Mapig-oton ba Kaayo ang Bibliya?

“SA BATA pa, ako wala tudloi bahin sa mga sukdanan sa Bibliya. Wala gani hisgoti ang Diyos,” matod pa sa usa ka batan-ong lalaki sa Pinlandia. Daghan karon ang ingon niana ug kagikan. Daghan, ilabina ang mga batan-on, ang nag-isip sa Bibliya nga kinaraan kaayo ug ang tambag niini sobra ka mapig-oton. Kadtong nagtinguha sa pagsunod sa Bibliya gilantaw sa uban ingong mga tawong dinaogdaog kansang kinabuhi nabug-atan sa mga pagdili ug mga sugo. Busa, gibati sa daghan nga mas maayo nga dili na lang mobasag Bibliya ug sa lain na lang mangitag giya.

Ang pangunang hinungdan kon nganong gilantaw ang Bibliya niining paagiha mao ang taas nga rekord sa pagpangdaogdaog nga gihimo sa mga relihiyon sa Kakristiyanohan. Pananglitan, sa yugto nga gitawag sa mga historyano nga Mangiob nga Katuigan, ang Iglesya Katolika sa Uropa nagkontrolar sa halos matag bahin sa kinabuhi sa mga tawo. Si bisan kinsa nga mosulay sa pagtutol sa simbahan paantoson o patyon pa gani. Ang mga relihiyon sa Protestante nga mitungha sa ulahi, nagdili usab sa personal nga kagawasan. Karon, ang mga termino sama sa “Calvinista” o “Puritano” makapahinumdom dili lamang bahin sa mga sumusunod sa usa ka pagtulon-an kondili sa grabeng mga silot nga gipahamtang sa maong mga grupo. Ingong resulta sa pagkamadaogdaogon sa mga relihiyon, ang mga tawo sayop nga nanghinapos nga malupigon ang mga pagtulon-an sa Bibliya.

Sa di pa dugayng mga siglo, ang mga relihiyon halos nawad-an sa impluwensiya niini diha sa kinabuhi sa mga tawo, labing menos diha sa pipila ka kayutaan. Human isalikway ang tradisyonal nga relihiyosong mga pagtuo, daghan ang misagop sa pagtuo nga katungod sa tawo ang paghukom mismo kon unsay maayo ug daotan. Unsay resulta niini? Si Ahti Laitinen, usa ka propesor sa kriminolohiya ug hudisyal nga sosyolohiya, nagpatin-aw: “Ang pagtahod sa awtoridad mius-os, ug ang pagsabot sa mga tawo sa kon unsay dalawaton ug dili dalawaton nag-anam ka lubog.” Katingad-an, bisan ang mga lider sa simbahan nakabaton na niini nga panghunahuna. Ang usa ka prominente nga Luteranong obispo miingon: “Ako dili mouyon sa pangangkon nga matubag ang moral nga mga pangutana pinaagi sa pagdangop ngadto sa Bibliya o sa pipila ka relihiyosong awtoridad.”

Maayo ba ang Walay-Kinutbanang Kagawasan?

Ang ideya bahin sa walay-kinutbanang kagawasan daw madanihon, ilabina alang sa mga batan-on. Ang kadaghanan dili gayod gustong pakamenoson o magawngan sa mga lagda. Apan, angay ba nga ang matag usa magpatuyang sa paghimo sa iyang gusto? Sa pagtubag niining pangutanaha, tagda ang usa ka ilustrasyon. Handurawa ang usa ka siyudad nga walay mga balaod sa trapiko. Dili na kinahanglan ang lisensiya sa drayber ug eksaminasyon sa pagmaneho. Ang mga tawo makapatuyang sa pagmaneho sumala sa ilang gusto, bisan kon hubog, nga dili mabalaka bahin sa gikusgon sa pagpadagan, mga signal sa paghunong, mga suga sa trapiko, mga karsada nga one-way, o tabokanan sa mga tawo. Maayo ba ang maong “kagawasan”?  Dili gayod! Kini moresulta sa grabeng kagubot ug kadaot. Bisan tuod ang mga balaod sa trapiko naglimite sa kagawasan sa tawo, kita nakasabot nga kining mga balaora nanalipod sa mga drayber ug sa mga tawong naglakaw.

Sa susama, si Jehova naghatag ug mga lagda kon unsaon nato sa pagkinabuhi. Kini makaayo kanato. Kon wala kana nga giya, kita makakat-on lamang pinaagi sa pag-eksperimento, ug sa pagbuhat niana, kita makapahinabog kadaot sa atong kaugalingon ug sa uban. Ang maong kahimtang sa pagkawalay sukdanan sa moralidad sama ka delikado sa pagmaneho diha sa usa ka siyudad nga walay balaod sa trapiko. Ang tinuod mao, kita nagkinahanglag mga lagda ug balaod ug uyon gayod niana ang kadaghanang tawo.

“Ang Akong Luwan Magaan”

Ang mga balaod sa trapiko mahimong maglangkob ug daghan ug detalyadong listahan sa mga lagda—sa pipila ka dapit ang balaod bahin sa pagparking pa lamang daghan na kaayo. Sa kasukwahi, ang Bibliya wala maghatag ug taas kaayo nga listahan sa mga lagda. Hinunoa, kini naghatag ug paninugdang mga prinsipyo, ug kini dili bug-at o malupigon. Si Jesu-Kristo nagtanyag ug usa ka makapadaning pagdapit sa iyang mga katalirongan: “Umari kanako, kamong tanang nabudlayan ug nabug-atan, ug ako magapalagsik kaninyo. Kay ang akong yugo masayon ug ang akong luwan magaan.” (Mateo 11:28, 30) Diha sa iyang sulat ngadto sa Kristohanong kongregasyon sa Corinto, si apostol Pablo miingon: “Kon asa gani ang espiritu ni Jehova, adunay kagawasan.”—2 Corinto 3:17.

Apan, kanang maong kagawasan dili kay walay kinutbanan. Klarong gipaila ni Jesus nga ang mga kinahanglanon sa Diyos naglakip ug pipila ka simple nga mga sugo. Pananglitan, si Jesus miingon sa iyang nga tinun-an: “Mao kini ang akong sugo, nga maghigugmaay kamo sa usag usa ingon sa akong paghigugma kaninyo.” (Juan 15:12) Pagkaanindot gayod unta sa kinabuhi kon ang matag usa nagpadapat nianang sugoa! Busa, ang kagawasan nga gitagamtam sa mga Kristohanon dili kay walay limitasyon. Si apostol Pedro misulat: “Manig-ingon sa mga tawong may kagawasan, apan hupti ang inyong kagawasan, dili ingong takoban sa pagkadaotan, kondili ingong mga ulipon sa Diyos.”—1 Pedro 2:16.

Busa, bisan tuod ang mga Kristohanon wala na magsunod ug detalyadong listahan sa mga balaod, sila wala maglihok sumala sa ilang kaugalingong ideya kon unsay husto ug sayop. Ang mga tawo nanginahanglan sa giya nga Diyos ray makahatag kanila. Ang Bibliya tin-awng nag-ingon: “Dili iya sa tawo nga nagalakaw bisan ang pagtultol sa iyang lakang.” (Jeremias 10:23) Kon atong sundon ang paggiya sa Diyos, kita makabenepisyo gayod.—Salmo 19:11.

Ang usa sa mga kaayohan mao ang kalipay. Pananglitan, ang batan-ong lalaki nga gihisgotan ganina maoy kawatan ug bakakon kaniadto. Siya usab imoral nga tawo. Sa nakakat-on siya sa hataas nga mga sukdanan sa Bibliya, iyang gipasibo ang iyang paagi sa pagkinabuhi niini. Siya miingon: “Bisag wala dayon nako masunod sa bug-os ang mga sukdanan sa Bibliya, akong nasabtan ang bili niini. Ang akong pagkinabuhi kanhi wala nakahatag kanakog kalipay sama sa akong natagamtam  karon. Ang pagkinabuhi subay sa mga sukdanan sa Bibliya makapayano sa imong kinabuhi. Mahibalo ka kon asa nagpadulong ang imong kinabuhi ug kon unsay husto ug sayop.”

Milyonmilyong tawo ang nakasinati usab niana. Ang usa sa mga benepisyo mao, ang giya nga makaplagan sa Bibliya nakatabang kanila sa pagbaton ug mas maayong relasyon sa uban, pag-ugmad ug timbang nga panglantaw sa trabaho, paglikay sa mga bisyo, ug busa sa pagkinabuhi nga mas malipayon. Si Markus, a usa ka batan-on nga nakasulay pagkinabuhi subay ug dili subay sa mga sukdanan sa Bibliya, miingon bahin sa iyang kinabuhi: “Pinaagi sa pagkinabuhi subay sa Bibliya, akong napauswag ang akong pagtamod sa kaugalingon.” b

Unsay Imong Pilion?

Busa mapig-oton ba ang Bibliya? Ang tubag maoy oo—alang sa kaayohan natong tanan. Apan mapig-oton ba kaayo ang Bibliya? Ang tubag maoy dili. Ang walay-kinutbanan nga kagawasan motultol lamang sa mga suliran. Ang mga sukdanan sa Bibliya maoy timbang, ug kini makahatag kanatog kaayohan ug kalipay. Si Markus nag-ingon: “Sa paglabay sa panahon akong naamgohan nga maalamon ang pagpadapat sa Pulong sa Diyos sa akong kinabuhi. Bisag sa daghang paagi lahi ang akong kinabuhi sa kadaghanang tawo, wala gayod ako maghunahuna nga nahikawan ako ug maayong butang.”

Sa dihang masinati nimo ang mga panalangin sa pagkinabuhi subay sa mga sukdanan sa Bibliya, ang imong pagpabili sa Pulong sa Diyos mouswag. Kini motultol sa mas dako pang panalangin—ikaw mahigugma sa Tinubdan niini, si Jehova nga Diyos. “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.”—1 Juan 5:3.

Si Jehova mao ang atong Maglalalang ug ang atong langitnong Amahan. Siya nahibalo kon unsay labing maayo alang kanato. Inay pig-otan kita, siya mahigugmaong nagtultol kanato alang sa atong kaayohan. Sa balaknong pagkasulti si Jehova nag-awhag kanato: “Oh kon ikaw mamati lamang unta gayod sa akong mga sugo! Niana ang imong kalinaw mahimong sama gayod sa usa ka suba, ug ang imong pagkamatarong sama sa mga balod sa dagat.”—Isaias 48:18.

[Mga footnote]

[Hulagway sa panid 9]

Si Jesus miingon nga ang mga kinahanglanon sa Diyos makapahayahay

[Hulagway sa panid 10]

Pinaagi sa pagtuman sa mga sugo sa Diyos, mabatonan ang kalipay ug pagtamod sa kaugalingon