Hudiyohanong Seremonyal nga Pagkaligo—Sinugdanan ba sa Bawtismo?

SI Juan Bawtista nagsangyaw ug “bawtismo nga simbolo sa paghinulsol.” Si Jesus usab nagsugo sa iyang mga sumusunod sa paghimog mga tinun-an ug sa pagbawtismo kanila.—Marcos 1:4; Mateo 28:19.

Gipakita sa Bibliya nga ang Kristohanong bawtismo nagbaod ug bug-os nga paglusbog sa tubig. Ang basahong Jesus and His World nag-ingon: “Ang susamang mga seremonya makita usab sa daghang relihiyon, kaniadto ug karon, latas sa daghang nasod ug mga kultura.” Ang maong basahon nagpakita nga “ang gigikanan sa Kristohanong bawtismo . . . makaplagan sa Judaismo.” Unsa ka makataronganon kining maong pangangkon?

Hudiyohanong Seremonyal nga Kaligoanan

Ang mga arkeologo nga nangubkob duol sa Bantawan sa Templo sa Jerusalem nakadiskobreg halos 100 ka seremonyal nga mga kaligoanan, nga gibuhat pa sa unang siglo W.K.P. ug sa unang siglo K.P. Ang usa ka sinulat diha sa sinagoga gikan sa ikaduha o ikatulong siglo K.P. naghisgot nga ang maong mga kaligoanan gitagana alang sa “mga bisita nga nagkinahanglan niini.” Ang ubang mga kaligoanan nakaplagan sa seksiyon sa Jerusalem nga gipuy-an sa mga adunahan ug saserdotehanong mga pamilya; halos matag balay adunay pribadong seremonyal nga kaligoanan.

Kini nga mga kaligoanan maoy rektanggulo nga mga tangke nga gisapsap gikan sa bato o gikalot sa yuta ug gipaylan ug mga tisa o bato. Gipalitadahan kini aron walay mga liki. Ang kadaghanan adunay sukod nga mga 1.8 por 2.7 metros. Ang mga kanal maoy giagosan sa tubig sa ulan padulong sa maong mga ligoanan. Labing menos 1.2 metros ang giladmon sa tubig aron bug-os nga ikalusbog ang tawo pinaagi sa pagtikubo. Ang mga ang-ang nga palugsong sa tubig usahay giulang pinaagig mubo nga partisyon. Gituohan nga ang usa ka bahin sa mga ang-ang gigamit ingong entrada ngadto sa ligoanan sa pagputli, sa dihang hugaw pa ang naligo, ug ang pikas bahin maoy gawasanan aron dili na siya mahugawan.

Ang mga ligoanan gigamit maylabot sa Hudiyohanong seremonyal nga pagputli. Unsay gipasabot niini?

 Ang Balaod ug Tradisyon sa Pagkaligo

Ang Moisesnong Balaod nagpasiugda sa panginahanglan nga ang katawhan sa Diyos kinahanglang magmahinlo, sa espirituwal ug sa pisikal. Nahugawan ang mga Israelinhon sa daghang paagi mao nga kinahanglang magpaputli sila pinaagi sa pagligo sa ilang mga lawas ug paglaba sa ilang mga besti.—Levitico 11:28; 14:1-9; 15:1-31; Deuteronomio 23:10, 11.

Si Jehova nga Diyos maoy bug-os putli ug balaan. Busa ang mga saserdote ug mga Levihanon gibaoran, nga may silot nga kamatayon kon dili sila manghugas sa ilang mga kamot ug tiil sa dihang moduol sila sa iyang halaran.—Exodo 30:17-21.

Ang mga iskolar nagtuo nga sa pagkaunang siglo K.P., ang Hudiyohanong relihiyon nagpatuman sa mga kinahanglanon sa saserdotehanong pagkahinlo ngadto sa mga dili Levihanon. Ang mga Essene ug mga Pariseo nagbatasan sa makanunayong seremonyal nga pagkaligo. Usa ka reperensiya nagtaho bahin sa panahon ni Jesus: “Ang seremonyal nga kaputli gibaod sa usa ka Hudiyo sa dili pa siya mosulod sa Bantawan sa Templo, sa dili pa maghalad, sa dili pa madawat ang kaayohan sa usa ka saserdotehanong halad ug sa uban pang mga katuyoan.” Ang mga sinulat sa Talmud nag-ingon nga ang mga maligo gidahom nga molusbog sa bug-os.

Gisaway ni Jesus ang mga Pariseo sa ilang pagpamugos sa seremonyal nga pagpanghinlo. Dayag nga sila naghimog “nagkadaiyang mga bawtismo,” lakip na ang pagbawtismo sa “mga kopa ug sa mga pitsil ug sa tumbagang mga sudlanan.” Si Jesus miingon nga ang mga Pariseo naglapas sa mga sugo sa Diyos sa pagpatuman sa ilang mga tradisyon. (Hebreohanon 9:10; Marcos 7:1-9; Levitico 11:32, 33; Lucas 11:38-42) Walay bahin sa Moisesnong Balaod ang nagsugo ug bug-os nga paglusbog sa lawas.

Nagsugod ba ang Kristohanong bawtismo diha sa seremonyal nga pagkaligo nga gihimo sa mga Hudiyo? Wala!

Seremonyal nga Pagkaligo ug ang Kristohanong Bawtismo

Ang mga Hudiyo mismo ang naghimog seremonyal nga pagpanghinlo. Apan, ang bawtismo nga gihimo ni Juan dili parehas sa seremonyal nga pagkaligo nga naandan sa mga Hudiyo. Nga si Juan nailhan ingon nga Tigbawtismo nagpaila lamang nga lahi ang paglusbog nga iyang gihimo. Ang Hudiyohanong relihiyosong mga lider nagpadala pa gani ug mga tawo ngadto kaniya aron mangutana: “Nganong namawtismo ka man?”—Juan 1:25.

Ang pagpanghinlo nga gisugo sa Moisesnong Balaod kinahanglang usbon kon mahugawan na usab ang usa ka magsisimba. Dili ingon niana ang bawtismo nga gihimo ni Juan ni ang gihimo sa ulahi sa mga Kristohanon. Ang bawtismo ni Juan nagpaila sa paghinulsol ug pagsalikway sa kanhing paagi sa kinabuhi. Ang Kristohanong bawtismo nagsimblo sa kamatuoran nga ang usa ka tawo nagdedikar na sa iyang kaugalingon ngadto sa Diyos. Ang mga Kristohanon maghimo niana sa makausa, dili balikbalik.

Ang seremonyal nga pagkaligo nga gihimo sa mga puy-anan sa Hudiyohanong mga saserdote ug sa publikong mga kaligoanan duol sa Bantawan sa Templo nagpakita lamang ug diyutayng kasamahan sa Kristohanong bawtismo. Managlahi kaayo ang mga kahulogan niining duha ka paglusbog. Ang The Anchor Bible Dictionary nag-ingon: “Nagkauyon ang mga iskolar nga si Juan [Bawtista] wala mosapaw o modawat sa bisan unsang bawtismo gikan sa iyang palibot,” nga mao, gikan sa Judaismo. Ingon usab niana ang ikaingon bahin sa bawtismo nga gihimo sa Kristohanong kongregasyon.

Ang Kristohanong bawtismo naghawas sa “paghangyo sa Diyos alang sa usa ka maayong tanlag.” (1 Pedro 3:21) Kini nagsimbolo nga ang usa ka tawo bug-os nang nadedikar kang Jehova sa pag-alagad Kaniya ingon nga tinun-an sa Iyang Anak. Ang bug-os nga paglusbog sa tubig maoy tukmang simbolo sa maong dedikasyon. Ang paglusbog sa usa ka tawo nagsimbolo sa pagkamatay sa iyang kanhing paagi sa kinabuhi. Ang iyang paghaw-as gikan sa tubig nagsimbolo sa iyang pagkabuhi aron sa pagbuhat sa kabubut-on sa Diyos.

Si Jehova nga Diyos mohatag ug maayong tanlag niadtong mohimo sa maong dedikasyon ug nabawtismohan. Ang inspiradong apostol nga si Pedro sa ingon nakasulti sa iyang mga isigkamagtutuo: “[Ang bawtismo] karon nagaluwas usab kaninyo.” Butang kana nga dili gayod mahimo sa Hudiyohanong seremonyal nga pagkaligo.