Sugilanon sa Kinabuhi

Si Jehova Mitabang Nako sa Akong mga Suliran sa Kinabuhi

SUMALA SA GIASOY NI DALE IRWIN

“IGO NA ANG WALO! MISAMOT KAPULIKI TUNGOD SA QUADRUPLET.” Mao kini ang ulohang balita sa usa ka lokal nga mantalaan nga nagbalita bahin sa quadruplet nga nadugang sa among upat ka anak babaye. Sa batan-on pa, wala koy planong magminyo, ilabina gayod ang pagbaton ug mga anak. Apan, ania—walo ang akong anak!

AKO natawo niadtong 1934 sa lungsod sa Mareeba, Australia. Ako ang kinamanghoran sa tulo ka anak. Ang among pamilya sa ulahi mibalhin sa Brisbane, diin si Mama nagtudlo sa Sunday school sa simbahan sa Metodista.

Sayo sa 1938, gibalita diha sa lokal nga mga mantalaan nga si Joseph F. Rutherford nga gikan sa hedkuwarter sa mga Saksi ni Jehova lagmit did-an sa pagsulod sa Australia. “Nganong gibuhat man nila kini kaniya?” Kana maoy pangutana ni Mama sa Saksi nga miduaw sa among balay human niya mabasa ang balita. Ang Saksi mitubag: “Dili ba miingon si Jesus nga lutoson sa mga tawo ang iyang mga sumusunod?” Dayon gidawat ni Mama ang pulyeto nga Cure, nga nagpakita sa daghang kalainan tali sa matuod ug bakak nga relihiyon. a Kay nakaangay sa pulyeto, gidala ni Mama kaming mga anak sa tigom sa mga Saksi ni Jehova pagkasunod Dominggo. Sa sinugdan tutol kaayo si Papa, apan usahay magsulat siyag mga pangutana bahin sa Bibliya nga ipahatag niya kang Mama ngadto sa usa sa mga igsoon. Sa baylo, isulat sa maong igsoon ang Kasulatanhong mga tubag aron ihatag ni Mama kang Papa.

Usa ka Dominggo niana, si Papa mitambong uban kanamo aron ipahungaw ang iyang kalagot sa mga Saksi. Apan, human makigsulti sa nagapanawng magtatan-aw nga miduaw sa kongregasyon  nianang panahona, ang tinamdan ni Papa nausab ug misugot pa gani siya nga didto ipahigayon sa among balay ang senemanang pagtuon sa Bibliya, nga gitambongan sa interesadong mga tawo sa among lugar.

Sa Septiyembre 1938, ang akong mga ginikanan nabawtismohan. Kami sa akong mga igsoon nabawtismohan sa Disyembre 1941 sa usa ka nasyonal nga kombensiyon nga gipahigayon sa Hargreave Park sa Sydney, New South Wales. Ako siyete anyos kaniadto. Human niadto, ako regular nga nakigbahin sa pagsangyaw uban sa akong mga ginikanan. Niadtong panahona, ang mga Saksi magdaladalag mga ponograpo sa balay ug balay ug magpatokar ug girekord nga mga diskurso sa Bibliya alang sa mga tagbalay.

Ang usa ka Saksi nga dili gayod nako malimtan mao si Bert Horton. Siya adunay sound car—usa ka sakyanan nga adunay kusog nga amplipayr ug dakong trompa nga gitaod sa atop niini. Makalilipay ang pagpakig-uban kang Bert diha sa buluhaton, ilabina alang sa usa ka bata nga sama nakog pangedaron. Pananglitan, sa dihang magpatokar kamig diskurso bahin sa Bibliya ibabaw sa bungtod, subsob nga makakita kamig sakyanan sa polis nga magpaingon kanamo. Dalidalion ug patay ni Bert ang ponograpo, padaganon ang sakyanan sa laing bungtod nga pila ka kilometro ang gilay-on, ug dayon magpatokar na usab ug laing plaka. Daghan akog nakat-onan bahin sa pagsalig kang Jehova ug kaisog gikan kang Bert ug sa ubang maunongon ug maisogong mga igsoon sama kaniya.—Mateo 10:16.

Sa dihang ako nag-edad ug 12 anyos, regular akong mosangyaw human sa klase nga mag-inusara. Sa usa ka higayon, nahimamat nako ang usa ka pamilya nga Adshead ang apelyido. Sa ngadtongadto, ang mga ginikanan, ang ilang walo ka anak, ug daghang apo nakakat-on sa kamatuoran. Ako nagpasalamat kang Jehova sa paggamit kanako, nga usa lang ka bata, sa pagdala sa kamatuoran sa Bibliya niining buotan nga pamilya.—Mateo 21:16.

Unang mga Pribilehiyo sa Pag-alagad

Sa edad nga 18 anyos, ako nahimong bug-os-panahong payunir nga ministro ug giasayn sa Maitland, New South Wales. Sa 1956, ako gidapit sa pag-alagad sa sangang buhatan sa Australia sa Sydney. Sa 20 ka kawani, mga un-tersiya niini maoy mga dinihogan, nga may paglaom nga magmando uban kang Kristo sa iyang langitnong Gingharian. Pagkadakong pribilehiyo ang pag-alagad uban kanila!—Lucas 12:32; Pinadayag 1:6; 5:10.

Ang akong tinguha nga magpabiling tagsaanon nahanaw sa dihang akong nailaila si Judy Helberg, usa ka maanyag nga payunir nga sister nga temporaryong gidapit ngadto sa sangang buhatan aron motabang kanako sa usa ka dakong proyekto. Nagkahigugmaay mi ni Judy, ug naminyo mi duha ka tuig sa ulahi. Human niana, gisugdan namo ang buluhaton sa sirkito, nga naglangkit ug pagduaw ug usa ka kongregasyon sa mga Saksi ni Jehova matag semana aron dasigon ang mga igsoon.

Sa 1960, nanganak si Judy sa una namong anak nga babaye, si Kim. Sa pagkakaron, kinahanglang moundang sa buluhaton sa sirkito ug mopondo sa usa ka dapit kon manganak na. Apan sa among dakong katingala, kami gidapit sa pagpadayon sa pagduaw sa mga kongregasyon. Human mag-ampo sa makadaghan, gidawat namo ang imbitasyon, ug sa misunod nga pito ka bulan, si Kim mibiyaheg 13,000 ka kilometros sa bus, ayroplano, ug tren samtang kami nagduaw sa lagyong mga kongregasyon sa Queensland ug sa Amihanang Teritoryo. Wala kamiy sakyanan niadtong panahona.

Kami kanunayng moestar sa balay sa mga igsoon. Tungod kay tropikanhon man ang klima, ang mga kuwarto niadtong panahona kasagarang walay sira nga gitabilan lang ug kortina, nga mas nakapabalaka  kanamo sa dihang mohilak si Kim sa gabii. Sa ngadtongadto, ang mga kaakohan sa pag-atiman sa bata ug sa among asaynment nahimong bug-at na kaayo. Busa kami mipahiluna sa Brisbane, ug ang akong nahimong trabaho mao ang pagpamintal ug mga karatula, usa ka matang sa komersiyal nga arte. Duha ka tuig human matawo si Kim, natawo ang among ikaduhang anak babaye, si Petina.

Pagsagubang sa Usa ka Trahedya

Sa 1972, sa dihang ang mga bata nag-edad ug 12 ug 10, si Judy namatay tungod sa Hodgkin’s disease, usa ka matang sa kanser sa lymphoid tissue. Ang iyang kamatayon halos dili maantos sa among pamilya. Bisan pa niana, panahon sa pagkasakit ni Judy ug human sa iyang kamatayon, si Jehova naghupay kanamo pinaagi sa iyang Pulong, sa iyang balaang espiritu, ug sa mga igsoon. Kami napalig-on usab pinaagi sa magasing Bantayanang Torre nga among nadawat human sa trahedya. Kadto adunay artikulo nga naghisgot bahin sa personal nga mga pagsulay, lakip na sa pagbangotan, ug nagpakita kon sa unsang paagi ang mga pagsulay makatabang kanamo sa pag-ugmad sa diyosnong mga hiyas, sama sa pagkamainantoson, pagtuo, ug integridad. b—Santiago 1:2-4.

Human sa kamatayon ni Judy, ako nasuod pag-ayo sa akong mga anak. Apan moangkon ko nga lisod abagahon ang papel sa amahan ug inahan. Apan gipasayon kini sa akong duha ka buotang anak.

Pagminyo Pag-usab ug Usa ka Mas Dako nga Pamilya

Sa ngadtongadto, nagminyo ko pag-usab. Ang akong bag-ong asawa, si Mary, ug ako managsama sa daghang paagi. Siya nawad-an usab ug kapikas tungod sa Hodgkin’s disease. Siya usab adunay duha ka anak babaye—si Colleen ug Jennifer. Si Colleen manghod ni Petina ug tulo ka tuig. Busa nianang tungora ang among pamilya gilangkoban na ug upat ka babaye nga nag-edad ug 14, 12, 9, ug 7 anyos.

Midesisyon mi ni Mary nga mag-iyahay una kamig disiplina sa among mga anak hangtod madawat na nila ang among pagdisiplina ingong amaama o inaina. Sa among relasyon ingong magtiayon, kami ni Mary adunay duha ka hinungdanong lagda. Una, dili mi maglalis atubangan sa mga bata, ug ikaduha, kaharmonya sa prinsipyo sa Bibliya nga nasulat sa Efeso 4:26, among estoryahan ang problema hangtod masulbad kini —bisag mogugol kinig daghang oras!

Katingalahan kaayo nga dali rang nakapasibo ang matag usa sa pagkinabuhi ingong pamilya nga may humabdos, apan wala dayon namo malimti ang pagkawala sa among minahal sa kinabuhi. Pananglitan, ang Lunes sa gabii nahimong “tinghilak” ni Mary. Human sa pagtuon sa among pamilya, sa dihang matulog na ang mga bata, sagad nga ipahungaw ni Mary ang iyang giluom nga mga pagbati.

Gusto ni Mary nga makabaton kamig kaugalingong anak. Ikasubo, nakuhaan siya. Sa dihang nagsabak na usab si Mary, dunay dakong sorpresa nga naghulat kanamo. Gipakita sa ultrasound nga ang iyang gisabak, dili kay usa ra, kondili upat ka bata! Nakuratan ko. Hunahunaa ra, 47 anyos na ako ug karon mahimo nang walo ang akong anak! Ang quadruplet natawo nga sesaryan  niadtong Pebrero 14, 1982, human gisabak sa 32 ka semana. Sumala sa pagkasunodsunod, sila mao si Clint, 1.6 kilos; si Cindy, 1.9 kilos; si Jeremy, 1.4 kilos; ug si Danette, 1.7 kilos. Wala kanilay managsama ug hitsura.

Pagkahuman gayod sa pagpanganak, ang doktor ni Mary miduol kanako ug milingkod tupad nako.

“Nabalaka ka ba kon unsaon nimo pagbuhi ang mga bata?” siya nangutana.

Ako miingon, “Aw, wala pa man god ko kaagi niini sukad.”

Ang sunod niyang gisulti nakapakurat ug nakadasig kanako.

“Dili ka pasagdan sa inyong kongregasyon,” siya miingon. “Bisag moatsi lang ka, usa ka libong panyo ang itanyag kanimo!”

Mapasalamaton akog dako niining hanas nga obstetrisyan ug sa iyang medikal nga tem kay ang upat ka himsog nga mga masuso nakagawas sa ospital sulod lang sa duha ka bulan.

Ang Kalisod sa Pagmatuto sa Quadruplet

Aron mamentinar ang kahusay, naghimo kami ni Mary ug 24-oras nga eskedyul. Ang upat ka dagko nang mga anak mitabang sa pag-atiman sa mga bata. Ug ang gipamulong sa doktor husto gayod—igo lang kong ‘miatsi’ ug ang kongregasyon mitabang dayon kanamo. Sayosayo pa, ang dugay na nakong higala nga si John MacArthur nag-organisar ug mga Saksi nga artesano aron padak-an ang among balay. Pag-abot sa mga bata, usa ka grupo sa mga sister ang mitabang sa pag-atiman. Kining tanang buhat sa kalulot maoy pagpasundayag sa Kristohanong gugma.—1 Juan 3:18.

Sa usa ka paagi, ang quadruplet maoy “mga anak sa kongregasyon.” Bisan karon, ilang giisip nga pamilya ang daghang mahigugmaong mga igsoon nga mitabang kanamo. Kon bahin kang Mary, siya usa ka maayo kaayong asawa ug inahan nga dili mahakogong nag-atiman sa iyang mga anak. Iya gayong gipadapat ang iyang nakat-onan gikan sa Pulong sa Diyos ug sa organisasyon. Wala nay laing makahatag ug mas maayong tambag!—Salmo 1:2, 3; Mateo 24:45.

Ang Kristohanong mga tigom ug ang pagsangyaw nga buluhaton nagpabiling hinungdanong bahin sa among senemanang rutina, bisag lisod ang pag-atiman sa upat ka gagmayng bata. Usa ka panalangin nianang panahona ang pagtuon sa Bibliya nga among gidumala uban sa duha ka magtiayon, nga malulotong moanhi sa among balay alang sa panagtuon. Bisag nakapasayon kini kanamo, si Mary usahay kapoyon kaayo nga magduka siya panahon sa pagtuon samtang nagkugos ug nahikatulog nga bata. Sa ngadtongadto, ang duha ka magtiayon nahimong among espirituwal nga igsoon.

Espirituwal nga Pagbansay sa Linghod nga Pangedaron

Bisan sa dili pa makalakaw ang mga bata, dad-on na namo sila sa pagsangyaw. Sa makalakaw na sila, magdala mi ni Mary ug tagduha ka bata ug wala sila makapabug-at kanamo. Sa pagkatinuod, subsob nga dali rang makasugod ug kabildohay uban sa mahigalaong mga tagbalay tungod kanila. Usa ka adlaw niana nahimamat nako ang usa ka tawo nga nangangkon nga kon matawo kono ka tunong sa usa ka simbolo sa astrolohiya sa usa ka partikular nga adlaw, ang imong personalidad mahisubay sa usa ka dalan. Wala ako makiglantugi kaniya, apan gisukna nako siya kon mahimo ba kong mobalik pagkataudtaod. Miuyon siya, busa mibalik ako dala ang quadruplet. Samtang nagtan-aw siya nga nahingangha, ako silang gilinya nga sunodsunod sumala sa pagkatawo. Miresulta kadtog mahigalaong panag-estoryahay, dili lang bahin sa makitang kalainan sa ilang panagway, kondili sa dagko usab nga mga kalainan sa ilang personalidad, nga nagpanghimakak sa iyang pangagpas. “Kataw-anan nga akong gisulti kanimo kining akong pangagpas,” siya miingon. “Kinahanglan pa nako kining tun-an ug dugang, dili ba?”

 Sa midagko-dagko na, dili sila gustong dunganon pagdisiplina sa dihang makahimog sayop, busa amo silang tul-iron nga tagsa-tagsa. Bisan pa niana, sila nakakat-on nga parehas ra ang mga lagda nga ilang pagasundon. Sa dihang sila mag-atubang ug suliran sa eskuylahan maylabot sa tanlag, sila lig-ong mobarog dapig sa mga prinsipyo sa Bibliya ug mopaluyo sa usag usa, ug si Cindy maoy ilang tigpamaba. Sa wala madugay, ang mga tawo nakamatikod nga lig-on gayod ang upat ka bata!

Nasinati namo ni Mary ang komon nga mga suliran sa pagtabang sa among mga anak nga magmaunongon kang Jehova panahon sa ilang pagkatin-edyer. Mas lisod pa gayod unta kadto kon wala pa ang mahigugmaong tabang sa kongregasyon ug ang abundang espirituwal nga pagkaon nga among nadawat gikan sa makitang bahin sa organisasyon ni Jehova. Kami naningkamot nga makabatog regular nga pagtuon sa Bibliya ingong pamilya ug magpabiling bukas ang linya sa komunikasyon, bisag dili kanunay sayon ang pagbuhat niini. Bisan pa niana, ang paningkamot takos gayod kay ang among walo ka anak mipili sa pag-alagad kang Jehova.

Pagsagubang sa Pagkatigulang

Sa daghang katuigan, ako nakapahimulos sa daghang espirituwal nga mga pribilehiyo: ansiyano sa kongregasyon, magtatan-aw sa siyudad, ug kapuling magtatan-aw sa sirkito. Ako nakaalagad usab ingong membro sa lokal nga Hospital Liaison Committee, nga ang buluhaton mao ang pagtabang sa mga doktor nga mokooperar sa Saksi nga mga pasyente sa dihang mahimong isyu ang pag-abono ug dugo. Sa 34 ka tuig, ako nakapribilehiyo usab ingong mangangasal. Ako nakadumalag 350 ka seremonyas sa kasal, lakip na sa akong unom ka anak nga babaye.

Ako kanunayng nagpasalamat kang Jehova sa maunongong pagpaluyo nga akong nadawat, una gikan kang Judy ug karon kang Mary. (Proverbio 31:10, 30) Samtang nagpaluyo kanako sa akong buluhaton ingong ansiyano sa kongregasyon, sila usab naghatag ug maayong panig-ingnan diha sa ministeryo ug mitabang sa pagsilsil sa espirituwal nga mga hiyas ngadto sa among mga anak.

Sa 1996, ako gidayagnos nga dunay sakit sa utok nga maoy hinungdan nga mangurog ang akong mga kamot ug maglisod ako sa pagpanimbang. Busa, dili na ako makapamintal ug mga karatula. Apan, ako nakakaplag gihapon ug dakong kalipay sa pag-alagad kang Jehova, bisag dili na sama ka abtik kaniadto. Ang kaayohan mao, ako nahimong mas mabination sa ubang mga tigulang.

Sa dihang mamalandong ako sa akong kinabuhi, ako mapasalamaton kang Jehova nga siya kanunayng andam sa pagtabang kanako ug sa akong pamilya aron masagubang nga malipayon ang daghang mga suliran. (Isaias 41:10) Kami ni Mary, uban sa among walo ka anak, mapasalamaton usab sa kahibulongan, mapaluyohong pamilya sa espirituwal nga mga igsoon. Ang tanan nagpakita sa ilang gugma nga labaw pa kay sa among mabatbat.—Juan 13:34, 35.

[Mga footnote]

[Hulagway sa panid 12]

Uban kang Mama, sa akong magulang nga lalaki ug babaye nga si Garth ug Dawn, nga andam na sa pagbiyahe paingon sa kombensiyon sa Sydney sa 1941

[Hulagway sa panid 13]

Uban kang Judy ug sa among batang gamay nga si Kim sa nag-alagad pa ako sa sirkito sa Queensland

[Hulagway sa panid 15]

Human sa pagkatawo sa quadruplet, ang among upat ka dagko nang mga anak nga babaye ug ang kongregasyon mitabang dayon kanamo