Si Job​—Usa ka Tawo nga Mainantoson ug may Integridad

“Imo bang gipunting ang imong kasingkasing kang Job nga akong alagad, nga walay usa nga sama kaniya sa yuta, usa ka tawo nga walay-ikasaway ug matul-id, mahadlokon sa Diyos ug naglikay sa daotan?”—JOB 1:8.

MAY usa ka tawo nga daw nakabaton na sa tanan—katigayonan, kadungganan, kahimsog, ug malipayong pagkinabuhi ingong pamilya. Unya sunodsunod nga mihugpa ang tulo ka trahedya. Nahanaw sa kalit ang iyang katigayonan. Dayon, nangamatay ang iyang tanang anak tungod sa talagsaon kaayong bagyo. Pagkahuman niadto, gitaptan siyag makapahugo nga sakit nga ang tibuok niyang lawas nalukop ug ngutngot nga mga hubag. Ang maong tawo mao si Job, nga pangunang karakter sa basahon sa Bibliya nga nagdala sa iyang ngalan.—Job, kapitulo 1 ug 2.

² “Oh nga unta didto ako niadtong lunar nga mga bulan sa kanhing panahon,” siya miagulo. (Job 3:3; 29:2) Inighugpa sa katalagman, kinsay dili mangandoy sa kanhing mga adlaw? Sa kahimtang ni Job, ang iyang pagkinabuhi matul-id, nga daw sinalipdan batok sa kaalaotan. Siya gitahod sa inila nga mga tawo ug ilang gitinguha ang iyang tambag. (Job 29:5-11) Siya adunahan, apan balanse ang iyang panghunahuna bahin sa salapi. (Job 31:24, 25, 28) Sa dihang nakahibalag siyag mga babayeng balo o mga ilo nga nagkinahanglan, iyang gitabangan sila. (Job 29:12-16) Ug siya nagpabiling maunongon sa iyang asawa.—Job 31:1, 9, 11.

³ Si Job nagkinabuhi nga walay-ikasaway tungod kay siya nagsimba sa Diyos. “Walay usa nga sama kaniya sa yuta,” miingon si Jehova, “usa ka tawo nga walay-ikasaway ug matul-id, mahadlokon sa Diyos ug naglikay sa daotan.” (Job 1:1, 8) Apan bisan pa sa moral nga integridad ni Job, ang iyang haruhay nga pagkinabuhi natapos tungod sa mga trahedya. Nahanaw ang tanan niyang hinagoan, ug ang tinuod niyang kinaiya gisulayan tungod sa kasakitan, kagul-anan, ug kahigawad.

⁴ Hinuon, si Job dili mao lang ang alagad sa Diyos nga nakaagom ug personal nga katalagman. Daghang Kristohanon karon ang nakaagom ug susamang kasinatian. Busa angayng isukna ang duha ka pangutana: Sa unsang paagi ang paghinumdom sa mapait nga kasinatian ni Job makatabang kanato  sa dihang kita makaagom ug trahedya? Ug sa unsang paagi matudloan kita niini aron mahimong mas mabination sa uban nga nag-antos?

Usa ka Isyu Bahin sa Pagkamaunongon ug Usa ka Pagsulay sa Integridad

⁵ Talagsaon ang kahimtang ni Job. Nga wala mahibalo si Job, gikuwestiyon sa Yawa ang mga motibo ni Job sa pag-alagad sa Diyos. Sa dihang gipunting ni Jehova ang maayong mga hiyas ni Job panahon sa usa ka panagkatigom sa langit, si Satanas mitubag: “Dili ba ikaw nagbutang man ug alad libot niya ug libot sa iyang balay ug libot sa tanang butang nga anaa kaniya sa tibuok palibot?” Busa si Satanas nangangkon nga ang kahakog maoy nagtukmod kang Job sa pag-alagad sa Diyos—ug nagdahig kana sa tanan nga ubang mga alagad sa Diyos. “Palihog bakyawa ang imong kamot, ug tandoga ang tanang butang nga anaa kaniya ug tan-awa kon dili ka ba niya tunglohon sa imong nawong mismo,” si Satanas miingon kang Jehova.—Job 1:8-11.

⁶ Mahinungdanon ang isyu. Gikuwestiyon ni Satanas ang paagi sa paggamit ni Jehova sa iyang pagkasoberano. Posible ba nga ang Diyos magmando sa uniberso pinaagi sa gugma? O, sumala sa gipasabot ni Satanas, kahakog ba ang modaog kanunay sa kataposan? Gitugotan ni Jehova nga ilangkit sa Yawa si Job ingon nga pananglitan, kay may pagsalig siya sa integridad ug kamaunongon sa Iyang alagad. Busa, gipahinabo ni Satanas nga si Job makaagom ug sunodsunod nga mga katalagman. Sa dihang napakyas si Satanas sa iyang unang mga pag-atake, iyang gihampak si Job ug usa ka ngutngot nga sakit. “Panit alang sa panit, ug ang tanang butang nga anaa sa usa ka tawo iyang ihatag tungod sa iyang kalag,” nagpatuo ang Yawa.—Job 2:4.

⁷ Bisag ang kadaghanang Kristohanon karon wala mag-antos nga sama kang Job, ilang giantos ang nagkadaiyang matang sa kasakitan. Ang daghan nagsagubang ug paglutos o pamilyahanong mga suliran. Ang kalisod sa panginabuhi o ang pagkamasakiton mahimong dakong kagul-anan. Ang pipila namatay tungod sa ilang pagtuo. Hinuon, dili gayod nato hunahunaon nga si Satanas ang nagpahinabo sa matag trahedya nga atong giantos. Sa pagkatinuod, ang hinungdan sa pipila ka suliran mahimong mao ang atong kaugalingong mga sayop o pisikal nga panulondon. (Galacia 6:7) Ug kitang tanan makasinati sa mga kaluyahon sa pagkatigulang ug sa kadaot sa kinaiyanhong mga katalagman. Gitin-aw sa Bibliya nga sa pagkakaron, si Jehova dili milagrosong manalipod sa iyang mga alagad batok sa maong mga kasakitan.—Ecclesiastes 9:11.

⁸ Hinuon, mahimong gamiton ni Satanas ang mga kasakitan nga atong giantos aron daoton ang atong pagtuo. Si apostol Pablo naghisgot nga siya gisakit sa “tunok sa unod, usa ka manulonda ni Satanas,” nga ‘nagsagpa’ kanunay kaniya. ((2 Corinto 12:7) Kon kadto ba maoy suliran sa panglawas, sama sa halap nga mga mata, o laing suliran, gisabot ni Pablo nga mahimong gamiton ni Satanas ang maong sakit ug ang moresultang pagbati sa kapakyasan aron matibhangan ang kalipay ug integridad ni Pablo. (Proverbio 24:10) Karong adlawa, mahimong sibahan ni Satanas ang mga membro sa pamilya, mga eskolmet, o bisan ang diktador nga mga kagamhanan aron lutoson ang mga alagad sa Diyos.

⁹ Sa unsang paagi masagubang natong malamposon kining mga sulirana? Pinaagi sa pag-isip niini ingong kahigayonan sa pagpasundayag nga dili matarog ang atong gugma kang Jehova ug ang atong pagpasakop sa iyang pagkasoberano. (Santiago 1:2-4) Bisan kon unsay hinungdan sa atong kasakitan, ang pagkasabot nga hinungdanon ang pag-unong sa Diyos makatabang aron mahuptan nato ang espirituwal nga panimbang. Si apostol Pedro misulat sa mga Kristohanon: “Mga hinigugma, ayaw kamo kahibulong sa pagdilaab taliwala kaninyo, nga nagakahitabo kaninyo ingon nga pagsulay, nga daw usa ka katingad-ang butang ang midangat kaninyo.” (1 Pedro 4:12) Ug si Pablo mipatin-aw: “Ang tanan nga nagtinguha sa pagkinabuhi uban ang diyosnong pagkamahinalaron kalangkit ni Kristo Jesus pagalutoson usab.”  (2 Timoteo 3:12) Gikuwestiyon gihapon ni Satanas ang integridad sa mga Saksi ni Jehova, sama sa kahimtang ni Job. Sa pagkatinuod, gipaila sa Bibliya nga misamot ang mga pag-atake ni Satanas sa katawhan sa Diyos niining kataposang mga adlaw.—Pinadayag 12:9, 17.

Sayop nga Pagsabot ug Sayop nga Tambag

¹⁰ Si Job nakaagom ug dili-paborable nga kahimtang, nga dili kinahanglan natong maagoman. Wala siyay alamag kon nganong midangat kaniya ang maong mga katalagman. Sayop nga gihunahuna ni Job nga sa usa ka paagi “si Jehova mihatag, ug si Jehova mikuha.” (Job 1:21) Lagmit gitinguha ni Satanas nga ipasabot kang Job nga ang Diyos maoy nagpahinabo sa iyang kasakitan.

¹¹ Gibati ni Job ang grabeng kaminghoy bisan pag wala niya tungloha ang Diyos sumala sa giawhag sa iyang asawa nga iyang himoon. (Job 2:9, 10) ‘Ang mga daotan daw mas maayo ug kahimtang kay kanako,’ siya miingon. (Job 21:7-9) ‘Nganong ang Diyos nagsilot man kanako?’ siya nahibulong gayod. May mga higayon nga buot na lang niyang mamatay. “Oh nga sa Sheol imo unta akong tagoan, nga imo unta akong ibutang sa tago hangtod nga ang imong kasuko motalikod!” siya mipatugbaw.—Job 14:13.

¹² May tulo ka higala nga miduaw kang Job, nga miduaw konohay sa “pagduyog sa iyang kasubo ug sa paghupay kaniya.” (Job 2:11) Bisan pa niadto, sila maoy “samokan nga mga maghuhupay.” (Job 16:2) Makapahupay unta kang Job ang mga higala nga iyang kapahungawan sa iyang mga suliran, apan kadtong tulo ka higala nakadugang hinuon sa kalibog ni Job ug nakapasamot sa iyang gibati nga kapakyasan.—Job 19:2; 26:2.

¹³ Hisabtan nga si Job makasukna sa iyang kaugalingon: ‘Nganong ako pa man? Unsa bay nabuhat ko aron makaagom niining tanang katalagman?’ Gipahayag sa iyang mga higala ang mga katin-awan nga bug-os makapahisalaag. Gipatuo nila nga si Job ray mabasol sa iyang pag-antos tungod kay siya nakahimog seryosong sala. “Kinsa ba ang walay sala nga nawagtang sukad?” nangutana si Elipaz. “Sumala sa akong nakita, kadtong nagalaraw kon unsay makadaot ug kadtong nagapugas ug kasamok, sila magaani niini.”—Job 4:7, 8.

¹⁴ Tinuod, ang mga suliran mahimong motungha kon kita magapugas sumala sa unod inay sa espiritu. (Galacia 6:7, 8) Apan sa atong presenteng sistema, ang kasamok mahimong motungha bisan kon unsay atong panggawi. Dugang pa, dili gayod ikaingon nga ang mga inosente mahigawas sa tanang katalagman. Si Jesu-Kristo, kinsa “wala mahugawi, nahimulag sa mga makasasala,” nakaagom sa masakit nga kamatayon diha sa usa ka sakitanang estaka, ug si apostol Santiago namatay ingong martir. (Hebreohanon 7:26; Buhat 12:1, 2) Ang hiwi nga pangatarongan ni Elipaz ug sa iyang duha ka higala nagtukmod kang Job nga depensahan ang iyang maayong dungog ug ipahayag gayod ang iyang kawalay sala. Bisan pa niana, ang panghunahuna ni Job bahin sa hustisya sa Diyos mahimong naapektohan sa ilang hugot nga pagpatuo nga si Job angayng mag-antos.—Job 34:5; 35:2.

Pagkaplag ug Tabang sa Dihang Nagsagubang ug Kasakitan

¹⁵ Aduna ba kitay makat-onan niini? Ang mga trahedya, sakit, o paglutos daw dili gayod makataronganon. Ang ubang mga tawo daw nakalingkawas sa daghan nianang maong mga suliran. (Salmo 73:3-12) Usahay, kita mahimong mosukna sa atong kaugalingon niining hinungdanong mga pangutana: ‘Ang akong gugma sa Diyos nagtukmod ba kanako sa pag- alagad kaniya bisag unsay mahitabo? Gipangandoy ko ba ang paghatag kang Jehova ug “usa ka tubag sa usa nga nagatamay Kaniya?”’ (Proverbio 27:11; Mateo 22:37) Dili gayod nato itugot nga magduhaduha kita bahin sa atong langitnong Amahan tungod sa negatibo nga mga komento sa uban. Usa ka matinumanong Kristohanon nga nag-antos sa sugmatsugmat nga sakit sa daghang katuigan kas-a miingon: “Nahibalo ko nga kon bisan unsay itugot ni Jehova, maantos ko kana. Nahibalo ko nga ihatag niya kanako ang gikinahanglang kalig-on. Kanunay niya kanang gihimo.”

 ¹⁶ Bahin sa mga taktika ni Satanas, may nasabtan kita nga wala hisabti ni Job. “Kita dili kay walay alamag sa iyang mga laraw,” o daotang mga plano. (2 Corinto 2:11) Dugang pa, daghan kitag praktikal nga kaalam nga atong magamit. Atong mabasa sa Bibliya ang mga asoy bahin sa matinumanon nga mga lalaki ug mga babaye nga nag-antos sa tanang matang sa kalisdanan. Si apostol Pablo, nga nakaagom ug mas daghang kalisdanan kay sa uban, misulat: “Ang tanang butang nga gisulat kanhi gisulat alang sa pagtudlo kanato, aron nga pinaagi sa atong pag-antos ug pinaagi sa paghupay gikan sa mga Kasulatan kita makabatog paglaom.” (Roma 15:4) Usa ka Saksi sa Uropa nga nabilanggo tungod sa iyang pagtuo sa ikaduhang gubat sa kalibotan nagbaylo sa iyang rasyong pagkaon sulod sa tulo ka adlaw ilis sa Bibliya. “Pagkabililhon gayod kadtong pagbayloa!” matod niya. “Bisan pa sa akong pisikal nga kagutom, akong nadawat ang espirituwal nga pagkaon nga nakatabang sa pagpalig-on kanako ug sa uban sa among mga pagsulay niadtong gubot nga kapanahonan. Gitipigan ko gihapon ang maong Bibliya hangtod niining adlawa.”

¹⁷ Gawas pa sa paghupay gikan sa Kasulatan, kita adunay daghang galamiton nga makatabang sa atong pagsabot sa Bibliya nga mohatag ug maayong giya sa pagsagubang sa mga suliran. Kon konsultahon mo ang Watch Tower Publications Index, lagmit makabasa kag kasinatian sa isigka-Kristohanon nga may pagsulay nga susama sa imoha. (1 Pedro 5:9) Makatabang usab ang pagsulti sa imong mga kahimtang ngadto sa masinabtanong mga ansiyano o sa ubang hamtong nga mga Kristohanon. Labaw sa tanan, pinaagig pag-ampo, makasalig ka sa tabang gikan ni Jehova ug sa iyang balaang espiritu. Sa unsang paagi nasagubang ni Pablo  ang ‘mga sagpa’ ni Satanas? Pinaagi sa pagkat-on sa pagsalig sa gahom sa Diyos. (2 Corinto 12:9, 10) “Sa tanang butang ako adunay kusog pinaagi kaniya nga naghatag ug gahom kanako,” siya misulat.—Filipos 4:13.

¹⁸ Busa adunay tabang nga mabatonan, ug dili ka angayng magpanuko sa pagtinguha niana. “Naluya ka ba sa adlaw sa kasakit? Ang imong kusog diyutay ra,” nag-ingon ang proverbio. (Proverbio 24:10) Ingon nga ang mga anay makapalumpag sa tabla nga balay, ang kaminghoy o kaluya makapadaot sa integridad sa Kristohanon. Sa pagsanta sa maong kapeligrohan, si Jehova nagpaluyo kanato pinaagi sa atong mga isigkaalagad sa Diyos. Usa ka manulonda nagpakita kang Jesus ug naglig-on kaniya sa gabii nga gidakop siya. (Lucas 22:43) Samtang nagbiyahe paingon sa Roma ingong binilanggo, si Pablo “nagpasalamat sa Diyos ug nakabatog kaisog” sa dihang iyang nahibalag ang mga igsoon didto sa Tiyanggihan sa Apio ug sa Tulo ka Abotanan. (Buhat 28:15) Usa ka Alemang Saksi mahinumdom pa sa tabang nga iyang nadawat sa pag-abot sa Ravensbrück nga kampo konsentrasyon sa dihang siya usa pa ka mahadlokong tin-edyer. “Ako nakaplagan dayon sa usa ka sister ug siya madasigong nag-abiabi kanako,” nahinumdom siya. “Ang laing matinumanong sister nag-atiman kanako, ug siya nahimong samag espirituwal nga inahan kanako.”

“Pamatud-i ang Imong Kaugalingon nga Matinumanon”

¹⁹ Si Jehova naghubit kang Job ingong usa ka tawo nga ‘naghupot sa iyang integridad.’ (Job 2:3) Bisag mibatig kaminghoy ug wala makasabot kon nganong siya nag-antos, si Job wala gayod magpalingpaling kon bahin sa hinungdanong isyu sa pagkamaunongon. Wala ipanghimakak ni Job ang tanan nga tungod niana siya nagkinabuhi. Siya may kalig-on nga miingon: “Hangtod nga ako mamatay dili ko wad-on ang akong integridad gikan kanako!”—Job 27:5.

²⁰ Ang susamang determinasyon makatabang kanato sa paghupot sa atong integridad ubos sa tanang kahimtang—sa dihang nagsagubang ug mga tentasyon, pagsupak, o kalisdanan. “Ayaw kahadlok sa mga butang nga hapit na nimong antoson,” giingnan ni Jesus ang kongregasyon sa Smirna. “Tan-awa! Ang Yawa padayong magabalhog sa pipila kaninyo sa bilanggoan aron kamo bug-os nga mabutang sa pagsulay, ug aron kamo makaagom ug kasakitan [kasamok, kasakitan, o pagpanglupig] sulod sa napulo ka adlaw. Pamatud-i ang imong kaugalingon nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.”—Pinadayag 2:10.

²¹ Niining sistema karon nga gimandoan ni Satanas, ang atong pag-antos ug integridad pagasulayon. Bisan pa niana, gipasaligan kita ni Jesus nga samtang nagtan-aw kita sa umaabot, walay katarongan nga kita mahadlok. Ang hinungdanong butang mao nga pamatud-an nato nga kita matinumanon. “Ang kasakitan makadiyot lamang,” matod ni Pablo, samtang ang “himaya,” o  ganti nga gisaad kanato ni Jehova, “labaw pa gayod ang gibug-aton ug walay kataposan.” (2 Corinto 4:17, 18) Bisan ang kasakitan ni Job maoy makadiyot lamang kon itandi sa daghang malipayong katuigan nga iyang natagamtam sa wala pa ug pagkahuman sa iyang pagsulay.—Job 42:16.

²² Hinuon, mahimong adunay mga gutlo sa atong kinabuhi nga daw dili matapos ang atong mga pagsulay ug daw dili na maagwanta ang atong pag-antos. Sa sunod artikulo, hisgotan nato kon sa unsang paagi ang kasinatian ni Job makahatag kanatog dugang nga mga pagtulon-an bahin sa pag-antos. Tukion usab nato ang mga paagi diin kita makapalig-on sa uban nga nagsagubang ug kalisdanan.

Unsay Imong Tubag?

• Unsang pangunang isyu ang gipatungha ni Satanas mahitungod sa integridad ni Job?

• Nganong dili kita angayng matingala bahin sa kalisdanan?

• Sa unsang paagi si Jehova nagtabang kanato sa pag-antos?

[Mga Pangutana sa Pagtuon]

1, 2. (a) Unsang wala-damha nga mga trahedya ang naagoman ni Job? (b) Batbata ang kinabuhi ni Job sa wala pa mohugpa ang mga trahedya.

 3. Unsay panglantaw ni Jehova kang Job?

 4. Nganong mapuslanon ang paghinumdom sa mapait nga kasinatian ni Job?

 5. Sumala kang Satanas, nganong nag-alagad si Job sa Diyos?

 6. Unsang hinungdanong isyu ang gipatungha ni Satanas?

 7. Sa unsang mga paagi ang mga alagad sa Diyos karon makasinatig mga pagsulay nga susama sa kang Job?

 8. Sa unsang paagi mahimong gamiton ni Satanas ang mga kasakitan nga atong ginaantos?

 9. Nganong dili gayod kita matingala sa kalisdanan o paglutos?

10. Unsang dili-paborable nga kahimtang ang naagoman ni Job?

11. Ipatin-aw kon unsay reaksiyon ni Job bahin sa iyang mga katalagman.

12, 13. Sa unsang paagi naapektohan si Job sa mga komento sa iyang tulo ka higala?

14. Nganong dili dayon nato ipasangil ang pag-antos sa dili-maayong panggawi?

15. Unsang pangatarongan ang makatabang kanato samtang nag-antos?

16. Sa unsang paagi ang Pulong sa Diyos makatabang niadtong nagsagubang ug mga kalisdanan?

17. Unsang mga tagana gikan sa Diyos ang makatabang kanato sa pag-antos?

18. Sa unsang paagi ang mga isigka-Kristohanon makahatag ug bililhong pagdasig?

19. Unsay nakatabang kang Job sa pagsukol sa mga paningkamot ni Satanas?

20. Nganong mapuslanon ang pag-antos?

21, 22. Sa dihang magaantos sa kasakitan, makapahupay kanato ang unsang kahibalo?

[Mga Hulagway sa panid 23]

Ang pagpanukiduki, pagpakigsulti sa hamtong nga mga Kristohanon, ug pagpahayag kon unsay anaa sa atong kasingkasing diha sa pag-ampo makatabang kanato sa pag-antos