Nabatonan ba Nimo ang Panglantaw ni Jehova sa Sagradong mga Butang?
Nabatonan ba Nimo ang Panglantaw ni Jehova sa Sagradong mga Butang?
“Maampingong magbantay . . . aron walay makihilawason ni si bisan kinsa nga wala magpabili sa sagradong mga butang.”—HEBREOHANON 12:15, 16.
1. Unsang tinamdan karon ang wala mabatoni sa mga alagad ni Jehova?
ANG kalibotan sa katibuk-an anam-anam nga nawad-ag pagtagad sa sagradong mga butang. Ang Pranses nga sosyologong si Edgar Morin miingon: “Ang tanang pundasyon diin gipasukad ang moralidad—Diyos, kinaiyahan, yutang natawhan, kasaysayan, pangatarongan—nahimo nang kaduhaduhaan. . . . Ang mga tawo mopili ug mohukom kon unsang mga prinsipyoha ang ilang sundon.” Kini nagbanaag sa “espiritu sa kalibotan,” o sa “espiritu nga nagalihok karon diha sa mga anak sa pagkadili-masinugtanon.” (1 Corinto 2:12; Efeso 2:2) Kanang dili-matinahorong espiritu wala mabatoni niadtong nagpahinungod sa ilang kaugalingon kang Jehova ug kinabubut-ong nagpasakop sa iyang katungod ingong soberano. (Roma 12:1, 2) Hinunoa, ang mga alagad sa Diyos nakaamgo sa hinungdanong bahin sa pagkasagrado, o pagkabalaan, diha sa ilang pagsimba kang Jehova. Unsang mga butanga sa atong kinabuhi ang angayng isipon nga sagrado? Kining artikuloha maghisgot ug lima ka butang nga balaan para sa tanang alagad sa Diyos. Ang sunod nga artikulo magsentro sa pagtagad nganha sa atong Kristohanong mga tigom. Apan unsa ba gayoy kahulogan sa pulong “balaan”?
2, 3. (a) Sa unsang paagi gipasiugda sa Kasulatan ang pagkabalaan ni Jehova? (b) Sa unsang paagi kita nag-isip nga balaan sa ngalan ni Jehova?
2 Sa Hebreohanon nga gigamit sa Bibliya, ang pulong “balaan” naghatag ug ideya sa pagkanahilain. Diha sa pagsimba, ang pulong “balaan” mapadapat nianang gilain gikan sa ordinaryong paggamit, o giisip nga sagrado. Si Jehova maoy balaan sa bug-os nga diwa. Siya gitawag nga “Labing Balaang Usa.” (Proverbio 9:10; 30:3) Sa karaang Israel, ang hataas nga saserdote nagtaod diha sa iyang purong ug usa ka plaka nga bulawan nga gikulitan sa mga pulong “Ang pagkabalaan iya ni Jehova.” (Exodo 28:36, 37) Ang mga kerubin ug mga serapin sa langit nga nagtindog palibot sa trono ni Jehova gihulagway sa Kasulatan nga nagmantala: “Balaan, balaan, balaan si Jehova.” (Isaias 6:2, 3; Pinadayag 4:6-8) Kining maong pagsubli nagpasiugda nga si Jehova balaan, hinlo, ug putli sa kinalabwang sukod. Sa pagkatinuod, siya ang Tuboran sa tanang pagkabalaan.
3 Ang ngalan ni Jehova sagrado, o balaan. Ang salmista mipatugbaw: “Ipadayeg kanila ang imong ngalan. Kini dako ug makalilisang, kini balaan.” (Salmo 99:3) Gitudloan kita ni Jesus sa pag-ampo: “Amahan namo nga anaa sa mga langit, pagabalaanon [o, “isipong sagrado; tagdon nga sagrado”] unta ang imong ngalan.” (Mateo 6:9) Ang yutan-ong inahan ni Jesus nga si Maria nagmantala: “Pagapadakoon sa akong kalag si Jehova . . . ang gamhanang Usa nagbuhat ug dagkong mga buhat alang kanako, ug balaan ang iyang ngalan.” (Lucas 1:46, 49) Ingong mga alagad ni Jehova, kita nag-isip sa iyang ngalan nga balaan ug naglikay sa pagbuhat sa bisan unsa nga magpasipala nianang balaang ngalan. Dugang pa, atong nabatonan ang panglantaw ni Jehova sa pagkasagrado, sa ato pa, atong giisip nga sagrado ang mga butang nga iyang giisip nga sagrado.—Amos 5:14, 15.
Kon Nganong Kita Adunay Halalom nga Pagtahod Kang Jesus
4. Nganong gihubit sa Bibliya si Jesus ingong “ang Balaang Usa”?
4 Ingong “bugtong nga anak” sa balaang Diyos, si Jehova, si Jesus gilalang nga balaan. (Juan 1:14; Colosas 1:15; Hebreohanon 1:1-3) Busa gitawag siya nga “ang Balaang Usa sa Diyos.” (Juan 6:69) Iyang nahuptan ang iyang pagkabalaan sa dihang gibalhin ang iyang kinabuhi gikan sa langit nganhi sa yuta, kay ilalom sa gahom sa balaang espiritu nga si Maria nanganak kang Jesus. Usa ka manulonda ang miingon kaniya: “Pagakunsaran ikaw sa balaang espiritu . . . ang matawo pagatawgong balaan, Anak sa Diyos.” (Lucas 1:35) Diha sa pag-ampo kang Jehova, ang mga Kristohanon sa Jerusalem kaduha nagtawag sa Anak sa Diyos ingong “imong balaang alagad nga si Jesus.”—Buhat 4:27, 30.
5. Unsang sagradong misyon ang gituman ni Jesus dinhi sa yuta, ug nganong bililhon ang iyang dugo?
5 Si Jesus may sagradong misyon nga tumanon samtang dinhi sa yuta. Sa pagbawtismo kaniya sa 29 K.P., si Jesus gidihogan ingong Hataas nga Saserdote sa dakong espirituwal nga templo ni Jehova. (Lucas 3:21, 22; Hebreohanon 7:26; 8:1, 2) Gawas pa, siya mamatay ingong halad. Ang iyang giula nga dugo magtaganag lukat nga pinaagi niana ang makasasalang mga tawo mahimong maluwas. (Mateo 20:28; Hebreohanon 9:14) Busa isipon natong sagrado, ug ‘bililhon’ ang dugo ni Jesus.—1 Pedro 1:19.
6. Unsay angay natong tinamdan kang Kristo Jesus, ug ngano?
6 Sa pagpakita nga angay gayod natong tahoron ang atong Hari ug Hataas nga Saserdote, si Kristo Jesus, si apostol Pablo misulat: “Ang Diyos nagbayaw [sa iyang Anak] ngadto sa usa ka labaw nga katungdanan ug malulotong naghatag kaniya sa ngalan nga labaw sa tanang uban pa nga ngalan, aron nga sa ngalan ni Jesus moluhod ang tanang tuhod nilang anaa sa langit ug nilang anaa sa yuta ug nilang anaa ilalom sa yuta, ug ang tanang dila magaila sa dayag nga si Jesu-Kristo maoy Ginoo alang sa kahimayaan sa Diyos nga Amahan.” (Filipos 2:9-11) Atong mapasundayag nga atong nabatonan ang panglantaw ni Jehova sa sagradong mga butang pinaagi sa atong malipayong pagpasakop sa atong Pangulo ug nagamandong Hari, si Kristo Jesus, ang Ulo sa Kristohanong kongregasyon.—Mateo 23:10; Colosas 1:18.
7. Sa unsang paagi mapakita nato ang atong pagpasakop kang Kristo?
7 Ang pagpasakop kang Kristo naglangkit usab sa atong pagpakita ug pagtahod sa mga lalaki nga iyang gigamit sa pagpanguna sa buluhaton nga iyang gidumala karon. Ang papel sa mga dinihogan-sa-espiritu nga naglangkob sa Nagamandong Lawas ug sa mga magtatan-aw nga gitudlo nila diha sa mga sangang buhatan, distrito, sirkito, ug mga kongregasyon angayng ilhon ingong sagradong responsibilidad. Busa kita kinahanglang adunay halalom nga pagtahod ug magpasakop niining maong kahikayan.—Hebreohanon 13:7, 17.
Usa ka Balaang Katawhan
8, 9. (a) Sa unsang paagi ang mga Israelinhon usa ka balaang katawhan? (b) Sa unsang paagi gitisok ni Jehova sa mga Israelinhon ang prinsipyo sa pagkasagrado?
8 Si Jehova naghimog pakigsaad uban sa Israel. Kining maong relasyon nagtuboy nianang bag-ong nasod sa linaing kahimtang. Sila gibalaan, o gilain. Si Jehova mismo miingon kanila: “Kamo magmabalaan alang kanako, tungod kay ako si Jehova maoy balaan; ug ginabulag ko kamo gikan sa mga katawhan aron mahimong akoa.”—Levitico 19:2; 20:26.
9 Sa pagkatukod pa lamang sa nasod sa Israel, gitisok na ni Jehova sa mga Israelinhon ang prinsipyo sa pagkasagrado. Dili gani nila angayng hikapon ang bukid diin gihatag ang Napulo ka Sugo ug kon dili sila motuman sila mamatay. Busa ang Bukid sa Sinai sa usa ka diwa giisip nga sagrado. (Exodo 19:12, 23) Ang mga saserdote, ang tabernakulo, ug ang mga kasangkapan niini giisip usab nga sagrado. (Exodo 30:26-30) Unsay kahimtang diha sa Kristohanong kongregasyon?
10, 11. Nganong ikaingon nga ang Kristohanong kongregasyon sa mga dinihogan maoy balaan, ug unsay epekto niini diha sa “ubang mga karnero”?
10 Ang Kristohanong kongregasyon sa mga dinihogan maoy sagrado sa mga mata ni Jehova. (1 Corinto 1:2) Sa pagkatinuod, ang enterong grupo sa dinihogang mga Kristohanon sa yuta sa bisan unsang yugto gipakasama sa usa ka balaang templo, bisan tuod wala sila maglangkob sa dakong espirituwal nga templo. Si Jehova nagpuyo nianang temploha pinaagi sa iyang balaang espiritu. Si apostol Pablo misulat: “Nga nahiusa [kang Kristo Jesus], ang tibuok tinukod, kay takdo nga pagkadugtong, nagatubo ngadto sa pagkahimong usa ka balaang templo alang kang Jehova. Nga nahiusa kaniya, kamo usab sa tingob ginatukod sa pagkahimong usa ka dapit nga puloy-anan sa Diyos pinaagi sa espiritu.”—Efeso 2:21, 22; 1 Pedro 2:5, 9.
11 Si Pablo misulat pa ngadto sa dinihogang mga Kristohanon: “Wala ba kamo mahibalo nga kamo mao ang templo sa Diyos, ug nga ang espiritu sa Diyos nagapuyo diha kaninyo? . . . Ang templo sa Diyos balaan, nga kining temploha mao kamo.” (1 Corinto 3:16, 17) Pinaagi sa iyang espiritu, si Jehova ‘mipuyo’ taliwala sa mga dinihogan ug ‘naglakaw sa ilang taliwala.’ (2 Corinto 6:16) Siya padayong naggiya sa iyang matinumanong “ulipon.” (Mateo 24:45-47) Ang “ubang mga karnero” nagpabili sa ilang pribilehiyo nga makapakig-uban sa “templo” nga matang.—Juan 10:16; Mateo 25:37-40.
Sagradong mga Butang Diha sa Atong Kristohanong Kinabuhi
12. Unsang mga butanga ang sagrado sa atong kinabuhi, ug ngano?
12 Dili ikatingala, daghang butang nga nalangkit sa kinabuhi sa dinihogang mga membro sa Kristohanong kongregasyon ug sa ilang mga kauban ang giisip nga sagrado. Ang atong relasyon kang Jehova maoy sagradong butang. (1 Cronicas 28:9; Salmo 36:7) Bililhon kaayo kini kanato nga dili nato tugotan ang bisan unsa nga mopahuyang sa atong relasyon sa atong Diyos, si Jehova. (2 Cronicas 15:2; Santiago 4:7, 8) Ang pag-ampo adunay hinungdanong bahin sa atong paghupot ug suod nga relasyon kang Jehova. Ang pag-ampo sagrado kaayo para kang manalagnang Daniel nga bisan pag nameligro ang iyang kinabuhi, siya nagpadayon sa iyang nabatasan na nga pag-ampo kang Jehova. (Daniel 6:7-11) “Ang mga pag-ampo sa mga balaan,” o dinihogang mga Kristohanon, gipakasama sa insenso nga gigamit sa pagsimba diha sa templo. (Pinadayag 5:8; 8:3, 4; Levitico 16:12, 13) Kining maong simbolismo nagpasiugda sa pagkasagrado sa pag-ampo. Pagkadakong pribilehiyo nga makapakigsulti sa Soberano sa uniberso! Dili ikatingala nga ang pag-ampo isipon nga sagrado sa atong kinabuhi!
13. Unsang puwersaha ang balaan, ug sa unsang paagi tugotan nato kini sa paglihok diha sa atong kinabuhi?
13 Adunay puwersa diha sa kinabuhi sa dinihogang mga Kristohanon ug sa ilang mga kauban nga giisip gayod nilang sagrado—ang balaang espiritu. Kanang espirituha mao ang aktibong puwersa ni Jehova, ug tungod kay kini kanunayng naglihok uyon sa kabubut-on sa balaang Diyos, kini haom nga tawgong “balaang espiritu,” o “espiritu sa pagkabalaan.” (Juan 14:26; Roma 1:4) Pinaagi sa balaang espiritu, si Jehova naghatag sa iyang mga alagad ug gahom sa pagsangyaw sa maayong balita. (Buhat 1:8; 4:31) Si Jehova naghatag sa iyang espiritu “niadtong nagasugot kaniya ingon nga magmamando,” niadtong ‘nagpadayon sa paglakaw pinaagi sa espiritu,’ dili sumala sa unodnong mga tinguha. (Buhat 5:32; Galacia 5:16, 25; Roma 8:5-8) Kining gamhanang puwersa nakapaarang sa mga Kristohanon sa pagpatungha sa “bunga sa espiritu”—maayong mga hiyas—ug “balaang mga buhat sa panggawi ug mga buhat sa diyosnong pagkamahinalaron.” (Galacia 5:22, 23; 2 Pedro 3:11) Kon giisip natong sagrado ang balaang espiritu, dili kita mobuhat ug bisan unsa nga makapaguol nianang maong espiritu, o makababag sa paglihok niana sa atong kinabuhi.—Efeso 4:30.
14. Unsang pribilehiyoa ang giisip nga sagrado sa mga dinihogan, ug sa unsang paagi kining pribilehiyoa giambitan sa ubang mga karnero?
14 Ang atong pribilehiyo nga magdala sa ngalan sa Balaang Diyos, si Jehova, ug mahimong iyang mga Saksi maoy laing butang nga atong giisip nga sagrado. (Isaias 43:10-12, 15) Ang dinihogang mga Kristohanon gihimong kuwalipikado ni Jehova nga mahimong “mga ministro sa usa ka bag-ong pakigsaad.” (2 Corinto 3:5, 6) Ingong mga ministro, sila gisugo sa pagwali ‘niining maayong balita sa gingharian’ ug sa “paghimog mga tinun-an sa katawhan sa tanang kanasoran.” (Mateo 24:14; 28:19, 20) Sila matinumanong nagabuhat niining sugoa, ug milyonmilyong karnerohong mga tawo ang misanong, nga sa simbolikong paagi miingon sa mga dinihogan: “Mouban kami kaninyo, kay kami nakadungog nga ang Diyos nagauban kaninyo.” (Zacarias 8:23) Kini sila malipayong nag-alagad sa espirituwal nga diwa ingong “mga mag-uuma” ug “mga tig-atiman sa parasan” alang sa dinihogang “mga alagad sa atong Diyos.” Nianang paagiha, ang ubang mga karnero nakatabang ug dako sa mga dinihogan sa pagtuman sa ilang ministeryo sa tibuok kalibotan.—Isaias 61:5, 6.
15. Unsang buluhaton ang giisip ni apostol Pablo nga sagrado, ug nganong nabatonan nato ang samang panglantaw?
15 Si apostol Pablo maoy usa ka pananglitan niadtong nag-isip sa iyang publikong ministeryo nga usa ka butang nga sagrado, o balaan. Iyang gihisgotan ang iyang kaugalingon ingong “publikong alagad ni Kristo Jesus ngadto sa kanasoran, nga nagabuhat sa balaang buluhaton sa maayong balita sa Diyos.” (Roma 15:16) Sa pagsulat ngadto sa mga Kristohanon sa Corinto, gitawag ni Pablo ang iyang ministeryo ingong “bahandi.” (2 Corinto 4:1, 7) Pinaagi sa atong publikong ministeryo, atong gipahibalo “ang sagradong mga pahayag sa Diyos.” (1 Pedro 4:11) Busa, sakop man kita sa mga dinihogan o sa ubang mga karnero, atong giisip nga usa ka sagradong pribilehiyo ang pagpakigbahin sa buluhatong pagpamatuod.
“Magahingpit sa Pagkabalaan Diha sa Kahadlok sa Diyos”
16. Unsay motabang kanato sa paglikay nga mahimong mga tawo nga ‘walay pagpabili sa sagradong mga butang’?
16 Gipasidan-an ni apostol Pablo ang iyang mga isigka-Kristohanon batok sa pagkahimong mga tawo nga ‘walay pagpabili sa sagradong mga butang.’ Hinunoa, gitambagan niya sila nga ‘tinguhaon ang pagkabalaan,’ “nga maampingong magbantay . . . nga walay makahilong gamot nga mogitib ug mopahinabog kasamok ug aron dili mahugawan ang daghan pinaagi niini.” (Hebreohanon 12:14-16) Ang ekspresyong “makahilong gamot” nagtumong niadtong pipila diha sa Kristohanong kongregasyon nga nanaway sa paagi sa pagbuhat sa mga butang. Pananglitan, dili tingali sila mouyon sa mga panglantaw ni Jehova bahin sa pagkasagrado sa kaminyoon o sa panginahanglan nga magmahinlo sa moral. (1 Tesalonica 4:3-7; Hebreohanon 13:4) O basin nakigbahin sila sa paghisgot ug pagpakaylap ug apostatang mga ideya, “mga sulting walay-pulos nga nagpasipala kon unsay balaan,” nga naggikan niadtong “mitipas gikan sa kamatuoran.”—2 Timoteo 2:16-18.
17. Nganong ang kanunayng pagpaningkamot gikinahanglan sa bahin sa mga dinihogan aron mabanaag ang panglantaw ni Jehova sa pagkabalaan?
17 Sa iyang dinihogang mga igsoon, si Pablo misulat: “Mga hinigugma, hinloan nato ang atong kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.” (2 Corinto 7:1) Kining maong pamulong nagpakita nga ang dinihogang mga Kristohanon, nga “mga mag-aambit sa langitnong pagtawag,” kinahanglang maningkamot kanunay sa pagpamatuod nga ilang gibanaag ang panglantaw ni Jehova sa pagkabalaan diha sa tanang bahin sa ilang kinabuhi. (Hebreohanon 3:1) Sa samang paagi, si apostol Pedro nagtambag sa iyang inanak-sa-espiritu nga mga igsoon: “Ingong masinugtanong mga anak, hunong na sa pagpaumol sumala sa mga tinguha nga inyong nabatonan kanhi sa inyong kawalay-alamag, apan, sumala sa Balaang Usa nga nagtawag kaninyo, magmabalaan usab kamo sa tanan ninyong panggawi.”—1 Pedro 1:14, 15.
18, 19. (a) Sa unsang paagi mapakita sa mga membro sa “dakong panon” nga ilang nabatonan ang panglantaw ni Jehova sa sagradong mga butang? (b) Unsang ubang sagradong bahin sa atong Kristohanong kinabuhi ang hisgotan sa sunod nga artikulo?
18 Komosta ang mga membro sa “dakong panon,” nga makalabang-buhi sa “dakong kasakitan”? Kinahanglang pamatud-an usab nila nga ilang nabatonan ang panglantaw ni Jehova sa sagradong mga butang. Sa basahon sa Pinadayag, sila gihulagway nga naghatag kang Jehova ug “sagradong pag-alagad” diha sa yutan-ong sawang sa iyang espirituwal nga templo. Sila nagtuo sa halad lukat ni Kristo, nga sa simbolikong paagi ‘naglaba sa ilang tag-as nga mga besti ug nagpaputi niini sa dugo sa Kordero.’ (Pinadayag 7:9, 14, 15) Kini naghatag kanila ug hinlong baroganan atubangan kang Jehova ug nag-obligar kanila sa ‘paghinlo sa ilang kaugalingon sa tanang kahugawan sa unod ug espiritu, nga magahingpit sa pagkabalaan diha sa kahadlok sa Diyos.’
19 Ang usa ka hinungdanong bahin sa kinabuhi sa dinihogang mga Kristohanon ug sa ilang mga kauban mao ang regular nga pagtigom aron sa pagsimba kang Jehova ug pagtuon sa iyang Pulong. Giisip ni Jehova nga sagrado kining maong mga panagkatigom sa iyang katawhan. Hisgotan sa sunod nga artikulo kon sa unsang paagi ug ngano nga angay natong batonan ang panglantaw ni Jehova sa sagradong mga butang niining hinungdanong bahin sa atong kinabuhi.
Agig Pagsubli
• Unsang panglantaw sa kalibotan ang wala mabatoni sa mga alagad ni Jehova?
• Nganong si Jehova ang Tuboran sa tanang butang nga balaan?
• Sa unsang paagi mapakita nato nga atong gitahod ang pagkabalaan ni Kristo?
• Unsang mga butanga ang angay natong isipong sagrado sa atong kinabuhi?
[Mga Pangutana sa Pagtuon]
[Hulagway sa panid 23]
Sa karaang Israel, ang mga saserdote, tabernakulo, ug ang mga kasangkapan niini giisip nga sagrado
[Hulagway sa panid 24]
Ang dinihogang mga Kristohanon sa yuta naglangkob sa usa ka balaang templo
[Mga hulagway sa panid 25]
Ang pag-ampo ug ang atong publikong ministeryo maoy sagradong mga pribilehiyo