Nagkahiusa sa Pagpanukod Aron Dayegon ang Diyos

ANG mga tawo sa usa sa mga pulo sa Solomon Islands nakamatikod sa usa ka bag-ong Kingdom Hall sa mga Saksi ni Jehova. Usa ka babaye miingon: “Ang among simbahan nagpasiugda ug daghang kalihokan aron makapondo ug salapi. Among gihangyo ang among mga membro sa paghatag ug kuwarta, apan wala gihapon kamiy igong pondo sa pagtukod ug bag-ong simbahan. Giunsa man ninyo pagkuha ang inyong mga pondo?” Ang Saksi nga iyang kaestorya mitubag: “Kami nagsimba kang Jehova ingong usa ka tibuok-kalibotang pamilya. Ang among kongregasyon ug ang among mga igsoon sa tibuok kalibotan nagdonar kon unsay gikinahanglan aron makatukod ug bag-ong Kingdom Hall. Si Jehova nagtudlo kanamo nga mahiusa sa tanang butang.”

Imong makita ang panaghiusa sa mga Saksi ni Jehova diha sa tanan nilang mga kalihokan, nga naglakip sa pagpanukod ug libolibong Kingdom Hall. Ang maong panaghiusa sa pagpalampos niining mga proyektoha dili kay karon ra. Naglungtad na kini taliwala sa katawhan sa Diyos sulod sa daghang milenyo. Nganong makaingon kita niana?

Pagtukod sa Tabernakulo ug sa Templo

Bahin sa nasod sa Israel, giingnan ni Jehova si Moises kapin sa 3,500 ka tuig kanhi: “Sila maghimog usa ka sangtuwaryo alang kanako.” (Exodo 25:8) Kon bahin sa disenyo niining tukoron nga proyekto, si Jehova dugang miingon: “Sumala sa tanan nga ginapakita ko kanimo ingong sumbanan sa tabernakulo ug sumbanan sa tanang kasangkapan niini, ingon niana ang inyong paghimo niini.” (Exodo 25:9) Dayon si Jehova naghatag ug detalyadong mga plano alang sa gambalay, kasangkapan, ug kahimanan sa sangtuwaryo. (Exodo 25:10–27:19) Kini nga “tabernakulo,” o tolda, mao ang mahimong sentro sa matuod nga pagsimba sa tibuok Israel.

Wala kita mahibalo kon pila ka tawo ang nagtrabaho sa maong proyekto, apan ang tanang Israelinhon giawhag sa pagsuportar niini. Si Moises miingon kanila: “Gikan sa inyong taliwala pagkuha ug amot alang kang Jehova. Ang matag tawo nga andam ug kasingkasing padad-a niini ingong amot alang kang Jehova.” (Exodo 35:4-9) Unsay sanong sa mga Israelinhon? Ang Exodo 36:3 nag-ingon: “Ilang gikuha sa atubangan ni Moises ang tanang amot nga gidala sa mga anak sa Israel alang sa buluhaton sa balaang pag-alagad aron buhaton kini, ug, kon bahin niining mga ulahing gihisgotan, sila sa gihapon nagdala ngadto kaniya ug kinabubut-ong halad buntagbuntag.”

Sa wala madugay dihay daghan kaayong gidonar nga mga butang, ug ang katawhan nagsige gihapog dala ug dugang. Sa kataposan, ang mga trabahante miingon kang Moises: “Ang katawhan nagdala ug daghan kaayo kay sa gikinahanglan sa pag-alagad alang sa buluhaton nga gisugo ni Jehova nga pagahimoon.” Busa si Moises nagsugo:  “Mga lalaki ug mga babaye, ayaw na kamo pagdalag bisan unsang mga butang alang sa balaang amot.” Unsay resulta? “Ang mga butang nga giamot igo na alang sa tanang buluhaton nga pagabuhaton, ug gani nagsobra pa.”—Exodo 36:4-7.

Tungod sa kamahinatagon sa mga Israelinhon, ang tabernakulo nahuman sa usa ka tuig. (Exodo 19:1; 40:1, 2) Pinaagi sa pagsuportar sa matuod nga pagsimba, ang katawhan sa Diyos nagpasidungog kang Jehova. (Proverbio 3:9) Sa ulahi, sila kinahanglang maghimo ug mas dakong tinukod. Ug sa makausa pa, ang tanang may gusto makahimo sa pagtabang sa maong proyekto, may kahanas man sila sa pagpanukod o wala.

Halos lima ka siglo human matukod ang tabernakulo, ang Israel nagtukod ug templo didto sa Jerusalem. (1 Hari 6:1) Kini maoy usa ka dako, permanente nga tinukod nga gama sa mga bato ug kahoy. (1 Hari 5:17, 18) Si Jehova naghatag ug arkitektural nga mga plano alang sa templo ngadto kang David “pinaagi sa pagdasig.” (1 Cronicas 28:11-19) Apan iyang gipili ang anak ni David nga si Solomon nga maoy manguna sa pagtukod. (1 Cronicas 22:6-10) Kinasingkasing gayong gisuportahan ni David kining proyektoha. Siya nagkuhag mga bato, kahoy, ug uban pang mga materyales ug nag-amot ug daghang bulawan ug plata. Iyang gidasig usab ang iyang mga isigka-Israelinhon nga magmahinatagon, nga nangutana kanila: “Kinsa ang moboluntaryo aron pun-on ang iyang kamot karong adlawa sa usa ka gasa alang kang Jehova?” Unsay sanong sa katawhan?—1 Cronicas 29:1-5.

Sa dihang gisugdan ni Solomon ang pagtukod sa templo, aduna na siyay libolibong tonelada nga bulawan ug plata nga magamit. Daghan kaayo ang tumbaga ug puthaw niadtong panahona nga kini dili arang matimbang. (1 Cronicas 22:14-16) Tungod sa pagpaluyo ni Jehova ug sa tibuok Israel, ang proyekto nahuman sulod lang sa pito ka tuig ug tunga.—1 Hari 6:1, 37, 38.

“Ang Balay sa Matuod nga Diyos”

Ang tabernakulo ug ang templo gitawag nga “balay sa matuod nga Diyos.” (Maghuhukom 18:31; 2 Cronicas 24:7) Si Jehova wala gayod manginahanglag balay nga kapuy-an. (Isaias 66:1) Iya kadtong gipatukod alang sa kaayohan sa mga tawo. Gani, sa inagurasyon sa templo, si Solomon nangutana: “Ang Diyos mopuyo ba gayod dinhi sa yuta? Tan-awa! Ang mga langit, oo, ang langit sa mga langit, dili makaigo kanimo; nan, unsa pa  kaha kining balaya nga akong gitukod!”—1 Hari 8:27.

Si Jehova miingon pinaagi sa iyang manalagna nga si Isaias: “Ang akong balay pagatawgon mismo nga usa ka balay nga ampoanan alang sa tanang mga katawhan.” (Isaias 56:7) Ang mga halad ug mga pag-ampo nga gitanyag diha sa templo, ug ang mga seremonyas nga gihimo didto, nagtugot sa diyosnong mga tawo—mga Hudiyo ug dili-Hudiyo—sa pagpakigsuod sa matuod nga Diyos. Ilang napahimuslan ang panaghigala ug panalipod ni Jehova pinaagi sa pagsimba didto sa iyang balay. Ang pag-ampo nga gitanyag ni Solomon sa pagpahinungod sa templo nagpasiugda niining kamatuorana. Imong mabasa ang iyang makatandog nga mga pahayag ngadto sa Diyos diha sa 1 Hari 8:22-53 ug sa 2 Cronicas 6:12-42.

Ang maong karaang balay sa matuod nga Diyos dugay nang nahanaw, apan ang Pulong sa Diyos nagpunting sa usa ka panahon sa dihang ang mga tawo sa tanang nasod magkatigom sa pagsimba kang Jehova diha sa mas dakong espirituwal nga templo. (Isaias 2:2) Ang hingpit nga halad sa bugtong Anak sa Diyos, nga gihulagwayan sa mga halad nga mananap diha sa templo, mao ang paagi sa pagduol kang Jehova. (Juan 14:6; Hebreohanon 7:27; 9:12) Ang mga Saksi ni Jehova karon nagsimba sa Diyos pinaagi sa maong labaw nga paagi, ug ilang gitabangan ang daghan sa paghimo usab niana.

Modernong Pagpanukod

Sa tibuok kalibotan, ang mga Saksi ni Jehova nag-alagad sa matuod nga Diyos. Sila naglangkob sa “usa ka gamhanang nasod,” kansang populasyon nagpadayon sa pagtubo. (Isaias 60:22) Ang pangunang tigomanan sa mga Saksi ni Jehova mao ang Kingdom Hall. a Libolibo na niini nga mga tinukod ang gigamit, ug libolibo pa ang gikinahanglan.

Ang mga Saksi ni Jehova ‘nagatanyag sa ilang kaugalingon nga kinabubut-on’ sa pagtukod sa gikinahanglang mga Kingdom Hall. (Salmo 110:3) Apan kasagaran, kulang ug kahanas sa pagpanukod ang lokal nga mga Saksi, ug ang ubang mga lugar nga kusog ang pag-uswag nag-ilaid sa tumang kakabos. Sa 1999, ang Nagamandong Lawas sa mga Saksi ni Jehova nagtukod ug usa ka programa sa pagpanukod ug Kingdom Hall aron mabuntog ang maong mga kakulian. Pinaagi niining programaha, ang mga Saksi nga may kahanas sa pagpanukod mibiyahe ngadto sa lagyong mga lugar aron sa pagbansay sa ilang mga igsoon sa pagpanukod ug mga Kingdom Hall. Ang nabansay nga mga trabahante nagpadayon sa pagpanukod diha sa maong rehiyon. Unsay resulta niining linaing paningkamot?

Sa Pebrero 2006, ang mga Saksi ni Jehova diha sa mga nasod nga limitado lang ang kahinguhaan nakakita ug kapin sa 13,000 ka bag-ong mga Kingdom Hall nga natukod. Basaha ang gisulti sa pipila nga naggamit sa bag-ong mga Kingdom Hall.

“Ang kongregasyon adunay aberids nga 160 ka tumatambong. Sa unang tigom human matukod ang bag-ong Kingdom Hall, ang mitambong miabot ug 200. Karon, unom ka bulan sa ulahi, sila adunay tumatambong nga 230. Gipanalanginan gayod ni Jehova ang pagpanukod niining kasarangan apan mapuslanon nga mga tinukod.”—Usa ka magtatan-aw sa sirkito sa Ecuador.

“Sa daghang katuigan ang mga tawo nangutana kanamo, ‘Kanus-a man kamo makabaton ug Kingdom Hall nga sama nianang makita namo sa inyong mga basahon?’ Tungod sa tabang ni Jehova, sa kataposan kami aduna nay presentable nga tigomanan. Kaniadto didto kami magtigom sa tindahan sa usa ka igsoon, nga may aberids nga 30 ka tumatambong. Sa unang tigom sa bag-ong  Kingdom Hall, 110 ka tawo ang mitambong.”—Usa ka kongregasyon sa Uganda.

“Duha ka regular payunir nga mga sister mitaho nga mas makalingaw ang pagsangyaw sa teritoryo sukad natukod ang Kingdom Hall. Ang mga tawo andam nga magpatalinghog sa dihang sila magsangyaw sa balaybalay ug sa di-pormal nga mga paagi. Kining mga igsoona nagdumala karon ug 17 ka pagtuon sa Bibliya, ug daghan sa maong mga ginatun-an ang nagtambongan sa mga tigom.”—Sangang buhatan sa Solomon Islands.

“Usa ka pastor nga nagpuyo sa duol miingon nga ang bag-ong Kingdom Hall nakadugang sa dignidad sa tibuok komunidad ug gipasigarbo kini sa mga tawo nianang dapita. Daghang molabay ang nakadayeg sa kanindot sa maong tigomanan. Kini nakahatag ug kahigayonan sa mga igsoon sa pagpamatuod. Nagkadaghan ang mga tawo nga gustong mahibalo sa atong tibuok-kalibotang kapunongan. Daghan niadtong wala na magtambongan sulod sa daghang katuigan ang nadasig nga regular nga makig-uban pag-usab.”—Sangang buhatan sa Myanmar.

“Gidapit sa usa ka sister ang usa ka interesadong lalaki ngadto sa dapit nga gitukoran nga duol ra sa iyang gipuy-an. Ang maong lalaki miingon sa ulahi: ‘Abi nakog dili ko pasudlon sa mga nagtrabaho. Sa akong katingala, maluloton akong gitimbaya sa mga Saksi. Ang mga lalaki ug babaye makugihon kaayo, nga wala mag-usik ug panahon. Sila nagkahiusa ug malipayon.’ Ang maong lalaki midawat ug pagtuon sa Bibliya ug nagtambongan na sa mga tigom. Sa ulahi siya miingon: ‘Nausab ang akong panghunahuna. Dili na gayod nako biyaan ang Diyos karon nga ako na siyang nakaplagan.’”—Sangang buhatan sa Colombia.

 Hinungdanon ang Atong Pagpaluyo

Ang pagtukod ug mga Kingdom Hall maoy usa ka hinungdanong bahin sa atong sagradong pag-alagad. Dalayegon gayod ang pagpaluyo sa mga Saksi ni Jehova sa tibuok kalibotan nianang buluhatona—sa pinansiyal man ug sa ubang mga paagi. Apan, kinahanglan natong hinumdoman nga ang ubang bahin sa sagradong pag-alagad hinungdanon usab. Matag karon ug unya, ang mga Kristohanon mahimong mabiktima sa kinaiyanhong mga katalagman ug nanginahanglan sa atong tabang. Ang pag-imprenta ug mga literatura sa Bibliya mao ang pangunang bahin sa pagpaluyo sa sagradong pag-alagad. Kadaghanan kanato nakakita sa puwersa sa binase-sa-Bibliyang magasin o libro nga napahimutang nganha sa tawo nga nakiling sa pagkamatarong. Dugang pa, hinungdanon usab nga paluyohan ang mga misyonaryo ug uban pang nag-alagad nga bug-os panahon diha sa linaing paagi. Ang maong mga Kristohanon nga nagsakripisyo sa kaugalingon adunay dakong papel sa pagpalapad sa buluhatong pagsangyaw niining kataposang mga adlaw.

Nalipay gayod kadtong mitabang sa pagtukod sa templo. (1 Cronicas 29:9) Karon, ang pagpaluyo sa matuod nga pagsimba pinaagi sa atong mga amot makapalipay usab kanato. (Buhat 20:35) Kita makatagamtam niana nga kalipay sa dihang atong ihulog ang atong mga amot diha sa kahon nga gigahin alang sa Kingdom Hall Fund ug sa dihang kita moamot sa tibuok-kalibotang buluhaton, sa ingon nagpaluyo sa ubang mga proyekto nga nalangkit sa pagsangyaw sa maayong balita sa Gingharian. Sa katingalahang paagi, ang mga Saksi ni Jehova karon nagkahiusa sa matuod nga pagsimba. Hinaot kitang tanan matugob sa kalipay nga nagsumikad sa atong pagpaluyo sa maong pagsimba!

[Footnote]

[Kahon/Hulagway sa panid 20, 21]

MGA PAAGI SA PAGHATAG NGA GIPILI SA UBAN

MGA AMOT ALANG SA TIBUOK-KALIBOTANG BULUHATON

Daghan ang naggahin, o nagbadyet, ug salapi nga ilang ihulog diha sa mga kahon sa kontribusyon nga gimarkahan ug “Contributions for the Worldwide Work—Matthew 24:14.”

Matag bulan, ipadala sa mga kongregasyon kining maong salapi ngadto sa sangang buhatan sa mga Saksi ni Jehova nga nag-alagad sa ilang nasod. Ang kinabubut-on nga mga donasyong salapi mahimong ipadala usab nga direkta ngadto sa Watch Tower Bible and Tract Society of the Philippines, Inc., P.O. Box 2044, 1060 Manila, o sa sangang buhatan sa mga Saksi ni Jehova nga nag-alagad sa inyong nasod. Ang mga tseke nga ipadala sa adres sa ibabaw kinahanglang himoon nga payable to “Watch Tower.” Ang mga alahas o ubang mahalong mga butang mahimong idonar usab. Ang mubong sulat nga nagpahayag nga kana maoy direkta nga gasa angayng ilakip sa maong mga amot.

CONDITIONAL-DONATION TRUST NGA KAHIKAYAN

Ang salapi mahimong ibutang nga in trust with Watch Tower aron magamit sa tibuok kalibotan. Apan, kon ang nagdonar mohangyo niana, ang salapi ibalik kaniya. Alang sa dugang impormasyon, palihog kontaka ang Treasurer’s Office sa adres nga gitala sa itaas.

CHARITABLE PLANNING

Gawas pa sa direkta nga mga gasang salapi, adunay ubang mga paagi sa paghatag aron makatabang sa buluhaton sa Gingharian sa tibuok kalibotan. Kini nag-apil sa:

Insyurans: Ang Watch Tower mahimong himoon nga benepisyaryo sa usa ka polisa sa life insurance o sa usa ka programa sa pagretiro/pensiyon.

Mga Pondo sa Bangko: Ang mga pondo sa bangko, sertipiko sa deposito, o indibiduwal nga mga pondo sa pagretiro mahimong ibutang nga in trust for o himoong payable on death ngadto sa Watch Tower, nga nahiuyon sa mga kinahanglanon sa lokal nga bangko.

Stocks and Bonds: Ang mga stock o aksiyones ug mga bond mahimong idonar ngadto sa Watch Tower ingong direkta nga gasa.

Balay ug Yuta: Ang ikabaligya nga balay ug yuta mahimong idonar pinaagi kaha sa deretsong paghatag isip gasa o, sa kahimtang sa residensiyal nga propiedad, pinaagi sa pagreserba sa balay o yuta sa nagdonar, kinsa mahimong magpadayon sa pagpuyo diha niana samtang buhi pa siya. Kontaka ang sangang buhatan sa inyong nasod sa dili pa buhatag papeles ang bisan unsang balay o yuta.

Gift Annuity: Ang gift annuity maoy usa ka kahikayan diin ibalhin sa usa ang iyang salapi o mga deposito ngadto sa usa ka tinudlo nga korporasyon nga gigamit sa mga Saksi ni Jehova. Sa baylo, ang nagdonar, o ang usa nga gitudlo sa nagdonar, modawat ug usa ka tino nga bayad matag tuig sa tibuok niyang kinabuhi. Ang buhis sa kinitaan o income tax sa nagdonar makunhoran sa tuig nga gisugdan ang gift annuity.

Wills and Trusts: Ang propiedad o salapi mahimong ikabilin ngadto sa Watch Tower pinaagi sa usa ka legal nga testamento, o ang Watch Tower mahimong himoon nga benepisyaryo sa usa ka trust agreement. Ang trust nga mapanunod sa usa ka relihiyosong organisasyon mahimong adunay pipila ka bentaha sa buluhisan.

Ingon sa gipasabot sa terminong “charitable planning” o pagplano alang sa buhat sa kaluoy, kining mga matanga sa donasyon kasagarang manginahanglan ug pagplano sa bahin sa nagdonar. Aron maabagan ang mga indibiduwal nga gustong motabang sa tibuok-kalibotang buluhaton sa mga Saksi ni Jehova pinaagi sa usa ka matang sa pagplano alang sa buhat sa kaluoy, gihimo ang Iningles ug Kinatsila nga brosyur nga nag-ulohang Charitable Planning to Benefit Kingdom Service Worldwide. Ang brosyur gisulat aron sa paghatag ug impormasyon bahin sa nagkalainlaing mga paagi nga ihatag ang mga gasa karon o pinaagi sa pagbilin ug panulondon inigkamatay. Human mabasa ang brosyur ug makonsulta ang ilang mga magtatambag bahin sa legal nga mga butang o sa buhis, daghan ang nakatabang sa pagsuportar sa relihiyoso ug makitawhanon nga kalihokan sa mga Saksi ni Jehova sa tibuok kalibotan ug namenosan ang ilang bayranan sa buhis samtang nagbuhat niini. Kining brosyura mahimong mabatonan pinaagi sa pagpangayo ug kopya nga direkta gikan sa Charitable Planning Office.

Alang sa dugang impormasyon, mahimong kontakon nimo ang Charitable Planning Office, pinaagi kaha sa sulat o sa telepono, diha sa adres nga gilista sa ubos, o mahimong kontakon nimo ang sangang buhatan sa mga Saksi ni Jehova nga nag-alagad sa inyong nasod.

Charitable Planning Office

Watch Tower Bible and Tract Society of the Philippines, Inc.

186 Roosevelt Avenue, San Francisco del Monte 1105 Quezon City

Telepono: (02) 411-6090

[Hulagway sa panid 18]

Ang atong hiniusang mga paningkamot nagpaposible sa pagtukod ug matahom nga mga Kingdom Hall sa tibuok kalibotan

[Hulagway sa panid 18]

Bag-ong Kingdom Hall sa Ghana