Kon Unsaon Pagduol ang “Tigpatalinghog sa Pag-ampo”

“Oh Tigpatalinghog sa pag-ampo, nganha kanimo moduol ang tanang matang sa katawhan.”—SALMO 65:2.

1. Unsay nakapalahi sa mga tawo gikan sa ubang mga linalang sa yuta, ug unsang kahigayonan ang nabuksan niini?

 SA LIBOLIBONG buhing mga linalang sa yuta, ang mga tawo lamang ang adunay kapasidad nga mosimba sa Maglalalang. Ang mga tawo lamang ang makaamgo nga sila adunay espirituwal nga panginahanglan ug magtinguha sa pagtagbaw niini. Kini nagbukas kanato sa maanindot kaayong kahigayonan nga makabaton ug personal nga relasyon uban sa atong langitnong Amahan.

2. Unsay daotang epekto sa sala diha sa relasyon sa tawo uban sa iyang Maglalalang?

² Ang Diyos naglalang sa tawo uban ang katakos sa pagpakigsulti sa iyang Magbubuhat. Si Adan ug Eva gilalang nga walay sala. Busa, sila may kagawasang makapakigsulti sa Diyos sama nga ang usa ka bata makigsulti sa iyang amahan. Apan, kanang dakong pribilehiyo nawala tungod sa sala. Si Adan ug Eva misupak sa Diyos ug nawala ang ilang suod nga relasyon kaniya. (Genesis 3:8-13, 17-24) Nagpasabot ba kana nga ang dili-hingpit nga mga kaliwat ni Adan dili na makapakigsulti sa Diyos? Wala. Gitugotan gihapon sila ni Jehova sa pagpakigsulti kaniya kon sila motuman sa pipila ka kinahanglanon. Unsa man kanang maong mga kinahanglanon?

Mga Kinahanglanon Aron Makaduol sa Diyos

3. Sa unsang paagi ang makasasalang mga tawo makaduol sa Diyos, ug unsang pananglitan ang nag-ilustrar niini?

³ Ang usa ka hitabo nga naglangkit sa duha sa mga anak ni Adan motabang kanato sa pagsabot kon unsay gikinahanglan sa Diyos gikan sa dili-hingpit nga mga tawo nga gustong moduol Kaniya. Si Cain ug Abel parehong misulay sa pagduol sa Diyos pinaagi sa pagtanyag ug mga halad ngadto kaniya. Ang halad ni Abel gidawat, samtang ang kang Cain wala. (Genesis 4:3-5) Nganong gidawat man ang halad ni Abel? Ang Hebreohanon 11:4 nag-ingon: “Tungod sa pagtuo si Abel naghalad sa Diyos ug usa ka halad nga mas labaw ug bili kay sa kang Cain, nga pinaagi niini nga pagtuo siya gipamatud-an nga matarong.” Nan, klaro nga ang pagtuo maoy usa ka kinahanglanon aron mahimong dalawaton sa Diyos. Ang laing kinahanglanon makita diha sa gisulti ni Jehova kang Cain: “Kon magbuhat ka ug maayo, dili ba adunay pagbayaw?” Oo, dawaton unta sa Diyos ang halad ni Cain kon si Cain nagbuhat pa ug maayo. Apan, gisalikway ni Cain ang tambag sa Diyos, iyang gipatay si Abel, ug sa ulahi si Cain gihinginlan. (Genesis 4:7-12) Busa, sa unang bahin sa kasaysayan sa tawo, gipasiugda na ang kahinungdanon sa pagtuo ug pagbuhat ug maayo aron makaduol sa Diyos.

4. Unsay angay natong ilhon maylabot sa atong pagduol sa Diyos?

⁴ Hinungdanon nga ilhon nato ang atong pagkamakasasala kon buot natong moduol sa Diyos. Ang tanang tawo makasasala, ug ang sala maoy babag sa pagduol sa Diyos. Ang manalagnang si Jeremias misulat mahitungod sa Israel: “Kami nakalapas . . . Gialihan mo ang pagduol kanimo pinaagi sa bagang panganod, aron ang pag-ampo dili makalahos.” (Lamentaciones 3:42, 44) Bisan pa niana, sa tibuok kasaysayan sa tawo gipakita sa Diyos nga andam siyang magpatalinghog sa mga pag-ampo niadtong moduol kaniya uban ang pagtuo ug hustong tinamdan sa kasingkasing ug motuman sa iyang mga sugo. (Salmo 119:145) Kinsa ang pipila niining maong mga indibiduwal, ug unsay atong makat-onan gikan sa ilang mga pag-ampo?

5, 6. Unsay atong makat-onan gikan sa paagi sa pagduol ni Abraham sa Diyos?

 ⁵ Ang usa nianang mga tawhana mao si Abraham. Gidawat sa Diyos ang mga paningkamot ni Abraham sa pagduol sa Diyos, tungod kay gitawag sa Diyos si Abraham nga “akong higala.” (Isaias 41:8) Unsay atong makat-onan gikan sa paagi sa pagduol ni Abraham sa Diyos? Kining matinumanong patriarka nangutana kang Jehova bahin sa usa ka manununod, nga nag-ingon: “Unsay imong ihatag kanako, sanglit ako walay anak?” (Genesis 15:2, 3; 17:18) Sa laing higayon, iyang gipahayag ang iyang kahingawa kon kinsay pagaluwason sa dihang gipahamtang sa Diyos ang paghukom batok sa daotan nga Sodoma ug Gomora. (Genesis 18:23-33) Si Abraham nangamuyo usab alang sa uban. (Genesis 20:7, 17) Ug, sama sa kahimtang ni Abel, ang pagduol ni Abraham sa Diyos naglangkit usahay ug pagtanyag ug halad ngadto kang Jehova.—Genesis 22:9-14.

⁶ Niining tanang higayon, gibati ni Abraham nga may kagawasan siyang makigsulti kang Jehova. Apan, ang iyang kagawasan sa pagsulti gilakipan usab niya ug mapaubsanong panglantaw sa iyang baroganan atubangan sa iyang Maglalalang. Matikdi ang iyang matinahorong mga pulong, nga makita diha sa Genesis 18:27: “Palihog, ania, ako nangako sa pagsulti kang Jehova, bisan tuod ako abog ug abo.” Pagkamaayong tinamdan nga sundogon!

7. Unsang mga butanga ang giapil sa mga patriarka diha sa ilang pag-ampo kang Jehova?

⁷ Ang mga patriarka nag-ampo bahin sa lainlaing mga butang, ug sila gidungog ni Jehova. Si Jacob naglitok ug usa ka pag-ampo sa dagway sa usa ka panaad. Human mangayog tabang gikan sa Diyos, siya seryosong nanaad: “Kon bahin sa tanang butang nga imong ihatag kanako ako sa walay pakyas maghatag sa ikapulo niini kanimo.” (Genesis 28:20-22) Sa ulahi, sa dihang hapit na silang magkita sa iyang igsoon, si Jacob nangaliyupo nga panalipdan siya ni Jehova, nga nag-ingon: “Luwasa ako, ako nagaampo kanimo, gikan sa kamot sa akong igsoon, gikan sa kamot ni Esau, tungod kay nahadlok ako kaniya.” (Genesis 32:9-12) Ang patriarkang si Job miduol kang Jehova alang sa iyang pamilya, nga nagtanyag ug mga halad alang kanila. Sa dihang ang tulo ka kauban ni Job nakasala pinaagi sa ilang gipamulong, si Job nag-ampo alang kanila, ug “gidawat ni Jehova ang nawong ni Job.” (Job 1:5; 42:7-9) Kining maong mga asoy motabang kanato sa pag-ila kon unsang mga butanga ang mahimong iapil sa atong pag-ampo kang Jehova. Masabtan usab nato nga si Jehova andam nga magpatalinghog sa mga pag-ampo niadtong moduol kaniya sa hustong paagi.

Ilalom sa Balaod sa Pakigsaad

8. Ilalom sa Balaod sa pakigsaad, sa unsang paagi gipahayag ang mga pag-ampo ngadto kang Jehova alang sa katawhan?

⁸ Human luwasa ni Jehova ang nasod sa Israel gikan sa Ehipto, iyang gihatagan sila ug Balaod sa pakigsaad. Gilatid sa Balaod ang kahikayan  sa pagduol sa Diyos pinaagi sa tinudlong mga saserdote. Ang ubang mga Levihanon gitudlo ingong mga saserdote alang sa katawhan. Sa dihang motungha ang mga butang nga makaapektar sa tibuok nasod, ang usa ka hawas sa katawhan—usahay usa ka hari o usa ka manalagna—magpahayag niana ngadto sa Diyos pinaagi sa pag-ampo. (1 Samuel 8:21, 22; 14:36-41; Jeremias 42:1-3) Pananglitan, sa pagpahinungod sa templo, si Haring Solomon miduol kang Jehova pinaagi sa kinasingkasing nga pag-ampo. Sa baylo, gipakita ni Jehova nga siya nagpatalinghog sa pag-ampo ni Solomon pinaagi sa pagpuno sa templo sa Iyang himaya ug sa pag-ingon: “Ang akong igdulungog mamati sa pag-ampo niining dapita.”—2 Cronicas 6:12–7:3, 15.

9. Unsay gikinahanglan aron makaduol kang Jehova diha sa sangtuwaryo sa hustong paagi?

⁹ Sa Balaod nga gihatag ngadto sa Israel, gilakip ni Jehova ang usa ka kinahanglanon aron sila makaduol kaniya diha sa sangtuwaryo sa paagi nga dalawaton. Unsa man kana? Kada buntag ug kada gabii, gawas pa sa paghalad ug mga mananap, ang hataas nga saserdote gisugo sa pagsunog ug gipahumotan nga insenso atubangan kang Jehova. Sa ulahi, ang luyo-luyong mga saserdote naghimo usab niining maong pag-alagad, gawas lang sa Adlaw sa Pagtabon sa Sala. Kon ang mga saserdote dili maghimo nianang matinahorong pagpakita ug kataha, si Jehova dili mahimuot sa ilang pag-alagad.—Exodo 30:7, 8; 2 Cronicas 13:11.

10, 11. Unsay pamatuod nga si Jehova nagpatalinghog sa mga pag-ampo sa mga indibiduwal?

¹⁰ Pinaagi ba lamang sa tinudlong mga hawas nga makaduol sa Diyos ang karaang Israel? Dili. Gipakita sa Kasulatan nga si Jehova nalipay sa pagpatalinghog sa personal nga mga pag-ampo sa mga indibiduwal. Sa pag-ampo ni Solomon panahon sa pagpahinungod sa templo, siya nangamuyo kang Jehova, nga nag-ingon: “Bisan unsa nga pag-ampo, bisan unsa nga hangyo alang sa pabor nga himoon ni bisan kinsa nga tawo o sa tibuok nimong katawhang Israel, . . . sa dihang siya gayod magabayaw sa iyang mga kamot paatubang niining balaya, nan maminaw ka unta gikan sa mga langit.” (2 Cronicas 6:29, 30) Ang asoy ni Lucas nagtug-an kanato nga sa dihang si Zacarias, nga amahan ni Juan Bawtista, naghalad ug insenso diha sa sangtuwaryo, usa ka panon sa dili-saserdoteng mga magsisimba ni Jehova ang “nag-ampo sa gawas.” Dayag nga naandan na sa mga tawo nga magtigom sa gawas sa sangtuwaryo ug mag-ampo samtang gihalad ang insenso ngadto kang Jehova diha sa bulawang halaran.—Lucas 1:8-10.

¹¹ Busa, sa dihang giduol si Jehova sa hustong paagi, siya nalipay sa pagpatalinghog sa mga pag-ampo sa mga tawo nga naghawas sa tibuok nasod ug sa mga indibiduwal nga nagtinguha sa pagduol mismo kaniya. Karon kita wala na magkinabuhi ilalom sa Balaod sa pakigsaad. Bisan pa niana, kita makakat-on ug pipila ka hinungdanong mga pagtulon-an bahin sa pag-ampo gikan sa mga paagi nga ang mga Israelinhon kaniadto miduol sa Diyos.

Ilalom sa Kristohanong Kahikayan

12. Unsang kahikayan ang gihimo aron ang mga Kristohanon makaduol kang Jehova?

¹² Kita nagkinabuhi karon ilalom sa Kristohanong kahikayan. Wala nay pisikal nga templo diin ang mga saserdote makahawas sa tanang katawhan sa Diyos o diin kita makaadto sa dihang kita moampo sa Diyos. Bisan pa niana, si Jehova naghimo gihapon ug kahikayan aron kita makaduol kaniya. Unsa man kana? Niadtong 29 K.P., sa dihang si Kristo gidihogan ug gitudlo ingong Hataas  nga Saserdote, namugna ang usa ka espirituwal nga templo. a Kining espirituwal nga templo mao ang bag-ong kahikayan sa pagduol kang Jehova diha sa pagsimba pinasukad sa halad-pasig-uli ni Jesu-Kristo.—Hebreohanon 9:11, 12.

13. Maylabot sa pag-ampo, unsay usa ka kasamahan tali sa templo sa Jerusalem ug sa espirituwal nga templo?

¹³ Daghang bahin sa templo sa Jerusalem ang haom nga naghulagway sa lainlaing bahin sa espirituwal nga templo, lakip na nianang may kalabotan sa pag-ampo. (Hebreohanon 9:1-10) Pananglitan, unsay gihawasan sa insenso nga gihalad, buntag ug gabii, diha sa halaran sa insenso sa Balaang lawak sa templo? Sumala sa basahon sa Pinadayag, “ang insenso mao ang mga pag-ampo sa mga balaan.” (Pinadayag 5:8; 8:3, 4) Si David giinspirar sa pagsulat: “Hinaot ang akong pag-ampo maandam ingon sa insenso sa imong atubangan.” (Salmo 141:2) Busa, diha sa Kristohanong kahikayan, ang humot nga insenso haom nga naghawas sa dalawatong mga pag-ampo ug pagdayeg kang Jehova.—1 Tesalonica 3:10.

14, 15. Unsay ikasulti bahin sa pagduol kang Jehova (a) sa dinihogang mga Kristohanon? (b) sa “ubang mga karnero”?

¹⁴ Kinsay mahimong moduol sa Diyos diha niining espirituwal nga templo? Sa pisikal nga templo, ang mga saserdote ug mga Levihanon may pribilehiyo nga mag-alagad diha sa sulod nga sawang, apan ang mga saserdote lamang ang makasulod sa Balaang dapit. Ang dinihogang mga Kristohanon nga adunay langitnong paglaom nagpahimulos sa usa ka talagsaong espirituwal nga kahimtang nga gihawasan sa sulod nga sawang ug sa Balaang dapit, nga nakapaarang kanila sa pagtanyag ug mga pag-ampo ug pagdayeg ngadto sa Diyos.

¹⁵ Komosta kadtong adunay yutan-ong paglaom, ang “ubang mga karnero”? (Juan 10:16) Ang manalagnang si Isaias nag-ingon nga ang katawhan sa daghang kanasoran mangabot aron sa pagsimba kang Jehova “sa kaulahiang bahin sa mga adlaw.” (Isaias 2:2, 3) Nagsulat usab siya nga ang “mga langyaw” makighiusa kang Jehova. Sa pagpaila sa iyang pagkaandam nga modawat kanila, ang Diyos miingon: ‘Pamayaon ko sila sa sulod sa akong balay nga ampoanan.’ (Isaias 56:6, 7) Ang Pinadayag 7:9-15 naghatag ug dugang mga detalye, nga naghisgot bahin sa “usa ka dakong panon” gikan sa “tanang kanasoran” nga magtigom aron sa pagsimba ug pag-ampo sa Diyos “adlaw ug gabii” samtang sila nagbarog sa gawas nga sawang sa espirituwal nga templo. Makapahupay gayong hunahunaon nga ang tanang alagad sa Diyos karon may kagawasang makaduol sa Diyos uban ang bug-os nga pagsalig nga sila iyang patalinghogan!

Unsang mga Pag-ampo ang Patalinghogan?

16. Unsay atong makat-onan bahin sa pag-ampo gikan sa unang mga Kristohanon?

¹⁶ Ang unang mga Kristohanon maoy mainampoong mga tawo. Bahin sa unsa ang ilang giampo? Ang Kristohanong mga ansiyano nangayog giya sa pagpili ug mga lalaki nga modumala sa mga responsibilidad diha sa organisasyon. (Buhat 1:24, 25; 6:5, 6) Si Epafras nag-ampo alang sa iyang mga isigkamagtutuo. (Colosas 4:12) Ang mga membro sa kongregasyon sa Jerusalem nag-ampo alang kang Pedro sa dihang siya nabilanggo. (Buhat 12:5) Ang unang mga Kristohanon mihangyo sa Diyos nga hatagan unta silag kaisog sa pag-atubang sa pagsupak, nga nag-ingon:  “Hatagig pagtagad ang ilang mga hulga, ug itugot sa imong mga alagad ang pagpadayon pagsulti sa imong pulong uban ang bug-os nga kaisog.” (Buhat 4:23-30) Ang tinun-an nga si Santiago nag-awhag sa mga Kristohanon sa pag-ampo ngadto sa Diyos alang sa kaalam sa dihang mag-atubang ug pagsulay. (Santiago 1:5) Giapil ba nimo kanang mga butanga diha sa imong mga pangaliya kang Jehova?

17. Kang kinsang mga pag-ampo ang patalinghogan ni Jehova?

¹⁷ Ang Diyos dili magpatalinghog sa tanang pag-ampo. Nan, unsaon nato pag-ampo nga makalaom nga kita seguradong patalinghogan? Ang matinumanong mga tawo nga gipatalinghogan sa Diyos sa kanhing mga panahon miduol kaniya nga sinsero ug may hustong tinamdan sa kasingkasing. Sila nagpakita ug pagtuo ug gipaluyohan kini sa maayong mga buhat. Makaseguro kita nga si Jehova mamati sa tanan nga moduol kaniya sa samang paagi karon.

18. Aron patalinghogan ang ilang mga pag-ampo, unsang kinahanglanon ang angayng kab-oton sa mga Kristohanon?

¹⁸ Aduna pay laing kinahanglanon. Gipatin-aw kini ni apostol Pablo, nga nag-ingon: “Pinaagi kaniya kita . . . makaduol sa Amahan pinaagi sa usa ka espiritu.” Kinsa may gitumong ni Pablo sa dihang siya misulat, “pinaagi kaniya”? Si Jesu-Kristo. (Efeso 2:13, 18) Oo, kita may kagawasang makaduol sa Amahan pinaagi lamang kang Jesus.—Juan 14:6; 15:16; 16:23, 24.

19. (a) Kanus-a nahimong dulumtanan kang Jehova ang halad nga mga insenso sa Israel? (b) Sa unsang paagi makaseguro kita nga ang atong mga pag-ampo mahisamag humot nga insenso para kang Jehova?

¹⁹ Sa nahisgotan na, ang insenso nga gihalad sa Israelinhong mga saserdote naghawas sa dalawatong mga pag-ampo sa matinumanong mga alagad sa Diyos. Apan, usahay, ang insenso nga gihalad sa mga Israelinhon dulumtanan kang Jehova. Ingon niini ang kahimtang sa dihang ang mga Israelinhon nagsunog ug mga insenso diha sa templo apan sa samang panahon nagyukbo sa mga idolo. (Ezequiel 8:10, 11) Mao man usab karon, ang mga pag-ampo niadtong nag-angkong nag-alagad kang Jehova apan sa samang panahon naghimog mga butang nga supak sa iyang mga balaod mahisamag mangil-ad nga baho para kaniya. (Proverbio 15:8) Nan, padayon natong huptang hinlo ang tanang bahin sa atong kinabuhi aron ang atong mga pag-ampo mahisamag humot nga insenso para sa Diyos. Si Jehova malipay sa mga pag-ampo niadtong nagasubay sa iyang matarong nga mga dalan. (Juan 9:31) Apan, adunay pipila ka pangutana nga wala pa matubag. Sa unsang paagi kita moampo? Alang sa unsa nga kita makaampo? Ug sa unsang paagi tubagon sa Diyos ang atong mga pag-ampo? Ang among sunod nga artikulo magtubag niini ug sa uban pang mga pangutana.

[Footnote]

Makapatin-aw Ka Ba?

• Sa unsang paagi ang dili-hingpit nga mga tawo makaduol sa paagi nga dalawaton sa Diyos?

• Sa atong mga pag-ampo, sa unsang paagi masundog nato ang mga patriarka?

• Unsay atong makat-onan gikan sa mga pag-ampo sa unang mga Kristohanon?

• Kanus-a nga ang atong mga pag-ampo mahisamag humot nga insenso para sa Diyos?

[Mga Pangutana sa Pagtuon]

[Hulagway sa panid 23]

Nganong gidawat sa Diyos ang halad ni Abel apan ang kang Cain wala?

[Hulagway sa panid 24]

“Ako abog ug abo”

[Hulagway sa panid 25]

“Ako sa walay pakyas maghatag sa ikapulo niini kanimo”

[Hulagway sa panid 26]

Ang imo bang mga pag-ampo nahisamag humot nga insenso para kang Jehova?