Mga Pangutana Gikan sa mga Magbabasa

Nganong ang Bag-ong Kalibotang Hubad nag-ingon sa Deuteronomio 31:2 nga si Moises ‘dili na tugotan nga makagula ug makasulod’ ingon nga lider sa Israel, nga ang ubang mga hubad nagpakita man nga siya dili na makahimo sa pagbuhat sa ingon?

Bisan tuod ang Hebreohanong pulong nga gikuwestiyon mahimong hubaron sa bisan hain niana, ang paghubad sa pipila ka Cebuano nga mga Bibliya nagpakita nga sa hinapos nga bahin sa iyang kinabuhi, si Moises maluyahon na ug dili na makabuhat sa mga responsibilidad sa pagkapangulo. Pananglitan, Ang Bibliya—Bag-ong Hubad nga Binisaya nagkutlo kang Moises nga nag-ingon: “Ang akong panuigon karon usa ka gatus ug kaluhaan ka tuig na ug dili na ako makahimo sa pagpangulo kaninyo.” Sa samang paagi, ang Maayong Balita Bibliya nag-ingon: “Dili na ako makapangulo kaninyo.”

Apan, ang Deuteronomio 34:7 nagpakita nga bisan tuod tigulang na si Moises, siya dili maluyahon. Kini nag-ingon: “Si Moises usa ka gatos ug kawhaan ka tuig ang panuigon sa iyang pagkamatay. Ang iyang mata wala mohalap, ug ang iyang kusog wala mobiya.” Busa, kusgan pa si Moises aron sa pagpangulo sa nasod, apan dili na kabubut-on ni Jehova nga siya magpadayon sa pagbuhat sa ingon. Kini makita sumala sa gisulti ni Moises: “Si Jehova miingon kanako, ‘Dili ka makatabok niining Jordan.’” Lagmit nga gisubli lamang ni Jehova ang iyang gihukom didto sa katubigan sa Meriba.—Numeros 20:9-12.

Taas ug talagsaon ang pagkinabuhi ni Moises, nga mahimong bahinon sa tulo ka yugto. Sulod sa 40 ka tuig siya nagpuyo sa Ehipto, diin siya “natudloan sa tanang kaalam sa mga Ehiptohanon” ug “gamhanan sa iyang mga pulong ug mga buhat.” (Buhat 7:20-22) Sa laing 40 ka tuig, siya nagpuyo sa Midian. Didto iyang naugmad ang espirituwal nga mga hiyas nga gikinahanglan sa pagpanguna sa katawhan sa Diyos. Sa kataposan, sulod sa 40 ka tuig siya naggiya ug nangulo sa mga Israelinhon. Apan niadtong higayona, si Jehova nakahukom nga si Josue, dili si Moises, ang mangulo sa nasod sa pagtabok sa Suba sa Jordan ngadto sa Yutang Saad.—Deuteronomio 31:3.

Busa, nakuha sa Bag-ong Kalibotang Hubad ang hustong kahulogan sa Deuteronomio 31:2. Si Moises wala na makapadayon ingong lider sa Israel, dili tungod sa kaluyahon, kondili tungod kay si Jehova wala na magtugot kaniya sa pagbuhat sa ingon.