“Tungod sa Nuybe-Anyos nga Bata”

SA MATAG higayon nga manuktok ang mga Saksi ni Jehova sa iyang balay, si Wiesława, nga taga-Habagatang Polandia, matinahorong magpasalamat kanila ug dayon balibaran niya sila. Usa ka adlaw niana, ang nuybe-anyos nga si Samuel ug ang iyang inahan miduaw kaniya. Niining higayona siya mihukom nga maminaw sa mensahe ug midawat ug magasin nga naghisgot bahin sa usa ka paraisong yuta.

Tungod kay hapit na ang Memoryal sa kamatayon ni Jesu-Kristo, gusto ni Samuel nga dapiton si Wiesława niining espesyal nga okasyon. Busa, kuyog sa iyang inahan, giduaw pag-usab sa bata ang babaye, nga niadtong higayona nagdala ug pinatik nga imbitasyon. Sa pagkakita niya sa bata nga hapsay ug sinina, nanabi si Wiesława kadiyot aron mag-ilis ug sinina. Sa dihang siya mibalik, siya naminaw kang Samuel, midawat sa imbitasyon, ug nangutana: “Moadto ba ko nga ako ra o iuban nako ang akong bana?” Dayon siya midugang: “Bisag dili mouban ang akong bana, moadto ko. Ako nang buhaton tungod nimo, Samuel.” Nalipay si Samuel nga gituman sa babaye ang iyang saad.

Sa pakigpulong sa Memoryal, si Samuel mitupad kang Wiesława ug iyang gipakita sa babaye ang mga teksto nga gihisgotan. Si Wiesława nakadayeg niini. Siya nalipay nga nakatambong sa Memoryal ug mapasalamaton kay ang lawom nga mga butang gisaysay sa paagi nga sayon sabton. Natandog usab siya sa mainitong pag-abiabi ug kalulot sa kongregasyon kaniya. Sukad niadto, miuswag ang pagpabili ni Wiesława sa espirituwal nga mga butang ug regular na nga nakig-uban sa mga Saksi ni Jehova. Di pa dugay siya miingon: “Naulaw ko nga wala ta mo atubanga kaniadto sa dihang manuktok mo sa balay. Ug angkonon nako nga naminaw lang ko sa inyong mensahe tungod sa nuybe-anyos nga bata, tungod kang Samuel.”

Sama kang Samuel sa Polandia, daghang ubang batan-ong mga Saksi ni Jehova ang nagdayeg sa Diyos pinaagi sa ilang mga baba ug pinaagi sa ilang maayong pamatasan ug panggawi. Kon ikaw usa ka batan-on, makahimo ka usab sa pagtabang sa sinserong mga tawo sa pag-apresyar sa maayong espirituwal nga mga butang.