Relihiyon—Unsay Kaayohan Niini?

“PUWEDE kong mahimong maayong tawo bisag dili ko relihiyoso!” Kana nga pagbati komon kaayo. Daghang tawo nga matinud-anon, maluluy-on, ug kasaligan ang dili interesado sa relihiyon. Pananglitan, pipila ra sa mga taga-Kasadpang Uropa ang tigsimba, bisag ang kadaghanan kanila moingon nga motuo sila sa Diyos. a Bisan sa Latin Amerika, 15 ngadto sa 20 porsiyento ra sa mga Katoliko ang kanunayng manimba.

Sama sa uban, tingali gibati nimo nga ang relihiyon dili makatabang sa pagbaton ug mas maayong kinabuhi. Apan, lagmit nahibalo ka usab nga kaniadto, sa panahon sa imong mga apohan, kadaghanan sa mga tawo mas relihiyoso kon itandi karon. Nganong nawad-ag interes ang mga tawo sa relihiyon? Puwede ba nga ang usa mahimong maayong tawo bisag dili siya relihiyoso? Aduna bay relihiyon nga makaayo kanimo?

Kon Nganong Daghan ang Nagsalikway sa Relihiyon

Sulod sa kasiglohan, kadaghanan sa mga tawo sa Kakristiyanohan nagtuo nga gikinahanglan sa Diyos ang pagkamasinugtanon. Sila mosimba aron maangkon ang pabor sa Diyos, pinaagi sa mga rituwal nga himoon sa usa ka pari o kaha pinaagi sa giya nga gitagana sa usa ka magwawali. Siyempre, daghan ang nahibalo sa pagkasalingkapaw diha sa relihiyon. Ang papel sa relihiyon diha sa mga gubat nabaniog pag-ayo, mao man usab ang imoral nga mga buhat sa pipila ka mga klerigo. Apan ang kadaghanang tawo naghunahuna nga ang relihiyon maayo. Nagustohan sa uban ang pagkamisteryoso niini, ang tradisyon, ug ang musika; ang pipila naikag pa gani sa doktrina bahin sa walay-kataposang pagsakit sa impiyerno, nga wala itudlo sa Bibliya. Sa ulahi, ang pipila ka kahimtang nag-usab sa panglantaw sa mga tawo sa relihiyon.

Ang teoriya sa ebolusyon nahimong popular. Ang uban nakombinsir nga sulagma lang nga mitungha ang kinabuhi—nga wala kini lalanga sa Diyos. Kadaghanan sa mga relihiyon wala makahatag ug lig-ong pamatuod nga ang Diyos mao ang Tuboran sa kinabuhi. (Salmo 36:9) Dugang pa, samtang nag-uswag ang teknolohiya, ang dagkong kalamposan diha sa medisina, transportasyon, ug komunikasyon nakapahunahuna sa mga tawo nga masulbad sa siyensiya ang bisan unsang suliran. Lain pa, gibati nila nga ang mga siyentipiko nga nagtuon bahin tawhanong katilingban ug ang mga sikolohista naghatag ug mas maayong giya kay sa mga simbahan. Kon bahin sa mga simbahan, sila wala makapakitag pamatuod nga ang pagsubay sa mga balaod sa Diyos mao ang kinamaayohang paagi sa pagkinabuhi.—Santiago 1:25.

Tungod niana, giusab sa daghang relihiyon ang ilang ginatudlo. Ang mga pari ug mga magwawali wala na magtudlo nga gikinahanglan sa Diyos ang pagkamasinugtanon. Hinunoa, daghan ang nagtudlo nga ang matag usa kinahanglang maoy mag-igo kon unsay husto ug unsay sayop. Aron mahimong dinawat, ang pipila ka relihiyosong mga lider nangangkon nga dawaton ka sa Diyos bisan unsa pay imong binuhatan. Ang mga pagtulon-an nga sama niana makapahinumdom kanato sa gitagna sa Bibliya: “Aduna unyay yugto sa panahon  nga sila dili makaantos sa makapahimsog nga pagtulon-an, hinunoa, sumala sa ilang kaugalingong mga tinguha, sila magtigom ug mga magtutudlo alang sa ilang kaugalingon aron gitikon ang ilang mga dalunggan.”—2 Timoteo 4:3.

Imbes madani ang mga tawo, ang maong pagtulon-an nag-abog hinuon kanila. Siyempre, maghunahuna sila: ‘Kon ang mga simbahan nagduhaduha sa gahom sa Diyos sa paglalang ug sa kaalam sa Diyos sa paghimog mga balaod, nganong mosimba pa man ko? Nganong maghagohago pa man ko sa pagtudlo sa akong mga anak bahin sa relihiyon?’ Ang mga indibiduwal nga naningkamot sa pagkinabuhing desente nag-isip sa relihiyon nga dili mapuslanon. Sila dili na mosimba, kay para kanila ang relihiyon dili na hinungdanon. Ngano man nga ang relihiyon nga makaayo unta nahimo man hinuong dili mapuslanon? Ang Bibliya klarong nagpatin-aw niini.

Ang Relihiyon Gigamit Alang sa Daotang mga Katuyoan

Si apostol Pablo nagpasidaan sa unang mga Kristohanon nga adunay pipila nga mogamit sa Kristiyanidad alang sa daotang katuyoan. Siya miingon: “Ang malupigong mga lobo mosulod sa inyong taliwala ug dili magtagad sa panon uban ang kalumo, ug gikan sa inyong taliwala may mga tawo nga motungha ug magsultig tinuis nga mga butang aron ipahilayo ang mga tinun-an ngadto kanila.” (Buhat 20:29, 30) Ang usa nianang nagsultig “tinuis nga mga butang” mao ang Romano Katolikong teologo nga si Augustine. Si Jesus nagtudlo sa iyang mga sumusunod sa pagkombinsir sa uban pinaagi sa pagpangatarongan pinasukad sa Kasulatan. Hinunoa, si Augustine nagtuis sa kahulogan sa mga pulong ni Jesus sa Lucas 14:23, “Pugsa sila sa pag-anhi,” nga nagkahulogan kono nga dili daotan ang paggamit ug puwersa sa pagpangombertir ug mga tawo. (Mateo 28:19, 20; Buhat 28:23, 24) Gigamit ni Augustine ang relihiyon sa pagkontrolar sa mga tawo.

Si Satanas, nga usa ka rebelyosong manulonda, maoy nagpaluyo sa dili-hustong paggamit ug pagkadaot sa relihiyon. Iyang giimpluwensiyahan ang relihiyosong mga tawo sa unang siglo sa pagdaot sa Kristohanong mga kongregasyon. Ang Bibliya nagsulti bahin niadtong mga tawhana: “Ang maong mga tawo mini nga mga apostoles, malimbongong mga mamumuhat, nga naghimo sa ilang kaugalingon nga mga apostoles ni Kristo. Ug dili ikatingala, kay si Satanas kanunayng naghimo sa iyang kaugalingon nga usa ka manulonda sa kahayag. Busa dili talagsaon kon ang iyang mga ministro usab kanunayng maghimo sa ilang kaugalingon nga mga ministro sa pagkamatarong.”—2 Corinto 11:13-15.

Ang relihiyon nga nagpakaaron-ingnong Kristohanon, maayog moral, ug naghatag ug kalamdagan gigamit gihapon ni Satanas aron ang mga tawo mosunod sa iyang mga sukdanan inay kay sa mga sukdanan sa Diyos. (Lucas 4:5-7) Tingali nakamatikod ka nga daghang klerigo karon ang naggamit sa relihiyon aron bayawon ang ilang kaugalingon pinaagi sa paggamit ug magarbohong mga titulo ug aron panguwartahan ang ilang mga panon. Ang mga kagamhanan naggamit usab sa relihiyon sa pagdani sa mga lungsoranon sa pagbuhis sa ilang kinabuhi diha sa panggubatan.

Ang relihiyon gigamit sa Yawa nga labaw pa kay sa gihunahuna sa kadaghanan. Naghunahuna ka tingali nga pipila lang ka relihiyosong mga ekstremista ang naimpluwensiyahan ni Satanas. Apan sumala sa Bibliya, “ang usa nga gitawag Yawa ug Satanas  . . . nagpahisalaag sa tibuok gipuy-ang yuta.” Ang Bibliya nag-ingon usab: “Ang tibuok kalibotan nailalom sa gahom sa usa nga daotan.” (Pinadayag 12:9; 1 Juan 5:19) Unsay panglantaw sa Diyos sa relihiyon nga gigamit sa mga lider sa politika ug relihiyon aron mosunod ang mga tawo kanila?

“Unsay Labot Nako?”

Kon nakurat ka sa panggawi sa pipila ka relihiyon sa Kakristiyanohan, hibaloi nga ang Labing Gamhanan nga Diyos wala gayod mahimuot kanila. Ang Kakristiyanohan nangangkon nga sila may pakigsaad sa Diyos; ang karaang Israel nangangkon usab niana. Parehas sila nga wala magmatinumanon. Busa ang paghukom ni Jehova batok sa Israel ipahamtang usab sa Kakristiyanohan karon. Si Jehova nag-ingon: “Sila wala mamati sa akong mga pulong ug nagsalikway sa akong balaod. Unsay labot nako sa insenso gikan sa Sheba? . . . Ang inyong mga halad wala makapahimuot kanako.” (Jeremias 6:19, 20, New International Version) Wala dawata sa Diyos ang mga buhat sa pagsimba sa mga salingkapaw. Siya dili interesado sa ilang mga rituwal ug mga pag-ampo. Iyang giingnan ang Israel: “Ang inyong mga kapistahan gidumtan sa akong kalag. Kanako kini nahimong kabug-at; ako gikapoy na sa pagpas-an niini. Ug sa dihang inyong bayawon ang inyong mga kamot, akong tagoan ang akong mga mata gikan kaninyo. Bisan pa kon kamo maghimog daghang mga pag-ampo, ako dili mamati.”—Isaias 1:14, 15.

Mahimuot ba si Jehova sa mga pista nga gipaila sa mga simbahan nga Kristohanon apan kon subayon nagpasidungog diay sa mini nga mga diyos? Mamati ba siya sa mga pag-ampo sa mga klerigo nga nagdaot sa mga pagtulon-an ni Kristo? Dawaton ba sa Diyos ang bisan unsang relihiyon nga nagsalikway sa iyang balaod? Makaseguro ka nga ang iyang panglantaw sa mga rituwal sa mga simbahan karon susama sa iyang panglantaw sa mga halad kaniadto sa Israel, nga bahin niadto siya miingon: “Unsay labot nako?”

Bisan pa niana, si Jehova nagtagad gayod sa matinud-anong pagsimba sa sinserong mga tawo. Malipay ang Diyos sa dihang ipahayag sa mga tawo ang ilang pagpabili sa tanan nilang nadawat gikan kaniya. (Malaquias 3:16, 17) Busa mahimo ka bang maayong tawo kon dili ka mosimba sa Diyos? Ang usa ka tawo nga walay ginabuhat alang sa iyang mahigugmaong mga ginikanan dili gayod matawag nga maayong tawo, dili ba? Ang usa ka tawo nga walay ginahimo alang sa Diyos maisip ba nga maayo? Makataronganon nga kita magpakitag aktibong interes sa matuod nga Diyos, nga maoy tuboran sa kinabuhi. Sa sunod nga artikulo, atong masabtan kon sa unsang paagi ang matuod nga pagsimba dili lamang magpasidungog sa Diyos kondili makaayo usab kanato.

[Footnote]

[Hulagway sa panid 4]

Ang mga simbahan ba naghatag ug ebidensiya nga gilalang sa Diyos ang tanang butang?

[Hulagway sa panid 4, 5]

Ang hawas sa Diyos mag-apil-apil ba niini nga kalihokan?

[Hulagway sa panid 5]

Unsay panglantaw sa Diyos niining matanga sa pista?

[Credit Line]

AP Photo/Georgy Abdaladze