Ang Pagsimba nga Makaayo Kanimo

“ANG pagduol sa Diyos maayo alang kanako,” nag-ingon ang salmistang si Asap. Siya naghunahuna sa pagsundog niadtong mga tawo nga wala magtagad sa Diyos aron sa pagpangagpas ug haruhay nga kinabuhi. Apan si Asap naghunahuna bahin sa mga kaayohan sa pagduol sa Diyos ug nakahinapos nga kini maayo alang kaniya. (Salmo 73:2, 3, 12, 28) Ang matuod nga pagsimba ba makaayo kanimo karon? Sa unsang paagi kini makabenepisyo kanimo?

Ang pagsimba sa matuod nga Diyos motabang kanimo sa pagkinabuhi nga dili maghunahuna sa kaugalingon lamang. Tungod sa paagi sa pagkalalang kanato sa “Diyos sa gugma,” kadtong nangagpas sa kaugalingon lamang nilang kaayohan dili gayod makakaplag ug kalipay. (2 Corinto 13:11) Si Jesus nagtudlo sa paninugdang kamatuoran mahitungod sa kinaiyahan sa tawo sa dihang siya miingon: “Adunay labaw nga kalipay sa paghatag kay sa pagdawat.” (Buhat 20:35) Kanay hinungdan kon nganong malipay kita sa pagbuhat sa mga butang alang sa atong mga higala ug pamilya. Apan ang kinalabwang kalipay naggikan sa pagbuhat sa mga butang alang sa Diyos. Mas takos siya sa atong gugma kay kang bisan kinsa. Nakaplagan sa milyonmilyong tawo gikan sa tanang kahimtang sa kinabuhi nga ang pagsimba sa Diyos pinaagi sa pagbuhat kon unsay iyang gisugo makapatagbaw gayod.—1 Juan 5:3.

Pagbatog Katuyoan sa Kinabuhi

Ang matuod nga pagsimba makaayo usab kanimo tungod kay maghatag kinig katuyoan sa imong kinabuhi. Namatikdan ba nimo kon unsa ka subsob nga gilangkit ang kalipay ngadto sa pagbati nga aduna kay napalampos nga hinungdanong butang? Kadaghanan sa mga tawo adunay tumong sa kinabuhi, nga tingali nalangkit sa ilang pamilya, mga higala, negosyo, o kalipayan. Tungod kay walay kasegurohan ang kinabuhi, kining mga butanga subsob nga wala makahatag kanilag kalipay. (Ecclesiastes 9:11) Hinunoa, ang matuod nga pagsimba motabang kanimo sa pagkaplag ug mas labaw nga katuyoan, kanang magpadayon sa paghatag ug katagbawan bisag ang ubang butang sa kinabuhi mapamatud-ang makapahigawad.

Ang matuod nga pagsimba naglangkit sa pagkaila kang Jehova ug sa pag-alagad kaniya nga matinumanon. Kadtong nagbuhat niini masuod pag-ayo sa Diyos. (Ecclesiastes 12:13; Juan 4:23; Santiago 4:8) Tingali malisdan ka sa paghunahuna nga mahimo nimong mailhan pag-ayo ang Diyos ug mahigala siya. Apan pinaagi sa pagpalandong sa asoy bahin sa iyang pagpakiglabot sa mga tawo ug sa pagkonsiderar sa iyang mga nalalang, imo gayong masabtan ang pipila ka bahin sa iyang personalidad. (Roma 1:20) Dugang pa, pinaagi sa pagbasa sa Pulong sa Diyos, imong masabtan kon nganong kita ania dinhi, kon nganong gitugotan sa Diyos ang pag-antos, kon sa unsang paagi taposon niya ang pag-antos ug, lagmit ang labing makaiikag sa tanan, kon sa unsang paagi makabaton kag hinungdanong papel sa kon unsay ginabuhat sa Diyos. (Isaias 43:10; 1 Corinto 3:9) Ang maong kahibalo maghatag kanimog bag-ong panukmod aron mabuhi!

Pagkahimong Mas Maayong Tawo

Ang matuod nga pagsimba makaayo kanimo tungod kay kini motabang kanimo nga mahimong mas maayong tawo. Samtang nagsubay ka sa matuod nga pagsimba, imong maugmad ang usa ka personalidad nga motultol ngadto sa mas malipayong relasyon sa uban. Imong makat-onan gikan sa Diyos ug sa iyang Anak ang paglihok nga matinud-anon, pagsulti nga maluloton, ug ang pagkahimong kasaligan. (Efeso 4:20–5:5) Sa dihang mailhan nimo pag-ayo ang Diyos nga mobati ka nag gugma kaniya, matukmod ka sa pagsundog kaniya. Ang Bibliya nag-ingon: “Mahimong mga tigsundog sa Diyos, ingon nga hinigugmang mga anak, ug magpadayon sa paglakaw diha sa gugma.”—Efeso 5:1, 2.

 Dili ba makalilipay nga malibotag mga tawo nga nagsundog sa gugma sa Diyos? Ikalipay nga dili kinahanglang mag-inusara ka sa pagsimba sa matuod nga Diyos. Ikaw makapakig-uban niadtong nahigugma sa kon unsay matarong ug maayo. Siyempre, dili ka tingali uyon sa ideya bahin sa organisadong relihiyon. Apan, sama sa atong nasabtan sa nag-unang artikulo, ang problema sa kadaghanang relihiyon dili tungod kay sila naorganisar kondili tungod kay sila wala maorganisar sa hustong paagi ug sa hustong mga hinungdan. Daghang organisadong relihiyon ang adunay daotang mga tumong. Ang katawhan sa Diyos giorganisar mismo ni Jehova alang sa maayong katuyoan. Ang Bibliya nag-ingon: “Ang Diyos usa ka Diyos, dili sa kasamok, kondili sa kalinaw.” (1 Corinto 14:33) Sama sa milyonmilyong uban pa, lagmit imong makaplagan nga ang pagpakig-uban sa usa ka organisadong grupo sa mga Kristohanon makahatag ug maayong impluwensiya sa imong panglantaw.

Paglaom sa Umaabot

Ang Balaang Kasulatan nagpakita nga ang Diyos nag-organisar sa matuod nga mga magsisimba aron sila makalabang-buhi sa kataposan niining presente nga sistema sa mga butang ug makapanunod sa bag-ong yuta nga niini “magpuyo ang pagkamatarong.” (2 Pedro 3:13; Pinadayag 7:9-17) Busa, ang pagsimba nga maayo kanimo magtaganag paglaom nga hinungdanon sa pagbatog kalipay. Ang pipila nagpasukad sa ilang mga panahom sa umaabot diha sa kalig-on sa mga kagamhanan, sa mga kahigayonan sa negosyo, o sa maayong panglawas ug makapatagbawng pagretiro. Apan, pipila lang niining mga butanga, kon aduna man ugaling, ang makataganag malipayong kaugmaon. Sa laing bahin, si apostol Pablo misulat: “Gipahimutang nato ang atong paglaom sa usa ka buhing Diyos.”—1 Timoteo 4:10.

Kon kugi kang magsusi, imong makaplagan ang matuod nga mga magsisimba. Niining nabahin nga kalibotan, ang gugma ug panaghiusa tin-awng nagpaila sa mga Saksi ni Jehova. Sila naggikan sa halos tanang nasod ug kagikan; apan, sila nahiusa sa gugma sa usag usa ug gugma kang Jehova. (Juan 13:35) Sila nagdapit kanimo sa pagsusi mismo kon unsay ilang nasinatian. Si Asap misulat: “Ang pagduol sa Diyos maayo alang kanako.”—Salmo 73:28.

[Hulagway sa panid 7]

Posible nga ikaw mahimong higala sa Diyos