“Kinahanglang Among Sugton ang Diyos Ingong Magmamando Inay ang mga Tawo”

‘Maisogong’ Naghatag ug Bug-os nga Pagpamatuod

ANG usa ka magubtanong panon andam nang mopatay sa usa ka matinumanong alagad sa Diyos. Sa igo lang gayod nga panahon, ang Romanong kasundalohan nagsakmit sa maong lalaki gikan sa mga nangatake ug nagbilanggo kaniya. Kini ang sinugdanan sa sunodsunod nga mga hitabo nga mikabat ug mga lima ka tuig. Tungod niini, daghang taas-ug-ranggo nga Romanong mga opisyales ang nakadungog bahin kang Jesu-Kristo.

Ang nag-antos mao si apostol Pablo. Sa mga 34 K.P., si Jesus miingon nga si Pablo (Saulo) magdala sa Iyang ngalan ngadto sa “mga hari.” (Buhat 9:15) Pagka-56 K.P., kini wala pa mahitabo. Apan sa hapit nang matapos sa apostol ang iyang ikatulo nga misyonaryong panaw, nausab ang mga kahimtang.

Giatake sa Magubtanong Panon Apan Wala Mahadlok

Si Pablo nagpadayon sa iyang panaw paingon sa Jerusalem, ug “pinaagi sa espiritu” gipasidan-an siya sa pipila ka Kristohanon nga dunay grabeng paglutos nga nagpaabot kaniya sa maong siyudad. Sa kamaisogon, si Pablo miingon: “Ako andam dili lamang sa pagpagapos kondili usab sa pagpakamatay didto sa Jerusalem tungod sa ngalan sa Ginoong Jesus.” (Buhat 21:4-14) Sa dihang miadto si Pablo sa templo sa Jerusalem, ang mga Hudiyo nga taga-Asia nga nahibalo sa kalamposan sa iyang pagsangyaw didto nag-aghat sa usa ka magubtanong panon sa pagpatay kaniya. Maayo na lang kay gitabang dayon siya sa Romanong mga sundalo. (Buhat 21:27-32) Tungod sa maong pagluwas si Pablo nakabaton ug talagsaong kahigayonan sa pagmantala sa kamatuoran bahin kang Kristo ngadto sa mga masuk-anong mga tawo ug sa taas-ug-ranggong mga indibiduwal.

Pagsangyaw Ngadto sa Lisod-Adtoon nga mga Tawo

Si Pablo gidala ngadto sa luwas nga lugar agi sa hagdanan sa kuta nga nailhang Torre sa Antonia. * Gikan sa maong hagdanan, ang apostol naghatag ug kusganong pamatuod ngadto sa relihiyosong panon. (Buhat 21:33–22:21) Apan sa dihang siya naghisgot bahin sa iyang buluhaton sa pagsangyaw ngadto sa mga Hentil, nagkaguliyang na usab. Ang komandante militar nga si Lisias mimando nga si Pablo sukitsukiton samtang latigohon aron ilang masuta kon nganong gisumbong siya sa mga Hudiyo. Apan wala madayon ang maong paglatigo sa dihang gipaila ni Pablo ang iyang kaugalingon nga usa ka Romano. Pagkasunod adlaw, gidala ni Lisias si Pablo atubangan sa Sanhedrin aron masuta kon nganong gisumbong siya sa mga Hudiyo.—Buhat 22:22-30.

Nagbarog atubangan sa hataas nga hukmanan, si Pablo nakabaton na usab ug maayong kahigayonan sa pagpamatuod ngadto sa iyang mga isigka-Hudiyo. Ang maisog nga magmamantala nagpahayag sa iyang pagtuo sa pagkabanhaw. (Buhat 23:1-8) Nagpangusmo gihapon sa kasuko ang mga Hudiyo, ug si Pablo gidala ngadto sa kuwartel sa mga sundalo. Pagkasunod gabii, siya nakadawat niining makapadasig nga pasalig gikan sa Ginoo: “Magmaisogon! Kay ingon nga ikaw naghatag ug bug-os nga pagpamatuod sa mga butang bahin kanako sa Jerusalem, sa ingon usab ikaw kinahanglang magpamatuod sa Roma.”—Buhat 23:9-11.

Ang plano sa pagpatay kang Pablo napakgang sa dihang ang apostol sekretong gidala ngadto sa Cesarea, ang kaulohan sa Romanhong kagamhanan sa Judea. (Buhat 23:12-24) Didto sa Cesarea, dugang bililhon nga mga kahigayonan ang mitungha, ug si Pablo nagpamatuod ngadto sa “mga hari.” Apan una pa niana, gipamatud-an sa apostol kang Gobernador Felix nga walay basehanan ang mga sumbong batok kaniya. Sa ulahi, si Pablo nagsangyaw kaniya ug sa iyang asawa nga si Drusila bahin kang Jesus, bahin sa pagpugong-sa-kaugalingon, sa pagkamatarong, ug sa umaabot nga paghukom. Apan, si Pablo pabiling gibilanggo sulod sa duha ka tuig, kay si Felix nagpaabot nga makadawat ug hiphip nga wala gayod niya madawat.—Buhat 23:33–24:27.

 Sa dihang si Felix gipulihan ni Festo, naningkamot na usab ang mga Hudiyo sa pagsumbong ug pagpapatay kang Pablo. Ang kaso gihusay pag-usab sa Cesarea, ug aron dili mabalhin ang husay ngadto sa Jerusalem, si Pablo miingon: “Ako nagbarog atubangan sa lingkoranan-sa-paghukom ni Cesar . . . Ako moapelar kang Cesar.” (Buhat 25:1-11, 20, 21) Pipila ka adlaw sa ulahi, human ikapresentar sa apostol ang iyang kaso atubangan kang Haring Herodes Agripa II, ang hari miingon: “Sa mubong panahon makombinsir mo ako nga mahimong Kristohanon.” (Buhat 26:1-28) Sa mga 58 K.P., si Pablo gipadala sa Roma. Ingong binilanggo didto, ang mapaigoon nga apostol nagpadayon sa pagpangitag mga paagi sa pagsangyaw bahin kang Kristo sulod sa duha ka tuig. (Buhat 28:16-31) Mopatim-aw nga si Pablo sa kadugayan nakaatubang kang Emperador Nero, gipahayag nga walay sala, ug sa kataposan gawasnon na usab nga nakaalagad ingong misyonaryo. Walay rekord nga dunay laing apostol nga nakahigayon sa pagpamatuod ngadto sa maong iladong mga tawo uban ang maayong balita.

Sumala sa gipakita sa ibabaw, si apostol Pablo nagkinabuhi nga uyon sa hinungdanong prinsipyo nga gipahayag atubangan sa hukmanan sa mga Hudiyo pinaagi sa iyang mga isigka-Kristohanon: “Kinahanglang among sugton ang Diyos ingong magmamando inay ang mga tawo.” (Buhat 5:29) Pagkamaayong panig-ingnan ang iyang gihatag kanato! Bisan pa sa mga paningkamot sa tawo sa pagpahunong kaniya, bug-os nga gituman sa apostol ang sugo nga magpamatuod sa bug-os. Tungod sa maong dili-matarog nga pagkamasinugtanon ngadto sa Diyos, natuman ni Pablo ang iyang buluhaton ingong “usa ka piniling sudlanan” sa pagdala sa ngalan ni Jesus “ngadto sa tanang kanasoran maingon man sa mga hari ug sa mga anak sa Israel.”—Buhat 9:15.

[Potnot]

[Kahon/Mga Hulagway sa panid 9]

SI PABLO INTERESADO BA LAMANG SA PAGDEPENSA SA IYANG KAUGALINGON?

Nagkomento bahin niining pangutanaha, ang awtor nga si Ben Witherington III, misulat: “Sumala sa punto-debista . . . ni Pablo, ang hinungdanong butang dili lamang ang pagdepensa sa iyang kaugalingon, kondili ang pagpamatuod bahin sa maayong balita ngadto sa mga awtoridad, sa mga Hudiyo ug sa mga Hentil. . . . Busa ang ebanghelyo mao gayod ang gihusay.”