Magpabilin Diha sa Gugma sa Diyos!
Magpabilin Diha sa Gugma sa Diyos!
“Mga hinigugma, . . . magpabilin kamo diha sa gugma sa Diyos, . . . nga nagapanglantaw sa kinabuhing walay kataposan.”—JUDAS 20, 21.
GIHIGUGMA pag-ayo ni Jehova ang kalibotan sa katawhan nga iyang gihatag ang iyang bugtong Anak aron nga ang tanan nga magpasundayag ug pagtuo kaniya makabaton ug kinabuhing walay kataposan. (Juan 3:16) Pagkanindot nga makatagamtam niana nga gugma! Kon ikaw usa ka alagad ni Jehova, buot ka gayong makatagamtam niana hangtod sa hangtod.
2 Ang disipulong si Judas nagbutyag kon sa unsang paagi makapabilin ka diha sa gugma sa Diyos. Misulat si Judas: “Pinaagi sa pagpalig-on sa inyong kaugalingon diha sa inyong labing balaan nga pagtuo, ug sa pag-ampo uban sa balaang espiritu, magpabilin kamo diha sa gugma sa Diyos, samtang nagapaabot kamo sa kaluoy sa atong Ginoong Jesu-Kristo nga nagapanglantaw sa kinabuhing walay kataposan.” (Judas 20, 21) Ang pagtuon sa Pulong sa Diyos ug pagwali sa maayong balita motabang kanimo sa pagpalig-on sa imong kaugalingon diha sa “labing balaan nga pagtuo”—ang Kristohanong mga pagtulon-an. Aron magpabilin diha sa gugma sa Diyos, kinahanglang mag-ampo ka “uban sa balaang espiritu,” o ilalom sa impluwensiya niini. Aron panalanginan ka ug kinabuhing walay kataposan, kinahanglang magpasundayag ka usab ug pagtuo sa halad lukat ni Jesu-Kristo.—1 Juan 4:10.
3 Ang uban nga kaniadto may pagtuo wala magpabilin diha sa gugma sa Diyos. Tungod kay sila mipili sa pagsubay sa makasasalang dalan, sila dili na mga Saksi ni Jehova. Sa unsang paagi malikayan nimo kanang maong kasinatian? Ang pagpamalandong sa mosunod nga mga punto makatabang kanimo sa paglikay sa sala ug sa pagpabilin diha sa gugma sa Diyos.
Ipasundayag ang Imong Gugma sa Diyos
4 Ipakita ang imong gugma sa Diyos pinaagi sa pagsugot kaniya. (Mateo 22:37) Si apostol Juan misulat: “Kini ang kahulogan sa paghigugma sa Diyos, nga atong bantayan ang iyang mga sugo; ug bisan pa ang iyang mga sugo dili mabug-at.” (1 Juan 5:3) Kon nabatasan na nimo ang pagsugot sa Diyos, kini makapalig-on kanimo sa pagsukol sa tentasyon ug makapalipay kanimo. Ang salmista miingon: “Malipayon ang tawo nga wala magalakaw sa tambag sa mga daotan, . . . hinunoa ang iyang kalipay anaa sa balaod ni Jehova.”—Salmo 1:1, 2.
5 Ang imong gugma kang Jehova magtukmod kanimo sa paglikay sa paghimog grabeng sala nga magpasipala sa iyang ngalan. Si Agur miampo: “Ayaw ako hatagi ug kakabos ni mga bahandi. Pakan-a ako sa pagkaon nga maoy gikinahanglan lamang alang kanako, tingali unya ako mabusog ug magalimod kanimo ug magaingon: ‘Kinsa ba si Jehova?’ ug aron dili ako mahimong kabos ug mangawat ug magapasipala sa ngalan sa akong Diyos.” (Proverbio 30:1, 8, 9) Magmadeterminado nga dili ‘makapasipala sa ngalan sa Diyos’ pinaagi sa pagpakaulaw kaniya. Hinunoa, kanunayng paningkamoti ang paghimo sa matarong nga mga butang nga maghimaya kaniya.—Salmo 86:12.
6 Pag-ampo kanunay sa imong mahigugmaong langitnong Amahan alang sa tabang sa pagpakigbisog sa tentasyon nga magpakasala. (Mateo 6:13; Roma 12:12) Sunda kanunay ang tambag sa Diyos aron ang imong mga pag-ampo dili mababagan. (1 Pedro 3:7) Kon ikaw tinuyong magpakasala, ang mga sangpotanan makapasubo kaayo, kay sa mahulagwayong paagi si Jehova mag-ali sa pagduol sa mga rebelyoso pinaagi sa bagang panganod aron ang ilang mga pag-ampo dili makalahos kaniya. (Lamentaciones 3:42-44) Busa ipakita ang mapainubsanong espiritu, ug pag-ampo nga dili ka makabuhat ug bisan unsa nga makababag sa imong pagduol sa Diyos pinaagi sa pag-ampo.—2 Corinto 13:7.
Ipakita ang Gugma Alang sa Anak sa Diyos
7 Ipakita ang gugma kang Jesu-Kristo pinaagi sa pagtuman sa iyang mga sugo, kay kini motabang kanimo sa pagsalikway sa makasasalang dalan. Si Jesus miingon: “Kon sundon ninyo ang akong mga sugo, kamo magpabilin sa akong gugma, ingon nga ako nagsunod sa mga sugo sa Amahan ug nagpabilin sa iyang gugma.” (Juan 15:10) Sa unsang paagi ang pagpadapat sa mga pulong ni Jesus makaabag kanimo sa pagpabilin diha sa gugma sa Diyos?
8 Ang pagpatalinghog sa mga pulong ni Jesus makatabang kanimo sa paghupot ug moral nga integridad. Ang Balaod sa Diyos sa Israel nag-ingon: “Dili ka manapaw.” (Exodo 20:14) Apan si Jesus nagpadayag ug prinsipyo luyo nianang sugoa pinaagi sa pag-ingon: “Ang matag usa nga magpadayon sa pagtan-aw sa usa ka babaye aron sa pagbaton ug kaibog kaniya nakapanapaw na uban kaniya diha sa iyang kasingkasing.” (Mateo 5:27, 28) Si apostol Pedro miingon nga ang uban diha sa unang-siglong kongregasyon “may mga mata nga puno sa pagpanapaw” ug ‘nanghaylo sa mabalhinong mga kalag.’ (2 Pedro 2:14) Apan, dili sama kanila, ikaw makalikay sa seksuwal nga mga sala kon ikaw mahigugma ug motuman sa Diyos ug kang Kristo ug determinado nga huptan ang imong relasyon uban kanila.
Tugoti ang Espiritu ni Jehova nga Mogiya Kanimo
9 Pag-ampo nga hatagan ka sa Diyos sa iyang balaang espiritu, ug tugoti kana nga mogiya kanimo. (Lucas 11:13; Galacia 5:19-25) Kon ikaw magpadayon sa pagpakasala, mahimong kuhaon sa Diyos ang iyang espiritu gikan kanimo. Human makasala si David uban kang Batseba, siya nangaliyupo sa Diyos: “Ayaw ako isalikway gikan sa imong atubangan; ug ayaw kuhaa ang imong balaang espiritu gikan kanako.” (Salmo 51:11) Tungod kay siya usa ka dili-mahinulsolong makasasala, si Haring Saul nawad-an gayod sa espiritu sa Diyos. Si Saul nakasala pinaagi sa pagtanyag ug halad nga sinunog ug sa wala niya pagpatay sa matambok nga mga karnero ug mga baka, ug sa hari sa mga Amalekanhon. Human niadto, gikuha ni Jehova ang iyang balaang espiritu gikan kang Saul.—1 Samuel 13:1-14; 15:1-35; 16:14-23.
10 Isalikway ang mismong hunahuna sa pagbatasan sa sala. Si apostol Pablo misulat: “Kon kita tinuyo nga magpakasala human makadawat sa tukmang kahibalo sa kamatuoran, wala nay halad nga nahibilin alang sa sala.” (Hebreohanon 10:26-31) Pagkamakapasubo kon ikaw tinuyo nga magpakasala!
Ipakita ang Tinuod nga Gugma Alang sa Uban
11 Ang gugma alang sa isigkatawo mopugong kanimo sa paghimog seksuwal nga kahiwian. (Mateo 22:39) Ang maong gugma magtukmod kanimo sa pag-amping sa imong kasingkasing aron dili kini mohaylo kanimo sa pagkawat sa pagbati sa kapikas sa laing tawo. Ang pagbuhat niana mahimong mosangpot sa sala nga pagpanapaw. (Proverbio 4:23; Jeremias 4:14; 17:9, 10) Sundoga ang matul-id nga si Job, kinsa wala magtugot sa iyang kaugalingon nga maibog sa laing babaye gawas sa iyang asawa.—Job 31:1.
12 Ang pagtahod sa pagkabalaan sa kaminyoon makatabang kanimo sa paglikay sa grabeng sala. Katuyoan sa Diyos nga ang dungganong kaminyoon ug ang seksuwal nga relasyon maoy mga paagi sa pagpatungha ug kinabuhi. (Genesis 1:26-28) Hinumdomi nga ang mga organo sa sekso adunay kalabotan sa kinabuhi, nga maoy sagrado. Ang mga makihilawason ug mga mananapaw nagsupak sa Diyos, nagpakamenos sa seksuwal nga buhat, walay pagtahod sa pagkabalaan sa kaminyoon, ug nakasala batok sa ilang kaugalingong lawas. (1 Corinto 6:18) Apan ang gugma sa Diyos ug sa silingan duyog sa diyosnong pagkamasinugtanon mopugong sa usa ka tawo nga malambigit sa panggawi nga mahimong moresulta sa pagpalagpot kaniya gikan sa Kristohanong kongregasyon.
13 Kinahanglang sumpoon nato ang makasasalang mga hunahuna aron dili nato mapasakitan ang atong mga minahal. “Siya nga nakig-uban sa mga pampam nagalaglag sa bililhong mga butang,” nag-ingon ang Proverbio 29:3. Ang dili-mahinulsolong mananapaw magdaot sa iyang relasyon sa Diyos ug sa iyang pamilya. Ang iyang asawa may katarongan nga makigdiborsiyo. (Mateo 19:9) Bana man o asawa ang nakasala, ang pagkabungkag sa kaminyoon makapahinabog dakong kasakit sa inosenteng kapikas, sa mga anak, ug sa uban. Dili ka ba mouyon nga ang pagkahibalo sa makadaot nga epekto sa imoral nga panggawi angayng magpalihok kanato sa pagsukol sa tentasyon nga mobuhat niana?
14 Ang kamatuoran nga dili gayod mabakwi ang daotang epekto sa pagpanapaw angayng magtukmod kanato sa paglikay niining mahakogon kaayong buhat. Ang Proverbio 6:30-35 nagpakita nga samtang ang mga tawo maluoy sa usa ka kawatan nga nangawat tungod kay siya gigutom, ilang tamayon ang mananapaw tungod kay siya adunay daotang motibo. Siya “nagalaglag sa iyang kaugalingong kalag [o, kinabuhi].” Ubos sa Moisesnong Balaod, angay unta siyang patyon. (Levitico 20:10) Ang usa ka tawo nga nakapanapaw nagpahinabog kasakit sa uban aron lang matagbaw ang iyang kaulag, ug ang dili-mahinulsolong mananapaw dili magpabilin sa gugma sa Diyos kondili palagpoton gikan sa hinlong Kristohanong kongregasyon.
Paghupot ug Hinlong Tanlag
15 Aron magpabilin diha sa gugma sa Diyos, dili nato tugotan ang atong tanlag nga makubalan tungod sa sala. Dayag nga dili gayod nato dawaton ang ubos nga moral nga mga sukdanan sa kalibotan, ug kinahanglang mag-amping kita sa atong pagpilig mga kauban, basahon, ug kalingawan. Si Pablo nagpasidaan: “Sa ulahing mga yugto sa panahon adunay pipila nga mangahulog gikan sa pagtuo, nga magtagad sa nagpahisalaag nga inspiradong mga pulong ug mga pagtulon-an sa mga demonyo, pinaagi sa pagkasalingkapaw sa mga tawo nga nagsultig kabakakan, minarkahan diha sa ilang tanlag nga daw pinaagi sa binagang puthaw.” (1 Timoteo 4:1, 2) Ang tanlag nga gimarkahan “nga daw pinaagi sa binagang puthaw” maoy sama sa napaso nga panit nga naulat na ug dili na mobati. Ang maong tanlag dili na mopasidaan kanato sa paglikay sa mga apostata ug sa mga situwasyon nga makapabiya kanato sa pagtuo.
16 Ang atong kaluwasan nagdepende sa atong paghupot ug hinlong tanlag. (1 Pedro 3:21) Pinaagi sa atong pagtuo sa giula nga dugo ni Jesus, ang atong tanlag nahinloan na gikan sa patayng mga buhat, “aron makahimo kitag sagradong pag-alagad ngadto sa buhi nga Diyos.” (Hebreohanon 9:13, 14) Kon kita tinuyong magpakasala, ang atong tanlag mahugawan ug kita dili na hinlo nga mga tawo nga kuwalipikado sa pag-alagad sa Diyos. (Tito 1:15) Apan uban sa tabang ni Jehova, atong mabatonan ang hinlong tanlag.
Ubang mga Paagi sa Paglikay sa Sayop nga Panggawi
17 ‘Sunda si Jehova sa bug-os,’ sama kang Caleb sa karaang Israel. (Deuteronomio 1:34-36) Buhata ang gikinahanglan sa Diyos kanimo, ug ayaw gayod hunahunaa nga moambit “sa lamesa sa mga demonyo.” (1 Corinto 10:21) Isalikway ang apostasya. Pakig-ambit nga mapabilhon sa espirituwal nga pagkaon nga mabatonan lamang diha sa lamesa ni Jehova, ug dili ka mapahisalaag sa mini nga mga magtutudlo o sa daotang espiritung mga puwersa. (Efeso 6:12; Judas 3, 4) Isentro ang imong pagtagad sa espirituwal nga mga butang, sama sa pagtuon sa Bibliya, pagtambong sa tigom, ug pagsangyaw sa kanataran. Seguradong magmalipayon ka kon sundon nimo si Jehova sa bug-os ug magmapuliki kanunay diha sa buluhaton sa Ginoo.—1 Corinto 15:58.
18 Magmadeterminado nga “makahatag ug sagradong pag-alagad nga dalawaton sa Diyos uban ang diyosnong kahadlok ug kalisang.” (Hebreohanon 12:28) Ang matahaong pagkahadlok kang Jehova magtukmod kanimo sa pagsalikway sa bisan unsang masinupakong dalan. Kini motabang kanimo sa paggawi nga nahiuyon sa tambag ni Pedro sa mga isigka-dinihogan: “Kon kamo magatawag sa Amahan nga nagahukom nga walay pagpihig sumala sa buhat sa matag usa, managgawi kamo nga may kahadlok sa panahon sa inyong pagpuyo ingong langyaw.”—1 Pedro 1:17.
19 Ipadapat kanunay ang imong nakat-onan gikan sa Pulong sa Diyos. Kini motabang kanimo sa paglikay sa grabeng sala tungod kay nahiapil ka “kanila nga pinaagi sa paggamit nakabansay sa ilang mga gahom sa pagsabot aron sa pag-ila sa maayo ug sa daotan.” (Hebreohanon 5:14) Imbes dili magpakabana sa imong sinultihan ug panggawi, magtukaw aron ikaw maglakaw ingong maalamong tawo, “nga magapalit sa nahiangay nga panahon” niining daotang mga adlaw. “Padayong sabta kon unsa ang kabubut-on ni Jehova,” ug padayon sa pagbuhat niana.—Efeso 5:15-17; 2 Pedro 3:17.
20 Likayi gayod ang hakog nga pangibog—hakog nga tinguha sa kon unsay gipanag-iya sa uban. Ang usa sa Napulo ka Sugo nag-ingon: “Dili ka magtinguha [“maibog,” New International Version] sa balay sa imong isigkatawo. Dili ka magtinguha sa asawa sa imong isigkatawo, ni sa iyang ulipong lalaki ni sa iyang ulipong babaye ni sa iyang baka ni sa iyang asno ni sa bisan unsa nga iya sa imong isigkatawo.” (Exodo 20:17) Kining balaora nanalipod sa balay, asawa, mga alagad, mga mananap, ug uban pa nga gipanag-iya sa usa ka tawo. Apan labing hinungdanon ang gipamulong ni Jesus nga ang hakog nga pangibog makapahugaw sa tawo.—Marcos 7:20-23.
21 Paghimog mga panagana aron ang tinguha dili mosangpot sa sala. Ang disipulong si Santiago misulat: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala; unya, ang sala, sa dihang kini mahingpit na, manganak ug kamatayon.” (Santiago 1:14, 15) Pananglitan, kon ang usa ka tawo may problema labot sa pag-inom ug alkoholikong ilimnon sa miagi, mohukom tingali siya nga dili magtipig ug alkoholikong mga ilimnon diha sa iyang balay. Aron malikayan ang tentasyon nga naglangkit sa usa ka membro sa kaatbang nga sekso, kinahanglan tingaling bag-ohon sa usa ka Kristohanon ang lokasyon sa iyang trabaho o ang iyang trabaho mismo.—Proverbio 6:23-28.
22 Ayaw himoa bisan ang unang tikang ngadto sa pagpakasala. Ang pagbirigbirig ug ang paghambin ug imoral nga mga ideya mahimong moresulta sa pakighilawas o pagpanapaw. Ang pagsultig ginagmayng mga bakak mahimong mag-aghat sa usa ka tawo sa pagsultig dagkong mga bakak ug mahimong mosangpot sa makasasalang pagbatasan sa pagpamakak. Ang ginagmayng pagpangawat makahabol sa tanlag sa usa hangtod sa punto nga magsugod na siya sa pagpangawat ug dinagko. Bisan ang gamayng pagtugot sa apostatang panghunahuna mahimong mosangpot ngadto sa bug-os nga apostasya.—Proverbio 11:9; Pinadayag 21:8.
Komosta Kon Ikaw Nakasala?
23 Ang tanang tawo dili hingpit. (Ecclesiastes 7:20) Apan kon ikaw nakahimog grabeng sala, mahupayan ka sa pag-ampo ni Haring Solomon panahon sa inagurasyon sa templo ni Jehova. Si Solomon miampo sa Diyos: “Bisan unsa nga pag-ampo, bisan unsa nga hangyo alang sa pabor nga himoon ni bisan kinsa nga tawo o sa tibuok nimong katawhang Israel, tungod kay matag usa kanila nahibalo sa iyang hampak ug sa iyang kasakit; sa dihang siya gayod magabayaw sa iyang mga kamot paatubang niining balaya, nan maminaw ka unta gikan sa mga langit, ang dapit nga imong puloy-anan, ug ikaw magapasaylo ug mohatag sa matag usa sumala sa tanan niyang mga dalan, tungod kay ikaw nahibalo sa iyang kasingkasing (tungod kay ikaw lamang ang nahibalo sa kasingkasing sa mga anak sa katawhan).”—2 Cronicas 6:29, 30.
24 Oo, ang Diyos nahibalo kon unsay anaa sa imong kasingkasing ug siya mapinasayloon. Ang Proverbio 28:13 nag-ingon: “Siya nga nagatabon sa iyang kalapasan dili molampos, apan siya nga nagasugid ug nagabiya niini pagakaluy-an.” Pinaagi sa mahinulsolong pagsugid ug pagbiya sa sala, ang usa ka tawo makadawat sa kaluoy sa Diyos. Apan, kon naluya ka sa espirituwal, unsa pay makatabang kanimo sa pagpabilin diha sa gugma sa Diyos?
Unsay Imong Tubag?
• Sa unsang paagi makapabilin kita diha sa gugma sa Diyos?
• Sa unsang paagi ang gugma alang sa Diyos ug kang Kristo motabang kanato sa pagsalikway sa makasasalang dalan?
• Nganong ang tinuod nga gugma alang sa uban mopugong kanato sa paghimog seksuwal nga kahiwian?
• Unsa ang pipila ka paagi sa paglikay sa sayop nga panggawi?
[Mga Pangutana sa Pagtuon]
1, 2. Sa unsang paagi makapabilin ka diha sa gugma sa Diyos?
3. Nganong ang pipila dili na mga Saksi ni Jehova?
4. Unsa ka hinungdanon ang pagsugot sa Diyos?
5. Ang gugma kang Jehova magtukmod kanimo sa paglihok sa unsang paagi?
6. Unsay mahitabo kon ikaw tinuyong magpakasala?
7, 8. Sa unsang paagi ang pagsunod sa tambag ni Jesus makatabang sa usa sa pagsalikway sa makasasalang dalan?
9. Mahitungod sa balaang espiritu, unsay mahimong mahitabo kon ang usa magpadayon sa pagpakasala?
10. Nganong angay nimong isalikway ang mismong hunahuna sa pagbatasan sa sala?
11, 12. Sa unsang mga paagi ang gugma ug pagtahod makapugong sa usa sa paghimog seksuwal nga kahiwian?
13. Sa unsang paagi ang imoral nga tawo “nagalaglag sa bililhong mga butang”?
14. Unsang leksiyon mahitungod sa sayop nga buhat ang atong makat-onan gikan sa Proverbio 6:30-35?
15. Unsay kahimtang sa tanlag nga gimarkahan “nga daw pinaagi sa binagang puthaw”?
16. Nganong hinungdanon kaayo nga huptan ang hinlong tanlag?
17. Unsay kaayohan sa ‘pagsunod kang Jehova sa bug-os’?
18. Sa unsang paagi ang pagkahadlok kang Jehova mag-apektar sa imong panggawi?
19. Nganong angay nimong ipadapat kanunay ang mga butang nga imong nakat-onan gikan sa Pulong sa Diyos?
20. Nganong angay natong likayan ang hakog nga pangibog?
21, 22. Unsang mga panagana ang mahimong buhaton sa usa ka Kristohanon aron malikayan ang pagpakasala?
23, 24. Unsang kahupayan ang madawat gikan sa 2 Cronicas 6:29, 30 ug Proverbio 28:13?
[Hulagway sa panid 21]
Gipakita ni Judas kanato kon unsaon pagpabilin diha sa gugma sa Diyos
[Hulagway sa panid 23]
Ang pagkabungkag sa kaminyoon makapahinabog dakong kasakit sa inosenteng kapikas ug sa mga anak
[Hulagway sa panid 24]
Sama kang Caleb, determinado ka bang ‘sundon si Jehova sa bug-os’?
[Hulagway sa panid 25]
Pag-ampo nga regular alang sa tabang nga makasukol sa tentasyon