Sa Dihang ang Usa ka Minahal Mobiya Kang Jehova

SI Mark ug Louise mga Saksi ni Jehova. a Uban ang gugma ug kahangawa, gitudloan nila sa Kasulatan ang ilang mga anak, sumala sa gitambag sa Bibliya nga buhaton sa Kristohanong mga ginikanan. (Proverbio 22:6; 2 Timoteo 3:15) Ikasubo, dili tanan nilang mga anak ang nagpadayon sa pag-alagad kang Jehova sa dihang nanagko na kini. “Maguol kong maghunahuna sa akong mga anak nga nahisalaag,” miingon si Louise. “Dili gayod nako ikalimod nga adlaw-adlaw bation nako ang hilabihang kaguol. Sa dihang ang uban maghisgot bahin sa ilang mga anak, sakitan kaayo ko ug kinahanglang pugngan nako ang akong mga luha.”

Oo, sa dihang ang usa ka tawo mopili sa pagbiya kang Jehova ug sa paagi sa pagkinabuhi nga gilatid sa Kasulatan, kinaiyanhon lamang nga ang matinumanong mga membro sa pamilya masubo pag-ayo. “Gimahal ko pag-ayo ang akong magulang nga babaye,” matod pa ni Irene. “Buhaton nako ang tanan aron lang siya makabalik sa pag-alagad kang Jehova!” Si Maria, kansang manghod nga lalaki mitalikod kang Jehova aron mosubay sa imoral nga pagkinabuhi, miingon: “Nalisdan ko sa pagsagubang niini tungod kay sa ubang bahin buotan kaayo kanako ang akong igsoon. Mingawon ko niya ilabina sa dihang magkauban ang tibuok pamilya.”

Nganong Lisod Kaayo Kining Sagubangon?

Ngano man nga ang Kristohanong mga paryente maguol pag-ayo kon ang ilang anak o uban pang minahal mobiya sa kamatuoran? Tungod kay sila nahibalo nga ang Kasulatan nagsaad ug kinabuhing dayon sa paraiso sa yuta alang niadtong magmaunongon kang Jehova. (Salmo 37:29; 2 Pedro 3:13; Pinadayag 21:3-5) Sila naglaom nga matagamtam kining maong mga panalangin uban sa ilang mga kapikas, anak, ginikanan, igsoon, ug mga apo. Sakitan kaayo silang maghunahuna nga ang ilang mga minahal nga mihunong sa pag-alagad kang Jehova dili na makapahimulos niana! Bisan maylabot sa ilang presenteng kinabuhi, nasabtan sa mga Kristohanon nga ang mga balaod ug prinsipyo ni Jehova maoy alang sa ilang kaayohan. Busa masubo ang mga Kristohanon nga makita ang ilang mga minahal nga nagpugas ug binhi sa paagi nga anihon gayod nila ang mapait nga mga sangpotanan niini.—Isaias 48:17, 18; Galacia 6:7, 8.

 Ang pipila nga wala pa gayod makasinati nianang problemaha malisdan sa pagsabot kon unsa kana ka makapaguol. Halos tanang bahin sa kinabuhi maapektahan. “Nalisdan ko sa pagtambong sa Kristohanong mga tigom ug makita ang mga ginikanan nga malipayong nakigsulti uban sa ilang mga anak,” matod pa ni Louise. “Ang bisan unsang malipayong okasyon masapawan sa kahaw-ang tungod kay wala diha ang mga minahal.” Ang usa ka Kristohanong ansiyano nahinumdom sa upat ka tuig diin ang iyang humabdos nga babaye mihunong sa pagpakig-uban kanila. Miingon siya: “Subsob nga bisan ang ‘makapalipayng mga okasyon’ mahimong makapaguol. Kon regalohan nako ang akong asawa o isuroy siya panahon sa hinapos sa semana, siya kalit lang mohilak tungod kay mahinumdom siya nga ang iyang anak nga babaye dili namo kauban sa paglingawlingaw.”

Naghinobra ba ang reaksiyon nianang maong mga Kristohanon? Mahimong wala. Gani, sa usa ka sukod mahimong nagbanaag sila sa mga hiyas ni Jehova, kang kansang larawan gihimo ang tawo. (Genesis 1:26, 27) Unsay buot ipasabot niini? Aw, unsay gibati ni Jehova sa dihang ang Israel nga iyang katawhan mirebelde kaniya? Sa Salmo 78:38-41, atong masayran nga si Jehova nasakitan. Bisan pa niana, siya mapailobong nagpasidaan ug nagdisiplina kanila, nga sublisubling nagpasaylo kanila sa dihang sila naghinulsol. Dayag nga si Jehova maunongon sa iyang mga linalang, ‘ang buhat sa iyang mga kamot,’ ug dili dayon mobiya kanila. (Job 14:15; Jonas 4:10, 11) Iyang gitisok diha sa mga tawo ang kapasidad nga mobati ug susamang pagkamaunongon, ug ang bugkos tali sa mga membro sa pamilya mahimong lig-on kaayo.  Busa dili ikatingala nga ang mga tawo masubo kon ang usa ka minahal nga paryente mobiya sa kamatuoran.

Sa pagkatinuod, mao kana ang usa sa labing lisod nga mga pagsulay nga modangat sa matuod nga mga magsisimba. (Buhat 14:22) Si Jesus miingon nga ang pagdawat sa iyang mensahe magpahinabog pagkabahinbahin sa pipila ka pamilya. (Mateo 10:34-38) Ang mensahe sa Bibliya dili maoy nakaingon sa pagkabahinbahin sa pamilya. Hinunoa, ang dili-magtutuo o ang dili-matinumanon nga mga membro sa pamilya makapahinabog pagkabahinbahin pinaagi sa pagsalikway, pagtalikod, o bisan pagsupak sa dalan sa Kristiyanidad. Apan, mapasalamaton gayod kita nga si Jehova motabang sa nagmatinumanon kaniya sa pagsagubang sa mga pagsulay nga modangat kanila. Kon sa pagkakaron ikaw nasubo tungod kay ang usa ka minahal mibiya sa kamatuoran, unsang mga prinsipyo sa Bibliya ang makatabang kanimo sa pag-antos sa kaguol ug pagtagamtam ug kalipay ug katagbawan?

Pagsagubang

“Pinaagi sa pagpalig-on sa inyong kaugalingon . . . , magpabilin kamo diha sa gugma sa Diyos.” (Judas 20, 21) Depende sa imong mga sirkumstansiya, tingali wala kay mahimo niining panahona sa pagtabang sa usa ka membro sa pamilya nga mihunong na sa pag-alagad kang Jehova. Bisan pa niana, ikaw makapalig-on ug angayng magpalig-on sa imong kaugalingon maingon man sa nahibiling matinumanon nga mga membro sa pamilya. Si Veronica, kansang duha sa tulo niya ka anak nga lalaki mibiya sa kamatuoran, miingon: “Ang akong bana ug ako gipahinumdoman nga kon kami magmalig-on sa espirituwal, maanaa kami sa kinamaayohang kahimtang nga moabiabi sa among mga anak sa dihang sila makaamgo sa ilang sayop. Mag-unsa kaha ang anak nga mausikon kon ang iyang amahan wala sa kahimtang nga modawat kaniya pag-usab?”

Aron mahuptan nimo ang kalig-on, magmapuliki sa espirituwal nga mga kalihokan. Kini naglakip sa paghupot ug eskedyul sa seryosong pagtuon sa Bibliya ug pagtambong sa Kristohanong mga tigom. Paningkamoti nga makatabang sa uban diha sa kongregasyon segun sa itugot sa imong mga sirkumstansiya. Tinuod, sa sinugdan malisdan ka tingali sa pagbuhat niana. Si Veronica nahinumdom: “Ang akong unang gibuhat mao ang paglain sa akong kaugalingon samag samdan nga mananap. Apan ang akong bana miinsistir nga huptan namo ang maayong espirituwal nga rutina. Iyang giseguro nga makatambong kami sa mga tigom. Sa dihang panahon na nga motambong sa usa ka kombensiyon, ako nagkinahanglan ug dakong kaisog sa pag-adto ug pag-atubang sa mga tawo. Apan, ang programa mas nakapasuod kanamo kang Jehova. Ang among anak nga lalaki nga nagpabiling matinumanon ilabinang napalig-on nianang kombensiyona.”

Si Maria, nga gihisgotan ganina, nagtuo nga makatabang kaayo ang pagpabiling puliki sa pagsangyaw sa kanataran ug sa pagkakaron siya nagatabang sa upat ka tawo nga makakat-on bahin sa Bibliya. Si Laura miingon usab: “Bisan tuod maghilak gihapon ko adlaw-adlaw, nagpasalamat ako kang Jehova nga bisan pag wala nako maangkon ang kalamposan nga nabatonan sa ubang mga ginikanan sa pagmatuto sa ilang mga anak, akong nabatonan ang hingpit nga mensahe sa Bibliya, nga makatabang sa mga pamilya niining kataposang mga adlaw.” Si Ken ug Eleanor, kansang hamtong na nga mga anak mibiya sa kongregasyon, naghikay sa ilang mga kalihokan aron makabalhin sa usa ka dapit diin mas dako ang panginahanglan  alang sa mga magmamantala sa Gingharian ug makasulod sa bug-os-panahong ministeryo. Nakatabang kini kanila sa paglantaw sa mga butang uban ang bukas nga hunahuna ug dili malumsan sa kaguol.

Ayawg wad-a ang imong paglaom. Ang gugma “molaom sa tanang butang.” (1 Corinto 13:7) Si Ken, nga gihisgotan ganina, miingon: “Sa dihang ang among mga anak mibiya sa dalan sa kamatuoran, gibati nako nga samag nangamatay sila. Apan, human mamatay ang akong kaluhang babaye, nausab ang akong panglantaw. Mapasalamaton ako nga ang akong mga anak wala mamatay sa literal nga paagi ug si Jehova nagpadayon sa pagbukas sa dalan alang kanila sa pagbalik kaniya.” Sa pagkatinuod, gipakita sa mga eksperyensiya nga daghan niadtong mibiya sa kamatuoran ang namalik ra sa ngadtongadto.—Lucas 15:11-24.

Ayawg basola ang imong kaugalingon. Ang mga ginikanan lagmit mahinumdom sa nangagi ug magmahay nga wala nila madumala ang pipila ka kahimtang sa hustong paagi. Apan, ang pangunang punto nga gipakita sa Ezequiel 18:20 mao nga papanubagon ni Jehova ang makasasala, dili ang iyang mga ginikanan, sa sayop nga dalan nga iyang gipili. Makaiikag nga bisan tuod ang basahon sa mga Proverbio daghag gisulti bahin sa obligasyon sa mga ginikanan sa pagmatuto sa ilang mga anak diha sa hustong dalan, kapin sa upat ka pilo ang gidaghanon sa mga tambag niini alang sa mga batan-on nga sila kinahanglang mamati ug motuman sa ilang mga ginikanan. Oo, ang mga anak adunay responsibilidad sa pagsunod sa binase-sa-Bibliya nga pagbansay kanila sa ilang dili-hingpit nga mga ginikanan. Lagmit gidumala nimo ang mga butang kutob sa imong maarangan nianang panahona. Apan, bisan pag gibati nimo nga ikaw nakahimog pipila ka kasaypanan ug kini imo gayong sala, kana wala magpasabot nga ang imong kasaypanan maoy nakaingon nga ang imong minahal mibiya sa kamatuoran. Bisan unsa pa may kahimtang, kawang lang ang pagsigeg mahay sa atong nabuhat o wala mabuhat sa nangagi. Pagkat-on gikan sa imong kasaypanan, magmadeterminado nga dili na kana nimo usbon, ug mag-ampo kang Jehova alang sa kapasayloan. (Salmo 103:8-14; Isaias 55:7) Unya lantaw sa unahan, dili sa nangagi.

Magmapailobon sa uban. Malisdan tingali ang pipila sa pagkahibalo kon unsaon ka sa pagdasig o paghupay, ilabina kon wala pa gayod nila kana maeksperyensiyahi. Gawas pa, ang mga tawo lainlain ug panglantaw sa kon unsay makapadasig ug makapahupay. Busa kon ang uban mosultig mga butang nga makapapikal kanimo, ipadapat ang tambag ni apostol Pablo nga makaplagan diha sa Colosas 3:13: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain.”

Tahora ang kahikayan ni Jehova sa pagdisiplina. Kon ang imong paryente nadisiplina sa kongregasyon, hinumdomi nga kini maoy bahin sa kahikayan ni Jehova ug gihimo alang sa kaayohan sa tanan, lakip na sa nakasala. (Hebreohanon 12:11) Busa, sukli ang bisan unsang kiling nga mangitag sayop sa mga ansiyano nga nalangkit sa paghusay sa kaso o sa mga desisyon nga ilang gihimo. Hinumdomi nga ang pagbuhat sa mga butang sa paagi ni Jehova maayo gayod ug sangpotanan, samtang ang pagsupak sa mga kahikayan ni Jehova moresulta lamang sa dugang kagul-anan.

Human mapagawas ang Israel gikan sa Ehipto, si Moises kanunayng nag-alagad ingong maghuhukom. (Exodo 18:13-16) Sanglit ang paghukom nga pabor sa usa ka indibiduwal lagmit nga kontra sa lain, dayag nga ang uban nahigawad sa mga desisyon ni Moises. Ang pagpangitag sayop sa mga paghukom ni Moises lagmit mitultol sa pipila ka pagrebelde batok sa iyang pagpanguna. Apan, gigamit ni Jehova si Moises sa pagpanguna sa Iyang katawhan, ug Iyang gisilotan, dili si Moises, kondili ang mga rebelde ug ang ilang mga pamilya nga misuportar  kanila. (Numeros 16:31-35) Makapupo kitag pagtulon-an gikan niini pinaagi sa pagpaningkamot sa pagtahod ug pagpakigtambayayong sa mga desisyon nga gihimo niadtong adunay teokratikanhong awtoridad karon.

Bahin niini, si Delores nahinumdom nga nalisdan siya sa paghupot ug timbang nga panglantaw sa dihang ang iyang anak nga babaye nadisiplina sa kongregasyon. “Ang nakatabang kanako,” matod niya, “mao ang pagbalikbalik ug basa sa mga artikulo nga naghisgot bahin sa pagkamakataronganon sa mga kahikayan ni Jehova. Akong gisulat sa notbok ang mga punto gikan sa mga pakigpulong ug mga artikulo nga makatabang kanako sa paglahutay ug sa pagpadayon sa pag-alagad kang Jehova.” Kini motultol ngadto sa laing hinungdanong paagi sa pagsagubang.

Isugid ang imong gibati. Makatabang tingali kanimo ang pagsugid sa imong gibati ngadto sa usa o duha ka masinaboton nga mga higala nga imong kasaligan. Sa pagbuhat niana, pilia ang mga higala nga motabang kanimo sa paghupot ug positibong tinamdan. Makatabang gayod ang ‘pagbubo sa imong kasingkasing’ diha sa pag-ampo ngadto kang Jehova. b (Salmo 62:7, 8) Ngano? Tungod kay siya nakasabot pag-ayo kon unsa ka bug-at ang imong gibati. Pananglitan, maghunahuna ka tingali nga dili husto nga mobati ka ug tumang kaguol. Kon buot hunahunaon, ikaw wala mobiya kang Jehova. Isulti kang Jehova ang imong gibati, ug hangyoa siya nga tabangan ka nga dili kaayo masakitan sa situwasyon.—Salmo 37:5.

Sa paglabay sa panahon, lagmit mas makontrolar na nimo ang imong gibati. Sa kasamtangan, ayaw paglunga sa imong mga paningkamot nga pahimut-an ang imong langitnong Amahan, ug ayaw gayod paghunahuna nga nakawang ang imong mga paningkamot. (Galacia 6:9) Hinumdomi, kon kita mobiya kang Jehova, kita aduna gihapoy mga problema. Sa laing bahin, pinaagi sa pagpabiling maunongon kaniya, tabangan niya kita sa mga pagsulay nga atong giatubang. Nan, magmasaligon nga nasabtan ni Jehova ang kaguol nga imong gibati ug magpadayon siya sa paghatag kanimo sa gikinahanglang kusog sa hustong panahon.—2 Corinto 4:7; Filipos 4:13; Hebreohanon 4:16.

[Mga footnote]

[Kahon sa panid 19]

Kon Unsaon Pagsagubang

◆ “Pinaagi sa pagpalig-on sa inyong kaugalingon . . . , magpabilin kamo diha sa gugma sa Diyos.”—Judas 20, 21.

◆ Ayawg wad-a ang imong paglaom.—1 Corinto 13:7.

◆ Ayawg basola ang imong kaugalingon.—Ezequiel 18:20.

◆ Magmapailobon sa uban.—Colosas 3:13.

◆ Tahora ang kahikayan ni Jehova sa pagdisiplina.—Hebreohanon 12:11.

◆ Isugid ang imong gibati.—Salmo 62:7, 8.

[Kahon/Hulagway sa panid 21]

Mibiya Ka ba Kang Jehova?

Kon mao, bisan unsa may hinungdan niana, nameligro ang imong relasyon kang Jehova ug ang imong walay-kataposang kaugmaon. Tingali naghunahuna kang mobalik kang Jehova. Naningkamot ka ba sa pagbalik karon? O nagsige ka na lag unya-unya nga nagpaabot “sa hustong panahon”? Hinumdomi, hapit na gayod moabot ang Armagedon. Dugang pa, ang kinabuhi niining sistemaha mubo ra ug walay kasegurohan. Wala ka gani masayod kon buhi ka pa ugma. (Salmo 102:3; Santiago 4:13, 14) Ang usa ka tawo kinsa nadayagnos nga adunay grabeng sakit miingon: “Nataptan ako niining sakita samtang nag-alagad kang Jehova nga bug-os-panahon, nga walay gitagong makauulaw nga sekreto. Ug makapahupay kanang bation.” Apan, handurawa kon unsa kahay iyang gibati kon siya nataptan ug sakit samtang siya naghunahunang, “May adlaw ra nga mobalik ako kang Jehova!” Kon ikaw mibiya kang Jehova, karon na ang labing maayong panahon nga mobalik.

[Mga hulagway sa panid 18]

Ang pagkapuliki sa espirituwal nga mga kalihokan makatabang kanimo sa paghupot ug hustong panglantaw