Ang Iyang Kalipay Anaa sa Balaod ni Jehova

NATAPOS ni Albert D. Schroeder, usa ka membro sa Nagamandong Lawas sa mga Saksi ni Jehova, ang iyang yutan-ong kinabuhi niadtong Miyerkoles, Marso 8, 2006. Siya nag-edad ug 94 anyos ug migugol ug kapin sa 73 ka tuig sa bug-os-panahong ministeryo.

Si Brader Schroeder natawo sa Saginaw, Michigan, T.B.A., sa 1911. a Sa bata pa siya, daghan siyag nakat-onan sa Bibliya gikan sa iyang lola sa inahan, nga nagsilsil diha kaniya sa gugma sa pagbasa sa Pulong sa Diyos. Siya nagtuon ug Latin, Aleman ug elektrikal nga inhenyeriya sa University of Michigan. Apan, tungod sa iyang nag-uswag nga pagpabili sa Kasulatan, siya miundang sa pag-eskuyla aron mosulod sa bug-os-panahong buluhaton sa pagsangyaw sa Gingharian. Sa 1932, siya nahimong membro sa pamilyang Bethel sa Brooklyn, New York.

Niadtong 1937, sa edad nga 26, si Brader Schroeder gitudlo nga modumala sa buluhaton sa mga Saksi ni Jehova sa Britanya. Ang iyang kasibot sa buluhatong pagsangyaw nagdasig sa uban didto sa pagsulod sa bug-os-panahon nga pag-alagad. Usa ka batan-ong lalaki nga iyang nakauban sa Bethel sa London mao si John E. Barr. Sila sa ulahi nag-uban sa pag-alagad sa daghang katuigan diha sa Nagamandong Lawas.

Ang nahimo ni Brader Schroeder alang sa mga Saksi ni Jehova nadayag panahon sa gubat. Sa Agosto 1942 siya gipapahawa sa Britanya. Human sa malisod nga paglawig latas sa Atlantiko, siya nakaabot sa Brooklyn pagka-Septiyembre.

Niadtong panahona, ang mga alagad ni Jehova daan nang nagdahom nga adunay dakong buluhaton nga pagahimoon human sa Gubat sa Kalibotan II. Si Brader Schroeder nasorpresa ug nalipay sa pagdawat sa iyang sunod nga asaynment—ang pagtabang sa paglaraw ug kursong tun-anan alang sa Watchtower Bible School of Gilead. Sa pipila ka katuigan, siya nag-alagad ingong instruktor, nga nagtabang sa pagbansay ug mga misyonaryo. Ang mga estudyante nga iyang natudloan sa Gilead ug sa ulahi diha sa Tunghaan sa Ministeryo sa Gingharian daghag nindot nga mahinumdoman sa iyang mga klase. Siya nalipay gayod sa pagsilsil nganha sa iyang mga estudyante sa paghigugma sa mga balaod sa Diyos ug sa pagpasiugda sa kahinungdanon sa pagkaila kang Jehova.

Sa 1956, si Brader Schroeder naminyo kang Charlotte Bowin, ug sa 1958 natawo ang ilang anak nga lalaki, si Judah Ben. Si Brader Schroeder maoy maayong bana ug amahan. Sa 1974, siya misugod sa pag-alagad diha sa Nagamandong Lawas, diin ang iyang lawom nga pagsabot gipabilhan gayod. Siya usa ka tawong maluloton ug mapainubsanon nga, labaw sa tanan, gustong mohimaya sa bantogang ngalan sa Diyos. Kita makasalig nga nadawat ni Brader Schroeder ang iyang langitnong ganti ingong dinihogang Kristohanon nga ang ‘kalipay anaa gayod sa balaod ni Jehova.’—Salmo 1:2.

[Footnote]