Pagpangitag Espirituwal nga mga Bahandi sa Guinea

SA DAGHANG siglo, gipameligro sa mga eksplorador ang ilang kinabuhi aron sa pagpangitag natagong mga bahandi. Ang way-kokahadlok nga mga eksplorador nga nakaabot sa Guinea, sa Kasadpang Aprika, nakakaplag ug duha ka magkalahi kaayo nga matang sa bahandi—materyal ug espirituwal. Ang yuta, nga daghan kaayog mga diamante, bulawan, puthawng mineral, ug dekalidad nga bauxite (nga maoy gikuhaan sa aluminum), adunay populasyon nga kapin sa siyam ka milyon.

Bisan tuod ang mga relihiyon sa Kakristiyanohan dili mao ang kinadaghanan sa nasod, ang pagsimba mahinungdanon, ug daghan ang mapabilhon kaayo sa espirituwal nga mga bahandi. Unsa ba gayod kining mga bahandia? Kini mao ang matinumanong mga alagad ni Jehova, nga gihubit sa Haggeo 2:7 ingong “ang tilinguhaong mga butang sa tanang kanasoran.”

Espirituwal nga mga Bahandi

Ang pagkubkob ngadto sa ilalom sa yuta aron sa pagpangitag natagong mga bahandi nagkinahanglag dakong paningkamot. Sa susama, diha sa Kristohanong ministeryo, gikinahanglan ang tim-os nga paningkamot aron makaplagan ang espirituwal nga mga bahandi. Sa Guinea, ang pagsangyaw sa Gingharian nagsugod sa interyor nga bahin sa nasod sa unang katuigan sa 1950 apan wala makaabot sa kaulohan, sa Conakry, hangtod sa unang katuigan sa 1960. Karon, aduna nay mga 900 ka Saksi ni Jehova diha sa 21 ka kongregasyon ug mga grupo sa tibuok nasod.

Ang mga misyonaryo nangabot niadtong 1987 ug nagsangyaw duyog sa bugtong kongregasyon sa Conakry. Karon duna nay kapin sa 20 ka misyonaryo diha sa kaulohan ug sa kabaryohan. Sila masibotong  nagpalig-on sa mga kongregasyon ug nakig-uban sa mga igsoon sa ministeryo.

Si Luc, nga nagpuyo sa Conakry, nalipay kaayo samtang iyang gitun-an ang Bibliya uban kang Albert, usa ka batan-ong doktor. Si Albert nangitag relihiyosong kamatuoran diha sa nagkalainlaing mga simbahan, ug siya nalangkit sa espiritismo. Nagsingsing pa gani siyag hinatag sa usa ka espiritista nga nagpasalig kaniya nga kini makahatag kaniyag suwerte. Human sa dakong kahigawad sa iyang pagpangita sa tinuod nga relihiyon, gilabay ni Albert ang iyang singsing ug miampo: “Diyos ko, kon naglungtad ka man, tugoti akong makaila ug makaalagad kanimo. Kay kon dili, magkinabuhi lang ako sumala sa kaugalingon kong mga tinguha.” Wala madugay human niana, giduaw ni Albert ang iyang magulang nga babaye ug nadunggan niya ang usa ka Saksi ni Jehova nga nagdumalag pagtuon sa Bibliya uban sa iyang pag-umangkong babaye. Wala madugay ilang gihikay nga si Luc maoy magdumalag pagtuon sa Bibliya uban kaniya.

Kada semana, si Luc malipayong molakaw ug kapin sa napulo ka kilometro ida buwelta aron sa pagdumala sa maong pagtuon. Bisan tuod mubo rag grado si Luc, nakadayeg kaayo si Albert, nga usa ka graduwado sa unibersidad, sa lig-ong pagtuo ni Luc sa Kasulatan ug sa iyang praktikal nga pagpadapat sa kahibalo bahin sa Bibliya. Nalipay kaayo si Albert sa pagkasayod nga ang pag-antos sa mga tawo dili pagbuot sa Diyos, kondili katuyoan hinuon ni Jehova nga taposon ang tanang pag-antos ug himoong paraiso kining yutaa. (Salmo 37:9-11) Ang mga kamatuoran sa Bibliya uban sa maayong panggawi nga iyang namatikdan taliwala sa mga membro sa kongregasyon nakatandog sa kasingkasing ni Albert.

Apan, maingon nga ang kinaiyanhong diamante kinahanglang tabason pag-ayo sa batid nga artisano aron mosinaw, kinahanglang tangtangon usab ni Albert ang daghang dili-maayong mga kinaiya nga kinalibotanon aron iyang ikapahiuyon ang iyang kinabuhi sa matarong nga mga sukdanan sa Diyos. Mihunong na siya sa pagkonsulta sa mga espiritista, pag-abuso sa makahubog nga ilimnon, ug pagpanugal. Mas nalisdan si Albert sa paghunong sa pagpanabako. Sa dihang sa kataposan siya hugot nga miampo kang Jehova alang sa tabang, siya milampos. Unom ka bulan sa ulahi, iyang gipalegal ang iyang kaminyoon. Ang iyang asawa nagtuon  na pod sa Bibliya. Karon silang duha bawtismado nang mga alagad ni Jehova.

Si Martin maoy lain pang espirituwal nga diamante. Misugod siya sa pagtuon sa Bibliya didto sa Guéckédou sa dihang 15 anyos pa siya. Misupak ang iyang Katolikong mga ginikanan sa iyang pagtambong sa mga tigom sa mga Saksi ni Jehova. Ilang gisunog ang literatura sa Bibliya ni Martin, gibunalan, ug gipalayas siya sa ilang balay. Maingon nga maporma ang usa ka diamante sa dihang ang karbon ipailalom sa grabeng kainit, milig-on usab ang gugma ni Martin alang sa kamatuoran sa Bibliya tungod sa maong pagsupak. Sa ngadtongadto, nalukmay ang kasingkasing sa iyang mga ginikanan, ug siya mipauli sa ilang balay. Unsay nakapausab sa tinamdan sa iyang mga ginikanan? Ilang namatikdan ang kalainan sa batasan ni Martin ug sa iyang mga manghod, nga nakaugmad ug rebelyosong tinamdan ug nalangkit sa seksuwal nga imoralidad. Kay nakombinsir nga ang bag-ong tinuohan ni Martin nakaayo kaniya, giabiabi na sa iyang amahan ang mga membro sa kongregasyon diha sa ilang balay. Kadaghan pasalamati sa inahan ni Martin ang mga Saksi sa tanan nilang nahimo sa pagtabang sa ilang anak. Kay bawtismado na sa edad nga 18, sa ulahi si Martin mieskuyla sa Ministerial Training School ug karon nag-alagad na ingong espesyal payunir.

“Imported” nga Espirituwal nga mga Bahandi

Bisan tuod daghang kinaiyanhong mga kahinguhaan ang gibaligya sa Guinea ngadto sa gawas sa nasod, ang pipila sa espirituwal nga mga bahandi niini maoy “imported” o gikan sa gawas sa nasod. Daghang katawhan ang nanglalin gikan sa ubang mga nasod sa Aprika, kasagaran tungod sa kalisod sa panginabuhi. Ang uban nangabot aron makalingkawas sa dugay ug pintas nga mga gubat.

Si Ernestine, nga taga-Cameroon, miabot sa Guinea 12 ka tuig kanhi. Siya nagtuon uban sa mga Saksi ni Jehova ug nagtambong sa mga tigom sulod sa daghang katuigan apan wala pa mabawtismohi. Niadtong 2003, nanglugmaw ang iyang luha sa dihang iyang nakita ang bawtismo sa usa ka sirkitong asembliya sa mga Saksi ni Jehova. Kay nadaog sa mga pagbating sad-an, siya miampo kang Jehova:  “Ako 51 anyos na karon, ug wala pa akoy nahimong maayo alang kanimo. Buot kong moalagad kanimo.” Human niana, si Ernestine milihok uyon sa iyang mapaubsanong pag-ampo. Iyang giingnan ang lalaki nga iyang gikapuyo nga makapadayon lang silang mag-ipon kon legal na silang makasal. Miuyon ang lalaki, ug sa ulahi siya nakahilak sa kalipay sa dihang siya gibawtismohan niadtong Nobyembre 2004.

Sukad sa unang katuigan sa 1990, gidawat sa Guinea ang libolibong mga kagiw gikan sa Liberia ug Sierra Leone, nga naglakip sa ginatos ka alagad ni Jehova. Wala madugay human makaabot sa kampo sa mga kagiw, ang mga igsoon naghikay ug regular nga mga tigom, nag-organisar ug pagsangyaw, ug nagtukod ug Kingdom Hall. Ang pipila ka tawo nahimong mga alagad ni Jehova diha sa kampo sa mga kagiw. Si Isaac maoy usa kanila. Human siya bawtismohi, aduna untay kahigayonan si Isaac nga makabalik sa kanhi niyang trabaho sa usa ka dakong kompaniya sa Liberia. Apan gipalabi niyang magpabilin sa kampo sa mga kagiw sa Lainé ingong usa ka regular payunir. Siya miingon: “Karon dili na ako kinahanglang mananghid pag amo aron motambong sa mga tigom o asembliya. Gawasnon na akong moalagad kang Jehova.” Niadtong Disyembre 2003, usa ka distritong kombensiyon ang gipahigayon dinhi niining nahilit nga kampo alang sa 150 ka Saksi nga nagpuyo taliwala sa 30,000 ka kagiw. Ikalipay nga dunay 591 ang nanambong, nga naglakip sa 9 ka bungol nga nakabenepisyo sa programa pinaagig senyas nga pinulongan. Napulog duha ang nabawtismohan. Mapasalamaton kaayo ang mga igsoon sa mga paningkamot nga gihimo sa pagtaganag espirituwal nga kombira alang kanila.

Ang “Tilinguhaong mga Butang” Naghimog Gikinahanglang mga Kausaban

Walay babag nga daw dako ra kaayo nga dili mabuntog alang niadtong nangitag bulawan ug mga diamante. Apan, makapadasig ang pagkakita sa mga paningkamot sa mga bag-ohan sa pagbuntog sa tanang babag aron makaalagad kang Jehova. Tagda ang kahimtang ni Zainab.

Sa edad nga 13, si Zainab napugos sa pagpaulipon. Gidala siya ngadto sa Guinea gikan sa iyang pinuy-anan sa laing nasod sa Kasadpang Aprika. Sa edad nga 20, iyang nadungog ang mensahe sa Bibliya. Maikagon niyang gipadapat ang iyang nakat-onan.

Nalisdan si Zainab sa pagtambong sa Kristohanong panagkatigom aron sa pagsimba. Apan gipabilhan pag-ayo niya ang mga tigom ug determinadong dili mopalta niana. (Hebreohanon 10:24, 25) Iyang tagoan ang iyang mga libro sa gawas ug iya lang kining kuhaon kon motambong na siya sa mga tigom. Kadaghan siyang gidagmalan pag-ayo sa iyang mga amo konohay tungod sa pagtambong sa mga tigom.

Sa ulahi, nausab ang mga kahimtang ug si Zainab wala na maulipon. Gitambongan dayon niya ang tanang tigom, nga nakatabang kaniya aron kusog nga mouswag sa espirituwal. Wala siya modawat ug dakog-suweldo nga trabaho nga makapugong kaniya sa pagtambong sa mga tigom aron makadawat siya ug Kristohanong mga instruksiyon. Nagpalista siya sa Teokratikanhong Tunghaan sa Ministeryo, nahimong di-bawtismadong magmamantala sa Gingharian, ug sa ulahi gipasimbolohan ang iyang pagpahinungod kang Jehova pinaagig bawtismo sa tubig. Human niana, siya nag-oksilyare payunir dayon. Unom ka bulan sa ulahi, miaplay siya ingong usa ka regular payunir.

Human makatambong ug pipila ka tigom, usa ka interesadong tawo miingon: “Dili ko mobating kabos kon ania ko dinhi.” Bisan tuod daghang tawo ang interesado lamang sa materyal nga mga bahandi sa Guinea, kadtong nahigugma kang Jehova maikagong nangita sa espirituwal nga mga bahandi. Oo, “ang tilinguhaong mga butang sa tanang kanasoran” midangop ngadto sa putling pagsimba ni Jehova karon!

[Kahon sa panid 8]

GUINEA-2005

Kinatas-ang ihap sa mga Saksi: 883

Pagtuon sa Bibliya: 1,710

Mitambong sa Memoryal: 3,255

[Mga mapa sa panid 8]

(Alang sa aktuwal nga pagkahan-ay, tan-awa ang publikasyon)

GUINEA

Conakry

SIERRA LEONE

LIBERIA

[Hulagway sa panid 9]

Si Albert ug Luc

[Hulagway sa panid 9]

Kingdom Hall sa Conakry

[Hulagway sa panid 10]

Si Ernestine

[Hulagway sa panid 10]

Si Martin

[Hulagway sa panid 10]

Si Zainab

[Picture Credit Line sa panid 8]

USAID