“Ipahibalo ang Inyong mga Pangaliya sa Diyos”
“Ipahibalo ang Inyong mga Pangaliya sa Diyos”
“Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.”—FILIPOS 4:6.
1. Kang kinsa kita adunay pribilehiyo nga makigsulti, ug nganong kahibulongan kaayo kana?
KON mohangyo ka nga makigkita sa magmamando sa imong nasod, unsa kahay madawat nimong tubag? Lagmit makadawat ka ug matinahorong sulat gikan sa iyang buhatan, apan segurado nga dili ka tugotan nga makigsulti sa magmamando mismo. Apan, sa kinatas-ang Magmamando sa tanan, si Jehova nga Diyos, ang Soberano sa uniberso, dili ingon niana ang kahimtang. Kita makaduol kaniya bisan asa kita ug sa bisan unsang panahon nga atong gusto. Ang dalawatong mga pag-ampo makaabot gayod kaniya. (Proverbio 15:29) Pagkakahibulongan niana! Dili ba ang atong apresasyon niini angayng magtukmod kanato sa pag-ampo kanunay sa Usa nga haom tawgong “Tigpatalinghog sa pag-ampo”?—Salmo 65:2.
2. Unsay gikinahanglan aron ang mga pag-ampo mahimong dalawaton sa Diyos?
2 Apan, duna tingaliy mangutana, ‘Unsang matanga sa mga pag-ampo ang dalawaton sa Diyos?’ Gipatin-aw sa Bibliya ang usa ka butang nga gikinahanglan aron ang mga pag-ampo mahimong dalawaton sa dihang kini nag-ingon: “Kon walay pagtuo imposible ang pagpahimuot kaniya, kay siya nga moduol sa Diyos angay nga motuo nga siya mao ug nga siya maoy tigganti sa mga matinuorong nagapangita kaniya.” (Hebreohanon 11:6) Oo, ingon sa gipatin-aw sa nag-unang artikulo, ang usa ka kinahanglanon sa pagduol sa Diyos mao ang pagtuo. Ang Diyos andam nga magpatalinghog sa mga pag-ampo niadtong moduol kaniya, apan kinahanglang buhaton nila kana uban ang pagtuo ug maayong binuhatan apil na ang pagkasinsero ug hustong tinamdan sa kasingkasing.
3. (a) Ingon sa gipakita sa mga pag-ampo sa matinumanong mga alagad kaniadto, unsang matanga sa mga pahayag ang mahimong ilakip diha sa mga pag-ampo? (b) Unsa ang lainlaing matang sa pag-ampo?
3 Giawhag ni apostol Pablo ang mga Kristohanon sa iyang adlaw: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” (Filipos 4:6, 7) Ang Bibliya adunay daghang panig-ingnan niadtong nag-ampo sa Diyos bahin sa ilang mga kabalaka. Lakip kanila si Ana, Elias, Ezequias, ug Daniel. (1 Samuel 2:1-10; 1 Hari 18:36, 37; 2 Hari 19:15-19; Daniel 9:3-21) Angay natong sundon ang ilang panig-ingnan. Matikdi usab nga ang mga pulong ni Pablo nagpakita nga adunay lainlaing matang sa mga pag-ampo. Iyang gihisgotan ang pagpasalamat, sa ato pa, pag-ampo diin atong ipahayag ang atong apresasyon sa gihimo sa Diyos alang kanato. Kini mahimong apilan ug pagdayeg. Ang pangamuyo nagtumong sa mapaubsanon, tim-os nga pangaliyupo. Ug kita makapahayag ug mga pangaliya, o mga hangyo alang sa espesipikong butang. (Lucas 11:2, 3) Ang atong langitnong Amahan malipay nga kita moduol kaniya sa bisan hain niining mga paagiha.
4. Bisan tuod si Jehova nahibalo sa atong mga panginahanglan, nganong mangaliya pa gihapon kita kaniya?
4 Ang uban mangutana tingali, ‘Dili ba nahibalo na man si Jehova sa tanan natong panginahanglan?’ Oo, nahibalo siya. (Mateo 6:8, 32) Nan, nganong gusto pa man niya nga moduol kita kaniya aron mangaliya? Tagda kini nga pananglitan: Ang usa ka tag-iyag tindahan motanyag tingali ug gasa sa pipila niya ka suki. Apan, para madawat kining maong gasa, ang mga suki kinahanglang moadto sa tag-iya aron pangayoon kana. Kadtong dili gustong moadto magpakita nga wala gayod nila pabilhi ang maong tanyag. Sa samang paagi, ang dili nato pagpahibalo sa atong mga pangaliya pinaagi sa pag-ampo magpakitag kakulang ug apresasyon sa gitagana ni Jehova. Si Jesus miingon: “Pangayo ug kamo makadawat.” (Juan 16:24) Niining paagiha, atong gipasundayag ang atong pagsalig sa Diyos.
Unsaon Nato Pagduol ang Diyos?
5. Nganong kinahanglan kitang mag-ampo pinaagi sa ngalan ni Jesus?
5 Si Jehova wala maglatid ug daghan kaayong estriktong mga lagda kon unsaon pag-ampo. Bisan pa niana, kinahanglang makakat-on kita sa hustong paagi sa pagduol sa Diyos, nga gipatin-aw diha sa Bibliya. Pananglitan, gitudloan ni Jesus ang iyang mga sumusunod: “Kon kamo mangayo sa Amahan sa bisan unsa kini iyang ihatag kaninyo sa akong ngalan.” (Juan 16:23) Busa, kinahanglan nga kita mag-ampo pinaagi sa ngalan ni Jesus, nga nag-ila nga pinaagi lamang kang Jesus nga madawat sa katawhan ang mga panalangin sa Diyos.
6. Sa dihang mag-ampo, unsay angay natong posisyon?
6 Unsay angay natong posisyon sa dihang mag-ampo? Sa Bibliya, walay gisulti nga partikular nga posisyon aron patalinghogan ang atong mga pag-ampo. (1 Hari 8:22; Nehemias 8:6; Marcos 11:25; Lucas 22:41) Ang hinungdanon mao ang pag-ampo ngadto sa Diyos uban ang pagkasinsero ug hustong tinamdan sa kasingkasing.—Joel 2:12, 13.
7. (a) Unsay kahulogan sa “amen”? (b) Sa unsang paagi kana haom nga gigamit diha sa mga pag-ampo?
7 Komosta ang paggamit sa pulong nga “amen”? Gipaila sa Kasulatan nga kini sagad nga maoy haom nga panapos sa atong mga pag-ampo, ilabina kon kita mag-ampo sa publiko. (Salmo 72:19; 89:52) Ang Hebreohanong pulong nga ʼa·menʹ nagkahulogan ug “segurado.” Ang McClintock and Strong’s Cyclopedia nagpatin-aw nga ang pagsultig “Amen” sa kataposan sa mga pag-ampo nagpadayag ug “pag-uyon sa mga pulong nga gisulti, ug paghangyo nga matuman kana.” Busa, sa pagtapos sa pag-ampo pinaagi sa sinserong pagsultig “Amen,” gipakita sa nag-ampo ang iyang tim-os nga pagbati labot sa mga pulong nga bag-o pa niyang gibungat. Sa dihang ang usa ka Kristohanon nga naghawas sa kongregasyon diha sa pag-ampo motapos niana pinaagi sa pagsultig “Amen,” kadtong namati mahimong mosulti usab ug “Amen” nga hilom o igong madungog sa uban aron sa pagpakita nga sila uyon gayod sa gilitok nga pag-ampo.—1 Corinto 14:16.
8. Sa unsang paagi ang uban natong mga pag-ampo mahisama tingali sa mga pag-ampo ni Jacob o Abraham, ug unsay gipakita niini bahin kanato?
8 May mga panahon nga tugotan tingali kita sa Diyos sa pagpakita sa giladmon sa atong kaikag bahin sa mga butang nga atong giampo. Tingali kinahanglang mahisama kita kang Jacob kaniadto, kinsa nakiglayog sa usa ka manulonda sa tibuok gabii aron makadawat ug panalangin. (Genesis 32:24-26) O sa ubang mga kahimtang tingali kinahanglang mahisama kita kang Abraham, kinsa makadaghang naghangyo kang Jehova alang kang Lot ug kang bisan kinsa pang matarong nga lagmit anaa sa Sodoma. (Genesis 18:22-33) Tingali mangamuyo usab kita kang Jehova bahin sa mga butang nga bililhon kanato, nga maghangyo kaniya pinasukad sa hustisya, mahigugmaong-kalulot, ug kaluoy.
Unsay Mahimo Natong Pangayoon?
9. Unsay kinahanglan natong unahon sa dihang mag-ampo?
9 Hinumdomi nga si Pablo miingon: “Sa bisan unsang butang . . . ipahibalo ang inyong mga pangaliya sa Diyos.” (Filipos 4:6) Busa, ang personal nga mga pag-ampo mahimong maglakip sa halos tanang bahin sa atong kinabuhi. Apan, ang mga intereses ni Jehova ang kinahanglan natong unahon sa dihang kita mag-ampo. Si Daniel nagpakita ug maayong panig-ingnan niining bahina. Sa dihang ang Israel gisilotan tungod sa ilang mga sala, si Daniel mihangyo kang Jehova nga pakitaan unta silag kaluoy, nga nag-ingon: ‘Ayaw paglangan, tungod sa imong kaugalingon, Oh akong Diyos, tungod sa imong ngalan.’ (Daniel 9:15-19) Ang ato bang mga pag-ampo nagpakita usab nga ang pagbalaan sa ngalan ni Jehova ug ang katumanan sa iyang kabubut-on mao ang atong giuna?
10. Giunsa nato pagkahibalo nga haom ang pag-ampo bahin sa personal nga mga butang?
10 Bisan pa niana, haom usab nga mohangyo bahin sa personal nga mga butang. Pananglitan, sama sa salmista, kita tingali mag-ampo nga hatagan unta kitag mas lalom nga pagsabot sa espirituwal nga mga butang. Siya miampo: “Pasabta ako, aron mabantayan ko ang imong balaod ug makatuman ako niini sa bug-os nga kasingkasing.” (Salmo 119:33, 34; Colosas 1:9, 10) Si Jesus “naghimog mga pangamuyo ug mga pangaliya usab ngadto sa Usa nga arang makaluwas kaniya gikan sa kamatayon.” (Hebreohanon 5:7) Sa pagbuhat niana, iyang gipasundayag nga haom gayod ang pagpangayog kalig-on sa dihang ang usa mag-atubang ug kapeligrohan o mga pagsulay. Sa dihang gihatag ang modelong pag-ampo ngadto sa iyang mga tinun-an, gilakip ni Jesus ang personal nga mga butang, sama sa pagpasaylo sa mga kasaypanan ug pagbaton ug pagkaon sa adlaw-adlaw.
11. Sa unsang paagi ang pag-ampo makatabang kanato nga dili madaog sa mga tentasyon?
11 Nianang modelong pag-ampo, gilakip ni Jesus ang hangyo: “Ayaw kami dad-a ngadto sa tentasyon, apan luwasa kami gikan sa usa nga daotan.” (Mateo 6:9-13) Sa ulahi siya nagtambag: “Magpadayon sa pagbantay ug mag-ampo nga mapinadayonon, aron dili kamo mahiagom sa tentasyon.” (Mateo 26:41) Ang pag-ampo hinungdanon sa dihang kita mag-atubang ug mga tentasyon. Tingali tentalon kita sa pagsalikway sa mga prinsipyo sa Bibliya diha sa trabahoan o sa eskuylahan. Ang mga dili Saksi magdapit tingali kanato sa pagduyog kanila sa kuwestiyonableng mga kalihokan. Basin hangyoon kita sa pagbuhat ug usa ka butang nga naglapas sa matarong nga mga prinsipyo. Nianang mga panahona, maayong sundon nato ang tambag ni Jesus nga mag-ampo—sa dili pa ug sa dihang aktuwal nga nag-atubang ug tentasyon—nga hangyoon ang Diyos nga tabangan kita nga dili unta mahulog sa tentasyon.
12. Unsang mga hinungdan sa kabalaka ang mahimong mag-aghat kanato sa pag-ampo, ug unsay atong madahom kang Jehova?
12 Ang lainlaing mga pagpit-os ug mga kabalaka nag-apektar sa kinabuhi sa mga alagad sa Diyos karon. Ang sakit ug emosyonal nga kapit-os maoy pangunang gikabalak-an sa daghan. Ang kapintasan sa atong palibot makapit-os sa atong kinabuhi. Tungod sa kalisod sa panginabuhi, malisdan kita sa pagbaton sa atong mga panginahanglan. Pagkamakapahupay ang pagkahibalo nga si Jehova mamati sa iyang mga alagad nga nag-ampo bahin niining mga butanga! Ang Salmo 102:17 nag-ingon bahin kang Jehova: “Hatagan gayod niya ug pagtagad ang pag-ampo niadtong gihukasan sa tanang butang, ug dili tamayon ang ilang pag-ampo.”
13. (a) Unsang personal nga mga butang ang haom nga iampo? (b) Iasoy ang usa ka pananglitan nianang matanga sa pag-ampo.
13 Sa pagkatinuod, ang bisan unsang butang nga mag-apektar sa atong pag-alagad kang Jehova o sa atong relasyon kaniya mahimong iampo. (1 Juan 5:14) Kon kinahanglan kang mohimog desisyon bahin sa kaminyoon o panarbaho o sa pagpalapad sa imong ministeryo, ayaw pagpanuko sa pag-ampo sa Diyos bahin niini, nga mangayo sa iyang giya. Pananglitan, usa ka batan-ong babaye sa Pilipinas ang nagtinguha sa pagsulod sa bug-os-panahong ministeryo. Apan, wala siyay trabaho nga ikasuportar sa iyang kaugalingon. Siya miingon: “Usa ka Sabado niana, ako espesipikong nag-ampo kang Jehova bahin sa pagpayunir. Unya niana gihapong adlawa, sa dihang ako nagsangyaw, akong gitanyagag libro ang usa ka tin-edyer. Sa wala damha, ang dalagita miingon: ‘Kinahanglang moadto ka sa among eskuylahan sa Lunes sa buntag.’ Ako siyang gipangutana, ‘Ngano man?’ Siya miingon nga dunay bakanteng puwesto sa trabaho nga kinahanglang masudlan dayon. Ako miadto, ug nadawat dihadiha. Dali ra kaayo ang mga panghitabo.” Daghang Saksi sa tibuok kalibotan ang adunay susamang mga eksperyensiya. Busa ayaw pagpanuko sa pag-ampo ngadto sa Diyos bahin sa imong kinasingkasing nga mga pangaliya!
Komosta Kon Kita Nakasala?
14, 15. (a) Nganong ang usa ka tawo dili angayng magpanuko sa pag-ampo bisan pag siya nakasala? (b) Gawas sa personal nga mga pag-ampo, unsa pay makatabang sa usa ka tawo nga maulian sa iyang sala?
14 Sa unsang paagi ang pag-ampo makatabang kon ang usa nakasala? Tungod sa kaulaw, ang uban nga nakasala dili na moampo. Apan, ang pagbuhat niana dili maalamon. Sa pag-ilustrar: Ang mga piloto sa ayroplano nahibalo nga kon sila mawala sa ilang ruta, sila makakontak sa mga tigkontrol sa trapiko sa kahanginan aron mangayog tabang. Komosta kon ang usa ka piloto magpanuko sa pagkontak sa mga tigkontrol tungod kay siya naulaw nga siya nawala? Mahimong mosangpot kana sa aksidente! Sa samang paagi, ang usa ka tawo nga nakasala ug maulaw nga moampo sa Diyos mahimong mahiagom sa dugang kadaot. Ang kaulaw tungod sa nahimong sala dili angayng mopugong sa usa sa pagpakigsulti kang Jehova. Sa pagkatinuod, ang Diyos nag-awhag niadtong nakahimog seryosong mga sala nga moampo ngadto kaniya. Ang manalagnang si Isaias nag-awhag sa mga makasasala sa iyang adlaw nga mosangpit kang Jehova, “kay siya magpasaylo sa madagayaon gayod.” (Isaias 55:6, 7) Siyempre, kinahanglan tingaling ‘lukmayon sa usa ang nawong ni Jehova’ pinaagi sa pagpaubos sa iyang kaugalingon, nga talikdan ang makasasalang dalan, ug sinserong maghinulsol.—Salmo 119:58; Daniel 9:13.
15 Diin nalangkit ang sala, hinungdanon ang pag-ampo tungod sa lain pang hinungdan. Miingon si Santiago mahitungod sa usa nga nagkinahanglag espirituwal nga tabang: “Magpatawag siyag mga ansiyano sa kongregasyon, ug paampoa sila alang kaniya, . . . ug si Jehova magbangon kaniya.” (Santiago 5:14, 15) Oo, ang usa ka indibiduwal kinahanglang personal nga mosugid sa iyang sala ngadto kang Jehova pinaagi sa pag-ampo, apan makahangyo usab siya sa mga ansiyano sa pag-ampo alang kaniya. Makatabang kana kaniya nga maulian sa espirituwal.
Tubag sa mga Pag-ampo
16, 17. (a) Sa unsang paagi si Jehova nagtubag sa mga pag-ampo? (b) Unsang mga eksperyensiya ang nag-ilustrar nga ang pag-ampo ug ang buluhatong pagsangyaw dakog kalambigitan?
16 Sa unsang paagi ginatubag ang mga pag-ampo? Ang uban mahimong tubagon dayon ug sa dayag nga paagi. (2 Hari 20:1-6) Ang uban dugay-dugay pa, ug ang mga tubag dili kaayo mamatikdan. Ingon sa gipakita sa ilustrasyon ni Jesus bahin sa babayeng balo nga nagpunayg adto sa maghuhukom, gikinahanglan tingali nga makadaghan kitang moampo sa Diyos. (Lucas 18:1-8) Apan, makaseguro kita nga kon kita mag-ampo nga nahiuyon sa kabubut-on sa Diyos, dili gayod kita sultian ni Jehova: “Hunong na sa pagsamok kanako.”—Lucas 11:5-9.
17 Sa makadaghan, nakita sa katawhan ni Jehova nga gitubag ang ilang mga pag-ampo. Dayag kaayo kini diha sa atong publikong ministeryo. Pananglitan, duha ka Kristohanong mga sister sa Pilipinas ang nanagtag ug literatura sa Bibliya diha sa usa ka hilit nga dapit. Sa dihang mitunol sila ug tract sa usa ka babaye, nanglugmaw ang mga luha niini. Siya miingon: “Gabii, ako nag-ampo sa Diyos nga duna unta siyay ipadala aron tun-an ako sa Bibliya, ug nagtuo ko nga mao kini ang tubag sa akong pag-ampo.” Wala madugay human niana, ang babaye nagtambongan na sa mga tigom sa Kingdom Hall. Sa laing dapit sa Habagatan-sidlakang Asia, usa ka Kristohanong brader ang nagpanuko sa pagsangyaw diha sa guwardiyado kaayo nga apartment. Apan, siya nag-ampo kang Jehova, nakabatog kaisog, ug misulod sa bilding. Siya nanuktok sa pultahan sa usa ka apartment, ug usa ka batan-ong babaye ang miabli sa pultahan. Sa dihang gipatin-aw sa brader ang rason sa iyang pagduaw, ang babaye mihilak. Matod niya dugay na siyang nangita sa mga Saksi ni Jehova ug nag-ampo nga unta makaplagan niya sila. Ang brader nalipay sa pagtabang kaniya nga makontak sa lokal nga kongregasyon sa mga Saksi ni Jehova.
18. (a) Sa dihang madawat ang tubag sa atong mga pag-ampo, unsay angay natong buhaton? (b) Sa unsa kita makaseguro kon kita mag-ampo sa tanang higayon?
18 Ang pag-ampo usa gayod ka kahibulongang tagana. Si Jehova andam nga mamati ug motubag sa atong mga pag-ampo. (Isaias 30:18, 19) Apan, kinahanglang mapaniiron kita kon sa unsang paagi gitubag ni Jehova ang atong mga pag-ampo. Tingali dili kanunayng sa paagi nga atong gidahom. Bisan pa niana, sa dihang atong maila ang iyang paggiya, dili gayod nato kalimtan nga ihatag kaniya ang atong mga pasalamat ug pagdayeg. (1 Tesalonica 5:18) Dugang pa, hinumdomi gayod ang tambag ni apostol Pablo: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” Oo, pahimusli ang tanang kahigayonan nga makapakigsulti sa Diyos. Nianang paagiha, maeksperyensiyahan nimo kanunay nga tinuod ang giingon ni Pablo mahitungod niadtong kansang mga pag-ampo gitubag: “Ang kalinaw sa Diyos nga labaw sa tanang panghunahuna magbantay sa inyong mga kasingkasing ug sa inyong mga gahom sa pangisip.”—Filipos 4:6, 7.
Makatubag Ka Ba?
• Unsa ang lainlaing matang sa pag-ampo?
• Sa unsang paagi kita moampo?
• Unsay mahimo natong ilakip sa atong mga pag-ampo?
• Unsay papel sa pag-ampo sa dihang ang usa nakasala?
[Mga Pangutana sa Pagtuon]
[Mga hulagway sa panid 29]
Ang kinasingkasing nga pag-ampo motabang kanato nga dili madaog sa mga tentasyon
[Mga hulagway sa panid 31]
Pinaagi sa pag-ampo, kita makapahayag sa Diyos sa atong pagpasalamat, mga kabalaka, ug mga pangaliya