga tentasyon nga atong sagubangon?
10, 11. (a) Unsay nakatabang kang Job sa pag-antos? (b) Sa unsang paagi nakatabang kang Job ang pagkadunay maayong tanlag?
12. Unsay sanong ni Job sa tabang nga iyang nadawat gikan kang Elihu?
13. Sa unsang paagi ang pagpakitag kaluoy nagmapuslanon kang Job?
14, 15. (a) Unsang mga hiyas ang ipasundayag sa magtatambag aron makapahupay sa uban? (b) Ipatin-aw kon nganong si Elihu milampos sa pagtabang kang Job?
16. Sa unsang paagi ang tulo ka maghuhupay konohay ni Job nahimong mga kasangkapan ni Satanas?
17. Unsay angay natong hinumdoman sa dihang makaagom ug pagsulay?
18. Unsang mga kaayohan ang napahimuslan ni Job tungod sa iyang pagkamainantoson?
19. Nganong nagtuo ka nga ang pagkamainantoson mapuslanon?
[Hulagway sa panid 28]
Ang maayong magtatambag magpakitag empatiya, pagtahod, ug kalulot
[Mga Hulagway sa panid 29]
Si Elsa ug Harald Abt