Si Daniel ug ang Iyang Badge sa Kombensiyon

GIBADLONG ni Jesus ang nagpakamatarong-sa-kaugalingon nga mga lider sa relihiyon nga nangasuko sa dihang ilang nakita ang mga batang lalaki nga nagdayeg sa Diyos sa dayag. Mao nga gisukna sila ni Jesus: “Wala ba gayod kamo makabasa niini, ‘Gikan sa baba sa mga bata ug sa mga masuso ikaw nagtaganag pagdayeg’?”—Mateo 21:15, 16.

Ang sayis-anyos nga si Daniel, nga nakig-uban sa Rusog-pinulongan nga kongregasyon sa Alemanya, maoy usa ka pananglitan nga sa atong panahon aduna gihapoy mga batan-on nga nagadayeg kang Jehova. Uban sa iyang inahan ug magulang nga babaye, siya mitambong sa usa ka kombensiyon sa mga Saksi ni Jehova sa Duisburg. Kini ang unang higayon nga sila nakatambong ug usa ka dakong kombensiyon. Ang tanan bag-o alang kanila: ang hotel, ang daghan kaayong mamiminaw, ang paglingkod ug dugay sulod sa tulo ka adlaw, ang bawtismo, ug ang drama. Komosta si Daniel? Dalayegon kaayo ang iyang panggawi.

Pagka-Lunes human sa kombensiyon, sa nakauli na sila sa ilaha, si Daniel sayong mibangon aron motungha sa kindergarten. Apan unsa kanang anaa gihapon sa iyang dyaket? Ang badge nga nagpaila kaniya ingong delegado sa kombensiyon! Giingnan siya sa iyang inahan: “Human na ang kombensiyon. Mahimo na nimong tangtangon ang badge karon.” Apan si Daniel miingon: “Gusto nakong makita sa tanan kon diin ko gikan ug gusto kong mahibaloan nila ang akong nakat-onan.” Busa sa tibuok adlaw sa tunghaan, siya mapasigarbohong nagsul-ob sa iyang badge. Sa dihang gipangutana siya sa iyang maestra bahin niini, iyang gisaysay ngadto kaniya ang programa sa kombensiyon.

Sa pagbuhat niana, gisunod ni Daniel ang panig-ingnan sa libolibo ka batang lalaki ug babaye nga nagdayeg kang Jehova sa dayag latas sa daghang siglo.