Pauswaga ang Kalipay ug Dignidad sa Imong Adlaw sa Kasal

“ANG adlaw sa akong kasal maoy usa sa labing hinungdanon ug malipayon nga mga adlaw sa akong kinabuhi,” miingon si Gordon, nga duolan sa 60 ka tuig nang kasado. Unsay nakapahimo sa adlaw sa kasal nga hinungdanon kaayo alang sa matuod nga mga Kristohanon? Kini maoy adlaw nga sila mohimog sagradong panaad ngadto sa ilang gimahal pag-ayo—sa ilang kapikas ug kang Jehova nga Diyos. (Mateo 22:37; Efeso 5:22-29) Oo, ang mga managtrato nga nagplanong magminyo gustong magmalipayon sa adlaw sa ilang kasal, apan buot usab nilang pasidunggan ang Tagmugna sa kaminyoon.—Genesis 2:18-24; Mateo 19:5, 6.

Sa unsang paagi mapauswag sa pamanhonon ang dignidad niining malipayong okasyon? Unsay mahimo sa pangasaw-onon sa pagpakitag pasidungog sa iyang bana ug kang Jehova? Sa unsang paagi ang uban nga manambong makadugang sa kalipay sa adlaw sa kasal? Ang pagkonsiderar sa pipila ka prinsipyo sa Bibliya motabang sa pagtubag nianang mga pangutanaha, ug ang pagpadapat sa maong mga prinsipyo makapamenos sa mga problema nga posibleng makadaot nianang espesyal nga okasyon.

Kinsa ang Adunay Pangunang Responsibilidad?

Diha sa daghang nasod, ang usa ka ministro sa mga Saksi ni Jehova mahimong awtorisahan sa gobyerno nga mokasal. Bisan diha sa mga dapit diin huwes lamang ang awtorisadong mokasal, buot tingali sa magtiayon nga adunay ihatag nga pakigpulong nga pinasukad sa Bibliya. Sa maong pakigpulong, ang pamanhonon subsob nga hangyoon sa pagpalandong sa hinatag-sa-Diyos nga papel sa ulo sa pamilya. (1 Corinto 11:3) Busa, ang pamanhonon adunay pangunang responsibilidad sa kon unsay mahitabo panahon sa kasal. Siyempre, ang mga kahikayan sa seremonyas sa kasal mismo ug sa bisan unsang salo-salo nga himoon human niana subsob nga abanteng giplano. Nganong malisdan usahay ang pamanhonon sa paghimo niining maong mga kahikayan?

Ang usa ka rason mao nga ang mga paryente sa pangasaw-onon o sa pamanhonon mosulay tingali sa pag-impluwensiya pag-ayo sa mga plano sa kasal. Si Rodolfo, kinsa daghan nag nakasal, miingon: “Usahay, ang pamanhonon pit-oson pag-ayo sa mga paryente, ilabina kon sila motabang sa paggasto sa salo-salo sa kasal. Tingali duna silay hugot nga mga opinyon bahin sa kon unsay angayng mahitabo panahon sa seremonyas ug sa salo-salo sa kasal. Mahimong makapahuyang kini sa Kasulatanhong papel sa pamanhonon ingong usa nga adunay pangunang responsibilidad sa maong okasyon.”

Si Max, nga kapin sa 35 ka tuig nang mangangasal, miingon: “Akong namatikdan nga kasagaran ang pangasaw-onon maoy nanguna sa pagdesisyon kon unsay mahitabo panahon sa kasal ug sa salo-salo, nga ang pamanhonon wala kaayoy kahigayonan nga mohatag sa iyang opinyon.” Si David, nga daghan na usab ug nakasal, mikomento: “Ang mga pamanhonon wala tingali maanad sa pagpanguna ug kasagarang wala kaayo malangkit sa mga preparasyon sa kasal.” Sa unsang paagi ang pamanhonon epektibong makapas-an sa iyang responsibilidad?

Ang Komunikasyon Makapauswag sa Kalipay

Aron magmalamposon ang pamanhonon sa pagtuman sa iyang responsibilidad alang sa preparasyon sa kasal, kinahanglang makigsulti siya sa epektibong paagi. Ang Bibliya klarong nag-ingon: “Mapakyas ang mga plano kon walay  kompidensiyal nga panagsultihanay.” (Proverbio 15:22) Apan, malikayan ang dakong kahigawad kon ang pamanhonon maghisgot una sa mga preparasyon sa kasal uban sa pangasaw-onon, mga membro sa pamilya, ug sa uban pa nga makahatag ug maayo, binase-sa-Bibliya nga tambag.

Oo, hinungdanon nga hisgotan una sa kaslonon ang ilang mga plano ug mga posibilidad. Ngano? Aw, pamati sa pipila ka komento gikan kang Ivan ug sa iyang asawa nga si Delwyn, kinsa malipayon sa ilang kaminyoon sulod na sa daghang katuigan apan naggikan sa lainlaing kultura. Sa paghinumdom sa ilang mga plano sa kasal, si Ivan miingon: “Ako may tino nang ideya kon unsay akong gusto sa akong kasal, lakip na ang salo-salo nga tambongan sa tanan nakong mga higala, keyk, ug ang akong pangasaw-onon magsul-ob ug puti nga boda. Si Delwyn, sa laing bahin, gusto ug gamay, yano nga kasal nga walay keyk. Naghunahuna gani siya nga magsul-ob ug ordinaryo lamang nga sinina.”

Sa unsang paagi nasulbad niining magtiayona ang kalainan sa ilang opinyon? Pinaagi sa maluloton, matinud-anon nga komunikasyon. (Proverbio 12:18) Si Ivan midugang: “Among gitun-an ang binase-sa-Bibliya nga mga artikulo bahin sa mga kasal, sama nianang gipatik diha sa Ang Bantayanang Torre sa Oktubre 15, 1984. a Kining artikuloha nakatabang kanamo sa pagbaton ug espirituwal nga panglantaw sa maong okasyon. Tungod sa among lainlaing kagikan, kinahanglang ipasibo namo ang among personal nga kagustohan diha sa pipila ka bahin.”

Si Aret ug Penny naghimo usab niana. Mahitungod sa adlaw sa ilang kasal, si Aret miingon: “Si Penny ug ako naghisgot sa lainlain namong mga gusto alang sa kasal, ug nagkasabot ra kami. Kami nag-ampo nga panalanginan ni Jehova kanang adlawa. Nangayo usab ako ug tambag gikan sa among mga ginikanan ug sa ubang hamtong nga mga magtiayon sa kongregasyon. Ang ilang mga sugyot nakatabang kaayo. Tungod niini, makalilipay kaayo ang among kasal.”

Paghupot ug Dignidad Diha sa Pamesti ug Panghindik

Masabtan nga ang pangasaw-onon ug pamanhonon buot nga maayo silag pamesti sa ilang kasal. (Salmo 45:8-15) Tingali mogasto silag panahon, kusog, ug salapi alang sa haom nga besti. Unsang mga prinsipyo sa Bibliya ang makatabang kanila sa pagpilig besti nga dungganon ug maanindot?

Tagda kon unsay isul-ob sa pangasaw-onon sa maong okasyon. Bisan tuod dili managsamag gusto nga estilo ang lainlaing tawo sa lainlaing nasod, ang tambag sa Bibliya mapadapat bisan asa. Ang mga babaye giawhag nga “magdayandayan sa ilang kaugalingon sa mahapsay nga sinina, uban ang pagkamakasaranganon ug maayong panghunahuna.” Kana mapadapat sa Kristohanong mga babaye sa tanang panahon, ug tinong naglakip kana sa  adlaw sa kasal. Ang tinuod mao nga ang malipayong kasal wala magkinahanglan ug “mahalon kaayong sapot.” (1 Timoteo 2:9; 1 Pedro 3:3, 4) Pagkamakalilipay kon ipadapat kining tambaga!

Si David, nga gihisgotan ganina, nagkomento: “Kadaghanan sa mga magtiayon naningkamot sa pagsunod sa mga prinsipyo sa Bibliya, ug sila takos dayegon. Apan, may mga kahimtang diin ang mga boda sa mga pangasaw-onon ug sa mga abay dili makasaranganon, nga lawom kaayog liab o sihag.” Sa iyang pagpakigsulti sa pangasaw-onon ug pamanhonon una pa ang kasal, ang usa ka hamtong nga Kristohanong ansiyano motabang kanila sa paghupot ug espirituwal nga panglantaw. Sa unsang paagi? Pinaagi sa pagpangutana kanila kon ang besti nga ilang gihunahunang isul-ob makasaranganon ba nga mahimo kining isul-ob sa Kristohanong panagkatigom. Tinuod, ang estilo sa besti lahi tingali sa naandang isul-ob sa tigom, ug ang isul-ob sa kasal mahimong magbanaag sa lokal nga kostumbre, apan ang sukod sa pagkamakasaranganon niini kinahanglang nahiuyon sa dungganon nga Kristohanong mga sukdanan. Bisan pag ang pipila diha sa kalibotan maghunahuna tingali nga mapig-oton ang moral nga sukdanan sa Bibliya, ang matuod nga mga Kristohanon andam nga makigbisog sa mga paningkamot sa kalibotan sa pag-impluwensiya kanila.—Roma 12:2; 1 Pedro 4:4.

“Imbes isipon ang mga besti o ang salo-salo ingong labing hinungdanon,” matod ni Penny, “si Aret ug ako nagsentro sa among pagtagad diha sa seremonyas sa kasal, ang espirituwal nga bahin sa maong okasyon. Mao kana ang labing hinungdanong bahin sa adlaw. Ang espesyal nga mga butang nga akong nahinumdoman, dili ang akong gisul-ob o gikaon, kondili kon kinsay akong nakauban nianang panahona ug ang kalipay nga akong gibati sa pagpakigminyo sa lalaki nga akong gihigugma.” Maayong hinumdoman kana sa Kristohanong kaslonon samtang nagplano sila sa ilang kasal.

Ang Kingdom Hall—Usa ka Dungganong Dapit

Daghang Kristohanong kaslonon ang nagtinguha nga himoon ang seremonyas sa ilang kasal diha sa Kingdom Hall kon kini puwedeng gamiton. Nganong mas gusto man nila kini? Usa ka kaslonon ang nagpatin-aw sa ilang rason: “Nahibalo kami nga ang kaminyoon maoy sagradong kahikayan ni Jehova. Ang pagpakasal diha sa Kingdom Hall, ang atong dapit sa pagsimba, makatabang sa pagtisok diha kanamo sukad gayod sa sinugdan nga si Jehova kinahanglang mahimong bahin sa among kaminyoon. Ang laing kaayohan sa paghimo sa seremonyas sa kasal diha sa Kingdom Hall imbes didto sa laing dapit mao nga ipakita niini sa among dili-magtutuong mga paryente nga manambong sa kasal kon unsa ka hinungdanon ang pagsimba kang Jehova alang kanamo.”

Kon ang mga ansiyano sa kongregasyon nga naggamit sa maong Kingdom Hall motugot nga himoon didto ang kasal, ang kaslonon kinahanglang magpahibalong daan kanila sa mga preparasyon nga ilang giplano. Ang usa ka paagi diin ang pangasaw-onon ug ang pamanhonon makapakita ug angayang pagtahod sa mga dinapit sa kasal mao ang pagseguro nila nga sila moabot sa oras nga gitakda alang sa kasal. Ug tinoon gayod nila nga ang tanan himoon sa dungganong paagi. b (1 Corinto 14:40) Sa ingon ilang malikayan ang mga paghinobra nga maoy timailhan sa daghang kasal sa kalibotan.—1 Juan 2:15, 16.

Kadtong motambong sa kasal makapakita usab nga ilang nabatonan ang panglantaw ni Jehova sa kaminyoon. Pananglitan, dili nila dahomon nga ang kasal molabaw sa ubang Kristohanong mga kasal, nga daw may pag-indigay kon kang kinsang kasal ang mas maluho. Ang hamtong nga mga Kristohanon nahibalo usab nga ang pag-adto sa Kingdom Hall aron sa pagpamati sa binase-sa-Bibliya nga pakigpulong maoy mas hinungdanon ug mapuslanon kay sa pag-adto sa kombira o salo-salo nga lagmit himoon human niana. Kon tungod sa panahon o sirkumstansiya usa lang niana ang mahimong tambongan sa usa ka Kristohanon, tinong ang pag-adto sa Kingdom Hall ang angayng pilion. Ang usa ka ansiyano nga ginganlag William miingon: “Kon ang mga bisita sa walay  katarongan wala didto sa Kingdom Hall apan presente sa salo-salo, kini nagpakitag kakulang ug apresasyon sa pagkasagrado sa maong okasyon. Bisan pag wala kita dapita ngadto sa salo-salo, ikapakita nato ang atong pagpaluyo sa pangasaw-onon ug sa pamanhonon ug ikahatag nato ang maayong pagpamatuod ngadto sa dili-magtutuo nga mga paryente nga nanambong sa kasal pinaagi sa pagtambong sa seremonyas diha sa Kingdom Hall.”

Kalipay nga Molungtad Saylo sa Adlaw sa Kasal

Ang komersiyo naghimo sa selebrasyon sa kasal nga usa ka dakong negosyo. Sumala sa usa ka di pa dugayng taho, ang kasarangang kasal sa Tinipong Bansa “mokostar ug $22,000, o katunga sa aberids [tinuig] nga kita sa Amerikanong panimalay.” Kay naimpluwensiyahan sa komersiyal nga propaganda, daghang bag-ong kasal o ang ilang pamilya ang nagbaguod sa utang tungod nianang usa lang ka adlaw, nga ilang bayran sulod sa daghang katuigan. Maalamon ba kanang paagiha sa pagsugod sa kaminyoon? Kadtong wala mahibalo o wala magtagad sa mga prinsipyo sa Bibliya mogasto tingali ug dako bisag dili nila maabot, apan pagkalahi sa kahimtang taliwala sa matuod nga mga Kristohanon!

Pinaagi sa paglimite sa gidak-on sa ilang kasal, kanang makataronganon ug maabot sa badyet ug pinaagi sa pagsentro sa pagtagad diha sa espirituwal nga bahin sa maong okasyon, daghang Kristohanong magtiayon ang nakagamit sa ilang panahon ug kahinguhaan subay sa ilang pagpahinungod sa Diyos. (Mateo 6:33) Tagda ang pananglitan ni Lloyd ug Alexandra, kinsa nagpadayon diha sa bug-os-panahong ministeryo sulod sa 17 ka tuig sukad sa ilang pagminyo. Mikomento si Lloyd: “Ang uban nag-isip tingali sa among kasal ingong yano lamang nga okasyon, apan si Alexandra ug ako nalipay kaayo. Among gibati nga ang adlaw sa among kasal angay nga mahimong selebrasyon sa kahikayan ni Jehova sa paghatag ug dakong kalipay sa duha ka tawo, dili usa ka pinansiyal nga palas-anon.”

Midugang si Alexandra: “Ako nagpayunir sa wala pa kami maminyo, ug dili nako gustong moundang niining pribilehiyoa aron lang makabaton ug maluho nga kasal. Ang adlaw sa among kasal maoy espesyal kaayo nga okasyon. Apan, sinugdanan lamang kini sa among kinabuhi ingong magtiayon. Among gipadapat ang tambag nga dili hatagan ug sobrang pagtagad ang mismong pagpakasal ug kami nangayo sa giya ni Jehova sa among kinabuhi ingong magtiayon. Tungod niini, gipanalanginan gayod kami ni Jehova.” c

Oo, ang adlaw sa imong kasal maoy espesyal nga okasyon. Ang mga tinamdan ug lihok nga makita nianang adlawa mahimong sumbanan sa inyong umaabot ingong magtiayon. Busa, salig kang Jehova alang sa giya. (Proverbio 3:5, 6) Hatagig labawng pagtagad ang espirituwal nga kahulogan nianang adlawa. Paluyohi ang matag usa diha sa inyong hinatag-sa-Diyos nga mga papel. Sa ingon mapahiluna ninyo ang lig-on nga pundasyon sa inyong kaminyoon, ug uban sa panalangin ni Jehova, mabatonan ninyo ang kalipay nga molungtad saylo sa adlaw sa inyong kasal.—Proverbio 18:22.

[Mga footnote]

[Hulagway sa panid 29]

Ang kaslonon kinahanglang prangka apan matinahoron nga mag-estoryahanay samtang nagplano sa ilang kasal

[Hulagway sa panid 31]

Hatagig labawng pagtagad ang espirituwal nga kahulogan sa adlaw sa imong kasal