Tigulang Apan Walay Nakaulang

TUNGOD sa mga epekto sa pagkatigulang, daghan ang maparalisado, nga nahilain sa katilingban. Dili kana ang kahimtang ni Fernand Rivarol, kinsa namatay sa edad nga 95 anyos didto sa Geneva, Switzerland. Siya nagpuyong nag-inusara, kay ang iyang asawa namatay na ug ang iyang minyong anak nga babaye may kaugalingon nang balay. Bisan tuod siya halos diha lang kanunay sa iyang balay, siya wala magmamingawon. Kanunay siyang molingkod duol sa lamesa sa sala, nga maggunit ug telepono, ug manawag ug mga tawo nga iyang ikaestorya bahin sa espirituwal nga mga butang.

Panahon sa iyang maukyabong yugto sa kinabuhi, dihay panahon nga si Fernand literal nga dili makagawas. Ngano? Sa pagkahimo gayod ni Fernand ug sa iyang asawa nga aktibong mga Saksi ni Jehova niadtong 1939, ang Gubat sa Kalibotan II mibuto sa Uropa. Wala gayod talikdi ni Fernand ang iyang binase-sa-Bibliya nga desisyon nga dili mohimog kadaot kang bisan kinsa. Tungod niana, siya nawad-an sa iyang trabaho ug nabilanggo ug dugay—lima ka tuig ug tunga tanan—nga nianang panahona siya nabulag sa iyang asawa ug gamayng anak babaye.

Sa paghinumdom, si Fernand miingon: “Para sa daghang tawo, morag akong gihiklin ang akong maayong trabaho ug gipasagdan ang akong pamilya nga nagkalisodlisod. Giyam-iran ako sa mga tawo ug gitratar nga samag usa ka kriminal. Bisan pa niana, sa dihang akong hunahunaon ang maong malisod nga katuigan, ako gayong mahinumdoman kon sa unsang paagi si Jehova nagpaluyo ug nagtabang kanamo. Daghang tuig na ang milabay sukad niadto, apan ang akong pagsalig kang Jehova lig-on gihapon.”

Kini nga pagtuo nagdasig kang Fernand sa pagpaambit sa iyang paglaom nga gipasukad sa Kasulatan ngadto sa uban pinaagig telepono. Kon may interesadong makig-estorya kaniya, iyang padad-an siya ug literatura sa Bibliya. Sa ulahi, iyang tawgan ang maong tawo aron susihon kon nagustohan ba niya ang maong publikasyon. Usahay ang mga tawo mosanong pinaagig pagpadala ug sulat agig pasalamat, nga nakapalipay gayod kaniya.

Tingali may nahibalag kang tawo nga sama kang Fernand diha sa inyong lugar. Nganong dili paminawon kon unsay iyang isulti aron imong masusi kon unsay iyang gituohan? Ang mga Saksi ni Jehova kanunayng malipay sa pagpaambit kanimo sa ilang mga gituohan.