Nganong Angayng Buhaton kon Unsay Husto?

USA ka edukadong lalaki kas-a miingon: “Ang katakos sa pagtinguha ania kanako, apan ang katakos sa pagbuhat ug maayo wala kanako. Kay ang maayo nga buot nakong buhaton wala nako buhata, apan ang daotan nga dili nako buot buhaton mao ang akong ginabuhat.” Nganong nalisdan man kining tawhana sa pagbuhat sa maayo nga gusto niyang buhaton? Siya miingon: “Busa, nakita ko kini nga balaod sa akong kahimtang: nga sa dihang buot nakong buhaton ang maayo, ang daotan ania kanako. Nahimuot gayod ako sa balaod sa Diyos sumala sa akong pagkatawo sa sulod, apan nakita ko sa akong mga sangkap ang laing balaod nga nakigbugno batok sa balaod sa akong hunahuna ug nagbihag kanako ngadto sa balaod sa sala nga ania sa akong mga sangkap.”—Roma 7:18, 19, 21-23.

Kining mga pulonga ni apostol Pablo, nga narekord mga 2,000 ka tuig kanhi, nagpatin-aw kon nganong lisod ang pagbuhat kon unsay husto alang sa dili-hingpit nga mga tawo. Ang pagsunod sa hustong mga prinsipyo, ilabina ilalom sa masulayong mga kahimtang, nagkinahanglag moral nga kalig-on. Busa angay kitang mangutana, Unsa ang labing hinungdanong katarongan sa pagbuhat kon unsay husto?

Tagda ang giingon sa Kasulatan bahin sa umaabot sa usa ka tawo nga matarong sa moral. Sa Salmo 37:37, 38, atong mabasa: “Bantayi ang walay-ikasaway ug tan-awa kanunay ang matul-id, kay ang kaugmaon nianang tawhana maoy malinawon. Apan pagapuohon sa tingob ang mga malapason; pagaputlon gayod ang kaugmaon sa mga tawong daotan.” Ang Proverbio 2:21, 22 nagtug-an kanato: “Ang mga matul-id mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan, sila pagaputlon gikan sa yuta; ug kon bahin sa mga maluibon, sila pagalukahon gikan niini.”

Bisan tuod kining mga saara ug ang uban pang mga saad nga makita diha sa Bibliya magpalihok kanato sa pagsubay sa dalan nga makapahimuot sa Diyos, kini wala maghatag sa pangunang katarongan sa pagbuhat niana. Ang maong katarongan nalangkit sa isyu nga personal nga naglangkit sa tanang intelihenteng mga linalang. Hisgotan sa sunod nga artikulo kon unsa kanang isyuha ug kon sa unsang paagi kini makaapektar kanato.