“Gihigugma Ko Gayod ang Imong Balaod!”

ANG Salmo 119 maoy usa ka awit nga nagpadayag sa pagbati sa kompositor niini maylabot sa inspiradong mensahe, o pulong sa Diyos. Ang salmista miawit: “Gitipigan ko ang imong pulong sa akong kasingkasing.” “Ako nagakalipay sa imong mga lagda.” “Nagun-ob ang akong kalag sa pagpangandoy sa imong hudisyal nga mga hukom sa tanang panahon.” “Gikalipayan ko ang imong mga pahinumdom.” “Ako nangandoy sa imong mga sugo.” “Ipakita ko ang kahinangop sa imong kasugoan nga akong gihigugma.” “Palandongon ko ang imong mga regulasyon.” “Gihigugma ko gayod ang imong balaod! Kini ang akong gipalandong sa tibuok nga adlaw.”—Salmo 119:11, 16, 20, 24, 40, 47, 48, 97.

Kinasingkasing gayod nga nagpabili ang salmista sa gipadayag nga pulong sa Diyos! Ingon ba usab niana ang imong gibati bahin sa mensahe sa Pulong sa Diyos, ang Bibliya? Gusto ba nimong ugmaron ang samang kahinangop alang niini? Kon mao, kinahanglan usa nimong batasanon ang regular nga pagbasa sa Bibliya, kada adlaw kon makaarang ka niini. Si Jesu-Kristo miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mateo 4:4) Ikaduha, angayng palandongon nimo ang imong gibasa. Ang pagpalandong sa mga kamatuoran bahin sa Diyos, sa iyang mga hiyas, sa iyang kabubut-on, ug sa iyang katuyoan makapalalom sa imong pagpabili sa Bibliya. (Salmo 143:5) Ug labing hinungdanon sa tanan, ipadapat ang maayong tambag niini sa imong adlaw-adlaw nga pagkinabuhi.—Lucas 11:28; Juan 13:17.

Sa unsang paagi makapahimulos ka sa pag-ugmad ug kahinangop sa kon unsay gisulti sa Bibliya? ‘Malipayon ang mga nagasunod sa mga pahinumdom sa Diyos,’ nag-ingon ang Salmo 119:2. Ang mga pahinumdom diha sa Bibliya makatabang kanimo nga molampos sa pagsagubang sa mga suliran sa kinabuhi. (Salmo 1:1-3) Ikaw makabatog kaalam, hait nga salabotan, ug pagsabot, nga makatabang kanimo sa ‘pagpugong sa imong mga tiil gikan sa tanang daotan nga alagianan.’ (Salmo 119:98-101) Ang paghibalo sa kamatuoran bahin sa Diyos ug sa iyang katuyoan sa yuta maghimo sa imong kinabuhi nga mas makahuloganon ug magpasanag sa imong paglaom sa umaabot.—Isaias 45:18; Juan 17:3; Pinadayag 21:3, 4.

Ang mga Saksi ni Jehova interesado kaayo sa pagtabang sa uban nga makakat-on ug dugang sa Bibliya ug makaugmad ug gugma sa mensahe niini. Kami kinasingkasing nga nagdapit kanimo sa pagpahimulos sa among tanyag nga mabasa sa ubos.