Unsa ang “Kataposang mga Adlaw”?

NAHIBULONG ka ba kon unsay anaa sa umaabot alang kanimo ug sa imong mga minahal? Daghang tawo ang nagbantay pag-ayo sa mga balita aron ilang masabtan kon sa unsang paagi ang mga hitabo sa kalibotan makaapektar sa ilang kinabuhi. Apan, ang pagpatalinghog sa inspiradong Pulong sa Diyos maghatag kanatog tinuod nga pagsabot. Kini tungod kay dugay nang gitagna sa Bibliya ang mga kahimtang karon, ug ang mga panghitabo usab sa umaabot.

Pananglitan, sa dinhi pa si Jesu-Kristo sa yuta, iyang gisangyaw ang Gingharian sa Diyos sa daghang lugar. (Lucas 4:43) Natural, ang mga tawong nakapaminaw kaniya buot mahibalo kon kanus-a moabot kanang katingalahang Gingharian. Ngani, tulo ka adlaw sa wala pa patya si Jesus sa di-makataronganong paagi, ang iyang mga tinun-an nangutana kaniya: “Unsa man unya ang ilhanan sa imong presensiya [sa gahom sa Gingharian] ug sa kataposan sa sistema sa mga butang?” (Mateo 24:3) Giingnan sila ni Jesus nga si Jehova nga Diyos lamang ang nahibalo sa tukmang takna kon kanus-a kontrolahon sa Gingharian ang yuta sa bug-os. (Mateo 24:36; Marcos 13:32) Bisan pa niana, si Jesus ug ang uban pa nagtagna ug tinong mga panghitabo sa yuta isip pamatuod nga si Kristo nagmando na diha sa gahom sa Gingharian.

Sa dili pa nato susihon ang makitang ebidensiya nga kita nagkinabuhi na sa “kataposang mga adlaw” sa presenteng sistema sa mga butang, sa daklit atong tagdon ang hinungdanong hitabo didto sa langit. (2 Timoteo 3:1) Si Jesu-Kristo nahimong Hari sa langit sa tuig 1914. a (Daniel 7:13, 14) Dihadiha human niya madawat ang gahom sa Gingharian, si Jesus milihok. Ang Bibliya nagsugilon kanato: “Miulbo ang gubat sa langit: Si Miguel ug ang iyang mga manulonda nakiggubat sa dragon, ug ang dragon ug ang mga manulonda niini nakiggubat.” (Pinadayag 12:7) Si “Miguel nga arkanghel” mao si Jesu-Kristo diha sa iyang langitnong katungdanan. b (Judas 9; 1 Tesalonica 4:16) Ang dragon mao si Satanas nga Yawa. Unsay gidangatan ni Satanas ug sa iyang sumusunod nga daotang mga manulonda, nga gitawag ug mga demonyo? Sila napildi sa gubat ug “gitambog” nganhi sa yuta. (Pinadayag 12:9) Tungod niini, ang “kalangitan ug [kadtong] nanagpuyo niini,” ang matinumanong espiritung mga anak sa Diyos, nanaghugyaw sa kalipay. Apan ang mga tawo wala malipay sa ingon. “Alaot ang yuta,” ang Bibliya nagtagna, “kay ang Yawa nanaog kaninyo, nga may dakong kasuko, kay nahibalo nga hamubo na lamang ang iyang panahon.”—Pinadayag 12:12.

Sa iyang kapungot, si Satanas nagpahinabog kaalaotan—pag-antos ug pagsakit sa mga nanagpuyo sa yuta. Apan kini dili magdugay, sa ‘hamubo lamang nga panahon.’ Ang Bibliya naghisgot niining panahona ingong “kataposang mga adlaw.” Malipay kita nga sa di madugay ang impluwensiya sa Yawa ibabaw sa yuta pagahanawon na sa bug-os. Apan unsay pamatuod nga kita nagkinabuhi na sa kataposang mga adlaw?

[Mga footnote]

 [Picture Credit Lines sa panid 2]

COVER: Foreground: © Chris Stowers/Panos Pictures; background: FAROOQ NAEEM/AFP/Getty Images