Ang Pagpangita sa Tawo sa Kinabuhing Walay Kataposan

SUKAD sa karaang mga panahon, ang mga tawo nangandoy nga mabuhing walay kataposan. Bisan pa niana, kanang pangandoya wala pa matuman—wala pay tawo nga nakakitag paagi sa pagbuntog sa kamatayon. Apan di pa dugay, ang medikal nga panukiduki nakahaling pag-usab sa paglaom nga malugwayan pa ang kinabuhi sa talagsaong paagi. Tagda kon unsay nakaplagan sa nagkalainlaing natad sa siyentipikanhong pagtuon bahin niini.

Gieksperimentohan sa mga biologo ang enzyme nga telomerase aron sulayan kon malugwayan ba ang gidaghanon sa pagbag-o-bag-o sa mga selula. Nahibalo ang mga siyentipiko nga ang daan ug nagakadaot nga mga selula tangtangon ug pulihan ug bag-o. Gani, ang kadaghanang bahin sa lawas ginabag-o sa daghang higayon sulod sa pagkinabuhi sa usa ka tawo. Kon ang proseso sa pagbag-o malugwayan, naghunahuna ang mga tigpanukiduki nga “ang lawas sa tawo makabag-o sa kaugalingon sa taas kaayong panahon—bisan sa walay kataposan.”

Ang therapeutic cloning, usa ka kontrobersiyal nga natad sa pagpanukiduki, gikaingon nga makapatunghag bag-o ug tukma kaayong mga atay, rinyon, o kasingkasing nga ibalhin ngadto sa mga pasyente. Ang maong mga organo ipatungha pinaagi sa paggamit sa kaugalingong mga stem cell sa pasyente.

Nakapanglantaw ang mga tigpanukiduki sa nanotechnology sa panahon diin ang mga doktor magpasulod ug mga robot nga ingon ka gagmay sa mga selula ngadto sa kaugatan aron pangitaon ug patyon ang mga selula sa kanser ug makadaot nga mga bakterya. Nagtuo ang uban nga kini nga natad sa siyensiya, uban sa mga pagpanambal pinaagig mga gene, sa ngadtongadto magtabang sa lawas sa tawo sa pagsustento sa kaugalingon sa walay kataposan.

Ang mga nagpasiugda sa cryonics magpabagtok usab sa mga lawas sa nangamatay diha sa yelo. Ang ideya mao ang pagpreserbar niana hangtod makakaplag ang mga doktor ug mga tambal nga makaayo sa mga sakit, makabali sa mga epekto sa pagkatigulang, ug makabanhaw ug makapasig-uli sa himsog nga panglawas sa mga patay. Ang American Journal of Geriatric Psychiatry nagtawag niining ideyaha nga “usa ka modernong katumbas sa pag-embalsamar sa karaang mga Ehiptohanon.”

Ang way puas nga pagpangita sa tawo sa pagkawalay-kamatayon nagpasabot nga lisod dawaton ang kamatuoran nga kita mamatay. Posible ba gayod nga ang mga tawo mabuhi sa walay kataposan? Unsay giingon sa Bibliya bahin niini? Tubagon kini sa sunod nga artikulo.