Ikaw Mabuhi sa Walay Kataposan

KADAGHANAN sa mga membro sa mga relihiyon sa kalibotan nagtuo nga kita mahimong mabuhi sa walay kataposan sa usa ka paagi o sa lain. Ang mga detalye mahimong magkalahi gikan sa usa ka relihiyon ngadto sa lain, apan halos pareho lang ang paglaom—nga mabuhing malipayon ilalom sa maayong mga kahimtang nga dili na mamatay. Dili ba kana man usab ang imong gitinguha? Sa unsang paagi ikapatin-aw ang pagkakaylap sa maong mga pagtuo? Ug matuman ba gayod kaha ang paglaom nga mabuhing walay kataposan?

Ang Kasulatan nagpakita nga gibutang sa Maglalalang ang tinguha nga mabuhing walay kataposan diha sa kahiladman sa tawo sukad gayod sa sinugdanan, sukad sa iyang paglalang sa unang tawhanong magtiayon. “Ang panahong walay tino . . . gibutang [sa Diyos] sa ilang kasingkasing,” nag-ingon ang Bibliya.—Ecclesiastes 3:11.

Hinunoa, aron matuman ang maong tinguha, kinahanglang magpasakop ang unang tawhanong magtiayon sa awtoridad sa Diyos sa paghukom kon unsay husto ug sayop. Kon ila pang gibuhat kana, hukman unta sila ni Jehova nga takos mabuhi “hangtod sa panahong walay tino” diha sa pinuy-anan nga iyang giandam alang kanila, ang tanaman sa Eden.—Genesis 2:8; 3:22.

Kinabuhing Walay Kataposan Nawala

Ang rekord sa Bibliya nagpakita nga ang Diyos nagtanom diha sa tanaman ug “kahoy sa kahibalo sa maayo ug sa daotan,” diin iyang gidid-an si Adan ug Eva sa pagkaon sa bunga niini, nga kon sila mokaon sila tinong mamatay. (Genesis 2:9, 17) Ang dili pagkaon ni Adan ug Eva sa bunga magpasabot nga ilang giila ang iyang awtoridad. Sa laing bahin, ang pagkaon gikan sa maong kahoy nagpaila nga ilang gisalikway ang awtoridad sa Diyos. Gisupak ni Adan ug Eva ang gibaod ni Jehova ug midapig kang Satanas, usa ka espiritung linalang nga mirebelde sa awtoridad sa Diyos. Tungod niana, sa hustong paagi gihukman sa Diyos si Adan ug Eva nga dili takos mabuhi sa walay kataposan.—Genesis 3:1-6.

Ang gitanyag sa Diyos maoy kinabuhi o kamatayon, paglungtad o pagkawala-maglungtad. Ang resulta sa pagsupak mao ang kamatayon ug ang bug-os nga kataposan sa ilang paglungtad. Si Adan ug Eva o si bisan kinsa sa ilang mga anak dili magpadayong buhi pinaagig usa ka matang sa ilimnon nga may madyik o pinaagig dili-mamatayng kalag. a

Ang tanang kaliwat ni Adan nag-antos tungod sa iyang pagrebelde. Gipatin-aw ni apostol Pablo ang mga sangpotanan. Siya misulat: “Ang sala misulod sa kalibotan pinaagi sa usa ka tawo ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

Kinabuhing Walay Kataposan Nabatonan Pag-usab

Giilustrar ni apostol Pablo ang kahimtang sa mga kaliwat ni Adan pinaagi sa pagtandi niini ngadto sa usa ka ulipon sa unang siglo. Tungod  sa napanunod nga sala, ang mga anak ni Adan ug Eva dili kalikayan nga matawo nga “ulipon sa sala,” nga seguradong mamatay. (Roma 5:12; 6:16, 17) Oo, dili gayod unta kalikayan kana kon si Jehova wala pa magtaganag legal nga kasulbaran sa pagpalit sa kagawasan sa maong mga ulipon. Si Pablo nagpatin-aw: “Ingon nga pinaagi sa usa ka paglapas [ni Adan] nahimong hinukman ang tanang matang sa tawo, sa ingon usab pinaagi sa usa ka buhat sa pagkamatarong ang tanang matang sa tawo igapahayag nga matarong alang sa kinabuhi.” Kana nga “buhat sa pagkamatarong” mitultol ngadto sa paghalad ni Jesus sa iyang hingpit nga kinabuhi ingong “katugbang nga lukat alang sa tanan.” Giila ni Jehova ang legal nga gahom sa lukat sa pagpagawas sa katawhan gikan sa “pagkahinukman.”—Roma 5:16, 18, 19; 1 Timoteo 2:5, 6.

Mao nga dili gayod makaplagan sa mga siyentipiko ang yawi sa kinabuhing walay kataposan diha sa genetic code sa tawo. Ang yawi makaplagan sa laing dapit. Sumala sa Bibliya, ang lintunganayng hinungdan sa kamatayon sa katawhan maoy moral ug legal, dili sa pisikal nga paagi. Ang paagi sa pagpasig-uli sa kinabuhing walay kataposan—ang halad lukat ni Jesus—maoy legal nga kinahanglanon usab. Ang lukat maoy pagpahayag usab sa pagkamatarong ug sa mahigugmaong-kalulot sa Diyos. Nan, kinsay makabenepisyo sa lukat ug makadawat sa kinabuhing walay kataposan?

Ang Gasa nga Pagkawalay-Kamatayon

Si Jehova nga Diyos maoy “gikan sa panahong walay tino hangtod sa panahon walay tino.” Siya dili mamatay. (Salmo 90:2) Ang unang persona nga gigasahan ni Jehova ug pagkawalay-kamatayon mao si Jesu-Kristo. Si apostol Pablo nag-ingon: “Si Kristo, karon nga siya gibangon na gikan sa mga patay, dili na mamatay; ang kamatayon dili na agalon ibabaw kaniya.” (Roma 6:9) Sa pagkatinuod, nagtandi sa pagkabanhaw ni Jesus ngadto sa yutan-ong mga magmamando, si Pablo nagbatbat kaniya ingong ang bugtong nakabaton sa pagkawalay-kamatayon. Si Jesus magpadayong “buhi hangtod sa kahangtoran.” “Dili malaglag” ang iyang kinabuhi.—Hebreohanon 7:15-17, 23-25; 1 Timoteo 6:15, 16.

Dili lamang si Jesus ang makabaton sa maong gasa. Ang dinihogan-sa-espiritung mga Kristohanon nga gipiling magmando ingong mga hari didto sa langit makadawat sa samang pagkabanhaw nga nadawat ni Jesus. (Roma 6:5) Gipakita  ni apostol Juan nga kining pribilehiyoa gihatag ngadto sa 144,000 ka tawo. (Pinadayag 14:1) Sila usab makadawat ug pagkawalay-kamatayon. Mahitungod sa ilang pagkabanhaw, si Pablo nag-ingon: “Ang unod ug dugo dili makapanunod sa gingharian sa Diyos . . . Ang trompeta motingog, ug ang mga patay pagabangonon nga dili-madunoton, ug kita mangausab. Kay kini nga madunot angay magsul-ob ug pagkadili-madunoton, ug kini nga may-kamatayon angay magsul-ob ug pagkawalay-kamatayon.” Ang kamatayon wala nay gahom niadtong makadawat sa maong pagkabanhaw.—1 Corinto 15:50-53; Pinadayag 20:6.

Talagsaon gayod kini nga pagpadayag gikan sa Diyos. Bisag espirituhanong mga linalang pa sila, ang mga manulonda wala gani lalanga nga walay kamatayon. Kini gipaila sa kamatuoran nga kadtong espiritung mga linalang nga midapig kang Satanas sa iyang pagrebelde pagalaglagon. (Mateo 25:41) Sa laing bahin, ang kaubang mga magmamando ni Jesus makadawat ug gasa nga pagkawalay-kamatayon, nga maoy pamatuod sa lig-ong pagsalig ni Jehova sa ilang pagkamatinumanon.

Nagpasabot ba kini nga 144,000 lamang ka tawo, usa ka gamay ra kaayong gidaghanon kon itandi sa binilyong katawhan nga nagkinabuhi karon, ang mabuhi sa walay kataposan? Wala. Atong susihon kon ngano.

Kinabuhing Walay Kataposan sa Usa ka Paraisong Yuta

Ang basahon sa Pinadayag sa Bibliya naghulagway sa matahom nga talan-awon sa dili-maihap nga panon sa katawhan nga hatagan ug kinabuhing walay kataposan sa usa ka paraisong yuta. Uban kanila mao kadtong nangamatay apan banhawon ug ipasig-uli ngadto sa kahimsog ug kabaskog sa pagkabatan-on. (Pinadayag 7:9; 20:12, 13; 21:3, 4) Sila giyahan ngadto sa “usa ka suba sa tubig sa kinabuhi, ingon ka tin-aw sa kristal, nga nagaagos gikan sa trono sa Diyos.” Diha sa mga tampi niini anaa ang “mga kahoy sa kinabuhi . . . , ug ang mga dahon sa mga kahoy maoy tambal alang sa kanasoran.” Ang malulotong imbitasyon ni Jehova nga Diyos mao kini: “Si bisan kinsa nga giuhaw paaria; si bisan kinsa nga may tinguha paimna sa tubig sa kinabuhi nga walay bayad.”—Pinadayag 22:1, 2, 17.

Kining mga kahoya ug mga tubiga walay milagrosong mga sangkap o tuboran sa pagkabatan-on, sama nianang gipangita pag-ayo daghang siglo kanhi sa mga alkemista ug mga eksplorador. Hinunoa, kini naghawas sa mga tagana sa Diyos pinaagi ni Jesu-Kristo alang sa pagpasig-uli sa katawhan ngadto sa hingpit nga kahimtang nga naglungtad sa sinugdanan.

Wala mausab ang katuyoan sa Diyos nga mao ang paghatag ug kinabuhing walay kataposan sa masinugtanong katawhan. Kana nga katuyoan mamatuman, kay si Jehova maunongon. Ang Salmo 37:29 nag-ingon: “Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.” Kining saara motukmod kanato, lakip niadtong gihatagan ug pagkawalay-kamatayon sa langit, sa pagpahayag: “Dako ug katingalahan ang imong mga buhat, Jehova nga Diyos, ang Labing Gamhanan. Matarong ug matuod ang imong mga dalan, Hari nga walay kataposan. Kinsa bay dili mahadlok kanimo, Jehova, ug dili maghimaya sa imong ngalan, tungod kay ikaw lamang ang maunongon?”—Pinadayag 15:3, 4.

Gusto mo bang makabaton sa bililhong gasa nga kinabuhing walay kataposan? Kon mao, kinahanglan mong pamatud-an nga ikaw maunongon ug masinugtanon ngadto sa “Hari nga walay kataposan.” Kinahanglan kang makakat-on bahin kang Jehova ug sa usa nga pinaagi kaniya mabatonan ang maong kinabuhi, si Jesu-Kristo. Ang tanang andam nga motuman sa mga sukdanan sa Diyos sa husto ug sayop gasahan ug “kinabuhing walay kataposan.”—Juan 17:3.

[Footnote]

[Kahon/Hulagway sa panid 5]

Usa ka Dumalayong Pangandoy

Ang Epic of Gilgamesh, usa ka taas nga sugilanon sa Mesopotamia nga gituohan nga gikan pa sa ikaduhang milenyo W.K.P., naghubit sa usa ka bayani nga nangita sa walay-kataposang pagkabatan-on. Ang karaang mga Ehiptohanon nag-embalsamar sa ilang mga patay, sa pagtuo nga ang mga kalag, nga gituohang dili kono mamatay, makagamit pag-usab sa ilang mga lawas. Tungod niana, ang pipila ka lubnganan sa Ehipto punog mga butang nga mahimong gikinahanglan sa mga patay didto sa lain konong kalibotan.

Taliwala sa mga alkemista sa Tsina, ang pagkadili-mamatay sa pisikal nga lawas daw gituohan na niadto pang ikawalong siglo W.K.P., ug ang posibilidad nga makabaton niana pinaagig ilimnong may madyik, gituohan niadtong ikaupat nga siglo W.K.P. Gipangita ug gisulayan sa mga alkemista sa Edad Medya nga Uropa ug Arabia ang pagmugna sa kaugalingon nilang mga ilimnon sa kinabuhi. Ang pipila sa ilang mga tinimpla adunay mga asin sa arsenic, asogi, ug asupre. Wala mahibaloi kon pilay nangamatay kay nahilo human makainom sa maong mga tinimpla!

May higayon usab nga kaylap ang pagtuo bahin sa gikaingong Tuboran sa Pagkabatan-on—usa ka tuboran sa tubig nga makapasig-uli kono sa kabaskog sa tanan nga makainom gikan niana.

 [Kahon/Mga hulagway sa panid 7]

Makapuol ba ang Kinabuhing Walay Kataposan?

Ang pipila ka tawo moingon nga makapuol kono ang kinabuhing walay kataposan, nga anam-anamon pagbuhat ang walay-kapuslanang mga buluhaton nga sublisublion sa walay kataposan. Tingali ang walay kataposan nga ilang gihunahuna mao ang walay kataposan nga pagpalugway sa presenteng mga estilo ug mga kahimtang sa kinabuhi nga alang sa daghang tawo makapuol gayod ug walay kapuslanan. Apan sa Paraiso nga ipasig-uli sa Diyos, gisaaran niya ang tawo ug “tumang kalipay sa kadagaya sa pakigdait.” (Salmo 37:11) Ang maong kinabuhi maghatag ug kahigayonan sa mga tawo sa pagbaton ug kahibalo bahin sa kalalangan ni Jehova ug paggugol sa ilang panahon sa pag-ugmad sa bisan unsa o sa tanang talagsaong mga kahanas, pagtuon, ug mga trabaho nga ato lang gipangandoy karon.

Si Dr. Aubrey de Grey, usa ka geneticist sa Cambridge University nga nanukiduki bahin sa pagpalugway sa kinabuhi, nag-ingon: “Ang mga tawo nga may maayong edukasyon ug panahon sa paggamit niana dili gayod mapul-an karon ug dili gayod maghunahuna nga mahutdag bag-ong mga butang nga gusto nilang buhaton.” Bisan pa niana, nag-ingon ang inspiradong Pulong sa Diyos, “ang tawo dili [gayod] makatugkad sa buhat nga nahimo sa matuod nga Diyos sukad sa sinugdan hangtod sa kataposan.”—Ecclesiastes 3:11.