Mga Haylayt Gikan sa Ikalimang Basahon sa mga Salmo
Ang Pulong ni Jehova Buhi
Mga Haylayt Gikan sa Ikalimang Basahon sa mga Salmo
ANG mga dato moingon tingali: “Ang among mga anak nga lalaki maoy sama sa gagmayng mga tanom nga nanubo na sa ilang pagkabatan-on, ang among mga anak nga babaye maoy sama sa mga haligi sa eskina nga gikulit ingon sa estilo sa palasyo, ang among mga dapa napuno, . . . ang among mga panon sa kahayopan nagasanay nga linibo.” Dugang pa, ang mga adunahan lagmit mosulti: “Malipayon ang katawhan nga sama gayod niana!” Apan sa kasukwahi, ang salmista nag-ingon: “Malipayon ang katawhan kansang Diyos mao si Jehova!” (Salmo 144:12-15) Nganong malipayon man? Tungod kay si Jehova maoy malipayong Diyos, ug ang kalipay maangkon niadtong nagsimba kaniya. (1 Timoteo 1:11) Kining kamatuorana dayag diha sa kataposang hugpong sa mga awit nga giinspirar sa Diyos, nga gilangkoban sa Salmo 107 ngadto sa 150.
Ang Ikalimang Basahon sa Mga Salmo nagpasiugda usab sa kinalabwang mga hiyas ni Jehova, lakip na ang iyang mahigugmaong-kalulot, pagkamatinud-anon, ug pagkamaayo. Samtang mag-uswag ang atong pagsabot sa personalidad sa Diyos, mas molalom usab ang atong gugma ug kahadlok kaniya. Kini, sa baylo, makahatag kanato ug kalipay. Pagkabililhon sa mensahe nga atong makaplagan sa Ikalimang Basahon sa Mga Salmo!—Hebreohanon 4:12.
MALIPAYON TUNGOD SA MAHIGUGMAONG-KALULOT NI JEHOVA
“Oh nga magpasalamat unta ang katawhan kang Jehova tungod sa iyang mahigugmaong-kalulot ug tungod sa iyang katingalahang mga buhat alang sa mga anak sa mga tawo,” miawit ang nadestiyerong mga Hudiyo nga namalik gikan sa Babilonya. (Salmo 107:8, 15, 21, 31) Sa pagdayeg sa Diyos, miawit si David: “Ang imong kamatinud-anon abot sa kalangitan.” (Salmo 108:4) Diha sa sunod nga awit, siya miampo: “Tabangi ako, Oh Jehova nga akong Diyos; luwasa ako sumala sa imong mahigugmaong-kalulot.” (Salmo 109:18, 19, 26) Ang Salmo 110 maoy tagna bahin sa pagmando sa Mesiyas. “Ang pagkahadlok kang Jehova mao ang sinugdanan sa kaalam,” nag-ingon ang Salmo 111:10. Sumala sa sunod nga salmo, “malipayon ang tawo nga nahadlok kang Jehova.”—Salmo 112:1.
Ang mga Salmo 113 ngadto sa 118 gitawag nga Hallel nga mga Salmo, tungod kay balikbalik nga gigamit dinhi ang terminong “Aleluya,” o “Dayega si Jah!” Sumala sa Mishnah—usa ka sinulat sa ikatulong siglo nga naundan sa binaba nga tradisyon—kining mga awita giawit panahon sa Paskuwa ug sa tulo ka tinuig nga pista sa mga Hudiyo. Ang Salmo 119, nga maoy kinatas-an sa tanang mga salmo ug mga kapitulo sa Bibliya, nagbayaw sa gipadayag nga pulong o mensahe ni Jehova.
Tubag sa mga Pangutana Bahin sa Kasulatan:
109:23—Unsay gipasabot ni David sa dihang siya miingon: “Sama sa landong sa dihang molingay na kini, ako kinahanglang mobiya”? Si David, sa balaknong mga pulong, nag-ingon nga gibati niyang hapit na siyang mamatay.—Salmo 102:11.
110:1, 2—Unsay gibuhat sa “Ginoo [ni David],” si Jesu-Kristo, samtang naglingkod sa tuong kamot sa Diyos? Human mabanhaw, si Jesus misaka sa langit ug naghulat diha sa tuong kamot sa Diyos hangtod sa 1914 aron magmando ingong Hari. Nianang panahona, si Jesus nagmando na ibabaw sa iyang dinihogang mga sumusunod, nga naggiya kanila sa ilang buluhatong pagsangyaw ug paghimog tinun-an ug nag-andam kanila sa pagmando uban kaniya sa iyang Gingharian. —Mateo 24:14; 28:18-20; Lucas 22:28-30.
110:4—Unsang ‘panumpa ang wala basoli’ ni Jehova? Kini nga panumpa mao ang pakigsaad nga gihimo ni Jehova uban kang Jesu-Kristo aron mag-alagad ingong Hari ug Hataas nga Saserdote.—Lucas 22:29.
113:3—Sa unsang paagi pagadayegon ang ngalan ni Jehova “gikan sa sidlakan hangtod sa kasadpan”? Kini wala lamang magpasabot nga dunay usa ka grupo sa mga tawo nga nagsimba sa Diyos sa adlaw-adlaw. Gikan sa pagsubang sa adlaw sa sidlakan hangtod sa pagsalop niini sa kasadpan, ang mga bidlisiw sa adlaw nagdan-ag sa tibuok yuta. Sa samang paagi, si Jehova pagadayegon sa tibuok yuta. Kini dili mapalampos kon walay organisadong paningkamot. Ingong mga Saksi ni Jehova, kita adunay bililhong pribilehiyo sa pagdayeg sa Diyos ug sa pagpakigbahin nga masiboton sa buluhatong pagmantala sa Gingharian.
116:15—Unsa ka “bililhon sa mga mata ni Jehova ang kamatayon sa mga maunongon kaniya”? Alang kang Jehova, ang iyang mga magsisimba bililhon kaayo nga isipon niyang hilabihan ka mahal ang ilang kamatayon ingong usa ka grupo ug busa dili niya itugot kana. Kon tugotan ni Jehova nga mahitabo kana, mopatim-aw nga morag mas gamhanan ang iyang mga kaaway kay kaniya. Dugang pa, walay mahibilin dinhi sa yuta nga magsilbing pundasyon sa bag-ong kalibotan.
119:71—Unsay kaayohan sa pagsinatig kasakit? Ang kalisdanan mahimong magtudlo kanato nga mas bug-os nga mosalig kang Jehova, mas dulot nga mag-ampo kaniya, ug mas magkugi sa pagtuon sa Bibliya ug sa pagpadapat sa gisulti niini. Dugang pa, ang atong reaksiyon sa kasakit mahimong magpadayag sa mga depekto sa personalidad nga mahimong tul-iron. Ang pag-antos dili makapayugot kanato kon ato kining tugotan sa paglunsay kanato.
119:96—Unsay gipasabot sa “kataposan sa bug-os nga pagkahingpit”? Ang salmista naghisgot sa pagkahingpit sumala sa panglantaw sa tawo. Lagmit siya naghunahuna nga ang ideya sa tawo sa kahingpitan maoy limitado. Sa kasukwahi, ang mga sugo sa Diyos walay limitasyon. Ang giya niini mapadapat sa tanang bahin sa kinabuhi. Sa New Cebuano Version atong mabasa, “Nakakita akog kataposan sa tanang pagkahingpit, apan walay kinutoban ang imong mga sugo.”
119:164—Unsay kahulogan sa pagdayeg sa Diyos “makapito sa usa ka adlaw”? Ang numero siyete kasagarang nagpasabot ug pagkabug-os. Busa, buot ipasabot sa salmista nga si Jehova takos sa tanang pagdayeg.
Mga Leksiyon Alang Kanato:
107:27-31. Ang kaalam sa kalibotan “malibog” inig-abot sa Armagedon. (Pinadayag 16:14, 16) Kini dili makaluwas kang bisan kinsa gikan sa pagkalaglag. Kadto lamang mosalig kang Jehova alang sa kaluwasan ang mabuhi aron ‘magpasalamat kaniya tungod sa iyang mahigugmaong-kalulot.’
109:30, 31; 110:5. Ang tuong kamot sa sundalo nga maoy magkupot sa espada sagad dili mapanalipdan sa taming nga gikuptan sa walang kamot. Sa mahulagwayong paagi, si Jehova anaa sa “tuong kamot” sa iyang mga alagad, aron makig-away alang kanila. Sa ingon, siya manalipod ug motabang kanila—usa ka maayong katarongan nga atong ‘dayegon siya pag-ayo’!
113:4-9. Si Jehova hataas kaayo nga siya kinahanglang magpaubos bisan sa “pagtan-aw sa langit.” Bisan pa niana, siya mabination sa timawa, sa kabos, ug sa babayeng apuli. Ang Soberanong Ginoong Jehova mapaubsanon ug buot niya nga ang iyang mga magsisimba magtratar kanila nianang paagiha usab.—Santiago 4:6.
114:3-7. Ang pagkasayod bahin sa katingalahang mga buhat nga gihimo ni Jehova alang sa iyang katawhan sa Pulang Dagat, sa Suba sa Jordan, ug sa Bukid sa Sinai angay nga magtandog gayod kanato. Ang katawhan, nga gihulagwayan sa “yuta,” angayng mahingangha—sa mahulagwayong pagkasulti, ‘mobatig grabeng kasakit’—tungod sa Ginoo.
119:97-101. Ang pagbaton ug kaalam, hait nga salabotan, ug pagsabot sa Pulong sa Diyos manalipod kanato batok sa espirituwal nga kadaot.
119:105. Ang Pulong sa Diyos maoy lampara sa atong mga tiil sa paagi nga kini makatabang kanato sa pagsagubang sa mga problema karon. Kini usab mahulagwayong naglamdag sa atong alagianan, tungod kay kini abanteng nagsulti sa katuyoan sa Diyos sa umaabot.
MALIPAYON BISAN PA SA MGA KALISDANAN
Sa unsang paagi atong masagubang ang masulayong mga kahimtang ug maantos ang mga kalisdanan? Ang Salmo 120 ngadto sa 134 naghatag ug tin-awng tubag niining pangutanaha. Atong maantos ang kalisod ug mahuptan ang atong kalipay pinaagi sa pagpangayog tabang kang Jehova. Kining mga salmoha, nga gitawag Mga Awit Alang sa Pagtungas, lagmit giawit samtang ang mga Israelinhon nagtungas sa Jerusalem aron saulogon ang ilang tinuig nga mga pista.
Ang mga Salmo 135 ug 136 naghulagway kang Jehova ingong Magbubuhat sa bisan unsa nga makapahimuot kaniya, nga kasukwahi kaayo sa walay-mahimo nga mga idolo. Ang ika-136 nga Salmo gikomposo alang sa tubag-tubag nga pag-awit, nga ang ulahing bahin sa matag bersikulo giawit ingong tubag sa unang bahin. Ang sunod nga salmo naghisgot sa kasubo nga gibati sa mga Hudiyo sa Babilonya nga gustong mosimba kang Jehova sa Zion. Ang Salmo 138 hangtod sa 145 maoy mga salmo ni David. Buot niyang ‘dayegon si Jehova sa bug-os niyang kasingkasing.’ Ngano? “Tungod kay sa makalilisang nga paagi ako katingalahan nga pagkabuhat,” siya miingon. (Salmo 138:1; 139:14) Sa sunod nga lima ka saImo, si David nag-ampo alang sa proteksiyon batok sa daotang mga tawo, sa matarong nga pagbadlong, sa kaluwasan gikan sa mga maglulutos, ug alang sa giya sa paggawi. Iyang gipasiugda ang kalipay sa katawhan ni Jehova. (Salmo 144:15) Human sublia ang pagkadako ug pagkamaayo sa Diyos, si David mipatugbaw: “Ang akong baba magasulti sa pagdayeg kang Jehova; ug ipadayeg sa tanang unod ang iyang balaan nga ngalan hangtod sa panahong walay tino, bisan hangtod sa kahangtoran.”—Salmo 145:21.
Tubag sa mga Pangutana Bahin sa Kasulatan:
122:3—Sa unsang paagi ang Jerusalem usa ka siyudad nga “gitingob ingon nga usa lamang”? Sama sa kasagarang kahimtang sa karaang mga siyudad, ang mga balay sa Jerusalem gitukod nga sunson kaayo. Tungod niini ang siyudad dali rang depensahan. Dugang pa, kay dug-ol ra ang mga balay, posible alang sa mga molupyo sa siyudad ang pagdangop sa usag usa alang sa tabang ug proteksiyon. Kini nagpaila sa espirituwal nga panaghiusa sa 12 ka tribo sa Israel sa dihang sila magtigom alang sa pagsimba.
123:2—Unsa ang punto sa ilustrasyon bahin sa mga mata sa mga alagad? Ang mga alagad ug mga sulugoong babaye motan-aw sa kamot sa ilang agalong lalaki o babaye sa duha ka hinungdan: aron mahibalo kon unsay gusto sa ilang agalon ug aron mapanalipdan ug makadawat sa ilang mga kinahanglanon. Sa samang paagi, kita motan-aw kang Jehova aron mahibalo sa iyang kabubut-on ug aron maangkon ang iyang pabor.
131:1-3—Sa unsang paagi ‘gialam-alaman ug gipahilom ni David ang iyang kalag sama sa usa ka batang gilutas nga gisapnay sa iyang inahan’? Maingon nga ang nalutas nga bata makakat-on sa pagkaplag ug kahupayan ug katagbawan diha sa mga bukton sa iyang inahan, si David nakakat-on sa pag-alam-alam ug pagpakalma sa iyang kalag “sama sa usa ka batang gilutas nga gisapnay sa iyang inahan.” Sa unsang paagi? Pinaagi sa dili pagbaton ug mapahitas-ong kasingkasing ug mga mata ug sa dili niya pagpangagpas ug dagkong mga butang. Inay maningkamot nga mahimong inila, si David subsob nga midawat sa iyang mga limitasyon ug nagmapainubsanon. Maalamong sundogon nato ang iyang tinamdan, ilabina kon kita nagapangab-ot ug mga pribilehiyo diha sa kongregasyon.
Mga Leksiyon Alang Kanato:
120:1, 2, 6, 7. Ang mabutangbutangon ug masakit nga sinultihan makapaguol pag-ayo sa uban. Ang pagbantay sa atong sinultihan maoy usa ka paagi sa pagpakita nga kita ‘nagbarog dapig sa pakigdait.’
120:3, 4. Kon kita nag-antos tungod sa tawong adunay “dila nga malinglahon,” kita mahupayan sa pagkasayod nga si Jehova magtul-id niana sa iyang gitakdang panahon. Ang mga mabutangbutangon makaagom unya ug katalagman diha sa mga kamot “sa tawong gamhanan.” Sila tinong makaagom sa nagdilaab nga paghukom ni Jehova nga gihulagwayan sa “nagasigang mga baga sa mga kahoyng retama.”
127:1, 2. Sa tanan natong mga paningkamot, kita kinahanglang mangayo ug giya kang Jehova.
133:1-3. Ang panaghiusa sa katawhan ni Jehova makapahupay, makaayo, ug makapahayahay. Dili gayod kita magpahinabog kasamok pinaagi sa pagpangitag sayop, pagpakiglalis, o pagreklamo.
137:1, 5, 6. Ang nadestiyerong mga magsisimba ni Jehova nagmaunongon sa Zion, nga naghawas sa organisasyon sa Diyos. Komosta kita? Kita ba maunongon sa organisasyon nga gigamit ni Jehova karon?
138:2. Si Jehova ‘nagpadako sa iyang pulong nga labaw pa sa bug-os niyang ngalan’ sa paagi nga ang katumanan sa tanan niyang gisaad ginamit ang iyang ngalan molabaw pa sa tanan natong gidahom. Sa pagkatinuod, kita adunay maanindot kaayong palaaboton sa umaabot.
139:1-6, 15, 16. Si Jehova nahibalo sa atong mga kalihokan, hunahuna, ug mga pulong bisan sa wala pa nato ibungat kana. Siya nakaila kanato sukad sa binhi pa kita sa tagoangkan, sa wala pa maporma ang matag bahin sa atong lawas. Ang kahibalo sa Diyos bahin kanato ingong mga indibiduwal “katingalahan kaayo” nga dili nato kini matugkad. Makapahupay gayod ang pagkahibalo nga si Jehova wala lamang makakita sa masulayong kahimtang nga atong giatubang kondili nakasabot usab sa epekto niini kanato!
139:7-12. Walay dapit nga ato tingaling adtoan nga dili maabot sa Diyos aron kita palig-onon.
139:17, 18. Nakapalipay ba kanato ang kahibalo bahin kang Jehova? (Proverbio 2:10) Kon mao, maghatag kini kanatog walay-kataposang kalipay. Ang mga hunahuna ni Jehova ‘mas daghan pa kay sa balas.’ Kanunay nga adunay daghang butang nga makat-onan bahin kaniya.
139:23, 24. Buot gayod nato nga susihon ni Jehova ang atong pangsulod nga pagkatawo kon kini aduna bay ‘masakit nga mga dalan’—daotang mga hunahuna, mga tinguha, ug mga kiling—ug tabangan niya kita sa pagwagtang niana.
143:4-7. Sa unsang paagi atong maantos bisan ang grabeng kalisdanan? Ang salmista naghatag kanato sa tubag: Mamalandong kita sa mga buhat ni Jehova, kanunay kitang maghunahuna sa iyang mga buhat, ug mag-ampo kaniya alang sa tabang.
“Dayega Ninyo si Jah!”
Ang matag usa sa unang upat ka hugpong sa mga salmo gitapos pinaagi sa pagpahayag ug pagdayeg kang Jehova. (Salmo 41:13; 72:19, 20; 89:52; 106:48) Ang kataposang hugpong sama usab niana. Ang Salmo 150:6 nag-ingon: “Ang tanang may gininhawa—ipadayeg si Jah. Dayega ninyo si Jah!” Matuman gayod kana sa bag-ong kalibotan sa Diyos.
Samtang nagpaabot kita nianang malipayong panahon, aduna kitay daghang katarongan nga himayaon ang matuod nga Diyos ug dayegon ang iyang ngalan. Sa dihang maghunahuna kita sa kalipay nga atong natagamtam tungod kay kita nakaila kang Jehova ug nakabaton ug maayong relasyon uban kaniya, dili ba kita matukmod sa pagdayeg kaniya uban ang mapasalamatong kasingkasing?
[Hulagway sa panid 15]
Makapahingangha ang katingalahang mga buhat ni Jehova
[Hulagway sa panid 16]
Ang hunahuna ni Jehova ‘mas daghan pa kay sa balas’